ផ្នែកទី៤
ពិភពគ្រីស្ទសាសនាបានក្បត់ព្រះនិងព្រះគម្ពីរ
១, ២. ហេតុអ្វីក៏អ្នកខ្លះខ្វះការកោតគោរពដល់ព្រះគម្ពីរ តែព្រះគម្ពីរប្រាប់យើងយ៉ាងដូចម្ដេច?
១ ប្រជាជននៅប្រទេសជាច្រើនបានជៀសវាងហើយខ្វះការកោតគោរពដល់ព្រះគម្ពីរ ពីព្រោះដោយការប្រព្រឹត្តអាក្រក់របស់ពួកអ្នកដែលអះអាងថាខ្លួនកាន់តាមព្រះគម្ពីរ។ នៅប្រទេសខ្លះ គេបានថាព្រះគម្ពីរជាសៀវភៅដែលនាំឲ្យកើតសង្គ្រាម ជាសៀវភៅរបស់មនុស្សពូជស្បែកស ហើយជាសៀវភៅដែលគាំទ្រអាណានិគមនិយម។ ប៉ុន្តែមតិអស់នេះគឺខុសស្រឡះ។
២ ព្រះគម្ពីរដែលបានត្រូវសរសេរមកនៅមជ្ឈិមបូព៌ា មិនគាំទ្រសង្គ្រាមអាណានិគមនិងការកេងប្រវ័ញ្ចន៍លោភលន់ ដែលបានប្រព្រឹត្តឡើងក្នុងនាមសាសនាគ្រីស្ទានជាយូរមកហើយនោះទេ។ ផ្ទុយទៅវិញ ដោយអានព្រះគម្ពីរនិងរៀនអំពីសិក្ខាបទនៃសាសនាគ្រីស្ទានពិតដែលព្រះយេស៊ូបានបង្រៀន នោះអ្នកនឹងឃើញថា ព្រះគម្ពីរប្រឆាំងយ៉ាងខ្លាំងចំពោះសង្គ្រាមច្បាំងគ្នា អំពើអសីលធម៌ និងការកេងប្រវ័ញ្ចន៍ពីអ្នកដទៃ។ នេះជាកំហុសរបស់មនុស្សលោភលន់ មិនមែនរបស់ព្រះគម្ពីរទេ។ (កូរិនថូសទី១ ១៣:១-៦; យ៉ាកុប ៤:១-៣; ៥:១-៦; យ៉ូហានទី១ ៤:៧, ៨) ដូច្នេះ សូមកុំឲ្យការប្រព្រឹត្តខុសទំនងនៃមនុស្សចិត្តកំណាញ់ ដែលមិនគោរពតាមដំបូន្មានដ៏ប្រពៃនៃព្រះគម្ពីរ ឃាត់ឃាំងអ្នកមិនឲ្យទទួលផលប្រយោជន៍ពីភោគទ្រព្យព្រះគម្ពីរឡើយ។
៣. តើហេតុការណ៍ក្នុងប្រវត្ដិសាស្ត្របង្ហាញឲ្យឃើញយ៉ាងណាអំពីពិភពគ្រីស្ទសាសនា?
