៨២
ម៉ាដេកាយនិងនាងអេសធើរ
សូមឲ្យយើងបែរអារម្មណ៍ទៅរយៈពេលពីរបីឆ្នាំ មុននឹងអែសរ៉ាបានទៅក្រុងយេរូសាឡិម។ ម៉ាដេកាយនិងនាងអេសធើរជាប្រជាជនអ៊ីស្រាអែល ដែលមានមុខមាត់សំខាន់បំផុតនៅក្នុងព្រះរាជាណាចក្រសាសន៍ពើស៊ី។ នាងអេសធើរជាមហាក្សត្រី ហើយជីដូនមួយរបស់នាង ម៉ាដេកាយជាបុរសកាន់អំណាចទីពីរបន្ទាប់ពីស្តេច។ សូមឲ្យយើងពិនិត្យមើលនូវរបៀបដែលការនេះបានកើតឡើង។
ឪពុកម្ដាយរបស់នាងអេសធើរបានស្លាប់នៅពេលដែលនាងនៅក្មេងតូច ដូច្នេះម៉ាដេកាយក៏បានយកនាងមកចិញ្ចឹម។ អ័ហាស៊ូរុសជាស្តេចរបស់សាសន៍ពើស៊ី មានវាំងនៅក្រុងស៊ូសាន ហើយម៉ាដេកាយជាអ្នកបំរើរបស់ទ្រង់ម្នាក់ដែរ។ នៅថ្ងៃមួយជាយារបស់ស្តេចនាមវ៉ាសធី មិនគោរពតាមទ្រង់ឡើយ ដូច្នេះស្តេចក៏រើសយកជាយាថ្មីមួយទៀត ដើម្បីធ្វើជាមហាក្សត្រីរបស់ទ្រង់។ តើអ្នកស្គាល់ស្ត្រីដែលទ្រង់រើសយកទេ? ត្រូវហើយ ជានាងក្រមុំអេសធើរដែលមានរូបឆោមស្រស់។
តើអ្នកឃើញបុរសដ៏ក្រអឺតម្នាក់នេះ ដែលប្រជាជនកំពុងតែឱនគោរពទេ? នេះជាហាម៉ាន។ គាត់ជាបុរសដ៏សំខាន់ម្នាក់នៅស្រុកពើស៊ី។ ហាម៉ានចង់ឲ្យម៉ាដេកាយ ដែលអ្នកឃើញកំពុងតែអង្គុយនៅទីនេះ ឲ្យឱនគោរពដល់គាត់ដែរ។ ប៉ុន្តែម៉ាដេកាយមិនព្រមធ្វើឡើយ។ គាត់យល់ថាវាមិនត្រឹមត្រូវទេ ក្នុងការឱនគោរពដល់បុរសដ៏អាក្រក់បែបនេះ។ នេះធ្វើឲ្យហាម៉ានខឹងណាស់។ ដូច្នេះ នេះជាអ្វីដែលគាត់ធ្វើ។
ហាម៉ានទូលកុហកស្តេចអំពីប្រជាជនអ៊ីស្រាអែល។ គាត់និយាយថា៖ ‹ពួកគេជាមនុស្សអាក្រក់ដែលមិនគោរពតាមច្បាប់របស់ទ្រង់។ ត្រូវតែសម្លាប់ពួកគេចោលទៅ›។ ស្តេចអ័ហាស៊ូរុសមិនដឹងថាជាយារបស់ទ្រង់នាងអេសធើរជាប្រជាជនអ៊ីស្រាអែលទេ។ ដូច្នេះទ្រង់ក៏គោរពតាមហាម៉ាន ហើយទ្រង់ក៏បង្កើតច្បាប់មួយ ដែលនៅថ្ងៃកំណត់មួយ ប្រជាជនអ៊ីស្រាអែលទាំងអស់ត្រូវតែសម្លាប់ចោល។
នៅពេលដែលម៉ាដេកាយឮអំពីច្បាប់នោះ គាត់រកាំចិត្តណាស់។ គាត់ក៏ផ្ញើសារមួយទៅនាងអេសធើរថា៖ ‹អ្នកត្រូវតែទូលប្រាប់ស្តេច ទូលអង្វរចំពោះទ្រង់ឲ្យជួយយើងផង›។ ជាការប្រឆាំងនឹងច្បាប់នៅក្នុងស្រុកពើស៊ីក្នុងការទៅជួបស្តេច ទាល់តែអ្នកនោះត្រូវបានអញ្ជើញមក។ ប៉ុន្តែនាងអេសធើរចូលទៅ ដោយមិនទាំងបានអញ្ជើញផង។ ស្តេចក៏លើកដំបងមាសរបស់ទ្រង់សំដៅនាង ដែលមានន័យថាមិនត្រូវសម្លាប់នាងឡើយ។ នាងអេសធើរក៏អញ្ជើញស្តេចនិងហាម៉ានមកសោយលៀងយ៉ាងធំមួយ។ នៅទីនោះ ស្តេចក៏មានបន្ទូលសួរនាងអេសធើរ តើនាងចង់បានអនុគ្រោះអ្វីពីទ្រង់។ នាងអេសធើរទូលថានាងនឹងប្រាប់ឲ្យទ្រង់ជ្រាប បើទ្រង់និងហាម៉ានមកសោយលៀងនៅថ្ងៃស្អែកម្ដងទៀត។
នៅពេលសោយលៀងនោះ នាងអេសធើរទូលប្រាប់ស្តេចថា៖ ‹ប្រជាជនយើងខ្ញុំនិងខ្ញុំនឹងត្រូវគេសម្លាប់ជាមិនខាន›។ ស្តេចមានសេចក្ដីខ្ញាល់ណាស់។ ទ្រង់សួរថា៖ ‹តើអ្នកណាហ៊ានធ្វើអំពើបែបនេះ›?
នាងអេសធើរទូលថា៖ ‹បុរសជាសត្រូវនោះ ជាហាម៉ានដ៏អាក្រក់នេះឯង›!
ឥឡូវនេះ ស្តេចរឹតតែខ្ញាល់ខ្លាំងឡើងទៀត។ ទ្រង់បង្គាប់ឲ្យគេសម្លាប់ហាម៉ានទៅ។ ក្រោយមក ស្តេចក៏តាំងម៉ាដេកាយឲ្យកាន់អំណាចទីពីរបន្ទាប់ពីទ្រង់។ ម៉ាដេកាយក៏លៃលកបង្កើតច្បាប់ថ្មីមួយទៀត ដែលអនុញ្ញាតឲ្យប្រជាជនអ៊ីស្រាអែលប្រយុទ្ធដើម្បីការពារជីវិតខ្លួន នៅថ្ងៃដែលគេត្រូវសម្លាប់នោះ។ ឥឡូវនេះ ពីព្រោះម៉ាដេកាយជាបុរសដ៏សំខាន់ម្នាក់នោះ មនុស្សជាច្រើនជួយប្រជាជនអ៊ីស្រាអែល ហើយពួកគេក៏ត្រូវបានសង្គ្រោះពីពួកសត្រូវរបស់គេទៅ។