១០៣
ចូលក្នុងបន្ទប់ជាប់សោ
ក្រោយមក ពេត្រុសនិងយ៉ូហានក៏ចាកចេញពីផ្នូរ ដែលជាកន្លែងដាក់សពព្រះយេស៊ូវ ទុកឲ្យនាងម៉ារានៅទីនោះតែម្នាក់ឯង។ នាងក៏ចាប់ផ្ដើមយំ។ បន្ទាប់មក ដូចជាយើងបានឃើញក្នុងរូបភាពមុន នាងឈ្ងោកមើលទៅក្នុងផ្នូរ។ នៅក្នុងនោះ នាងឃើញទេវតាពីរអង្គ! គេសួរនាងថា៖ ‹ហេតុអ្វីបានជាអ្នកយំដូច្នេះ›?
នាងម៉ារាឆ្លើយថា៖ ‹គេបានយកព្រះអម្ចាស់របស់ខ្ញុំចេញបាត់ហើយ ហើយខ្ញុំមិនដឹងជាគេទុកទ្រង់នៅឯណាទេ›។ បន្ទាប់មក នាងម៉ារាបែរខ្លួនហើយឃើញបុរសម្នាក់។ គាត់សួរនាងថា៖ ‹តើអ្នកកំពុងតែរកអ្នកណាហ្នឹង›?
នាងម៉ារានឹកស្មានថាបុរសនេះជាអ្នកថែសួនច្បារ ហើយប្រហែលជាគាត់បានយកសពរបស់ព្រះយេស៊ូវ។ ដូច្នេះនាងនិយាយថា៖ ‹បើលោកបានយកទ្រង់ចេញនោះ សូមលោកប្រាប់ខ្ញុំផង តើលោកដាក់ទ្រង់នៅឯណា›។ ប៉ុន្តែ តាមការពិត បុរសនេះជាព្រះយេស៊ូវ។ ទ្រង់បានប្រែក្រឡាយករូបកាយមួយដែលនាងម៉ារាមើលមិនស្គាល់។ ប៉ុន្តែ នៅពេលដែលទ្រង់បានហៅឈ្មោះនាង នោះនាងម៉ារាដឹងថាបុរសនេះជាព្រះយេស៊ូវ។ នាងក៏រត់ទៅប្រាប់ពួកសិស្សថា៖ ‹ខ្ញុំបានឃើញព្រះអម្ចាស់ហើយ›!
ក្រោយមកនៅថ្ងៃដដែលនោះ កាលដែលពួកសិស្សពីរនាក់កំពុងតែដើរទៅភូមិអេម៉ោស មានបុរសម្នាក់បានមកដើរជាមួយពួកគេ។ ពួកសិស្សកំពុងតែសោកសង្រេងណាស់ ពីព្រោះព្រះយេស៊ូវទើបតែបានទទួលមរណភាព។ ប៉ុន្តែ កាលដែលកំពុងតែដើរនោះ បុរសម្នាក់នេះបានពន្យល់រឿងជាច្រើនពីព្រះគម្ពីរដែលធ្វើឲ្យគេមានចិត្តធូរស្រាល។ នៅទីបំផុត នៅពេលដែលពួកគេឈប់សំរាកដើម្បីបរិភោគអាហារ ពួកសិស្សក៏ដឹងថាបុរសនោះ គឺជាព្រះយេស៊ូវ។ បន្ទាប់មក ព្រះយេស៊ូវក៏ចេញបាត់ទៅ ហើយពួកសិស្សទាំងពីរនាក់នេះក៏នាំគ្នាប្រញាប់ប្រញាល់ត្រឡប់ទៅឯក្រុងយេរូសាឡិមវិញ ដើម្បីនឹងជំរាបប្រាប់ពួកសាវកអំពីទ្រង់។
កាលដែលការនេះកំពុងតែកើតឡើង ព្រះយេស៊ូវក៏បង្ហាញអង្គទ្រង់ឲ្យពេត្រុសឃើញដែរ។ ពួកអ្នកដទៃមានចិត្តរំភើបណាស់កាលដែលបានឮអំពីរឿងនេះ។ បន្ទាប់មក ពួកសិស្សទាំងពីរនាក់នេះបានមកដល់ក្រុងយេរូសាឡិម ហើយក៏រកឃើញពួកសាវក។ ពួកគេក៏ជំរាបប្រាប់ពួកសាវកនូវរបៀបដែលព្រះយេស៊ូវបានលេចមកឲ្យគេឃើញនៅតាមផ្លូវ។ ហើយកាលដែលពួកគេកំពុងតែប្រាប់អំពីរឿងនេះ តើអ្នកដឹងមានការអស្ចារ្យអ្វីកើតឡើងទេ?
សូមមើលក្នុងរូបភាពនេះ។ ព្រះយេស៊ូវលេចឡើងនៅក្នុងបន្ទប់ ទោះបីទ្វារត្រូវជាប់សោក្ដី។ ពួកសិស្សមានសេចក្ដីសប្បាយណាស់! តើនេះមិនជាថ្ងៃដ៏រំភើបមួយទេឬ? តើអ្នកអាចរាប់បានប៉ុន្មានដងមកដល់ឥឡូវនេះ ដែលព្រះយេស៊ូវបានលេចឡើងទៅពួកអ្នកកាន់តាមទ្រង់នោះ? តើអ្នករាប់បានប្រាំដងឬ?
រីឯសាវកម្នាក់ឈ្មោះថូម៉ាស គាត់មិនបាននៅជាមួយពួកសាវកក្នុងកាលដែលព្រះយេស៊ូវបានលេចឲ្យឃើញនោះទេ។ ដូច្នេះពួកសិស្សក៏ប្រាប់គាត់ថា៖ ‹យើងបានឃើញព្រះអម្ចាស់ហើយ›! ប៉ុន្តែ ថូម៉ាសនិយាយថា ទាល់តែគាត់ឃើញព្រះយេស៊ូវផ្ទាល់ខ្លួន ទើបគាត់ជឿ។ ប្រាំបីថ្ងៃក្រោយមក ពួកសិស្សបានមកជួបជុំគ្នានៅក្នុងបន្ទប់ជាប់សោម្ដងទៀត ហើយលើកនេះ ថូម៉ាសក៏នៅជាមួយពួកគេដែរ។ ភ្លាមនោះ ព្រះយេស៊ូវបានលេចឡើងនៅក្នុងបន្ទប់ចំពីមុខគេទាំងអស់គ្នា។ ឥឡូវនេះ ថូម៉ាសជឿហើយ។
យ៉ូហាន ២០:១១-២៩; លូកា ២៤:១៣-៤៣