៣ ក្នុងចំណោមពួកដែលមិនរស់នៅតាមដំបូន្មានព្រះគម្ពីរ គឺមានមនុស្សនិងជាតិសាសន៍របស់ពិភពគ្រីស្ទសាសនា។ ពាក្យ «ពិភពគ្រីស្ទសាសនា» មានអត្ថន័យថា ជាពិភពលោកមួយប៉ែកដែលច្រើនមានសាសនាគ្រីស្ទាន។ ភាគច្រើនគឺបស្ចិមប្រទេស ជាមួយនឹងប្រព័ន្ធសាសនាទាំងប៉ុន្មាន ដែលបានក្លាយជាល្បីលេចមុខចាប់តាំងពីប្រហែលសតវត្សទីបួននៃស.យ.។ ពិភពគ្រីស្ទសាសនាបានកាន់ព្រះគម្ពីរជាច្រើនសតវត្សមកហើយ។ ពួកបព្វជិតបានអះអាងថាគេបង្រៀនពីព្រះគម្ពីរ ហើយថាគេជាអ្នកតំណាងព្រះ។ ប៉ុន្តែ តើបព្វជិតនិងសាសនទូតនៃពិភពគ្រីស្ទសាសនាបង្រៀនសេចក្ដីពិតទេ? តើការប្រព្រឹត្តរបស់ពួកគេពិតជាតំណាងព្រះនិងព្រះគម្ពីរមែនទេ? តើក្នុងពិភពគ្រីស្ទសាសនាច្រើនតែមានសាសនាគ្រីស្ទានមែនឬ? មិនមែនទេ តាំងពីបានល្បីលេចមុខក្នុងសតវត្សទី៤មក ពិភពគ្រីស្ទសាសនាបានទៅជាខ្មាំងសត្រូវនៃព្រះនិងព្រះគម្ពីរវិញ។ មែនហើយ ហេតុការណ៍ក្នុងប្រវត្ដិសាស្ត្របង្ហាញថា ពិភពគ្រីស្ទសាសនាបានក្បត់ព្រះនិងព្រះគម្ពីរ។
លទ្ធិខុសផ្ទុយពីព្រះគម្ពីរ
៤, ៥. តើអ្វីជាលទ្ធិខុសផ្ទុយពីព្រះគម្ពីរ ដែលពិភពគ្រីស្ទសាសនាបង្រៀន?
៤ លទ្ធិសំខាន់ៗនៃពិភពគ្រីស្ទសាសនាគឺមិនមែនសំអាងលើព្រះគម្ពីរទេ តែសំអាងទៅលើអភូតកថាបុរាណរបស់ក្រិក អេស៊ីប បាប៊ីឡូន និងសាសន៍ឯទៀតទៅវិញ។ សេចក្ដីបង្រៀនដូចជា ព្រលឹងមនុស្សរមែងមិនស្លាប់ជានិច្ច ទារុណកម្មដ៏អស់កល្បក្នុងភ្លើងនរក ភ្លើងសម្រង់បាប និងព្រះត្រីឯកភាព (គឺរូបបីអង្គក្នុងព្រះតែមួយ) គឺឥតមានក្នុងព្រះគម្ពីរទេ។
៥ ជាឧទាហរណ៍ សូមពិចារណាមើលអំពីសេចក្ដីបង្រៀនដែលថា មនុស្សអាក្រក់នឹងត្រូវទទួលទារុណកម្មរហូតដល់អស់កល្បក្នុងភ្លើងនរក។ តើអ្នកយល់យ៉ាងណាដែរអំពីគំនិតនេះ? មនុស្សជាច្រើនយល់ថានេះជាការអាក្រក់រអើមណាស់។ គេយល់ថាមិនសមហេតុសោះ ដែលព្រះនឹងធ្វើទារុណកម្មមនុស្សអស់កល្បជានិច្ច ទុកឲ្យគេឈឺចាប់ខ្លោចផ្សាខ្លាំងយ៉ាងនេះ។ គំនិតអាក្រក់ឃោរឃៅបែបនេះគឺខុសផ្ទុយពីព្រះនៃព្រះគម្ពីរហើយ ដ្បិត «ព្រះទ្រង់ជាសេចក្ដីស្រឡាញ់»។ (យ៉ូហានទី១ ៤:៨) ព្រះគម្ពីរប្រាប់យ៉ាងច្បាស់ថា សេចក្ដីបង្រៀនបែបនេះ ‹មិនដែលចូលក្នុងព្រះហឫទ័យ› នៃព្រះដ៏មានគ្រប់ព្រះចេស្ដាឡើយ។—យេរេមា ៧:៣១; ១៩:៥; ៣២:៣៥
៦. តើព្រះគម្ពីរបង្ហាញឲ្យឃើញថា សេចក្ដីបង្រៀនអំពីព្រលឹងអមតៈគឺខុសយ៉ាងដូចម្ដេច?
