សេចក្ដីសន្យារបស់រាជាណាចក្រព្រះ: ការធ្វើអ្វីៗទាំងអស់ថ្មី

អ្នកលូកដៃទៅបេះផ្លែប៉ោមទុំមួយ ហិតក្លិនឈ្ងុយរបស់វាមួយភ្លែត រួចដាក់នៅក្នុងកន្ត្រកជាមួយនឹងផ្លែប៉ោមជាច្រើនទៀតដែលអ្នកបានបេះ។ អ្នកបេះផ្លែប៉ោមជាច្រើនម៉ោងហើយ ប៉ុន្តែអ្នកនៅតែមានកម្លាំងហើយចង់បេះតទៅទៀត។ ម្ដាយរបស់អ្នកនៅជិតដើមប៉ោមមួយទៀត។ គាត់កំពុងជជែកគ្នាយ៉ាងសប្បាយជាមួយនឹងសមាជិកក្រុមគ្រួសារឯទៀតនិងមិត្តភក្ដិដែលកំពុងជួយប្រមូលផលផ្លែនោះដែរ។ គាត់មើលទៅក្មេងណាស់ ដូចអ្នកចាំពីកាលដែលអ្នកនៅក្មេងនៅឡើយ។ អ្នកពិបាកជឿថាអ្នកធ្លាប់ឃើញគាត់ចាស់ទៅៗក្នុងពិភពលោកដែលបានកន្លងបាត់ទៅហើយនោះ។ អ្នកបានឃើញគាត់ដុនដាបទៅៗដោយសារជំងឺ ក៏បានកាន់ដៃរបស់គាត់កាលដែលគាត់ផុតដង្ហើម ហើយបានយំពេលដែលគេបញ្ចុះសពគាត់។ តែឥឡូវនេះ មើល! គាត់កំពុងរស់នៅទាំងមានសុខភាពល្អជាមួយនឹងមនុស្សជាច្រើនទៀត!

យើងដឹងប្រាកដថានឹងមានគ្រាបែបនោះមែន។ យើងដឹងប្រាកដដោយសារព្រះតែងតែធ្វើតាមសន្យារបស់លោក។ ក្នុងផ្នែកនេះយើងនឹងពិចារណាអំពីសេចក្ដីសន្យាខ្លះរបស់រាជាណាចក្រព្រះដែលនឹងកើតឡើងមិនយូរទៀត ដោយនាំទៅដល់សង្គ្រាមហាម៉ាគេដូន។ យើងក៏នឹងពិចារណាអំពីសេចក្ដីសន្យាខ្លះដ៏គួរឲ្យរំភើបចិត្តដែលនឹងកើតឡើងក្រោយពីនោះ។ យើងពិតជានឹងរីករាយណាស់ពេលឃើញរាជាណាចក្រព្រះគ្រប់គ្រងផែនដីទាំងមូល ហើយធ្វើអ្វីៗទាំងអស់ថ្មី!