ជំពូកទី២៤
មូលហេតុដែលព្រះយេស៊ូបានយាងមកផែនដី
ថ្ងៃរបស់ព្រះយេស៊ូនៅក្នុងក្រុងកាពើណិមជាមួយនឹងពួកសិស្សបួនរូបរបស់ទ្រង់ គឺមានការរវល់ណាស់ ក្នុងនោះរួមបញ្ចូលការប្រោសឲ្យជានូវអ្នកជំងឺទាំងប៉ុន្មានដែលពួកមនុស្សក្នុងក្រុងកាពើណិមបាននាំមកឲ្យទ្រង់ព្យាបាលនៅកំឡុងពេលល្ងាចនោះ។ ទ្រង់គ្មានពេលសំរាប់ទ្រង់ផ្ទាល់នោះទេ។
ឥឡូវគឺជាព្រឹកថ្ងៃបន្ទាប់។ ពេលព្រលឹមស្រាងៗនៅឡើយ នោះព្រះយេស៊ូតើនឡើង ហើយយាងចេញទៅក្រៅតែមួយអង្គឯង។ ទ្រង់ធ្វើដំណើរទៅកន្លែងមួយដ៏ស្ងាត់ដាច់ពីគេ ដើម្បីទ្រង់អាចអធិស្ឋានទៅព្រះវរបិតារបស់ទ្រង់។ ប៉ុន្តែ ព្រះយេស៊ូគង់តែមួយអង្គឯងពុំបានយូរប៉ុន្មានទេ ដោយព្រោះពេត្រុសនិងអ្នកដទៃដឹងថាបាត់ទ្រង់ ដូច្នេះពួកគេក៏នាំគ្នាតាមរកទ្រង់។
នៅពេលដែលពួកគេរកព្រះយេស៊ូឃើញហើយ ពេត្រុសទូលថា៖ «មនុស្សទាំងអស់កំពុងតែរកទ្រង់»។ ពួកបណ្ដាជននៅក្នុងក្រុងកាពើណិមចង់ឲ្យព្រះយេស៊ូស្នាក់នៅជាមួយពួកគេ។ ពួកគេមានចិត្តអបអរណាស់នូវអ្វីដែលទ្រង់បានធ្វើសំរាប់ពួកគេនោះ! ក៏ប៉ុន្តែ តើព្រះយេស៊ូបានយាងមកផែនដីនេះ គ្រាន់តែដើម្បីធ្វើអព្ភូតហេតុប្រោសឲ្យជាប៉ុណ្ណោះឬ? តើទ្រង់មានបន្ទូលយ៉ាងណាដែរអំពីរឿងនេះ?
យោងទៅតាមកំណត់ហេតុមួយក្នុងព្រះគម្ពីរ ព្រះយេស៊ូតបឆ្លើយដល់ពួកសិស្សទ្រង់ថា៖ «ចូរយើងទៅក្នុងអស់ទាំងភូមិនៅជុំវិញ ដើម្បីឲ្យខ្ញុំបានប្រកាសប្រាប់នៅភូមិទាំងនោះដែរ ដ្បិតគឺដោយហេតុនោះហើយបានជាខ្ញុំមក»។ ទោះជាពួកបណ្ដាជនទទូចសុំឲ្យព្រះយេស៊ូគង់នៅទីនោះក៏ដោយ ទ្រង់មានបន្ទូលប្រាប់ពួកគេថា៖ «ខ្ញុំត្រូវប្រាប់ដំណឹងល្អពីនគរព្រះ ដល់អស់ទាំងស្រុកឯទៀតដែរ គឺហេតុនោះបានជាព្រះវរបិតាចាត់ឲ្យខ្ញុំមក»។
ត្រូវហើយ ព្រះយេស៊ូបានយាងមកផែនដីនេះ ជាពិសេសដើម្បីផ្សព្វផ្សាយអំពីព្រះរាជាណាចក្ររបស់ព្រះ ដែលតាមរយៈព្រះរាជាណាចក្រនេះនឹងធ្វើឲ្យព្រះនាមរបស់ព្រះវរបិតាបានបរិសុទ្ធ ហើយព្យាបាលជំងឺរបស់មនុស្សឲ្យលែងមានជារៀងរហូត។ ក៏ប៉ុន្តែ ដើម្បីផ្ដល់ទីសំអាងថាព្រះបានបញ្ជូនព្រះយេស៊ូមកនោះ ព្រះយេស៊ូក៏ធ្វើអព្ភូតហេតុប្រោសឲ្យគេជា។ ជាច្រើនសតវត្សមុននេះ តាមរបៀបដូចគ្នា អព្ភូតហេតុដែលលោកម៉ូសេធ្វើក៏បានបង្ហាញថាលោកជាអ្នកបំរើរបស់ព្រះដែរ។
ឥឡូវ នៅពេលព្រះយេស៊ូយាងចេញពីក្រុងកាពើណិម ដើម្បីផ្សព្វផ្សាយនៅក្នុងក្រុងផ្សេងៗទៀត ពួកសិស្សបួននាក់របស់ទ្រង់ក៏ទៅជាមួយដែរ។ សិស្សបួននាក់នេះ គឺជាពេត្រុសនិងអនទ្រេជាប្អូនរបស់គាត់ ហើយយ៉ាកុបនិងប្អូនរបស់គាត់ឈ្មោះយ៉ូហាន។ អ្នកនៅនឹកចាំថា គ្រាន់តែមុននេះមួយអាទិត្យ ព្រះយេស៊ូបានអញ្ជើញពួកគាត់ឲ្យធ្វើជាគូកនដំបូងដែលរួមដំណើរជាមួយទ្រង់។
ការផ្សព្វផ្សាយរបស់ព្រះយេស៊ូនៅស្រុកកាលីឡេជាមួយនឹងសិស្សបួននាក់របស់ទ្រង់ គឺបានជោគជ័យយ៉ាងអស្ចារ្យ! តាមការពិត សេចក្ដីរាយការណ៍អំពីសកម្មភាពរបស់ទ្រង់បានឮសុសសាយទូទៅពេញក្នុងស្រុកស៊ីរី ដែរ។ ពួកបណ្ដាជនជាច្រើនពីស្រុកកាលីឡេ ស្រុកយូដា និងពីខាងនាយទន្លេយ័រដាន់ បានដើរតាមព្រះយេស៊ូនិងពួកសិស្សរបស់ទ្រង់។ ម៉ាកុស ១:៣៥-៣៩; លូកា ៤:៤២, ៤៣; ម៉ាថាយ ៤:២៣-២៥; និក្ខមនំ ៤:១-៩, ៣០, ៣១
▪ នៅពេលព្រឹកព្រលឹមបន្ទាប់ពីថ្ងៃដ៏រវល់របស់ព្រះយេស៊ូនៅក្នុងក្រុងកាពើណិម តើមានអ្វីកើតឡើង?
▪ ហេតុអ្វីព្រះយេស៊ូបានត្រូវបញ្ជូនមកផែនដីនេះ? ហើយតើទ្រង់មានគោលបំណងអ្វីដោយធ្វើអព្ភូតហេតុទាំងនោះ?
▪ តើអ្នកណាខ្លះទៅជាមួយព្រះយេស៊ូ ក្នុងដំណើរផ្សព្វផ្សាយក្នុងស្រុកកាលីឡេ? ហើយតើមនុស្សបានប្រព្រឹត្តតបយ៉ាងណាចំពោះសកម្មភាពរបស់ព្រះយេស៊ូ?