៦ សព្វថ្ងៃនេះមានសាសនាជាច្រើន រួមទាំងពិភពគ្រីស្ទសាសនាបង្រៀនថា មនុស្សមានព្រលឹងអមតៈ ដែលត្រូវទៅស្ថានសួគ៌ឬស្ថាននរកនៅពេលមនុស្សស្លាប់ទៅ។ ព្រះគម្ពីរឥតបង្រៀនដូច្នេះទេ។ ផ្ទុយទៅវិញ ព្រះគម្ពីរបានចែងយ៉ាងច្បាស់ថា៖ «មនុស្សដែលរស់ គេដឹងថាខ្លួននឹងស្លាប់ជាមិនខាន តែមនុស្សស្លាប់ឥតដឹងអ្វីឡើយ . . . ដ្បិតនៅក្នុងស្ថានឃុំព្រលឹងមនុស្សស្លាប់[ផ្នូរ] ជាកន្លែងដែលឯងត្រូវនៅ នោះគ្មានការធ្វើ គ្មានការគិតគូរ គ្មានដំរិះ ឬប្រាជ្ញាឡើយ»។ (សាស្ដា ៩:៥, ១០) ហើយអ្នកតែងទំនុកដំកើងបានថ្លែងប្រាប់ថា ពេលស្លាប់មនុស្សក៏ «ត្រឡប់ទៅជាដីវិញ នៅថ្ងៃនោះឯង អស់ទាំងគំនិតរបស់គេក៏សូន្យបាត់ទៅ»។—ទំនុកដំកើង ១៤៦:៤
៧. តើអ័ដាមនិងអេវ៉ាបានទទួលទណ្ឌកម្មអ្វី នៅពេលដែលគេបានប្រព្រឹត្តល្មើសច្បាប់វិន័យរបស់ព្រះ?
៧ សូមឲ្យចាំដែរថា នៅពេលដែលអ័ដាមនិងអេវ៉ាបានប្រព្រឹត្តល្មើសច្បាប់វិន័យព្រះ ទណ្ឌកម្មដែលពួកគេបានទទួលគឺមិនមែនជាភាពអមតៈទេ ដ្បិតនោះនឹងគឺជារង្វាន់ មិនមែនជាទណ្ឌកម្មឡើយ! ផ្ទុយទៅវិញ ព្រះមានបន្ទូលប្រាប់ពួកគេថា គេនឹង «ត្រឡប់ទៅជាដីវិញ ពីព្រោះ[ព្រះបានយកពួកគេ]ពីដីមក»។ ព្រះក៏មានបន្ទូលបញ្ជាក់ដល់អ័ដាមថា៖ «ដ្បិតឯងជាធូលីដី ក៏ត្រូវត្រឡប់ទៅជាធូលីដីវិញ»។ (លោកុប្បត្តិ ៣:១៩) ដូច្នេះ សេចក្ដីបង្រៀនថាព្រលឹងជាអមតៈ គឺឥតមាននៅក្នុងព្រះគម្ពីរទេ។ គឺពិភពគ្រីស្ទសាសនាទេដែលបានរើសយកពីពួកអ្នកមិនមែនជាគ្រីស្ទាន ដែលបានរស់នៅមុនពួកគេនោះ។
៨. តើព្រះគម្ពីរបង្ហាញឲ្យឃើញថា លទ្ធិព្រះត្រីឯកភាពនៃពិភពគ្រីស្ទសាសនាគឺខុសយ៉ាងដូចម្ដេច?
៨ លទ្ធិព្រះត្រីឯកភាពនៃពិភពគ្រីស្ទសាសនាសម្ដែងថា ព្រះគឺជាព្រះអាថ៌កំបាំងមានរូបបីអង្គរួមគ្នាជាមួយអង្គ។ តែសេចក្ដីបង្រៀននេះក៏អត់មានក្នុងព្រះគម្ពីរដែរ។ ជាឧទាហរណ៍ នៅអេសាយ ៤០:២៥ ព្រះមានបន្ទូលប្រាប់យ៉ាងច្បាស់ថា៖ «ឯងរាល់គ្នានឹងប្រៀបផ្ទឹមអញដូចជាអ្នកណា ឲ្យអញបានស្មើនឹងគេនោះ»? ចម្លើយគឺច្បាស់ណាស់៖ គ្មានអ្នកណាអាចស្មើនឹងព្រះបានទេ។ ហើយនៅទំនុកដំកើង ៨៣:១៨ ថ្លែងថា៖ «ទ្រង់តែ១អង្គ ព្រះនាមជាយេហូវ៉ា ដែលជាព្រះដ៏ខ្ពស់បំផុតលើផែនដីទាំងមូល»។—សូមមើល អេសាយ ៤៥:៥; ៤៦:៩; យ៉ូហាន ៥:១៩; ៦:៣៨; ៧:១៦ ដែរ
៩. តើយើងអាចនិយាយយ៉ាងដូចម្ដេច អំពីសេចក្ដីបង្រៀនរបស់ព្រះគម្ពីរ និងនៃពិភពគ្រីស្ទសាសនា?
