ជំពូកទី១១
យ៉ូហានដែលជាអ្នកជ្រមុជទឹករៀបចំផ្លូវ
ម៉ាថាយ ៣:១-១២ ម៉ាកុស ១:១-៨ លូកា ៣:១-១៨ យ៉ូហាន ១:៦-៨, ១៥-២៨
យ៉ូហានមកក្នុងនាមជាអ្នកផ្សព្វផ្សាយនិងជាអ្នកជ្រមុជទឹក
មនុស្សជាច្រើនបានទទួលការជ្រមុជទឹក តែមិនមែនទាំងអស់នោះទេ
ប្រហែលជា១៧ឆ្នាំបានកន្លងផុតទៅ តាំងពីកុមារយេស៊ូមានអាយុ១២ឆ្នាំ បានសួរសំណួរពួកគ្រូនៅឯវិហារ។ ឥឡូវជិតខែមេសា ឆ្នាំ២៩ គ.ស. ហើយមនុស្សជាច្រើនកំពុងនិយាយអំពីយ៉ូហានដែលជាសាច់ញាតិរបស់លោកយេស៊ូ។ គាត់កំពុងផ្សព្វផ្សាយគ្រប់ទីកន្លែងនៅតំបន់ខាងលិចនៃទន្លេយ៉ូដាន់។
យ៉ូហានគឺជាបុរសដ៏គួរឲ្យចាប់អារម្មណ៍ ទាំងការស្លៀកពាក់ ទាំងពាក្យសម្ដីផងដែរ។ គាត់មានសម្លៀកបំពាក់ធ្វើពីរោមអូដ្ឋ ឯខ្សែក្រវាត់ធ្វើពីស្បែក ហើយអាហាររបស់គាត់គឺជាសត្វកណ្ដូបនិងទឹកឃ្មុំព្រៃ។ តើគាត់កំពុងផ្សាយអំពីអ្វី? គាត់ផ្សាយថា៖ «ចូរប្រែចិត្ត ពីព្រោះរាជាណាចក្រស្ថានសួគ៌គឺជិតដល់ហើយ»។—ម៉ាថាយ ៣:២
ដំណឹងរបស់យ៉ូហានធ្វើឲ្យអ្នកដែលមកស្ដាប់គាត់រំភើបចិត្ត។ មនុស្សជាច្រើនទទួលស្គាល់ថាពួកគេត្រូវប្រែចិត្ត ពោលគឺផ្លាស់ប្ដូរចិត្តគំនិតនិងការប្រព្រឹត្តរបស់ពួកគេ ហើយលែងពេញចិត្តនឹងរបៀបរស់នៅដែលពួកគេធ្លាប់មាននៅអតីតកាល។ អ្នកដែលមកស្ដាប់យ៉ូហាន ពួកគេមកពី‹ក្រុងយេរូសាឡិម និងតំបន់យូឌា ព្រមទាំងតំបន់ជនបទក្បែរទន្លេយ៉ូដាន់›។ (ម៉ាថាយ ៣:៥) មនុស្សជាច្រើនដែលចេញមកជួបយ៉ូហានបានប្រែចិត្តមែន ហើយគាត់បានជ្រមុជទឹកឲ្យពួកគេនៅឯទន្លេយ៉ូដាន់។ ហេតុអ្វីគាត់ធ្វើដូច្នេះ?
យ៉ូហានជ្រមុជទឹកឲ្យបណ្ដាជន ជាតំណាងថាពួកគេទទួលស្គាល់ថាខ្លួនបានធ្វើខុសកិច្ចព្រមព្រៀងខាងច្បាប់របស់ព្រះ ហើយថាខ្លួនត្រូវប្រែចិត្តយ៉ាងស្មោះ។ (សកម្មភាព ១៩:៤) ទោះជាយ៉ាងនោះក្ដី មនុស្សខ្លះគ្មានគុណសម្បត្ដិគ្រប់គ្រាន់ដើម្បីទទួលការជ្រមុជទឹកឡើយ។ ជាឧទាហរណ៍ ពេលពួកអ្នកដឹកនាំសាសនាខ្លះ គឺពួកផារិស៊ីនិងពួកសាឌូស៊ីមកកន្លែងជ្រមុជទឹកនោះ យ៉ូហានហៅពួកគេថា៖ «ពូជពស់មានពិស»។ បន្ថែមទៀត គាត់និយាយថា៖ «ចូរប្រព្រឹត្តយ៉ាងណាដែលបង្ហាញថាអ្នកបានប្រែចិត្តចុះ ហើយកុំអាងថា៖ ‹អាប្រាហាំជាឪពុករបស់យើង› ព្រោះខ្ញុំប្រាប់អ្នករាល់គ្នាថា ព្រះអាចបង្កើតកូនឲ្យអាប្រាហាំពីដុំថ្មទាំងនេះបាន។ ពូថៅនៅគល់ឈើស្រាប់ហើយ។ ដូច្នេះ ដើមឈើណាដែលមិនបង្កើតផលល្អនឹងត្រូវកាប់ចោល ហើយបោះទៅក្នុងភ្លើង»។—ម៉ាថាយ ៣:៧-១០
