ជំពូកទី១៦
ចូរសម្រេចចិត្តគោរពប្រណិប័តន៍ព្រះតាមរបៀបត្រឹមត្រូវ
១, ២. តើអ្នកត្រូវសួរខ្លួនអ្នកនូវសំណួរអ្វី ហើយហេតុអ្វីសំណួរនេះសំខាន់?
តាមរយៈការសិក្សាគម្ពីរ អ្នកបានរៀនថាមនុស្សជាច្រើនអះអាងថាពួកគេជាអ្នកគោរពប្រណិប័តន៍ព្រះ តែតាមពិតអ្វីដែលពួកគេបង្រៀននិងប្រព្រឹត្ត គឺជាអ្វីដែលព្រះស្អប់ខ្ពើម។ (កូរិនថូសទី២ ៦:១៧) ហេតុនេះហើយបានជាព្រះយេហូវ៉ាបង្គាប់យើងឲ្យចេញពីសាសនាមិនពិតដែលជា«បាប៊ីឡូនដ៏ខ្លាំងក្លា»។ (ការបើកបង្ហាញ ១៨:២, ៤) តើអ្នកនឹងធ្វើតាមបង្គាប់នេះឬទេ? យើងម្នាក់ៗត្រូវសម្រេចចិត្តដោយខ្លួនឯង ហើយសួរខ្លួនអ្នកថា ‹តើខ្ញុំចង់គោរពប្រណិប័តន៍ព្រះតាមរបៀបដែលលោកចង់ឲ្យខ្ញុំធ្វើ ឬក៏តាមរបៀបដែលខ្ញុំតែងតែធ្វើវិញ?›។
២ បើអ្នកបានចាកចេញ ឬលុបឈ្មោះពីសាសនាមិនពិតហើយ នោះគឺជាការល្អណាស់។ ទោះជាយ៉ាងនេះក្ដី ក្នុងចិត្តរបស់អ្នកប្រហែលជានៅតែមានទំនៀមទម្លាប់និងការប្រព្រឹត្តខ្លះដែលមកពីសាសនាមិនពិត។ សូមឲ្យយើងពិនិត្យមើលការប្រព្រឹត្តនិងទំនៀមទម្លាប់ទាំងនោះ។ យើងក៏ពិចារណាដែរអំពីមូលហេតុសំខាន់ដែលយើងត្រូវមានទស្សនៈដូចព្រះយេហូវ៉ាចំពោះរឿងទាំងនោះ។
ការគោរពបូជារូបព្រះនិងដូនតា
៣. (ក) ហេតុអ្វីមនុស្សខ្លះប្រហែលជាពិបាកឈប់ប្រើរូបព្រះក្នុងការគោរពប្រណិប័តន៍របស់ពួកគេ? (ខ) តើគម្ពីរចែងយ៉ាងណាអំពីការប្រើរូបព្រះក្នុងការគោរពប្រណិប័តន៍?
៣ អស់ជាច្រើនឆ្នាំ មនុស្សខ្លះប្រើរូបព្រះនិងកន្លែងសម្រាប់ធ្វើសក្ការបូជា ឬអាសនៈក្នុងផ្ទះរបស់ពួកគេដើម្បីគោរពប្រណិប័តន៍ព្រះ។ តើអ្នកមានរបស់ទាំងនោះឬទេ? បើដូច្នេះមែន អ្នកប្រហែលជាមានអារម្មណ៍ថា គឺជាការចម្លែកឬមិនត្រឹមត្រូវទេ បើគ្មានរបស់ទាំងនោះក្នុងការគោរពប្រណិប័តន៍ព្រះ។ ប៉ុន្តែសូមចាំថា ព្រះយេហូវ៉ាបង្រៀនយើងអំពីរបៀបគោរពប្រណិប័តន៍លោក ហើយគម្ពីរក៏បានប្រាប់យ៉ាងច្បាស់ដែរថា ព្រះយេហូវ៉ាមិនចង់ឲ្យយើងប្រើរូបព្រះក្នុងការគោរពប្រណិប័តន៍លោកឡើយ។—សូមអាន និក្ខមនំ ២០:៤, ៥; ទំនុកតម្កើង ១១៥:៤-៨; អេសាយ ៤២:៨; យ៉ូហានទី១ ៥:២១
៤. (ក) ហេតុអ្វីយើងមិនគួរគោរពបូជាដូនតា? (ខ) ហេតុអ្វីព្រះយេហូវ៉ាប្រាប់រាស្ត្ររបស់លោកកុំឲ្យព្យាយាមទាក់ទងជាមួយនឹងមនុស្សស្លាប់?
៤ មនុស្សខ្លះប្រហែលជាខំប្រឹងចំណាយពេលវេលានិងកម្លាំងយ៉ាងច្រើន ដើម្បីផ្គាប់ចិត្តដូនតារបស់ពួកគេដែលបានស្លាប់ទៅ។ ជួនកាលពួកគេថែមទាំងគោរពបូជាដូនតាទៀតផង។ ប៉ុន្តែ យើងបានរៀនហើយថាអស់អ្នកដែលបានស្លាប់ទៅ មិនអាចជួយឬធ្វើបាបយើងបានឡើយ។ ក្រោយពីពួកគេស្លាប់ ពួកគេមិនរស់នៅកន្លែងណាផ្សេងទៀតទេ។ តាមពិត ការខំព្យាយាមទាក់ទងជាមួយនឹងមនុស្សស្លាប់គឺពិតជាគ្រោះថ្នាក់ណាស់ ពីព្រោះព័ត៌មានណាដែលហាក់ដូចជាមកពីមនុស្សស្លាប់ គឺមកពីពួកវិញ្ញាណកំណាចវិញ។ ហេតុនេះហើយបានជាព្រះយេហូវ៉ាបង្គាប់ជនជាតិអ៊ីស្រាអែលកុំឲ្យព្យាយាមទាក់ទងនឹងមនុស្សស្លាប់ ឬចូលរួមធ្វើអ្វីណាក៏ដោយដែលជាប់ទាក់ទងនឹងពួកវិញ្ញាណកំណាច (សូមមើលលេខ២៦និង៣១ក្នុងកំណត់នៅចុងសៀវភៅ)។—ចោទិយកថា ១៨:១០-១២
៥. តើអ្វីអាចជួយអ្នកឲ្យឈប់ប្រើរូបព្រះក្នុងការគោរពប្រណិប័តន៍ព្រះ ឬឈប់គោរពបូជាដូនតា?
៥ តើអ្វីអាចជួយអ្នកឲ្យឈប់ប្រើរូបព្រះក្នុងការគោរពប្រណិប័តន៍ព្រះ ឬឈប់គោរពបូជាដូនតា? អ្នកត្រូវអានគម្ពីរ ហើយរំពឹងគិតយ៉ាងយកចិត្តទុកដាក់អំពីទស្សនៈរបស់ព្រះយេហូវ៉ាចំពោះរឿងទាំងនោះ។ លោកចាត់ទុករបស់ទាំងនោះថា«ជាទីស្អប់ខ្ពើម»។ (ចោទិយកថា ២៧:១៥) សូមអធិដ្ឋានទៅព្រះយេហូវ៉ារាល់ថ្ងៃ ដើម្បីសុំលោកជួយអ្នកឲ្យមានទស្សនៈដូចលោក និងឲ្យគោរពប្រណិប័តន៍លោកតាមរបៀបដែលលោកចង់ឲ្យអ្នកធ្វើ។ (អេសាយ ៥៥:៩) អ្នកអាចជឿជាក់ថាព្រះយេហូវ៉ានឹងផ្ដល់ឲ្យអ្នកមានកម្លាំងដែលអ្នកត្រូវការ ដើម្បីអ្នកអាចលះចោលនូវអ្វីណាក៏ដោយដែលជាប់ទាក់ទងនឹងការគោរពប្រណិប័តន៍មិនពិត។
តើយើងគួរធ្វើបុណ្យណូអែលឬទេ?
៦. ហេតុអ្វីបានជាគេជ្រើសរើសថ្ងៃទី២៥ ខែធ្នូ ធ្វើជាថ្ងៃខួបកំណើតលោកយេស៊ូ?
