ជំពូកទី២៨
មានគេសួរអំពីការតមអាហារ
សឹងតែមួយឆ្នាំបានកន្លងទៅហើយ តាំងពីព្រះយេស៊ូបានចូលរួមបុណ្យរំលងនៅឆ្នាំ៣០ ស.យ.។ មកដល់ឥឡូវ យ៉ូហាន-បាទីស្ទ បានជាប់គុកអស់រយៈពេលបីបួនខែទៅហើយ។ ទោះជាលោកចង់ឲ្យពួកសិស្សរបស់លោកក្លាយទៅជាពួកអ្នកកាន់តាមព្រះគ្រីស្ទក៏ដោយ តែមិនមែនពួកគេទាំងអស់បានធ្វើតាមនោះទេ។
ឥឡូវនេះ សិស្សខ្លះរបស់លោកយ៉ូហាន ក៏មករកព្រះយេស៊ូហើយទូលសួរទ្រង់ថា៖ «ហេតុអ្វីបានជាយើងខ្ញុំ នឹងពួកផារិស៊ី តមតែញយៗ តែពួកសិស្សទ្រង់មិនដែលតមសោះដូច្នេះ?»។ ពួកផារីស៊ីតមអាហារពីរដងក្នុងមួយសប្ដាហ៍ តាមក្បួនរីតិ៍នៃសាសនារបស់គេ។ ហើយពួកសិស្សរបស់យ៉ូហាន ក៏ប្រហែលជាកាន់តាមទម្លាប់ស្រដៀងនេះដែរ។ ពួកគេក៏ប្រហែលជាតមអាហារ ដើម្បីកាន់ទុក្ខចំពោះការជាប់គុករបស់យ៉ូហាន ហើយពួកគេឆ្ងល់នូវមូលហេតុដែលពួកសិស្សរបស់ព្រះយេស៊ូ ឥតចូលរួមជាមួយពួកគេក្នុងការសម្ដែងនូវទុក្ខសោកនេះ។
ព្រះយេស៊ូពន្យល់ដោយមានបន្ទូលឆ្លើយទៅពួកគេវិញថា៖ «កំពុងដែលប្ដីថ្មោងថ្មីនៅជាមួយគ្នា តើពួកសំឡាញ់គាត់នឹងតមអាហារបានឬទេ? កាលប្ដីនៅជាមួយនៅឡើយ នោះតមអាហារពុំ បានទេ។ តែនឹងមានថ្ងៃមកដល់ ដែលប្ដីនឹងត្រូវយកចេញពីពួកមិត្រសំឡាញ់ទៅ នៅគ្រានោះគេនឹងតមវិញ»។
ពួកសិស្សរបស់យ៉ូហានគួរនឹកចាំថាយ៉ូហាន ក៏បាននិយាយអំពីព្រះយេស៊ូជាប្ដីថ្មោងថ្មីដែរ។ ដូច្នេះកាលដែលព្រះយេស៊ូមានវត្តមាន យ៉ូហាននឹងមិនចាត់ទុកថាការតមអាហារជាការសមហេតុផលនោះឡើយ ហើយពួកសិស្សរបស់ព្រះយេស៊ូក៏គិតដូច្នេះដែរ។ នៅក្រោយមក ពេលព្រះយេស៊ូសោយទិវង្គតទៅ នោះទើបពួកសិស្សរបស់ទ្រង់នឹងកាន់ទុក្ខហើយតមអាហារ។ ក៏ប៉ុន្តែ នៅពេលដែលទ្រង់ត្រូវប្រោសឲ្យរស់ឡើងវិញហើយយាងឡើងទៅស្ថានសួគ៌ នោះពួកគេលែងមានមូលហេតុនឹងតមអាហារដោយកាន់ទុក្ខនោះទៀតហើយ។
បន្ទាប់មក ព្រះយេស៊ូមានបន្ទូលប្រាប់ពីរឿងប្រៀបប្រដូចនេះថា៖ «គ្មានអ្នកណាដែលយកកំណាត់សំពត់ថ្មី មកប៉ះអាវចាស់ទេ ដ្បិតកំណាត់ថ្មីនោះ នឹងហែកអាវចាស់ចេញ ហើយរំហែកនោះនឹងរឹងរឹតតែអាក្រក់ជាងទៅទៀត ក៏មិនដែលមានអ្នកណាដាក់ស្រាទំពាំងបាយជូរថ្មី ក្នុងថង់ស្បែកចាស់ដែរ បើធ្វើដូច្នោះ ថង់ស្បែកនឹងធ្លាយ ហូរស្រាទំពាំងបាយជូរចេញអស់ ហើយទាំងថង់នោះក៏ត្រូវខូចខាតដែរ គឺគេតែងដាក់ស្រាទំពាំងបាយជូរថ្មី ក្នុងថង់ស្បែកថ្មីវិញ»។ តើរឿងប្រៀបប្រដូចទាំងនេះទាក់ទងអ្វីនឹងការតមអាហារនោះ?
ព្រះយេស៊ូកំពុងជួយពួកសិស្សរបស់យ៉ូហាន-បាទីស្ទឲ្យយល់ថា គ្មានអ្នកណាម្នាក់អាចឲ្យពួកអ្នកកាន់តាមទ្រង់ធ្វើតាមទំលាប់ចាស់នៃសាសនាយូដានោះទេ តួយ៉ាងដូចជាក្បួនរីតិ៍នៃការតមអាហារជាដើម។ ទ្រង់មិនមែនយាងមកដើម្បីស្ដារឡើងវិញ ហើយស្ថាបនាប្រព័ន្ធនៃការថ្វាយបង្គំចាស់ដែលរៀបនឹងបោះចោលទៅ ឲ្យនៅបានយូរទៀតនោះឡើយ។ សាសនាគ្រីស្ទាននឹងមិនត្រូវកាន់តាមសាសនាយូដានៅសម័យនោះ ដែលតែងតែធ្វើតាមទំនៀមទំលាប់របស់មនុស្សនោះទេ។ មិនមែនជាការត្រឹមត្រូវឡើយក្នុងការយកកំណាត់សំពត់ថ្មីទៅប៉ះលើសំពត់ចាស់ ឬក៏ដូចជាស្រាទំពាំងបាយជូរថ្មីដាក់ក្នុងថង់ស្បែកចាស់នោះ។ ម៉ាថាយ ៩:១៤-១៧; ម៉ាកុស ២:១៨-២២; លូកា ៥:៣៣-៣៩; យ៉ូហាន ៣:២៧-២៩
▪ តើអ្នកណាដែលកាន់តាមការតមអាហារ ហើយសំរាប់គោលបំណងអ្វី?
▪ ហេតុអ្វីក៏ពួកសិស្សរបស់ព្រះយេស៊ូឥតតមអាហារកាលដែលទ្រង់គង់នៅជាមួយពួកគេ? ហើយក្រោយមក តើមានមូលហេតុអ្វីសំរាប់ការតមអាហារ ដែលនៅតែបន្ដិចទៀតនឹងត្រូវបាត់សូន្យទៅនោះ?
▪ តើព្រះយេស៊ូរៀបរាប់រឿងប្រៀបប្រដូចអ្វី? ហើយតើនោះមានន័យយ៉ាងណា?