៩ សេចក្ដីបង្រៀននៃព្រះគម្ពីរ អំពីព្រះនិងគោលបំណងទ្រង់ គឺច្បាស់លាស់ ស្រួលយល់ ហើយសមហេតុផល។ តែសេចក្ដីបង្រៀននៃពិភពគ្រីស្ទសាសនាគឺមិនដូច្នោះទេ។ អ្វីដែលរឹតតែអាក្រក់ទៅទៀតនោះ គឺថាសេចក្ដីបង្រៀនរបស់គេគឺខុសផ្ទុយពីព្រះគម្ពីរ។
អំពើប្រព្រឹត្តដែលប្រឆាំងនឹងព្រះ
១០, ១១. តើតាមរបៀបណាដែលសេចក្ដីបង្រៀននៃព្រះគម្ពីរតម្រូវផ្ទុយពីអ្វីដែលពិភពគ្រីស្ទសាសនាបានធ្វើនោះ?
១០ ក្រៅពីការបង្រៀនលទ្ធិមិនពិត ពិភពគ្រីស្ទសាសនាក៏បានក្បត់ព្រះនិងព្រះគម្ពីរដោយអំពើប្រព្រឹត្តរបស់គេដែរ។ អំពើដែលពួកបព្វជិតនិងនិកាយទាំងឡាយបានប្រព្រឹត្តក្នុងសតវត្សកន្លងទៅ និងនៅតែប្រព្រឹត្តក្នុងជំនាន់យើងនេះ គឺខុសផ្ទុយពីអ្វីៗដែលព្រះនៃព្រះគម្ពីរបានតម្រូវ ហើយក៏ខុសផ្ទុយពីអ្វីៗដែលព្រះយេស៊ូគ្រីស្ទ ដែលជាអ្នកបង្កើតសាសនាគ្រីស្ទាន បានបង្រៀននិងអនុវត្តផង។
១១ ជាឧទាហរណ៍ ព្រះយេស៊ូបង្គាប់ពួកអ្នកកាន់តាមទ្រង់ កុំឲ្យចូលជ្រៀតជ្រែកក្នុងរឿងនយោបាយលោកីយ៍នេះ ឬចូលរួមក្នុងសង្គ្រាមលោកីយ៍នេះឡើយ។ ទ្រង់ក៏បានបង្គាប់ពួកគេឲ្យចេះស្រឡាញ់សន្ដិភាពវិញ ឲ្យគោរពតាមច្បាប់វិន័យ ឲ្យស្រឡាញ់ពួកមនុស្សផងទាំងពួង ដោយមិនចេះប្រកាន់ពូជសាសន៍ ហើយទាំងឲ្យលះបង់ជីវិតខ្លួន ជាជាងសម្លាប់ប្រហារជីវិតមនុស្សឯទៀត។—យ៉ូហាន ១៥:១៣; កិច្ចការ ១០:៣៤, ៣៥; យ៉ូហានទី១ ៤:២០, ២១
១២. តើព្រះយេស៊ូមានបន្ទូលថាអ្វីដែលនឹងសម្គាល់គ្រីស្ទានពិត?
