ជំពូកទី១១៩
យកទ្រង់ទៅលោកអាណ រួចយកទៅលោកកៃផា
ពួកគេចាប់ចងព្រះយេស៊ូដូចជាឧក្រិដ្ឋជន ហើយពួកគេនាំទ្រង់ទៅលោកអាណ ដែលជាអតីតសម្ដេចសង្ឃម្នាក់ដែលមានអំណាចធំដុំ។ លោកអាណជាសម្ដេចសង្ឃ ពេលព្រះយេស៊ូមានព្រះជន្មាយុ១២ឆ្នាំ នៅពេលនោះពួកគ្រូរ៉ាប៊ីបានស្ងើចសរសើរជាខ្លាំងនឹងប្រាជ្ញារបស់ទ្រង់នៅឯព្រះវិហារ។ ក្រោយមក កូនប្រុសបីបួននាក់របស់លោកអាណ ក៏បានបំរើជាសម្ដេចសង្ឃដែរ ហើយឥឡូវនេះ កូនប្រសារបស់លោក ឈ្មោះកៃផាកំពុងតែកាន់តំណែងនេះ។
ប្រហែលជាមុនដំបូង គេនាំព្រះយេស៊ូទៅផ្ទះរបស់លោកអាណ ពីព្រោះលោកជាសម្ដេចសង្ឃហើយមានឋានៈធំដុំជាយូរយារមកហើយក្នុងសាសនាយូដានោះ។ ការយកព្រះយេស៊ូទៅជួបលោកអាណ គឺអនុញ្ញាតឲ្យសម្ដេចសង្ឃកៃផាមានពេលប្រមូលក្រុមប្រឹក្សាជាន់ខ្ពស់ ដែលមានសមាជិក៧១រូបមកជួបជុំគ្នា ព្រមទាំងប្រមូលពួកសាក្សីក្លែងក្លាយដែរ។
ឥឡូវនេះលោកអាណសួរព្រះយេស៊ូអំពីពួកសិស្សនិងអំពីការបង្រៀនរបស់ទ្រង់។ យ៉ាងណាក៏ដោយ ព្រះយេស៊ូមានបន្ទូលឆ្លើយទៅលោកថា៖ «ខ្ញុំបាននិយាយនឹងបណ្ដាមនុស្ស នៅកណ្ដាលជំនុំ ខ្ញុំតែងតែបង្រៀនក្នុងសាលាប្រជុំ ហើយក្នុងព្រះវិហារ ជាកន្លែងដែលពួកសាសន៍យូដាប្រជុំគ្នា ខ្ញុំមិនដែលនិយាយដោយសំងាត់ទេ ហេតុអ្វីបានជាលោកសួរខ្ញុំ? ចូរសួរដល់ពួកអ្នកដែលបានស្ដាប់ខ្ញុំ ពីសេចក្ដីដែលខ្ញុំនិយាយនោះវិញ មើល! គេដឹងសេចក្ដីដែលខ្ញុំនិយាយដែរ»។
ភ្លាមនោះមានពួកអាជ្ញាម្នាក់ដែលឈរនៅទីនោះ បានទះកំផ្លៀងព្រះយេស៊ូ ទាំងពោលថា៖ «ឯងឆ្លើយទៅសំដេចសង្ឃយ៉ាងដូច្នេះឬ?»។
ព្រះយេស៊ូមានបន្ទូលទៅអ្នកនោះថា៖ «បើខ្ញុំបាននិយាយអាក្រក់ នោះចូរធ្វើបន្ទាល់ពីសេចក្ដីអាក្រក់នោះចុះ! តែបើខ្ញុំបាននិយាយល្អវិញ ហេតុអ្វីបានជាវាយខ្ញុំ?»។ ក្រោយពីការនិយាយឆ្លងឆ្លើយនេះ លោកអាណបញ្ជូនព្រះយេស៊ូទៅលោកកៃផាទាំងជាប់ចំណង។