៦ នៅទូទាំងពិភពលោក បុណ្យណូអែលគឺជាបុណ្យមួយដែលគេពេញនិយមបំផុត។ មនុស្សភាគច្រើនគិតថានោះគឺជាបុណ្យសម្រាប់រំលឹកថ្ងៃកំណើតរបស់លោកយេស៊ូ។ ក៏ប៉ុន្តែ តាមពិតបុណ្យណូអែលគឺជាប់ទាក់ទងនឹងការគោរពប្រណិប័តន៍មិនពិត។ សព្វវចនាធិប្បាយមួយពន្យល់ថាជនជាតិរ៉ូមដែលមិនកាន់គ្រិស្តសាសនាបានធ្វើបុណ្យខួបកំណើតព្រះអាទិត្យនៅថ្ងៃទី២៥ ខែធ្នូ។ ពួកអ្នកដឹកនាំពិភពគ្រិស្តសាសនាចង់ឲ្យមនុស្សជាច្រើនដែលមិនកាន់គ្រិស្តសាសនា ក្លាយទៅជាអ្នកកាន់គ្រិស្តសាសនាវិញ។ ដូច្នេះ ទោះជាលោកយេស៊ូមិនបានកើតនៅថ្ងៃទី២៥ ខែធ្នូក៏ដោយ ក៏ពួកគេសម្រេចចិត្តធ្វើបុណ្យខួបកំណើតលោកយេស៊ូនៅថ្ងៃនោះដែរ។ (លូកា ២:៨-១២) ប៉ុន្តែ ពួកអ្នកកាន់តាមលោកយេស៊ូមិនធ្វើបុណ្យណូអែលទេ។ សៀវភៅមួយពន្យល់ថា ក្នុងរយៈពេល២០០ឆ្នាំក្រោយពីលោកយេស៊ូបានកើតមក «គ្មានអ្នកណាដឹង និងមិនសូវមានអ្នកណាចាប់អារម្មណ៍ថាលោកបានកើតមកនៅថ្ងៃណាខែណានោះឡើយ» (Sacred Origins of Profound Things)។ អស់រាប់រយឆ្នាំក្រោយពីលោកយេស៊ូលែងនៅផែនដី មនុស្សចាប់ផ្ដើមធ្វើបុណ្យណូអែល។
៧. ហេតុអ្វីគ្រិស្តសាសនិកពិតមិនធ្វើបុណ្យណូអែល?
៧មនុស្សជាច្រើនដឹងថាបុណ្យណូអែលមានដើមកំណើតមកពីអ្នកមិនកាន់គ្រិស្តសាសនា។ ទំនៀមទម្លាប់ក្នុងបុណ្យនោះរួមមានពិធីជប់លៀងនិងការឲ្យអំណោយគ្នាជាដើម។ ជាឧទាហរណ៍ កាលពីមុននៅប្រទេសអង់គ្លេសនិងតំបន់ខ្លះក្នុងប្រទេសអាម៉េរិកបានហាមធ្វើបុណ្យណូអែល ពីព្រោះបុណ្យនោះមានដើមកំណើតមកពីពួកអ្នកដែលមិនកាន់គ្រិស្តសាសនា។ អ្នកណាដែលធ្វើបុណ្យនោះនឹងត្រូវដាក់ទោស។ យ៉ាងណាក្ដី នៅទីបំផុតមនុស្សចាប់ផ្ដើមធ្វើបុណ្យណូអែលម្ដងទៀត។ ហេតុអ្វីបានជាគ្រិស្តសាសនិកពិតមិនធ្វើបុណ្យណូអែល? ដោយសារពួកគេចង់ធ្វើអ្វីៗទាំងអស់ដែលព្រះពេញចិត្ត។
តើយើងគួរធ្វើបុណ្យខួបកំណើតឬទេ?
៨, ៩. ហេតុអ្វីគ្រិស្តសាសនិកនៅសម័យដើមមិនធ្វើបុណ្យខួបកំណើត?