១២ ប្រាកដហើយ ព្រះយេស៊ូបានបង្រៀនថា សេចក្ដីស្រឡាញ់ចំពោះមនុស្សឯទៀតគឺជាសញ្ញា ដែលសម្គាល់គ្រីស្ទានពិតពីគ្រីស្ទានក្លែងក្លាយដ៏ជាអ្នកបំប្លែងខ្លួន។ ទ្រង់មានបន្ទូលទៅអ្នកដែលនឹងកាន់តាមទ្រង់ថា៖ «ខ្ញុំឲ្យសេចក្ដីបញ្ញត្ត១ថ្មីដល់អ្នករាល់គ្នា គឺឲ្យអ្នករាល់គ្នាស្រឡាញ់គ្នាទៅវិញទៅមក ត្រូវឲ្យស្រឡាញ់គ្នា ដូចជាខ្ញុំបានស្រឡាញ់អ្នករាល់គ្នាដែរ គេនឹងដឹងថា អ្នករាល់គ្នាជាសិស្សរបស់ខ្ញុំ ដោយសារសេចក្ដីនេះឯង គឺដោយអ្នករាល់គ្នាមានសេចក្ដីស្រឡាញ់ដល់គ្នាទៅវិញទៅមក»។—យ៉ូហាន ១៣:៣៤, ៣៥; ១៥:១២
១៣, ១៤. តើអ្វីទៅដែលបង្ហាញថា ពិភពគ្រីស្ទសាសនាមិនមែនតំណាងព្រះនោះ?
១៣ ប៉ុន្តែ រៀងរាល់សតវត្ស ពួកបព្វជិតនៃពិភពគ្រីស្ទសាសនាបានចូលជ្រៀតជ្រែកក្នុងនយោបាយ ហើយបានគាំទ្រសង្គ្រាមនៃសាសន៍របស់ខ្លួន។ ពួកគេថែមទាំងបានគាំទ្រខាងដែលច្បាំងប្រឆាំងគ្នាផង ក្នុងសង្គ្រាមចំណោមពិភពគ្រីស្ទសាសនា ដូចជាសង្គ្រាមលោកទាំងពីរនៃសតវត្សនេះ។ ក្នុងសង្គ្រាមទាំងនេះ ពួកបព្វជិតនៅម្ខាងៗខំបន់ឲ្យបានជ័យជំនះ។ ដូច្នេះហើយបានជាសមាជិកសាសនា ពីប្រទេសមួយសម្លាប់សមាជិកសាសនាដូចគ្នាពីប្រទេសមួយទៀត។ ប៉ុន្តែនេះគឺជារបៀបដែលព្រះគម្ពីរប្រាប់ថាកូនអារក្សសាតាំងប្រព្រឹត្ត មិនមែនកូនព្រះទេ។ (យ៉ូហានទី១ ៣:១០-១២, ១៥) ដូច្នេះ ថ្វីបើពួកបព្វជិតនិងគ្នីគ្នាគេបានអះអាងថា ខ្លួនជាគ្រីស្ទានក៏ដោយ តែពួកគេបានប្រព្រឹត្តខុសផ្ទុយនឹងសេចក្ដីបង្រៀនរបស់ព្រះយេស៊ូគ្រីស្ទ ដែលមានបន្ទូលប្រាប់អ្នកកាន់តាមទ្រង់ឲ្យ ‹ស៊កដាវទៅក្នុងស្រោម›។—ម៉ាថាយ ២៦:៥១, ៥២
១៤ អស់ជាច្រើនសតវត្សមកហើយ និកាយគ្រីស្ទសាសនាបានចូលដៃជាមួយពួកអ្នកកាន់អំណាចនយោបាយនៃពិភពគ្រីស្ទសាសនា ពេលដែលសាសន៍ទាំងនោះវាយពង្រាបសាសន៍ឯទៀត ចាប់គេយកធ្វើជាទាសៈទាំងចំអកមើលងាយ កាលនៅសម័យចក្រពត្ដិនិយម។ ការនេះបានកើតឡើងអស់ជាច្រើនសតវត្សនៅទ្វីបអាហ្វ្រិក។ ប្រទេសចិនក៏ជួបប្រទះនឹងការជិះជាន់បែបនេះដែរ ពេលដែលពួកសាសន៍ពីបស្ចិមប្រទេសចូលតាំងអំណាចដោយប្រើកម្លាំងឈ្លានពាន ដូចក្នុងកាលសង្គ្រាមអាភៀន និងការបះបោរនៃកងប្រដាល់ចិន។
១៥. តើអ្វីជាអំពើអាក្រក់យង់ឃ្នង ដែលពិភពគ្រីស្ទសាសនាបានប្រព្រឹត្ត?
