ជំពូកទី២០
អព្ភូតហេតុទី២នៅភូមិកាណា
ម៉ាកុស ១:១៤, ១៥ លូកា ៤:១៤, ១៥ យ៉ូហាន ៤:៤៣-៥៤
លោកយេស៊ូផ្សព្វផ្សាយថា៖ «រាជាណាចក្ររបស់ព្រះគឺជិតដល់ហើយ»
លោកបានធ្វើឲ្យក្មេងប្រុសម្នាក់ជាពីចម្ងាយ
ក្រោយពីបានស្នាក់នៅតំបន់សាម៉ារីអស់ពីរថ្ងៃ លោកយេស៊ូបានបន្តដំណើរទៅស្រុកកំណើតរបស់លោក។ លោកបានចំណាយពេលផ្សព្វផ្សាយយ៉ាងយូរនៅតំបន់យូឌា។ បន្ទាប់មក លោកបានត្រឡប់ទៅស្រុកកាលីឡេជាស្រុកដែលលោកបានធំឡើង មិនមែនដើម្បីសម្រាកទេ តែគឺដើម្បីបង្កើនកិច្ចបម្រើផ្សាយ។ លោកយេស៊ូប្រហែលជាមិនបានរំពឹងថា មនុស្សនឹងពេញចិត្តទទួលលោកនៅទីនោះទេ ព្រោះដូចលោកបានមានប្រសាសន៍ថា៖ «អ្នកប្រកាសទំនាយមិនទទួលកិត្ដិយសនៅស្រុកកំណើតរបស់ខ្លួនឡើយ»។ (យ៉ូហាន ៤:៤៤) ពេលទៅដល់ទីនោះ ពួកអ្នកកាន់តាមលោកមិនបាននៅជាមួយនឹងលោកទេ។ ប៉ុន្តែ ពួកគាត់បានត្រឡប់ទៅផ្ទះជួបជុំក្រុមគ្រួសារ ហើយប្រកបមុខរបរដូចពីមុនវិញ។
តើលោកយេស៊ូចាប់ផ្ដើមផ្សព្វផ្សាយអំពីអ្វី? លោកផ្សព្វផ្សាយថា៖ «រាជាណាចក្ររបស់ព្រះគឺជិតដល់ហើយ។ ចូរប្រែចិត្ត ហើយមានជំនឿលើដំណឹងល្អចុះ!»។ (ម៉ាកុស ១:១៥) ពេលឮដំណឹងនេះ តើមនុស្សមានប្រតិកម្មយ៉ាងណា? មនុស្សជាច្រើននៅស្រុកកាលីឡេបានទទួលលោកយេស៊ូយ៉ាងរាក់ទាក់ ហើយលើកកិត្ដិយសលោក។ ពួកគេធ្វើដូច្នោះមិនមែនដោយសារតែដំណឹងដែលលោកបានផ្សព្វផ្សាយប៉ុណ្ណោះទេ តែដោយសារប៉ុន្មានខែមុននេះ អ្នកស្រុកកាលីឡេខ្លះបានទៅចូលរួមបុណ្យរំលងនៅក្រុងយេរូសាឡិម ហើយពួកគេបានឃើញការអស្ចារ្យជាច្រើនដែលលោកយេស៊ូបានធ្វើ។—យ៉ូហាន ២:២៣
តើនៅកន្លែងណាក្នុងស្រុកកាលីឡេដែលលោកយេស៊ូបានចាប់ផ្ដើមកិច្ចបម្រើផ្សាយ? ទំនងជានៅភូមិកាណាជាកន្លែងដែលលោកបានចូលរួមពិធីជប់លៀងអាពាហ៍ពិពាហ៍មួយ ហើយក្នុងពិធីនោះលោកបានធ្វើឲ្យទឹកក្លាយទៅជាស្រា។ ពេលដែលលោកទៅដល់ភូមិនោះជាលើកទី២ លោកបានឮអំពីក្មេងប្រុសម្នាក់កំពុងឈឺធ្ងន់ជិតស្លាប់។ ក្មេងនោះជាកូនប្រុសរបស់មន្ត្រីម្នាក់ ដែលបម្រើស្តេចហេរ៉ូឌ អាន់ទីប៉ាស ជាស្តេចដែលបានបញ្ជាឲ្យគេកាត់ក្បាលយ៉ូហាននៅពេលក្រោយមក។ ពេលដែលមន្ត្រីនេះឮថាលោកយេស៊ូបានចេញពីតំបន់យូឌាទៅភូមិកាណា គាត់ក៏ធ្វើដំណើរពីផ្ទះរបស់គាត់នៅក្រុងកាពើណិមទៅភូមិកាណាដែរ ដើម្បីរកលោកយេស៊ូ។ ពេលមន្ត្រីដែលកំពុងសោកសៅនេះបានជួបលោកយេស៊ូ គាត់អង្វរលោកថា៖ «លោកម្ចាស់ សូមចុះមកមុនកូនតូចរបស់ខ្ញុំស្លាប់»។—យ៉ូហាន ៤:៤៩
មន្ត្រីនោះច្បាស់ជាភ្ញាក់ផ្អើលខ្លាំងណាស់ពេលឮលោកយេស៊ូតបឆ្លើយថា៖ «អញ្ជើញទៅចុះ កូនប្រុសរបស់អ្នកបានជាឡើងវិញហើយ»។ (យ៉ូហាន ៤:៥០) មន្ត្រីនោះបានជឿលើប្រសាសន៍របស់លោកយេស៊ូ ហើយក៏ធ្វើដំណើរត្រឡប់ទៅផ្ទះវិញ។ នៅតាមផ្លូវ គាត់បានជួបខ្ញុំបម្រើរបស់គាត់ ដែលកំពុងរូតរះនាំដំណឹងល្អមកប្រាប់គាត់។ ដំណឹងនោះគឺថា កូនប្រុសរបស់គាត់បានជាសះស្បើយឡើងវិញហើយ! ពេលឮដូច្នោះ គាត់ក៏សួរពួកគេថា៖ ‹តើនៅពេលណាគាត់មានសុខភាពល្អឡើងវិញ?›។
ពួកគេឆ្លើយថា៖ «ម្សិលមិញ នៅម៉ោងទីប្រាំពីរ គ្រុនក៏បាត់ពីគាត់ទៅ»។—យ៉ូហាន ៤:៥២
មន្ត្រីនោះបានដឹងថា គឺនៅពេលនោះហើយដែលលោកយេស៊ូបានប្រាប់ថា៖ «កូនប្រុសរបស់អ្នកបានជាឡើងវិញ»។ ក្រោយមក មន្ត្រីស្តុកស្តម្ភនេះនិងក្រុមគ្រួសាររបស់គាត់ ព្រមទាំងខ្ញុំបម្រើទាំងអស់បានក្លាយទៅជាអ្នកកាន់តាមគ្រិស្ត។
ភូមិកាណាជាភូមិដែលលោកយេស៊ូបានធ្វើអព្ភូតហេតុពីរដង។ លើកទី១ លោកបានធ្វើឲ្យទឹកក្លាយទៅជាស្រា និងលើកទី២ លោកបានធ្វើឲ្យក្មេងប្រុសម្នាក់ជាពីចម្ងាយប្រហែលជា២៦គីឡូម៉ែត្រ។ តាមពិត លោកយេស៊ូបានធ្វើការអស្ចារ្យថែមទៀត។ ប៉ុន្តែ ការអស្ចារ្យលើកទី២នៅភូមិកាណាស្រុកកាលីឡេគឺគួរឲ្យកត់សម្គាល់ ដោយសារនេះបញ្ជាក់ថា លោកជាអ្នកប្រកាសទំនាយរបស់ព្រះ។ លោកច្បាស់ជាអ្នកប្រកាសទំនាយដែលព្រះពេញចិត្ត។ ក៏ប៉ុន្តែ តើ‹អ្នកប្រកាសទំនាយនេះនឹងទទួលកិត្ដិយសនៅស្រុកកំណើតរបស់ខ្លួន›ដល់កម្រិតណា?
សំណួរនេះនឹងត្រូវឆ្លើយ នៅពេលដែលលោកយេស៊ូធ្វើដំណើរឆ្ពោះទៅក្រុងណាសារ៉ែត។ តើលោកយេស៊ូនឹងធ្វើអ្វីនៅទីនោះ?