មនុស្សជាច្រើនស្គាល់យ៉ូហាន ដោយសារអ្វីដែលគាត់ផ្សាយមានឥទ្ធិពលខ្លាំងទៅលើចិត្តពួកគេ ហើយគាត់កំពុងជ្រមុជទឹកឲ្យមនុស្សជាច្រើន។ ដូច្នេះ ជនជាតិយូដាបានចាត់ពួកសង្ឃនិងពួកលេវីឲ្យទៅសួរយ៉ូហានថា៖ «តើអ្នកជាអ្នកណា?»។
យ៉ូហានឆ្លើយត្រង់ថា៖ «ខ្ញុំមិនមែនជាគ្រិស្តទេ»។
ពួកគេសួរទៀតថា៖ «បើដូច្នេះ តើអ្នកជាអ្នកណាវិញ? អេលីយ៉ាឬ?»។
គាត់ឆ្លើយថា៖ «ខ្ញុំមិនមែនជាអេលីយ៉ាទេ»។
ពួកគេក៏សួរថែមទៀតថា៖ «តើអ្នកជាអ្នកប្រកាសទំនាយដែលបានត្រូវសន្យាឬ?»។ ពួកគេសំដៅទៅលើអ្នកប្រកាសទំនាយដ៏អស្ចារ្យដែលម៉ូសេបាននិយាយថានឹងមក។—ចោទិយកថា ១៨:១៥, ១៨
យ៉ូហានឆ្លើយថា៖ «ទេ!»។
ពួកគេទទូចសួរថា៖ «តើអ្នកជាអ្នកណា? ចូរប្រាប់មក ដើម្បីយើងអាចប្រាប់អ្នកដែលបានចាត់យើងឲ្យមក។ តើអ្នកថាខ្លួនជាអ្នកណា?»។ យ៉ូហាននិយាយថា៖ «ខ្ញុំជាអ្នកដែលកំពុងស្រែកប្រកាសនៅតំបន់ស្ងាត់ជ្រងំថា៖ ‹ចូរធ្វើផ្លូវទទួលព្រះយេហូវ៉ាឲ្យត្រង់›ដូចអេសាយដែលជាអ្នកប្រកាសទំនាយបានប្រាប់»។—យ៉ូហាន ១:១៩-២៣
ម្ល៉ោះហើយ ពួកគេសួរថា៖ «ចុះហេតុអ្វីបានជាអ្នកជ្រមុជទឹកឲ្យគេដូច្នេះ បើអ្នកមិនមែនជាគ្រិស្ត ក៏មិនមែនជាអេលីយ៉ា ឬជាអ្នកប្រកាសទំនាយដែលបានត្រូវសន្យានោះ?»។ យ៉ូហានឆ្លើយថា៖ «ខ្ញុំជ្រមុជគេក្នុងទឹក។ នៅកណ្ដាលចំណោមអ្នករាល់គ្នា មានមនុស្សម្នាក់ដែលអ្នករាល់គ្នាមិនស្គាល់ គឺលោកដែលមកក្រោយខ្ញុំ»។—យ៉ូហាន ១:២៥-២៧
ពិតណាស់ យ៉ូហានទទួលស្គាល់ថាគាត់កំពុងរៀបចំផ្លូវ ពោលគឺជួយមនុស្សឲ្យមានចិត្តគំនិតត្រឹមត្រូវ ដើម្បីទទួលមេស្ស៊ីដែលបានត្រូវសន្យា ជាអ្នកដែលនឹងគ្រប់គ្រងជាស្តេច។ យ៉ូហាននិយាយអំពីមេស្ស៊ីថា៖ «លោកដែលនឹងមកក្រោយខ្ញុំ គឺខ្លាំងជាងខ្ញុំ។ ខ្ញុំមិនសមនឹងដោះស្បែកជើងជូនលោកឡើយ»។ (ម៉ាថាយ ៣:១១) តាមពិត យ៉ូហានថែមទាំងនិយាយថា៖ «លោកដែលមកក្រោយខ្ញុំបានទៅមុខខ្ញុំហើយ ពីព្រោះលោករស់នៅមុនខ្ញុំ»។—យ៉ូហាន ១:១៥
ដូច្នេះ ជាការសមត្រឹមត្រូវដែលយ៉ូហានផ្សាយថា៖ «ចូរប្រែចិត្ត ពីព្រោះរាជាណាចក្រស្ថានសួគ៌គឺជិតដល់ហើយ»។ (ម៉ាថាយ ៣:២) ដំណឹងនេះបញ្ជាក់ជាសាធារណៈថា កិច្ចបម្រើរបស់លោកយេស៊ូគ្រិស្តដែលព្រះយេហូវ៉ានឹងតែងតាំងជាស្តេច គឺហៀបនឹងចាប់ផ្ដើមហើយ។