៨ បុណ្យមួយទៀតដែលមនុស្សជាច្រើនពេញនិយម គឺបុណ្យខួបកំណើត។ តើគ្រិស្តសាសនិកគួរធ្វើបុណ្យខួបកំណើតឬទេ? បុណ្យខួបកំណើតដែលគម្ពីរបានរៀបរាប់ គឺបានត្រូវធ្វើឡើងដោយអ្នកដែលមិនគោរពប្រណិប័តន៍ព្រះយេហូវ៉ា។ (លោកុប្បត្តិ ៤០:២០; ម៉ាកុស ៦:២១) ម្យ៉ាងទៀត បុណ្យខួបកំណើតបានត្រូវធ្វើឡើងដើម្បីលើកតម្កើងព្រះមិនពិត។ នេះជាមូលហេតុដែលគ្រិស្តសាសនិកនៅសម័យដើម«បានចាត់ទុកថាការធ្វើបុណ្យខួបកំណើតរបស់មនុស្សណាម្នាក់ ជាទំនៀមទម្លាប់របស់អ្នកដែលមិនជឿគ្រិស្តសាសនា» (The World Book Encyclopedia)។
៩ នៅសម័យបុរាណជនជាតិរ៉ូមនិងជនជាតិក្រិចជឿថា មានវិញ្ញាណមួយរូបមានវត្តមាននៅពេលដែលមនុស្សម្នាក់កើតមក ហើយថាវិញ្ញាណនេះនឹងការពារអ្នកនោះអស់មួយជីវិត។ សៀវភៅមួយប្រាប់ថា៖ «វិញ្ញាណនោះមានទំនាក់ទំនងអាថ៌កំបាំងជាមួយនឹងព្រះណាដែលមានខួបកំណើតនៅចំថ្ងៃដែលមនុស្សម្នាក់ៗកើតមក» (The Lore of Birthdays)។
១០. ហេតុអ្វីគ្រិស្តសាសនិកនៅសព្វថ្ងៃនេះមិនគួរធ្វើបុណ្យខួបកំណើត?
១០ តើអ្នកគិតថាព្រះយេហូវ៉ាពេញចិត្តនឹងបុណ្យផ្សេងៗដែលទាក់ទងនឹងសាសនាមិនពិតឬ? (អេសាយ ៦៥:១១, ១២) លោកមិនពេញចិត្តទេ។ នេះជាមូលហេតុដែលយើងមិនធ្វើបុណ្យខួបកំណើត ឬបុណ្យណាក៏ដោយដែលទាក់ទងនឹងសាសនាមិនពិត។
តើនេះពិតជាសំខាន់ឬទេ?
១១. ហេតុអ្វីមនុស្សខ្លះធ្វើបុណ្យផ្សេងៗ? តើអ្វីគួរសំខាន់បំផុតចំពោះអ្នក?
១១ មនុស្សខ្លះទទួលស្គាល់ថាបុណ្យណូអែលនិងបុណ្យផ្សេងទៀតមានដើមកំណើតមកពីអ្នកមិនកាន់គ្រិស្តសាសនា ប៉ុន្តែពួកគេនៅតែបន្តធ្វើបុណ្យទាំងនោះ។ ហេតុអ្វី? ពីព្រោះពួកគេមានអារម្មណ៍ថាបុណ្យទាំងនោះគឺជាឱកាសល្អឲ្យពួកគេចំណាយពេលជាមួយនឹងក្រុមគ្រួសារ។ តើអ្នកមានអារម្មណ៍ដូច្នេះដែរឬ? តាមពិតគឺមិនខុសទេដែលអ្នកចង់ចំណាយពេលជាមួយនឹងក្រុមគ្រួសាររបស់អ្នក ដោយសារព្រះយេហូវ៉ាជាអ្នកផ្ដើមឲ្យមានក្រុមគ្រួសារ ដូច្នេះលោកចង់ឲ្យយើងមានទំនាក់ទំនងល្អជាមួយនឹងក្រុមគ្រួសាររបស់យើង។ (អេភេសូរ ៣:១៤, ១៥) យ៉ាងណាមិញ យើងត្រូវផ្ដោតអារម្មណ៍ទៅលើការមានចំណងមិត្តភាពល្អជាមួយនឹងព្រះយេហូវ៉ា ជាជាងធ្វើឲ្យសាច់ញាតិពេញចិត្ត ដោយចូលរួមធ្វើបុណ្យសាសនាមិនពិត។ ហេតុនេះ សាវ័កប៉ូលនិយាយថា៖ «ចូរពិចារណាជានិច្ចដើម្បីឲ្យដឹងប្រាកដអំពីអ្វីដែលលោកម្ចាស់ពេញចិត្ត»។—អេភេសូរ ៥:១០
១២. តើព្រះយេហូវ៉ាមិនពេញចិត្តនឹងបុណ្យបែបណា?
