មេរៀនទី៧
តើកូនធ្លាប់ភ័យខ្លាចនិងមានអារម្មណ៍ឯកោឬទេ?
សូមមើលក្មេងប្រុសក្នុងរូបភាពនេះ។ មើលទៅគាត់ភ័យខ្លាចហើយមានអារម្មណ៍ឯកោណាស់ មែនទេ? តើកូនធ្លាប់មានអារម្មណ៍ដូច្នេះទេ?— ជួនកាលយើងទាំងអស់គ្នាមានអារម្មណ៍ដូច្នេះមែន។ គម្ពីរប្រាប់អំពីមនុស្សខ្លះដែលជាមិត្តរបស់ព្រះយេហូវ៉ា ហើយពួកគេក៏ភ័យខ្លាចនិងមានអារម្មណ៍ឯកោដែរ។ ក្នុងចំណោមនោះគឺអេលីយ៉ា។ សូមឲ្យយើងរៀនអំពីគាត់។
យេសិបិលចង់សម្លាប់អេលីយ៉ា
អេលីយ៉ាធ្លាប់រស់នៅអ៊ីស្រាអែលយូរឆ្នាំ មុនលោកយេស៊ូបានកើត។ អ័ហាប់ជាស្តេចរបស់ប្រទេសអ៊ីស្រាអែល។ គាត់មិនគោរពប្រណិប័តន៍ព្រះយេហូវ៉ាជាព្រះពិតទេ។ អ័ហាប់និងយេសិបិលដែលជាប្រពន្ធរបស់គាត់ គោរពបូជាព្រះបាលជាព្រះមិនពិត។ ដូច្នេះ មនុស្សភាគច្រើននៅប្រទេសអ៊ីស្រាអែលក៏បានចាប់ផ្ដើមគោរពបូជាព្រះបាលដែរ។ មហាក្សត្រីយេសិបិលជាមនុស្សកាចសាហាវខ្លាំងណាស់ ហើយនាងចង់សម្លាប់អ្នកបម្រើទាំងអស់របស់ព្រះយេហូវ៉ា រួមទាំងអេលីយ៉ាដែរ! តើអេលីយ៉ាបានធ្វើយ៉ាងណា? តើកូនដឹងទេ?—
អេលីយ៉ាបានរត់គេចខ្លួន! គាត់បានរត់ទៅឆ្ងាយរហូតដល់តំបន់ដែលមានតែវាលខ្សាច់ ហើយពួននៅក្នុងរូងភ្នំ។ ហេតុអ្វីគាត់ធ្វើដូច្នេះ? តើកូនគិតយ៉ាងណា?— ពិតមែន ដោយសារគាត់ខ្លាច។ ក៏ប៉ុន្តែ តាមពិតអេលីយ៉ាមិនចាំបាច់ខ្លាចទេ។ ហេតុអ្វី? ពីព្រោះគាត់ដឹងថាព្រះយេហូវ៉ាអាចជួយគាត់បាន។ ព្រះយេហូវ៉ាធ្លាប់បង្ហាញកម្លាំងខ្លាំងក្លារបស់លោកឲ្យអេលីយ៉ាឃើញរួចហើយ។ មានពេលមួយ ព្រះយេហូវ៉ាបានតបឆ្លើយសេចក្ដីអធិដ្ឋានរបស់អេលីយ៉ា ដោយធ្វើឲ្យមានភ្លើងធ្លាក់ពីស្ថានសួគ៌។ ដូច្នេះ ព្រះយេហូវ៉ាប្រាកដជាអាចជួយគាត់នៅលើកនេះដែរ!
តើព្រះយេហូវ៉ាបានជួយអេលីយ៉ាយ៉ាងដូចម្ដេច?
ពេលអេលីយ៉ានៅក្នុងរូងភ្នំ ព្រះយេហូវ៉ាបានសួរគាត់ថា៖ ‹តើអ្នកធ្វើអ្វីនៅទីនេះ?›។ អេលីយ៉ាបានឆ្លើយថា៖ ‹មានតែខ្ញុំម្នាក់ទេដែលនៅគោរពប្រណិប័តន៍លោក ហើយខ្ញុំខ្លាចពីព្រោះគេក៏ចង់សម្លាប់ខ្ញុំដែរ›។ អេលីយ៉ាបានគិតថា គេសម្លាប់មនុស្សដែលគោរពប្រណិប័តន៍ព្រះយេហូវ៉ាអស់ហើយ។ ប៉ុន្តែ ព្រះយេហូវ៉ាបានប្រាប់អេលីយ៉ាថា៖ ‹មិនពិតទេ! មានមនុស្ស៧.០០០នាក់ទៀតដែលនៅគោរពប្រណិប័តន៍ខ្ញុំ។ ដូច្នេះ ចូរមានចិត្តក្លាហានចុះ! ខ្ញុំឲ្យកិច្ចការថែមទៀតដល់អ្នក!›។ ពេលឮដូច្នេះ តើកូនគិតថាអេលីយ៉ាសប្បាយចិត្តទេ?—
តើកូនអាចរៀនអ្វីពីរឿងរបស់អេលីយ៉ា?— កូនមិនបាច់ភ័យខ្លាចនិងមានអារម្មណ៍ឯកោទេ ពីព្រោះកូនមានមិត្តភក្ដិដែលស្រឡាញ់ព្រះយេហូវ៉ា ហើយមិត្តទាំងនោះស្រឡាញ់កូន។ ម្យ៉ាងទៀត ព្រះយេហូវ៉ាមានកម្លាំងខ្លាំងក្លាណាស់ ហើយលោកមុខជាជួយកូនជានិច្ច! ដោយដឹងថាព្រះយេហូវ៉ានឹងជួយកូន តើកូនសប្បាយចិត្តទេ?—