ជំពូកទី៥៥
ពួកសិស្សជាច្រើនឈប់កាន់តាមព្រះយេស៊ូ
ព្រះយេស៊ូកំពុងតែបង្រៀនក្នុងសាលាប្រជុំនៅក្រុងកាពើណិម ស្តីអំពីអង្គទ្រង់ជានំប៉័ងដ៏ពិតដែលមកពីស្ថានសួគ៌។ យ៉ាងជាក់ស្តែងណាស់ សុន្ទរកថារបស់ទ្រង់បានចាប់ផ្ដើមពិគ្រោះបន្ត ពេលហ្វូងមនុស្សដែលរកឃើញទ្រង់ ពួកគេបានធ្វើដំណើរមកពីទិសខាងកើតនៃសមុទ្រកាលីឡេ ជាកន្លែងដែលពួកគេបានបរិភោគនំប៉័ងនិងត្រីដែលបានផ្ដល់មកជាអព្ភូតហេតុនោះ។
ព្រះយេស៊ូមានបន្ទូលបន្តថា៖ «ឯនំប៉័ងដែលខ្ញុំឲ្យ គឺជារូបសាច់ខ្ញុំ ដែលខ្ញុំនឹងឲ្យជំនួសជីវិតមនុស្សលោក»។ ទើបតែពីរឆ្នាំមុននេះ នៅនិទាឃរដូវក្នុងឆ្នាំ៣០ ស.យ. នោះព្រះយេស៊ូបានមានបន្ទូលប្រាប់លោកនីកូដេមថា ព្រះស្រឡាញ់មនុស្សក្នុងលោកីយ៍ណាស់ ដោយហេតុនេះហើយទ្រង់ប្រទានបុត្ររបស់ទ្រង់ជាអ្នកសង្គ្រោះ។ ដូច្នេះហើយ ឥឡូវនេះ ព្រះយេស៊ូកំពុងតែបង្ហាញថាមនុស្សជាតិណាម្នាក់ ដែលបរិភោគសាច់របស់ទ្រង់បើនិយាយជានិមិត្តរូបនោះ គឺត្រូវធ្វើតាមជំនឿលើយញ្ញបូជាដែលទ្រង់នឹងផ្ដល់ឲ្យនោះ ទើបអាចទទួលជីវិតជារៀងរហូតបាន។
ប៉ុន្តែ ពួកមនុស្សដែលជំទាស់នឹងបន្ទូលរបស់ព្រះយេស៊ូសួរថា៖ «ធ្វើដូចម្ដេចឲ្យអ្នកនេះអាចនឹងឲ្យសាច់ខ្លួនមកយើងបរិភោគបាន?»។ ព្រះយេស៊ូចង់ឲ្យពួកអ្នកស្ដាប់របស់ទ្រង់យល់ថា ការបរិភោគសាច់ទ្រង់គ្រាន់តែជាការតំណាងប៉ុណ្ណោះ។ ដូច្នេះ ដើម្បីនឹងបញ្ជាក់អំពីរឿងនេះ ទ្រង់មានបន្ទូលជំទាស់យ៉ាងខ្លាំង បើធ្វើតាមរបៀបមែនទែននោះ។
ព្រះយេស៊ូមានបន្ទូលទៅគេថា៖ «បើអ្នករាល់គ្នាមិនពិសាសាច់ ហើយមិនផឹកឈាមរបស់កូនមនុស្ស នោះអ្នករាល់គ្នាគ្មានជីវិតនៅក្នុងខ្លួនទេ អ្នកណាដែលបរិភោគសាច់ នឹងឈាមរបស់ខ្ញុំ នោះមានជីវិតដ៏នៅអស់កល្បជានិច្ច ហើយខ្ញុំនឹងឲ្យអ្នកនោះរស់ឡើងវិញ នៅថ្ងៃចុងបំផុត ពីព្រោះសាច់ខ្ញុំជាអាហារពិត ហើយឈាមខ្ញុំក៏ជាគ្រឿងផឹកពិតប្រាកដ អ្នកណាដែលបរិភោគសាច់ នឹងឈាមរបស់ខ្ញុំ នោះនៅក្នុងខ្ញុំ ហើយខ្ញុំក៏នៅក្នុងអ្នកនោះដែរ»។
ប្រសិនបើទ្រង់ប្រទានយោបល់អំពីការស៊ីសាច់មនុស្ស នោះការបង្រៀនរបស់ព្រះយេស៊ូច្បាស់ជាគួរឲ្យស្អប់ខ្ពើមមែន។ ប៉ុន្តែ ព្រះយេស៊ូមិនគាំទ្រឲ្យបរិភោគសាច់ឬផឹកឈាមមែនទែននោះឡើយ។ ទ្រង់គ្រាន់តែបញ្ជាក់ថាអស់អ្នកដែលទទួលជីវិតជារៀងរហូត គប្បីប្រព្រឹត្តតាមជំនឿលើយញ្ញបូជាដែលទ្រង់នឹងធ្វើ ពេលទ្រង់ផ្ដល់រូបកាយដ៏គ្រប់ល័ក្ខណ៍ ដោយបង្ហូរព្រះលោហិតរបស់ទ្រង់នោះ។ ប៉ុន្តែសូម្បីតែសិស្សជាច្រើនរបស់ទ្រង់ក៏មិនវែកញែកឲ្យយល់អំពីការបង្រៀនរបស់ទ្រង់ដែរ ហើយថែមទាំងបដិសេធទៀតផង។ «ពាក្យនេះពិបាកស្ដាប់ណាស់ តើអ្នកណាយល់បាន?»។