១២ មនុស្សជាច្រើនមានអារម្មណ៍ថាដើមកំណើតនៃបុណ្យណាមួយគឺមិនសំខាន់ទេ។ ប៉ុន្តែ ចំពោះព្រះយេហូវ៉ាគឺសំខាន់ណាស់។ លោកមិនពេញចិត្តនឹងបុណ្យដែលមានដើមកំណើតមកពីការគោរពប្រណិប័តន៍មិនពិត ឬដែលលើកតម្កើងមនុស្ស ឬនិមិត្តរូបជាតិឡើយ។ ជាឧទាហរណ៍ ជនជាតិអេស៊ីបមានបុណ្យជាច្រើនសម្រាប់បណ្ដាព្រះមិនពិតរបស់ពួកគេ។ ក្រោយពីជនជាតិអ៊ីស្រាអែលបានត្រូវរំដោះចេញពីស្រុកអេស៊ីប ពួកគេបានធ្វើតាមបុណ្យមួយរបស់ជនជាតិអេស៊ីប ហើយដាក់ឈ្មោះថា«បុណ្យថ្វាយព្រះយេហូវ៉ា»។ ប៉ុន្តែ ព្រះយេហូវ៉ាបានដាក់ទោសពួកគេដោយសារពួកគេបានធ្វើបុណ្យនោះ។ (និក្ខមនំ ៣២:២-១០) ដូចអ្នកប្រកាសទំនាយអេសាយបានប្រាប់យើងថា៖ «កុំឲ្យពាល់របស់អ្វីដែលមិនស្អាតឡើយ»។—សូមអាន អេសាយ ៥២:១១
ចូរមានចិត្តសប្បុរសពេលពន្យល់អ្នកឯទៀតអំពីជំនឿរបស់អ្នក
១៣. ពេលដែលអ្នកសម្រេចចិត្តឈប់ធ្វើបុណ្យផ្សេងៗ តើអ្នកប្រហែលជាមានចម្ងល់អ្វីខ្លះ?
១៣ ពេលអ្នកសម្រេចចិត្តឈប់ធ្វើបុណ្យផ្សេងៗ អ្នកប្រហែលជាមានចម្ងល់ជាច្រើន។ ជាឧទាហរណ៍ អ្នកឆ្ងល់ថា តើខ្ញុំគួរនិយាយយ៉ាងណាបើអ្នករួមការងារសួរខ្ញុំអំពីមូលហេតុដែលខ្ញុំមិនធ្វើបុណ្យណូអែលជាមួយនឹងពួកគេ? តើខ្ញុំគួរធ្វើអ្វីបើអ្នកណាម្នាក់ឲ្យអំណោយបុណ្យណូអែលដល់ខ្ញុំ? តើខ្ញុំគួរធ្វើយ៉ាងណាបើគូអាពាហ៍ពិពាហ៍របស់ខ្ញុំតម្រូវឲ្យខ្ញុំធ្វើបុណ្យណាមួយ? តើតាមរបៀបណាខ្ញុំអាចជួយកូនខ្ញុំកុំឲ្យមានអារម្មណ៍ក្រៀមក្រំដោយសារតែមិនបានធ្វើបុណ្យខួបកំណើតឬបុណ្យផ្សេងទៀត?
១៤, ១៥. តើអ្នកអាចធ្វើយ៉ាងណាបើអ្នកណាម្នាក់ជូនពរអ្នក ឬជូនអំណោយឲ្យអ្នកក្នុងថ្ងៃបុណ្យ?
១៤ ជាការសំខាន់ណាស់ដែលអ្នកគិតពិចារណាដើម្បីអ្នកអាចដឹងអំពីរបៀបដែលអ្នកគួរនិយាយនិងគួរធ្វើក្នុងករណីនីមួយៗ។ ជាឧទាហរណ៍ បើមានគេជូនពរអ្នកនៅថ្ងៃបុណ្យ អ្នកមិនចាំបាច់ធ្វើមិនឮនោះទេ តែអ្នកអាចបង្ហាញការគួរសមដោយនិយាយថា៖ «អរគុណ»។ ចុះបើអ្នកណាម្នាក់ចង់ដឹងអំពីមូលហេតុដែលអ្នកមិនចូលរួមធ្វើបុណ្យណាមួយ? អ្នកអាចសម្រេចចិត្តពន្យល់គាត់អំពីមូលហេតុនោះ។ ទោះជាយ៉ាងណាក្ដី សូមនិយាយដោយគោរព ដោយមិនធ្វើឲ្យគេអន់ចិត្ត និងដោយសប្បុរសជានិច្ច។ គម្ពីរចែងថា៖ «ចូរឲ្យសម្ដីរបស់អ្នករាល់គ្នាប្រកបដោយភាពសប្បុរស ប្រៀបដូចជាបានត្រូវបង់អំបិល។ ធ្វើដូច្នេះ អ្នកនឹងដឹងថាគួរឆ្លើយដូចម្ដេចចំពោះមនុស្សម្នាក់ៗ»។ (កូឡុស ៤:៦) ប្រហែលជាអ្នកអាចពន្យល់គាត់ថាអ្នកចូលចិត្តចំណាយពេលជាមួយនឹងអ្នកឯទៀត ហើយជូនអំណោយគ្នា តែអ្នកចង់ធ្វើដូច្នោះនៅពេលផ្សេងទៀតដែលមិនចំថ្ងៃបុណ្យទាំងនោះ។