ឥឡូវនេះ សម្ដេចសង្ឃកៃផានិងពួកចាស់ទុំទាំងប៉ុន្មាន ព្រមទាំងពួកស្ក្រែប គឺក្រុមប្រឹក្សាជាន់ខ្ពស់ទាំងមូល បានមកជួបជុំគ្នាហើយ។ ជាក់ស្តែងណាស់ កន្លែងប្រជុំនេះគឺជាផ្ទះរបស់លោកកៃផា។ ការធ្វើការវិនិច្ឆ័យទោសដូចនេះក្នុងរាត្រីនៃបុណ្យរំលង គឺច្បាស់ជាបំពានលើក្រិត្យវិន័យសាសន៍យូដាមែន។ ប៉ុន្តែ នេះឥតធ្វើឲ្យពួកអ្នកដឹកនាំសាសនាញញើតនឹងបំណងដ៏លាមករបស់ពួកគេនោះទេ។
ប៉ុន្មានសប្ដាហ៍មុននេះ ពេលព្រះយេស៊ូប្រោសឡាសារឲ្យរស់ឡើងវិញ នោះក្រុមប្រឹក្សាជាន់ខ្ពស់នេះបានតាំងចិត្តជាស្រេចទៅហើយក្នុងចំណោមពួកគេ ថាទ្រង់ត្រូវតែសោយទិវង្គត។ ហើយនៅថ្ងៃពុធដែលគ្រាន់តែពីរថ្ងៃកន្លងទៅនេះ ពួកអាជ្ញាធរខាងសាសនាប្រជុំគ្នារិះរកកលល្បិចចាប់ព្រះយេស៊ូ ដើម្បីធ្វើគុតទ្រង់។ សូមគិតទៅមើល តាមពិតពួកគេកាត់ទោសទ្រង់រួចទៅហើយ មុននឹងតុលាការវិនិច្ឆ័យទោសទ្រង់!
ឥឡូវនេះ ពួកគេខំប្រឹងរកសាក្សីដែលនឹងផ្ដល់ឲ្យភស្តុតាងក្លែងក្លាយ ដើម្បីឲ្យមានពាក្យបណ្ដឹងចំពោះព្រះយេស៊ូ។ ប៉ុន្តែ ពួកគេពុំអាចរកបានសាក្សីដែលឯកភាពនឹងភស្តុតាងរបស់ពួកគេទេ។ នៅទីបំផុត មានមនុស្សពីរនាក់ដែលអះអាងថា៖ «យើងខ្ញុំបានឮវាថា ‹ខ្ញុំនឹងបំផ្លាញព្រះវិហារនេះ ដែលបានធ្វើដោយដៃមនុស្ស ហើយក្នុងរវាង៣ថ្ងៃ ខ្ញុំនឹងសង់១ទៀត ដែលមិនមែនធ្វើដោយដៃមនុស្សទេ›»។
សម្ដេចសង្ឃកៃផាសួរថា៖ «តើឯងមិនព្រមឆ្លើយសោះឬ? . . . សេចក្ដីដែលគេចោទប្រកាន់ឯងទាំងប៉ុន្មាននេះ តើយ៉ាងដូចម្ដេច?»។ ឯព្រះយេស៊ូទ្រង់នៅតែស្ងៀម។ នេះជាអ្វីដ៏គួរឲ្យអាម៉ាស់មុខដល់ក្រុមប្រឹក្សានេះណាស់ ដ្បិតទោះជាមានការចោទប្រកាន់ក្លែងក្លាយនេះក៏ដោយ ក៏សាក្សីទាំងនោះនិយាយមិនស្របគ្នាឡើយ។ ដូច្នេះ ឥឡូវនេះ សម្ដេចសង្ឃក៏សាកប្រើមធ្យោបាយផ្សេងទៀត។
លោកកៃផាដឹងថា ពួកសាសន៍យូដាខឹងណាស់ បើអ្នកណាអះអាងថាខ្លួនជាបុត្ររបស់ព្រះ។ ពីរលើកមកហើយ ពួកគេបានចោទព្រះយេស៊ូថា ជាអ្នកប្រមាថព្រះដែលសមតែនឹងស្លាប់។ ហើយនៅពេលមួយទៀត ពួកគេបានគិតខុសទាំងស្រុងថា ទ្រង់បានអះអាងថាទ្រង់ស្មើនឹងព្រះ។ ឥឡូវនេះ ដោយសារកលល្បិចនោះ សម្ដេចសង្ឃកៃផាសម្លុតសួរទ្រង់ថា៖ «ចូរស្បថនឹងព្រះដ៏មានព្រះជន្មរស់ចុះ! បើឯងជាព្រះគ្រីស្ទ ជាព្រះរាជបុត្រនៃព្រះមែន នោះចូរប្រាប់យើងមក!»។