ព្រះយេស៊ូជ្រាបថាមានពួកសិស្សរអ៊ូរទាំពីសេចក្ដីនោះ បានជាទ្រង់មានបន្ទូលថា៖ «តើសេចក្ដីនេះនាំបង្អាក់ដល់ចិត្តអ្នករាល់គ្នាឬអី? ចុះបើអ្នករាល់គ្នាបានឃើញកូនមនុស្សឡើងទៅឯស្ថាន ដែលលោកនៅពីដើម . . . ឯពាក្យដែលខ្ញុំនិយាយនឹងអ្នករាល់គ្នា នោះត្រូវខាងវិញ្ញាណនឹងជីវិតវិញ ប៉ុន្តែ មានអ្នករាល់គ្នាខ្លះមិនជឿទេ»។
ព្រះយេស៊ូមានបន្ទូលទៀតថា៖ «គឺហេតុនោះបានជាខ្ញុំប្រាប់អ្នករាល់គ្នាថា គ្មានអ្នកណាអាចនឹងមកឯខ្ញុំបានទេ លើកតែព្រះវរបិតាទ្រង់ប្រោសប្រទានឲ្យប៉ុណ្ណោះ»។ ហេតុនោះហើយបានជាសិស្សជាច្រើននាក់របស់ទ្រង់លែងកាន់តាមទ្រង់ទៀត។ ដូច្នេះព្រះយេស៊ូបែរព្រះភ័ក្ដ្រមកពួកសាវ័ក១២នាក់ ហើយមានបន្ទូលសួរថា៖ «អ្នករាល់គ្នាចង់ថយទៅដែរឬ?»។
ពេត្រុសទូលឆ្លើយថា៖ «ព្រះអម្ចាស់អើយ! តើយើងខ្ញុំនឹងទៅឯអ្នកណាវិញ? គឺទ្រង់ហើយ ដែលមានព្រះបន្ទូលនៃជីវិតដ៏នៅអស់កល្បជានិច្ច យើងខ្ញុំក៏បានជឿ ហើយដឹងថា ទ្រង់ជាព្រះគ្រីស្ទ ជាព្រះរាជបុត្រានៃព្រះដ៏មានព្រះជន្មរស់ពិត»។ នេះជាការសម្ដែងនូវភក្ដីភាពមែន! ថ្វីបើពេត្រុសនិងពួកសាវ័កឯទៀតឥតបានយល់ច្បាស់លាស់នឹងការបង្រៀនរបស់ព្រះយេស៊ូស្តីអំពីរឿងនេះក៏ដោយ។
ព្រះយេស៊ូបានពេញព្រះទ័យនឹងការតបឆ្លើយរបស់ពេត្រុស តែទ្រង់បានសង្កេតឃើញថា៖ «តើខ្ញុំមិនបានរើសអ្នករាល់គ្នា ជាពួក១២នាក់ទេឬអី? តែមានម្នាក់ក្នុងពួកអ្នករាល់គ្នាជាអារក្សវិញ»។ ទ្រង់កំពុងតែមានបន្ទូលអំពីយូដាសអ៊ីស្ការីយ៉ុត។ ប្រហែលជានៅគ្រានោះ ព្រះយេស៊ូអាចជ្រាបដឹងថា យូដាសបាន‹ចាប់ផ្ដើម›មានគំនិតអាក្រក់។
ព្រះយេស៊ូបានធ្វើឲ្យមនុស្សទាំងនោះខកចិត្ត ដោយទ្រង់ប្រឆាំងនឹងការរកចាប់ទ្រង់ឲ្យធ្វើជាស្តេច ហើយពួកគេប្រហែលជាវែកញែកថា៖ ‹តើបុគ្គលនេះអាចជាព្រះមេស្ស៊ីយ៉ាងណាបាន ប្រសិនបើទ្រង់ឥតមានជំហរដ៏ត្រឹមត្រូវជាព្រះមេស្ស៊ីផងនោះ?›។ ត្រូវហើយ រឿងនេះក៏ជាអ្វីដែលធ្វើឲ្យមនុស្សគិតដែរ។ យ៉ូហាន ៦:៥១-៧១; ៣:១៦
▪ តើព្រះយេស៊ូប្រទានសាច់របស់ទ្រង់ឲ្យអ្នកណា? តើពួកគេទាំងនេះ‹បរិភោគសាច់របស់ទ្រង់›យ៉ាងដូចម្ដេច?
▪ តើបន្ទូលអ្វីទៀតរបស់ព្រះយេស៊ូដែលធ្វើឲ្យមនុស្សភ្ញាក់ផ្អើល? ប៉ុន្តែ តើទ្រង់កំពុងតែបញ្ជាក់អំពីអ្វី?
▪ តើពេត្រុសតបឆ្លើយយ៉ាងណា ពេលមនុស្សជាច្រើនឈប់កាន់តាមព្រះយេស៊ូនោះ?