១៥ តើអ្នកគួរធ្វើយ៉ាងណាបើអ្នកណាម្នាក់ជូនអំណោយដល់អ្នក? គម្ពីរមិនមានច្បាប់ចែងក្នុងគ្រប់ករណីនោះទេ តែគម្ពីរចែងថាយើងគួររក្សាសមត្ថភាពវិនិច្ឆ័យដែលមិនផ្ដន្ទាទោស។ (ធីម៉ូថេទី១ ១:១៨, ១៩) ប្រហែលជាបុគ្គលម្នាក់ឲ្យអំណោយដល់អ្នក ដោយសារគាត់មិនបានដឹងថាអ្នកមិនធ្វើបុណ្យនោះឡើយ។ ឬមួយគាត់ប្រហែលជានិយាយថា៖ «ខ្ញុំដឹងថាអ្នកមិនធ្វើបុណ្យទេ តែខ្ញុំនៅតែចង់ឲ្យអំណោយនេះដល់អ្នក»។ ក្នុងករណីទាំងពីរនេះ អ្នកអាចសម្រេចចិត្តថាព្រមទទួលឬមិនព្រមទទួលអំណោយនោះ។ ក៏ប៉ុន្តែ ទោះជាអ្នកសម្រេចចិត្តបែបណាក៏ដោយ អ្នកត្រូវប្រាកដថាអ្នករក្សាសមត្ថភាពវិនិច្ឆ័យដែលមិនផ្ដន្ទាទោស។ យើងមិនចង់ធ្វើអ្វីណាមួយដែលជះឥទ្ធិពលមិនល្អមកលើចំណងមិត្តភាពរបស់យើងជាមួយនឹងព្រះយេហូវ៉ាឡើយ។
អ្នកនិងក្រុមគ្រួសាររបស់អ្នក
អស់អ្នកដែលបម្រើព្រះយេហូវ៉ា មានចិត្តសប្បាយរីករាយ
១៦. តើអ្នកគួរធ្វើអ្វីបើក្រុមគ្រួសារចង់ធ្វើបុណ្យផ្សេងៗ?
១៦ តើអ្នកគួរធ្វើអ្វីបើក្រុមគ្រួសារអ្នកចង់ធ្វើបុណ្យណាមួយ? អ្នកមិនចាំបាច់ឈ្លោះប្រកែកជាមួយនឹងពួកគាត់ទេ។ សូមចាំថា ពួកគាត់មានសិទ្ធិសម្រេចចិត្តធ្វើអ្វីណាក៏ដោយដែលពួកគាត់ចង់ធ្វើ។ ចូរមានចិត្តសប្បុរសនិងចេះគោរពចំពោះការសម្រេចចិត្តរបស់ពួកគាត់ ដូចដែលអ្នកចង់ឲ្យពួកគាត់គោរពការសម្រេចចិត្តរបស់អ្នកដែរ។ (សូមអាន ម៉ាថាយ ៧:១២) ប៉ុន្តែ បើក្រុមគ្រួសាររបស់អ្នកចង់ឲ្យអ្នកចំណាយពេលជាមួយនឹងពួកគាត់ក្នុងពេលមានបុណ្យទាន តើអ្នកគួរធ្វើអ្វី? មុនដែលអ្នកសម្រេចចិត្ត សូមអធិដ្ឋានទៅព្រះយេហូវ៉ាដើម្បីសុំលោកជួយអ្នកឲ្យធ្វើការសម្រេចចិត្តត្រឹមត្រូវ។ សូមចេះគិតពិចារណាអំពីស្ថានភាព ហើយស្វែងយល់ឲ្យដឹងអំពីបុណ្យនោះ។ សូមចាំថា អ្នកចង់ធ្វើឲ្យព្រះយេហូវ៉ាពេញចិត្តនឹងអ្នកជានិច្ច។
១៧. តើអ្នកអាចធ្វើអ្វីខ្លះដើម្បីជួយកូនមិនឲ្យមានអារម្មណ៍ថាពួកគេខានសប្បាយ ពេលដែលពួកគេឃើញអ្នកឯទៀតធ្វើបុណ្យផ្សេងៗ?
