ភាគ២១
លោកយេស៊ូបានត្រូវប្រោសឲ្យរស់ឡើងវិញ!
លោកយេស៊ូលេចមកឲ្យពួកអ្នកកាន់តាមលោកឃើញ ដើម្បីបង្ហាត់បង្រៀននិងលើកទឹកចិត្តពួកគាត់
នៅបីថ្ងៃក្រោយមរណភាពរបស់លោកយេស៊ូ ពួកស្ត្រីខ្លះដែលជាអ្នកកាន់តាមលោកបានឃើញថា ថ្មដែលបិទមាត់រូងទីបញ្ចុះសពនោះបានត្រូវប្រមៀលចេញ។ ម្យ៉ាងវិញទៀត ទីបញ្ចុះសពនោះនៅទទេ!
ទេវតាពីររូបបានលេចមក។ ទេវតាម្នាក់បាននិយាយថា៖ «អ្នកកំពុងរកលោកយេស៊ូពីក្រុងណាសារ៉ែត . . . លោកបានត្រូវប្រោសឲ្យរស់ឡើងវិញ»។ (ម៉ាកុស ១៦:៦) ភ្លាមនោះ ស្ត្រីទាំងនោះបានរត់ទៅប្រាប់ពួកសាវ័ក។ នៅតាមផ្លូវ ពួកគាត់បានជួបលោកយេស៊ូ។ លោកបានមានប្រសាសន៍ថា៖ «កុំខ្លាចឡើយ! ចូរទៅ ហើយនាំដំណឹងប្រាប់បងប្អូនរបស់ខ្ញុំផង ដើម្បីឲ្យពួកគាត់ទៅស្រុកកាលីឡេ ហើយពួកគាត់នឹងឃើញខ្ញុំនៅទីនោះ»។—ម៉ាថាយ ២៨:១០
ក្រោយមកនៅថ្ងៃនោះ អ្នកកាន់តាមពីរនាក់កំពុងដើរពីក្រុងយេរូសាឡិមទៅភូមិអេម៉ាស។ មនុស្សចម្លែកម្នាក់បានដើរជាមួយនឹងពួកគាត់ ហើយបានសួរថាពួកគាត់កំពុងនិយាយអំពីអ្វី។ តាមពិត បុគ្គលនេះជាលោកយេស៊ូដែលបានត្រូវប្រោសឲ្យរស់ឡើងវិញ ហើយបានលេចមក ក្នុងរូបកាយដែលមុនដំបូងអ្នកកាន់តាមនោះពុំបានស្គាល់ទេ។ ដោយមានទឹកមុខក្រៀមក្រំ ពួកគាត់បានតបឆ្លើយថា ពួកគាត់កំពុងនិយាយអំពីលោកយេស៊ូ។ មនុស្សចម្លែកនេះបានចាប់ផ្ដើមពន្យល់អំពីអ្វីៗដែលទាក់ទងនឹងមេស្ស៊ីក្នុងខគម្ពីរទាំងឡាយ។ ពិតមែនហើយ លោកយេស៊ូបានសម្រេចទំនាយទាំងអស់អំពីមេស្ស៊ីយ៉ាងល្អិតល្អន់បំផុត។a នៅពេលដែលពួកអ្នកកាន់តាមបានដឹងថា មនុស្សចម្លែកនោះគឺលោកយេស៊ូ ដែលបានត្រូវប្រោសឲ្យរស់ឡើងវិញជាបុគ្គលវិញ្ញាណ នោះលោកក៏បាត់ខ្លួនទៅ។
អ្នកកាន់តាមពីរនាក់នោះក៏ត្រឡប់ទៅក្រុងយេរូសាឡិមភ្លាម។ នៅទីនោះ ពួកគាត់ឃើញពួកសាវ័កបានជួបជុំគ្នាក្នុងបន្ទប់ចាក់សោ។ កាលដែលអ្នកកាន់តាមពីរនាក់នោះរៀបរាប់ពីអ្វីដែលពួកគាត់បានជួបប្រទះ នោះលោកយេស៊ូបានលេចមក។ ពួកអ្នកកាន់តាមលោកភ្ញាក់ផ្អើល ហើយស្ទើរតែមិនជឿថាជាលោក! លោកយេស៊ូបានសួរថា៖ «ហេតុអ្វីក៏បែរជាសង្ស័យក្នុងចិត្ត? . . . បទគម្ពីរបានចែងដូច្នេះថា គ្រិស្តនឹងរងទុក្ខ រួចនៅថ្ងៃទីបីលោកនឹងរស់ឡើងវិញពីចំណោមមនុស្សស្លាប់»។—លូកា ២៤:៣៨, ៤៦
ក្រោយពីលោកយេស៊ូបានត្រូវប្រោសឲ្យរស់ឡើងវិញ នោះលោកបានលេចមកឲ្យពួកអ្នកកាន់តាមឃើញនៅពេលផ្សេងៗអស់៤០ថ្ងៃ។ ក្នុងពេលមួយ លោកបានលេចមកឲ្យពួកអ្នកកាន់តាម៥០០នាក់ឃើញ! ទំនងជាពេលនេះហើយ ដែលលោកឲ្យពួកគាត់នូវភារកិច្ចដ៏សំខាន់នេះថា៖ «ចូរទៅបង្រៀនមនុស្សគ្រប់ជាតិសាសន៍ឲ្យក្លាយទៅជាអ្នកកាន់តាមខ្ញុំ . . . ហើយបង្រៀនពួកគេឲ្យកាន់តាមអ្វីៗទាំងអស់ដែលខ្ញុំបានបង្គាប់អ្នករាល់គ្នា។ មើល! ខ្ញុំនៅជាមួយនឹងអ្នករាល់គ្នាជារៀងរាល់ថ្ងៃ រហូតដល់គ្រាចុងបញ្ចប់នៃរបៀបរបបពិភពលោកនេះ»។—ម៉ាថាយ ២៨:១៩, ២០
នៅជំនួបចុងក្រោយជាមួយនឹងពួកសាវ័កស្មោះត្រង់១១នាក់ នោះលោកយេស៊ូបានសន្យាថា៖ «អ្នករាល់គ្នានឹងទទួលឫទ្ធានុភាព កាលដែលសកម្មពលបរិសុទ្ធរបស់ព្រះមកសណ្ឋិតលើអ្នករាល់គ្នា ហើយអ្នករាល់គ្នានឹងធ្វើជាសាក្សីបញ្ជាក់អំពីខ្ញុំ . . . រហូតដល់កន្លែងឆ្ងាយបំផុតនៅផែនដី»។ (សកម្មភាព ១:៨) រួចមក លោកយេស៊ូបានត្រូវលើកឡើង ហើយពពកមួយបានមកបាំងលោកបាត់ពីភ្នែកពួកគាត់ទៅ កាលដែលលោកបានឡើងទៅស្ថានសួគ៌។
—មានមូលដ្ឋានលើសៀវភៅម៉ាថាយ ជំពូកទី២៨ ម៉ាកុស ជំពូកទី១៦ លូកា ជំពូកទី២៤ យ៉ូហាន ជំពូកទី២០និង២១ កូរិនថូសទី១ ១៥:៥, ៦។
a ដើម្បីមើលទំនាយខ្លះៗស្តីអំពីមេស្ស៊ីដែលបានត្រូវសម្រេចដោយលោកយេស៊ូ សូមមើលភាគ១៤ ភាគ១៥ និងភាគ១៦នៃសៀវភៅនេះ និងលេខ៥ក្នុងកំណត់នៅចុងនៃសៀវភៅតើគម្ពីរអាចបង្រៀនយើងអំពីអ្វី?