១៥ ពិភពគ្រីស្ទសាសនាក៏បានល្បីលេចមុខខាងធ្វើទុក្ខបៀតបៀន ធ្វើទារុណកម្ម ព្រមទាំងសម្លាប់ពួកអ្នកដែលមិនស្របតាមគេ ក្នុងរយៈពេលប៉ុន្មានសតវត្សក្នុងប្រវត្ដិសាស្ត្រ ដែលគេហៅថាយុគអន្ធការនោះ។ ក្នុងជំនាន់សាលាជំនុំរបស់សាសនាកាតូលិកពីដើម ដែលមានរយៈរាប់រយឆ្នាំ នោះគេបានបើកអនុញ្ញាតឲ្យប្រព្រឹត្តអំពើអាក្រក់យង់ឃ្នង ដូចជាធ្វើទារុណកម្មនិងធ្វើឃាតដល់មនុស្សត្រឹមត្រូវដ៏គ្មានទោសកំហុស។ ពួកអ្នកប្រព្រឹត្តអំពើទាំងនេះគឺជាពួកបព្វជិតនិងពួកអ្នកកាន់តាមគេ ដែលសុទ្ធតែអះអាងថាខ្លួនជាគ្រីស្ទាន។ ពួកគេបានទាំងខំរកបំផ្លាញព្រះគម្ពីរចោលទៀតផង ដើម្បីកុំឲ្យមនុស្សសាមញ្ញអានព្រះគម្ពីរបាន។
មិនមែនគ្រីស្ទាន
១៦, ១៧. ហេតុអ្វីបានជាយើងអាចនិយាយថា ពិភពគ្រីស្ទសាសនាមិនមែនជាគ្រីស្ទាននោះទេ?
១៦ ជាតិសាសន៍និងនិកាយទាំងប៉ុន្មានរបស់ពិភពគ្រីស្ទសាសនា គឺមិនមែនជាគ្រីស្ទានទេ តាំងពីដើមមកដល់ឥឡូវនេះ ហើយក៏មិនមែនជាអ្នកបំរើព្រះដែរ។ បន្ទូលពីព្រះប្រាប់អំពីពួកគេថា៖ «គេប្រកាន់ថា គេស្គាល់ព្រះ តែកិរិយាប្រយោជន៍របស់គេមិនព្រមស្គាល់ព្រះទេ ដ្បិតគេជាមនុស្សគួរខ្ពើម ហើយរឹងចចេស គឺជាមនុស្សឥតមានប្រយោជន៍អ្វីដល់ការល្អទាំងអស់»។—ទីតុស ១:១៦
១៧ ព្រះយេស៊ូមានបន្ទូលថា សាសនាក្លែងក្លាយ គឺអាចសម្គាល់បានដោយសារផលដែលគេបង្កើត។ ទ្រង់មានបន្ទូលថា៖ «ចូរប្រយ័តនឹងពួកគ្រូក្លែងក្លាយ ដែលគេមកឯអ្នករាល់គ្នា ដោយពាក់រោមចៀមបំប្លែងខ្លួន តែខាងក្នុងរបស់គេ ជាឆ្កែចចកដែលឆ្មក់ស៊ីវិញ អ្នករាល់គ្នានឹងស្គាល់គេបាន ដោយសារផលគេបង្កើត . . . អស់ទាំងដើមឈើល្អ តែងមានផ្លែល្អ ឯដើមអាក្រក់ ក៏តែងមានផ្លែអាក្រក់ដែរ ធម្មតាដើមឈើល្អ មិនដែលបញ្ចេញផលអាក្រក់បានទេ ហើយដើមដែលអាក្រក់ ក៏ពុំអាចនឹងបញ្ចេញផលល្អបានដែរ អស់ទាំងដើមឈើណា ដែលមិនកើតផលផ្លែល្អ នោះត្រូវតែកាប់បោះចោលទៅក្នុងភ្លើងចេញ ដូច្នេះ អ្នករាល់គ្នានឹងស្គាល់[ពួកគ្រូក្លែងក្លាយ]បាន គឺដោយសារផលគេបង្កើត»។—ម៉ាថាយ ៧:១៥-២០
១៨. តើអ្វីបានកើតឡើងដោយសារសេចក្ដីបង្រៀននិងអំពើប្រព្រឹត្តរបស់ពិភពគ្រីស្ទសាសនា?
