មេរៀនទី១០
លោកយេស៊ូតែងតែស្ដាប់បង្គាប់
តើកូនស្រួលធ្វើតាមបង្គាប់របស់ឪពុកម្ដាយទេ?— ជួនកាលការធ្វើដូច្នេះពិបាកមែន។ លោកយេស៊ូបានស្ដាប់បង្គាប់ព្រះយេហូវ៉ានិងឪពុកម្ដាយរបស់លោក តើកូនដឹងអំពីរឿងនេះទេ?— គំរូរបស់លោកអាចជួយកូនឲ្យស្ដាប់បង្គាប់ឪពុកម្ដាយ ទោះជាពិបាកក៏ដោយ។ សូមយើងរៀនថែមទៀតអំពីរឿងនេះ។
មុនលោកយេស៊ូមកផែនដី លោករស់នៅជាមួយព្រះយេហូវ៉ាជាបិតានៅស្ថានសួគ៌។ ប៉ុន្តែលោកយេស៊ូក៏មានឪពុកម្ដាយនៅផែនដីដែរ។ ពួកគាត់ឈ្មោះយ៉ូសែបនិងម៉ារៀ។ តើតាមរបៀបណាពួកគាត់បានទៅជាឪពុកម្ដាយរបស់លោក? តើកូនដឹងទេ?—
ព្រះយេហូវ៉ាបានយកជីវិតរបស់លោកយេស៊ូនៅស្ថានសួគ៌ ហើយដាក់ក្នុងផ្ទៃរបស់ម៉ារៀ ដើម្បីឲ្យលោកយេស៊ូអាចកើតជាមនុស្សនិងរស់នៅផែនដី។ នេះជាការអស្ចារ្យមួយ! លោកយេស៊ូបានធំលូតលាស់ក្នុងផ្ទៃរបស់ម៉ារៀដូចកូនផ្សេងទៀតដែរ។ ប្រហែល៩ខែក្រោយមក លោកយេស៊ូបានកើតមក។ នេះជារបៀបដែលម៉ារៀនិងយ៉ូសែបជាប្ដីរបស់នាងបានទៅជាឪពុកម្ដាយរបស់លោកយេស៊ូនៅផែនដី។
ពេលលោកយេស៊ូអាយុតែ១២ឆ្នាំ លោកបានធ្វើអ្វីមួយដែលបង្ហាញថាលោកស្រឡាញ់ព្រះយេហូវ៉ាជាបិតារបស់លោកខ្លាំងណាស់។ នេះបានកើតឡើងនៅពេលលោកយេស៊ូនិងក្រុមគ្រួសាររបស់លោកធ្វើដំណើរយ៉ាងឆ្ងាយទៅក្រុងយេរូសាឡិម ដើម្បីចូលរួមបុណ្យរំលង ដែលរំលឹកអំពីការរំដោះប្រជាជនអ៊ីស្រាអែលពីស្រុកអេស៊ីប។ នៅតាមផ្លូវពេលធ្វើដំណើរត្រឡប់មកវិញ យ៉ូសែបនិងម៉ារៀរកលោកយេស៊ូនៅគ្រប់កន្លែង តែមិនឃើញទេ។ តើកូនដឹងថាលោកទៅណាទេ?—
ហេតុអ្វីលោកយេស៊ូនៅក្នុងវិហារ?
យ៉ូសែបនិងម៉ារៀប្រញាប់ត្រឡប់ទៅក្រុងយេរូសាឡិមវិញ ហើយរកលោកយេស៊ូនៅគ្រប់កន្លែង។ ពួកគាត់បារម្ភយ៉ាងខ្លាំងដោយសាររកលោកមិនឃើញសោះ។ ប៉ុន្តែ បីថ្ងៃក្រោយមក ពួកគាត់បានរកឃើញលោកនៅក្នុងវិហារ។ ហេតុអ្វីលោកយេស៊ូនៅក្នុងវិហារ? តើកូនដឹងទេ?— ពីព្រោះនៅទីនោះលោកអាចរៀនអំពីព្រះយេហូវ៉ាជាបិតារបស់លោក។ លោកស្រឡាញ់ព្រះយេហូវ៉ា ហើយចង់រៀនអំពីរបៀបធ្វើឲ្យព្រះយេហូវ៉ាពេញចិត្ត។ សូម្បីតែពេលលោកយេស៊ូបានធំឡើង ហើយទៅជាបុរសពេញវ័យម្នាក់ក្ដី លោកតែងតែស្ដាប់បង្គាប់ព្រះយេហូវ៉ា។ ទោះជាអ្វីដែលព្រះយេហូវ៉ាបង្គាប់គឺពិបាកចំពោះលោក ហើយតម្រូវឲ្យរងទុក្ខក៏ដោយ តែលោកយេស៊ូនៅតែស្ដាប់បង្គាប់។ តើលោកយេស៊ូស្ដាប់បង្គាប់យ៉ូសែបនិងម៉ារៀទេ?— គម្ពីរចែងថាលោកបានស្ដាប់បង្គាប់មែន។
តើកូនអាចរៀនមេរៀនអ្វីពីគំរូរបស់លោកយេស៊ូ?— ទោះជាពិបាកក៏ដោយ កូនត្រូវស្ដាប់បង្គាប់ឪពុកម្ដាយ។ តើកូននឹងធ្វើដូច្នេះទេ?—