ទោះជាពួកសាសន៍យូដាគិតយ៉ាងណាក៏ដោយ ព្រះយេស៊ូគឺពិតជាព្រះរាជបុត្រានៃព្រះមែន។ ហើយបើទ្រង់នៅស្ងៀម នោះគឺអាចបង្ហាញថាទ្រង់មិនមែនជាព្រះគ្រីស្ទទេ។ ដូច្នេះ ព្រះយេស៊ូមានបន្ទូលយ៉ាងក្លាហានថា៖ «គឺខ្ញុំនេះហើយ មួយទៀតអ្នករាល់គ្នានឹងឃើញកូនមនុស្ស អង្គុយនៅខាងស្ដាំនៃព្រះចេស្ដា ហើយទាំងមកក្នុងពពកនៅលើមេឃផង»។
ភ្លាមនោះ លោកកៃផាក៏ហែកអាវខ្លួន ហើយពោលថា៖ «វាបានពោលពាក្យប្រមាថដល់ព្រះ ដូច្នេះ តើយើងចាំបាច់ត្រូវការនឹងទីបន្ទាល់ណាថែមទៀត មើល! អ្នករាល់គ្នាទើបនឹងឮពាក្យ ដែលវាប្រមាថនោះស្រាប់ហើយ តើគិតយ៉ាងដូចម្ដេច?»។
ក្រុមប្រឹក្សាទាំងនោះឆ្លើយឡើងថា៖ «វាគួរស្លាប់ហើយ»។ រួចមក ពួកគេឡកឡឺយឲ្យទ្រង់ទាំងពោលពាក្យប្រមាថជាច្រើនដាក់ទ្រង់។ ពួកគេទះកំផ្លៀងនិងស្ដោះទឹកមាត់ដាក់ព្រះភ័ក្ដ្រទ្រង់។ អ្នកខ្លះគ្របព្រះភ័ក្ដ្ររបស់ទ្រង់ហើយវាយតប់ ថែមទាំងពោលពាក្យបញ្ឈឺថា៖ «ចូរទាយប្រាប់យើងចុះ! ព្រះគ្រីស្ទអើយ! តើអ្នកណាបានវាយឯង?»។ ការប្រព្រឹត្តដ៏ខុសច្បាប់ ដែលប្រមាថមើលងាយយ៉ាងអាក្រក់នេះ កើតឡើងពេលពួកគេធ្វើការវិនិច្ឆ័យទោសទ្រង់នៅពេលយប់។ ម៉ាថាយ ២៦:៥៧-៦៨; ២៦:៣, ៤; ម៉ាកុស ១៤:៥៣-៦៥; លូកា ២២:៥៤, ៦៣-៦៥; យ៉ូហាន ១៨:១៣-២៤; ១១:៤៥-៥៣; ១០:៣១-៣៩; ៥:១៦-១៨
▪ តើពួកគេនាំព្រះយេស៊ូទៅកន្លែងណាមុនដំបូង? ហើយមានអ្វីកើតឡើងដល់ទ្រង់នៅទីនោះ?
▪ បន្ទាប់មកតើពួកគេនាំយកទ្រង់ទៅទីណា? ហើយតើសំរាប់បំណងអ្វី?
▪ តើតាមរបៀបណាដែលលោកកៃផា អាចបង្គាប់ឲ្យក្រុមប្រឹក្សាជាន់ខ្ពស់ប្រកាសថា ព្រះយេស៊ូសមនឹងសោយទិវង្គត?
▪ តើការប្រព្រឹត្តដ៏ខុសច្បាប់ដែលប្រមាថមើលងាយយ៉ាងអាក្រក់អ្វី ដែលកើតឡើងពេលវិនិច្ឆ័យទោសទ្រង់?