៩១
ព្រះយេស៊ូវបង្រៀននៅលើភ្នំ
សូមមើលព្រះយេស៊ូវដែលកំពុងតែអង្គុយនៅទីនេះ។ ទ្រង់កំពុងតែបង្រៀនមនុស្សទាំងអស់នេះ នៅលើភ្នំក្នុងស្រុកកាលីឡេ។ ពួកអ្នកដែលអង្គុយជិតទ្រង់ជាងគេនោះជាសិស្សរបស់ទ្រង់។ ទ្រង់បានជ្រើសរើសពួកគេ១២នាក់ឲ្យធ្វើជាពួកសាវកទ្រង់។ ពួកសាវកជាពួកសិស្សដ៏ពិសេសរបស់ព្រះយេស៊ូវ។ តើអ្នកស្គាល់ឈ្មោះរបស់ពួកគេទេ?
គឺមានស៊ីម៉ូន-ពេត្រុស និងប្អូនប្រុសរបស់គាត់ឈ្មោះអនទ្រេ។ បន្ទាប់មក មានយ៉ាកុបនិងយ៉ូហាន ដែលជាបងប្អូនបង្កើតដែរ។ សាវកម្នាក់ទៀតមានឈ្មោះជាយ៉ាកុប ហើយម្នាក់ទៀតក៏ត្រូវគេហៅជាស៊ីម៉ូនដែរ។ សាវកពីរនាក់ទៀតមានឈ្មោះជាយូដាស។ ម្នាក់ជាយូដាស-អ៊ីស្ការីយ៉ុត ហើយយូដាសម្នាក់ទៀតក៏ត្រូវគេហៅជាថាដេដែរ។ បន្ទាប់មកមាន ភីលីព ហើយណាថាណែល(ក៏ហៅជាបារថូល៉ូមេ) និងម៉ាថាយហើយនិងថូម៉ាស។
ក្រោយពីបានត្រឡប់ពីស្រុកសាម៉ារីវិញ ព្រះយេស៊ូវក៏ចាប់ផ្ដើមផ្សាយជាលើកដំបូងថា៖ ‹ព្រះរាជាណាចក្រនៃស្ថានសួគ៌ជិតមកដល់ហើយ›។ តើអ្នកដឹងព្រះរាជាណាចក្រនោះជាអ្វីទេ? នេះជារដ្ឋាភិបាលដ៏ពិតរបស់ព្រះ។ ព្រះយេស៊ូវជាស្តេច។ ទ្រង់នឹងគ្រប់គ្រងពីស្ថានសួគ៌ហើយនឹងនាំឲ្យមានសន្ដិភាពនៅលើផែនដី។ ព្រះរាជាណាចក្ររបស់ព្រះនឹងធ្វើឲ្យផែនដីទាំងមូល ទៅជាសួនមនោរម្យដ៏ល្អបំព្រង។
ព្រះយេស៊ូវកំពុងតែបង្រៀនប្រជាជននៅទីនេះអំពីព្រះរាជាណាចក្រ។ ទ្រង់កំពុងតែពន្យល់ថា៖ ‹នេះជារបៀបដែលអ្នកត្រូវអធិស្ឋាន ឱព្រះវរបិតានៃយើងខ្ញុំ ដែលគង់នៅស្ថានសួគ៌អើយ សូមឲ្យព្រះនាមទ្រង់បានបរិសុទ្ធ។ សូមឲ្យព្រះរាជាណាចក្រទ្រង់បានមកដល់។ សូមឲ្យព្រះហឫទ័យទ្រង់បានសម្រេចនៅផែនដី ដូចនៅស្ថានសួគ៌ដែរ›។ មនុស្សជាច្រើនហៅនេះជា‹សេចក្ដីអធិស្ឋានរបស់ព្រះអម្ចាស់›។ អ្នកផ្សេងទៀតហៅសេចក្ដីអធិស្ឋាននេះ ជា‹ព្រះវរបិតារបស់យើង›។ តើអ្នកអាចចាំពាក្យទាំងអស់ក្នុងសេចក្ដីអធិស្ឋាននេះបានទេ?
ព្រះយេស៊ូវក៏បង្រៀនប្រជាជន នូវរបៀបដែលគេត្រូវប្រព្រឹត្តនឹងគ្នាទៅវិញទៅមកដែរ។ ទ្រង់មានបន្ទូលថា៖ ‹ចូរប្រព្រឹត្តដល់អ្នកដទៃ ដូចជាអ្នកចង់ឲ្យគេប្រព្រឹត្តដល់អ្នកវិញ›។ តើអ្នកមិនចូលចិត្តទេឬ នៅពេលដែលអ្នកណាមួយបានប្រព្រឹត្តនឹងអ្នកដោយចិត្តសប្បុរសនោះ? ដូច្នេះ ព្រះយេស៊ូវចង់មានបន្ទូលថា យើងគួរតែប្រព្រឹត្តដល់អ្នកដទៃតាមរបៀបសប្បុរសដែរ។ តើនឹងជាការល្អអស្ចារ្យយ៉ាងណាទៅហ្ន៎ នៅពេលមនុស្សគ្រប់គ្នានឹងប្រព្រឹត្តដូចនេះ នៅលើផែនដីជាសួនមនោរម្យនោះ?
ម៉ាថាយជំពូកទី៥ ទៅ ជំពូកទី៧; ១០:១-៤