១៧ តើអ្នកអាចធ្វើអ្វីដើម្បីជួយកូនរបស់អ្នកពេលដែលពួកគេឃើញអ្នកឯទៀតធ្វើបុណ្យផ្សេងៗ? ម្ដងម្កាលអ្នកអាចរៀបចំអ្វីដែលពិសេសសម្រាប់ពួកគេ។ អ្នកក៏អាចឲ្យអំណោយដែលកូនមិនដឹងទុកជាមុន។ ប៉ុន្តែ អំណោយមួយដែលល្អបំផុតសម្រាប់កូន គឺជាពេលវេលានិងសេចក្ដីស្រឡាញ់របស់អ្នក។
ចូរធ្វើតាមការគោរពប្រណិប័តន៍ពិត
១៨. ហេតុអ្វីយើងគួរចូលរួមកិច្ចប្រជុំគ្រិស្តសាសនិក?
១៨ ដើម្បីធ្វើឲ្យព្រះយេហូវ៉ាពេញចិត្ត យើងត្រូវបោះបង់ចោលសាសនាមិនពិត។ នេះរួមបញ្ចូលទំនៀមទម្លាប់និងបុណ្យផ្សេងៗដែលជាប់ទាក់ទងនឹងសាសនាមិនពិត។ ប៉ុន្តែ យើងក៏ត្រូវធ្វើតាមការគោរពប្រណិប័តន៍ពិតដែរ។ តើតាមរបៀបណា? វិធីមួយគឺចូលរួមកិច្ចប្រជុំគ្រិស្តសាសនិកជាទៀងទាត់។ (សូមអាន ហេប្រឺ ១០:២៤, ២៥) កិច្ចប្រជុំគឺជាផ្នែកមួយដ៏សំខាន់ណាស់ក្នុងការគោរពប្រណិប័តន៍ពិត។ (ទំនុកតម្កើង ២២:២២; ១២២:១) យើងអាចលើកទឹកចិត្តគ្នាទៅវិញទៅមក ពេលដែលយើងចូលរួមកិច្ចប្រជុំ។—រ៉ូម ១:១២
១៩. ហេតុអ្វីការប្រាប់អ្នកឯទៀតអំពីសេចក្ដីពិតក្នុងគម្ពីរដែលអ្នកបានរៀនគឺសំខាន់ម្ល៉េះ?
១៩ ផ្នែកដ៏សំខាន់មួយទៀតដែលបង្ហាញថាអ្នកសម្រេចចិត្តទទួលយកការគោរពប្រណិប័តន៍ពិត គឺដោយប្រាប់អ្នកឯទៀតអំពីអ្វីដែលអ្នកបានរៀនពីគម្ពីរ។ មនុស្សជាច្រើនតានតឹងចិត្ត ដោយសារតែមានអំពើអាក្រក់ផ្សេងៗមិនចេះចប់។ អ្នកប្រហែលជាស្គាល់មនុស្សខ្លះដែលមានអារម្មណ៍ដូចនេះ។ សូមប្រាប់ពួកគេអំពីសេចក្ដីសង្ឃឹមដ៏អស្ចារ្យរបស់អ្នកអំពីអនាគត។ កាលដែលអ្នកចូលរួមកិច្ចប្រជុំគ្រិស្តសាសនិក ហើយប្រាប់អ្នកឯទៀតអំពីសេចក្ដីពិតក្នុងគម្ពីរ នោះអ្នកនឹងឃើញថាអ្នកលែងចង់ធ្វើបុណ្យ ឬទំនៀមទម្លាប់ណាមួយដែលជាប់ទាក់ទងនឹងសាសនាមិនពិតទៀត។ អ្នកអាចប្រាកដថាអ្នកនឹងសប្បាយរីករាយ ហើយថាព្រះយេហូវ៉ានឹងផ្ដល់ពរជាច្រើនដល់ការខំព្យាយាមរបស់អ្នក ដោយសារអ្នកបានសម្រេចចិត្តគោរពប្រណិប័តន៍លោកតាមរបៀបត្រឹមត្រូវ។—ម៉ាឡាគី ៣:១០