៥៧
ព្រះរើសយកដាវីឌ
តើអ្នកអាចឃើញអ្វីដែលបានកើតឡើងទេ? ក្មេងប្រុសបានសង្គ្រោះកូនចៀមតូចនេះពីខ្លាឃ្មុំ។ ខ្លាឃ្មុំបានមកចាប់យកកូនចៀម ហើយបម្រុងនឹងស៊ីវាជាចំណី។ ប៉ុន្តែ ក្មេងប្រុសនេះបានដេញតាមខ្លាឃ្មុំនោះ រួចបានជួយសង្គ្រោះកូនចៀមឲ្យរួចពីមាត់ខ្លាឃ្មុំនោះ។ ហើយនៅពេលដែលខ្លាឃ្មុំបានស្ទុះហេមក ក្មេងប្រុសក៏ចាប់ខ្លាឃ្មុំវាយសម្លាប់វាទៅ! នៅពេលមួយទៀត គាត់ក៏បានជួយសង្គ្រោះចៀមមួយពីសត្វសិង្ហដែរ។ គាត់ជាក្មេងម្នាក់ដ៏ក្លាហានណាស់ មែនទេ? តើអ្នកដឹងថាគាត់ជាអ្នកណាទេ?
ក្មេងប្រុសនេះឈ្មោះដាវីឌ។ គាត់រស់នៅក្នុងភូមិបេថ្លេហិម។ ជីតារបស់គាត់ ឈ្មោះអូបិឌ គឺត្រូវជាកូនប្រុសរបស់នាងរស់ និងបូអូស។ តើអ្នកនៅចាំពួកគេទេ? ហើយឪពុករបស់ដាវីឌ ឈ្មោះអ៊ីសាយ។ ដាវីឌថែរក្សាចៀមរបស់ឪពុកគាត់។ ក្រោយពីព្រះយេហូវ៉ាបានរើសយកសូលឲ្យធ្វើជាស្តេចបាន១០ឆ្នាំហើយ ដាវីឌក៏បានកើតមក។
ពេលវេលាក៏មកដល់ ដែលព្រះយេហូវ៉ាមានបន្ទូលទៅសាំយូអែលថា៖ ‹ចូរយកប្រេងពិសេសខ្លះ ហើយឯងត្រូវទៅឯផ្ទះអ៊ីសាយនៅភូមិបេថ្លេហិមចុះ។ ដ្បិតអញបានរើសម្នាក់ក្នុងពួកកូនរបស់គាត់ឲ្យធ្វើជាស្តេចហើយ›។ នៅពេលដែលលោកសាំយូអែលក្រឡេកឃើញកូនច្បងបង្អស់របស់អ៊ីសាយ ឈ្មោះអេលាប គាត់និយាយនឹងខ្លួនគាត់ថា ‹នេះប្រាកដជាអ្នកដែលព្រះយេហូវ៉ារើសតាំងហើយ›។ ប៉ុន្តែព្រះយេហូវ៉ាមានបន្ទូលប្រាប់លោកថា៖ ‹កុំឲ្យមើលតែកំពស់និងរូបសង្ហារបស់គាត់ឡើយ។ ដ្បិតអញមិនរើសយកអ្នកនេះឲ្យធ្វើជាស្តេចទេ›។
ដូច្នេះ អ៊ីសាយក៏ហៅកូនប្រុសរបស់គាត់ឈ្មោះអ័ប៊ីន៉ាដាប់ មកឲ្យលោកសាំយូអែលពិនិត្យមើល។ ប៉ុន្តែលោកសាំយូអែលមានប្រសាសន៍ថា៖ ‹ព្រះយេហូវ៉ាទ្រង់មិនរើសយកអ្នកនេះទេ›។ បន្ទាប់មក អ៊ីសាយក៏នាំកូនប្រុសរបស់គាត់ម្នាក់ទៀត ឈ្មោះសាំម៉ា។ តែលោកសាំយូអែលមានប្រសាសន៍ទៀតថា៖ ‹ព្រះយេហូវ៉ាទ្រង់ក៏មិនរើសយកអ្នកនេះដែរ›។ អ៊ីសាយក៏នាំកូនប្រុសរបស់គាត់ទាំងប្រាំពីរនាក់មកឯសាំយូអែល ប៉ុន្តែព្រះយេហូវ៉ាមិនរើសយកអ្នកទាំងនេះឡើយ។ លោកសាំយូអែលក៏សួរថា៖ ‹តើអ្នកមានកូនតែប៉ុណ្ណេះទេឬអី›?
អ៊ីសាយឆ្លើយថា៖ ‹នៅមានកូនពៅម្នាក់ទៀត ប៉ុន្តែវាកំពុងតែឃ្វាលចៀម›។ នៅពេលដែលគេនាំដាវីឌចូលមក នោះលោកសាំយូអែលអាចឃើញថា កូននេះជាក្មេងដែលមានរូបសង្ហាមែន។ ព្រះយេហូវ៉ាទ្រង់មានបន្ទូលថា៖ ‹គឺអ្នកនេះហើយ ចូរចាក់ប្រេងទៅលើវាចុះ›។ លោកសាំយូអែលក៏ធ្វើតាមសេចក្ដីបង្គាប់នោះទៅ។ គ្រាដែលដាវីឌនឹងទៅជាស្តេចនៃសាសន៍អ៊ីស្រាអែល នោះនឹងមកជាមិនខាន។
សាំយូអែលទី១ ១៧:៣៤, ៣៥; ១៦:១-១៣