១៨ ដូច្នេះ ដោយសារអ្វីដែលគេបានបង្រៀន និងអ្វីដែលគេបានប្រព្រឹត្ត និកាយនៃពិភពគ្រីស្ទសាសនាបានសម្ដែងឲ្យឃើញថា គេបានកុហកភូតភរទៅវិញ ពេលគេអះអាងថាគេជឿព្រះគម្ពីរ កោតខ្លាចដល់ព្រះ ហើយថាខ្លួនជាគ្រីស្ទាននោះ។ ពួកគេបានក្បត់ព្រះនិងព្រះគម្ពីរ។ ដោយធ្វើដូច្នេះ ពួកគេបានបណ្ដាលឲ្យមនុស្សរាប់លាននាក់មានការស្អប់ខ្ពើម ទាំងបែរចេញលែងជឿថាមានព្រះអាទិទេពមួយអង្គទៀតផង។
១៩. ព្រោះតែពិភពគ្រីស្ទសាសនាមិនបានសម្រេចជោគជ័យ តើនេះមានន័យថាព្រះនិងព្រះគម្ពីរមិនបានសម្រេចជោគជ័យដែរឬ?
១៩ ប៉ុន្តែ ព្រោះតែបព្វជិតនិងពិភពគ្រីស្ទសាសនា ព្រមទាំងសាសនាឯទៀតនៅក្រៅពិភពគ្រីស្ទសាសនា មិនបានសម្រេចជោគជ័យ នោះមិនមែនមានន័យថាព្រះគម្ពីរមិនបានសម្រេចជោគជ័យនោះទេ ហើយនេះក៏មិនមែនបានសេចក្ដីថា ព្រះមិនបានសម្រេចជោគជ័យដែរ។ ផ្ទុយទៅវិញ ព្រះគម្ពីរប្រាប់យើងអំពីព្រះអាទិទេពមួយអង្គ ដែលគង់នៅ ដែលខ្វល់ខ្វាយចំពោះយើងព្រមទាំងអនាគតរបស់យើងផង។ ព្រះគម្ពីរបានបង្ហាញថា ទ្រង់នឹងប្រទានរង្វាន់ដល់មនុស្សចិត្តស្មោះត្រង់ ដែលចង់ធ្វើអំពើល្អត្រឹមត្រូវ ដែលចង់ឲ្យមានយុត្ដិធម៌និងសន្ដិភាពពាសពេញលើផែនដី។ ព្រះគម្ពីរក៏បង្ហាញនូវមូលហេតុដែលព្រះបានអនុញ្ញាតឲ្យមានអំពើអាក្រក់និងការឈឺចាប់ ហើយនូវរបៀបដែលទ្រង់នឹងកាត់ពួកអ្នកធ្វើទុក្ខដល់មនុស្សគ្នីគ្នាឯទៀតចោលចេញពីផែនដី ព្រមទាំងពួកអ្នកដែលអះអាងតែមាត់ ថាជាអ្នកបំរើទ្រង់នោះ។
[រូបភាពនៅទំព័រ១៧]
គំនូរ«ស្ថាននរក»របស់ដានថេ
[អ្នកផ្ដល់សិទ្ធិ]
Doré’s illustration of Barrators—Giampolo for Dante’s Divine Comedy
[រូបភាពនៅទំព័រ១៧]
ព្រះត្រីឯកភាពនៃពិភពគ្រីស្ទសាសនា
[រូបភាពនៅទំព័រ១៧]
ព្រះត្រីឯកភាពនៃហិណ្ឌូ
[អ្នកផ្ដល់សិទ្ធិ]
Courtesy of The British Museum
[រូបភាពនៅទំព័រ១៧]
ព្រះត្រីឯកភាពនៃអេស៊ីប
[អ្នកផ្ដល់សិទ្ធិ]
Museo Egizio, Turin
[រូបភាពនៅទំព័រ១៨]
ផ្ទុយពីសេចក្ដីបង្រៀនរបស់ព្រះយេស៊ូ ពួកបព្វជិតទាំងសងខាងបានគាំទ្រសង្គ្រាម
[អ្នកផ្ដល់សិទ្ធិ]
U.S. Army photo