៩៤
ទ្រង់ស្រឡាញ់ក្មេងតូចៗ
សូមមើលព្រះយេស៊ូវដាក់ដៃឱបក្មេងប្រុសតូចនៅទីនេះ។ អ្នកអាចឃើញថា ព្រះយេស៊ូវពិតជាយកព្រះទ័យទុកដាក់នឹងកូនក្មេងតូចៗ។ ពួកបុរសដែលកំពុងតែមើលនេះ ជាពួកសាវករបស់ទ្រង់។ តើព្រះយេស៊ូវមានបន្ទូលអ្វីទៅគេ? សូមឲ្យយើងពិនិត្យមើល។
ព្រះយេស៊ូវនិងពួកសាវករបស់ទ្រង់ទើបតែមកពីការធ្វើដំណើរយ៉ាងឆ្ងាយ។ នៅតាមផ្លូវនោះ ពួកសាវកបានប្រកែកគ្នាក្នុងចំណោមពួកគេ។ ដូច្នេះ បន្ទាប់ពីការធ្វើដំណើរព្រះយេស៊ូវក៏សួរគេថា៖ ‹តើពួកឯងប្រកែកគ្នាអំពីអ្វីនៅតាមផ្លូវនោះ›? តាមការពិត ព្រះយេស៊ូវជ្រាបនឹងសេចក្ដីប្រកែកនោះហើយ។ ប៉ុន្តែ ទ្រង់សួរដើម្បីចង់ដឹង ថាតើពួកសាវកនឹងប្រាប់ទ្រង់ឬមិនប្រាប់។
ពួកសាវកមិនឆ្លើយទេ ពីព្រោះនៅតាមផ្លូវ ពួកគេបានប្រកែកគ្នាអំពីអ្នកណាជាអ្នកធំជាងគេ។ ពួកសាវកខ្លះចង់បានឋានៈសំខាន់ជាងសាវកឯទៀត។ តើព្រះយេស៊ូវនឹងពន្យល់ប្រាប់ពួកគេយ៉ាងណា ដើម្បីឲ្យគេយល់ថាការចង់បានធំជាងគេ នោះមិនជាការត្រឹមត្រូវទេ?
ទ្រង់ហៅក្មេងប្រុសតូចម្នាក់ ហើយឲ្យឈរនៅមុខពួកគេទាំងអស់គ្នា។ បន្ទាប់មកទ្រង់ក៏មានបន្ទូលទៅពួកសាវកថា៖ ‹ខ្ញុំចង់ឲ្យអ្នករាល់គ្នាដឹងជាប្រាកដថា បើអ្នករាល់គ្នាមិនផ្លាស់គំនិត ហើយត្រឡប់ទៅជាដូចកូនក្មេង នោះអ្នកនឹងចូលទៅក្នុងព្រះរាជាណាចក្ររបស់ព្រះពុំបានឡើយ។ អ្នកធំជាងគេនៅក្នុងព្រះរាជាណាចក្រ គឺជាអ្នកដែលដូចកូនតូចនេះ›។ តើអ្នកដឹងហេតុអ្វីបានជាព្រះយេស៊ូវមានបន្ទូលដូច្នេះទេ?
ក្មេងតូចៗមិនព្រួយអំពីអ្នកណាធំជាង ឬអ្នកណាមានឋានៈសំខាន់ជាងគេនោះទេ។ ដូច្នេះ ពួកសាវកគួរតែរៀនឲ្យបានដូចកូនក្មេងតាមរបៀបនេះ ហើយមិនត្រូវប្រកែកគ្នាអំពីអ្នកណាធំឬអ្នកណាសំខាន់ជាងគេនោះឡើយ។
នៅមានគ្រាឯទៀតដែរ ដែលព្រះយេស៊ូវបង្ហាញនូវសេចក្ដីស្រឡាញ់ដល់ក្មេងតូចៗ។ ពីរបីខែក្រោយមក ប្រជាជនខ្លះបានយកកូនក្មេងមកជួបព្រះយេស៊ូវ។ ពួកសាវកព្យាយាមឃាត់ពួកកូនក្មេងមិនឲ្យចូល។ ប៉ុន្តែ ព្រះយេស៊ូវមានបន្ទូលប្រាប់ពួកសាវកទ្រង់ថា៖ ‹ចូរឲ្យកូនក្មេងមកឯខ្ញុំចុះ ហើយកុំឲ្យឃាត់គេឡើយ ពីព្រោះព្រះរាជាណាចក្ររបស់ព្រះជារបស់ផងកូនក្មេងទាំងនោះ›។ បន្ទាប់មកព្រះយេស៊ូវក៏ដាក់ដៃឱបកូនក្មេង ហើយក៏ឲ្យពរដល់ពួកគេ។ តើនេះមិនជាការដ៏ល្អទេឬ ដោយដឹងថាព្រះយេស៊ូវស្រឡាញ់ក្មេងតូចៗនោះ?
ម៉ាថាយ ១៨:១-៤; ១៩:១៣-១៥; ម៉ាកុស ៩:៣៣-៣៧; ១០:១៣-១៦