៥៦
សូល—ស្តេចទីមួយនៃសាសន៍អ៊ីស្រាអែល
សូមមើលលោកសាំយូអែលកំពុងតែចាក់ប្រេងទៅលើក្បាលបុរសនេះ។ នេះជាអ្វីដែលគេធ្លាប់ធ្វើដល់បុគ្គលម្នាក់ ដើម្បីសម្ដែងថា គាត់ត្រូវបានគេរើសតាំងឲ្យធ្វើជាស្តេច។ ព្រះយេហូវ៉ាបានមានបន្ទូលប្រាប់លោកសាំយូអែល ឲ្យចាក់ប្រេងទៅលើក្បាលរបស់សូល។ នេះជាប្រេងពិសេសដែលមានក្លិនក្រអូបឈ្ងុយ។
សូលពុំបានគិតថា គាត់ល្អសមនឹងធ្វើជាស្តេចនោះទេ។ គាត់ប្រាប់លោកសាំយូអែលថា ‹ខ្ញុំមកពីកុលសម្ព័ន្ធបេនយ៉ាមីន ជាកុលសម្ព័ន្ធតូចជាងគេក្នុងស្រុកអ៊ីស្រាអែល។ ចុះហេតុអ្វីបានជាលោកមានប្រសាសន៍ថាខ្ញុំនឹងទៅជាស្តេចដូច្នេះ›? ព្រះយេហូវ៉ាសព្វព្រះហឫទ័យនឹងសូល ពីព្រោះគាត់មិនធ្វើពុតជាអ្នកធំដុំនិងសំខាន់នោះទេ។ ដោយហេតុនេះហើយ បានជាទ្រង់រើសតាំងគាត់ឲ្យធ្វើជាស្តេចនោះ។
ប៉ុន្តែ សូលមិនមែនជាបុរសក្រ ឬមានមាឌតូចទេ។ គាត់មកពីគ្រួសារដ៏ស្តុកស្តម្ភមួយ ហើយគាត់ជាបុរសមាឌខ្ពស់យ៉ាងសង្ហាម្នាក់។ គាត់ខ្ពស់ជាងមនុស្សផ្សេងៗទៀតទាំងអស់ក្នុងស្រុកអ៊ីស្រាអែល ប្រមាណ៣០ស.ម.! សូលជាអ្នករត់លឿនណាស់ ហើយក៏ជាបុរសខ្លាំងពូកែម្នាក់ដែរ។ ប្រជាជនមានចិត្តរីករាយណាស់ ដែលព្រះយេហូវ៉ាបានរើសតាំងសូលឲ្យធ្វើជាស្តេចនោះ។ ប្រជាជនក៏ចាប់បន្លឺវាចារឡើងថា៖ ‹សូមឲ្យព្រះមហាក្សត្រមានព្រះជន្មាយុយឺនយូរ›!
ពួកសត្រូវនៃសាសន៍អ៊ីស្រាអែលនៅតែខ្លាំងជានិច្ច។ ពួកគេនៅតែបង្ករឿងជាច្រើនជាមួយនឹងប្រជាជនអ៊ីស្រាអែល។ មិនយូរប៉ុន្មាន ក្រោយពីសូលបានទៅជាស្តេច ពួកសាសន៍អាំម៉ូនបានលើកទ័ពមកប្រយុទ្ធនឹងពួកគេ។ ប៉ុន្តែសូលបានប្រមូលរើសកងទ័ពបានយ៉ាងធំមួយ ហើយទ្រង់ក៏បានជ័យជំនះទៅលើពួកសាសន៍អាំម៉ូន។ នេះបានធ្វើឲ្យប្រជាជនសប្បាយចិត្តណាស់ ដែលសូលជាស្តេចនោះ។
ជាច្រើនឆ្នាំកន្លងទៅ ស្តេចសូលដឹកនាំប្រជាជនអ៊ីស្រាអែលឲ្យមានជ័យជំនះជាច្រើនទៅលើពួកសត្រូវរបស់គេ។ សូលក៏មានបុត្រាដ៏ក្លាហានម្នាក់ដែរ ហើយនាមទ្រង់ជាយ៉ូណាថាន។ យ៉ូណាថានក៏ជួយឲ្យស្រុកអ៊ីស្រាអែលឈ្នះចម្បាំងជាច្រើនដែរ។ ពួកភីលីស្ទីននៅតែជាសត្រូវទីមួយនៃសាសន៍អ៊ីស្រាអែល។ នៅថ្ងៃមួយ មានពួកភីលីស្ទីនរាប់ពាន់នាក់មកប្រយុទ្ធនឹងប្រជាជនអ៊ីស្រាអែល។
លោកសាំយូអែលជំរាបប្រាប់សូលឲ្យទ្រង់រង់ចាំ ទាល់តែលោកមកដល់ដើម្បីថ្វាយយញ្ញបូជា ឬតង្វាយទៅព្រះយេហូវ៉ាសិន។ ប៉ុន្តែលោកសាំយូអែលមានការយឺតដំណើរបន្ដិច។ ឯសូលវិញ ទ្រង់ភ័យខ្លាចក្រែងពួកភីលីស្ទីននឹងចាប់ផ្ដើមប្រយុទ្ធ ដូច្នេះទ្រង់ក៏ថ្វាយយញ្ញបូជានោះទៅ។ នៅពេលដែលសាំយូអែលមកដល់ លោកប្រាប់សូលថាទ្រង់មិនបានគោរពតាមទេ។ សាំយូអែលមានប្រសាសន៍ថា ‹ព្រះយេហូវ៉ានឹងរើសតាំងបុគ្គលម្នាក់ទៀតឲ្យធ្វើជាស្តេចលើសាសន៍អ៊ីស្រាអែល›។
ក្រោយមកទៀត សូលក៏មិនបានគោរពតាមដែរ។ ដូច្នេះ សាំយូអែលប្រាប់ទ្រង់ថា៖ ‹ការគោរពតាមព្រះយេហូវ៉ា នោះជាការប្រសើរជាងការថ្វាយចៀមដ៏ល្អបំផុតទៅទៀត។ ដោយសារតែឯងមិនបានគោរពតាមព្រះយេហូវ៉ា នោះទ្រង់នឹងមិនទុកឯងឲ្យធ្វើជាស្តេចនៃសាសន៍អ៊ីស្រាអែលទៀតទេ›។
យើងអាចរៀននូវមេរៀនដ៏ល្អមួយពីរឿងនេះ។ រឿងនេះបង្ហាញឲ្យយើងដឹងថា ជាការសំខាន់ណាស់ដែលយើងត្រូវគោរពតាមព្រះយេហូវ៉ាជានិច្ច។ ម្យ៉ាងទៀត រឿងនេះបង្ហាញប្រាប់ថា មនុស្សល្អដូចជាសូលពីដើម ក៏អាចប្ដូរទៅជាមនុស្សអាក្រក់វិញបានដែរ។ យើងមិនចង់ទៅជាមនុស្សអាក្រក់ទេ មែនទេ?
សាំយូអែលទី១ ជំពូកទី៩ ទៅ ជំពូកទី១១; ១៣:៥-១៤; ១៤:៤៧-៥២; ១៥:១-៣៥; សាំយូអែលទី២ ១:២៣