សំណួរទី៩
តើខ្ញុំគួរជឿលើទ្រឹស្តីវិវត្តន៍ឬទេ?
តើប្អូននឹងធ្វើយ៉ាងណា?
សូមស្រមៃគិតអំពីរឿងនេះ: ឥឡូវអាឡិចចាប់ផ្ដើមច្របូកច្របល់ក្នុងគំនិត។ គាត់ជឿជានិច្ចទៅលើព្រះនិងជឿថាជីវិតទាំងឡាយមានអ្នកបង្កើត។ ប៉ុន្តែ ថ្ងៃនេះនៅសាលារៀនគ្រូជីវវិទ្យាបានអះអាងយ៉ាងខ្លាំងថាជីវិតទាំងឡាយពិតជាកើតឡើងពីការវិវត្តន៍មែន ហើយទ្រឹស្តីនេះមានមូលដ្ឋានលើការស្រាវជ្រាវរបស់ពួកអ្នកវិទ្យាសាស្ត្រ។ អាឡិចមិនចង់ឲ្យសិស្សឯទៀតគិតថាគាត់ល្ងង់ទេ ដូច្នេះគាត់គិតខ្លួនឯងថា ‹បើអ្នកវិទ្យាសាស្ត្របានបង្ហាញថាជីវិតពិតជាបានកើតឡើងពីការវិវត្តន៍មែន តើខ្ញុំជាអ្វីដែលត្រូវសង្ស័យពួកគេ?›។
បើប្អូនជាអាឡិច តើប្អូនព្រមជឿលើទ្រឹស្តីវិវត្តន៍ដោយសារតែសៀវភៅសាលាបង្រៀនថានេះគឺជារឿងពិតឬ?
គិតមុនគូរ!
ទាំងអ្នកដែលជឿលើទ្រឹស្តីវិវត្តន៍ទាំងអ្នកដែលជឿថាជីវិតមានអ្នកបង្កើត ពួកគេឆាប់និយាយអំពីអ្វីដែលពួកគេជឿ ដោយមិនដឹងច្បាស់អំពីមូលហេតុដែលពួកគេជឿ។
មនុស្សខ្លះជឿថាមានអ្នកបង្កើត ដោយសារពួកគេបានរៀនអំពីរឿងនោះពីសាសនារបស់ពួកគេ។
អ្នកខ្លះទៀតជឿលើទ្រឹស្តីវិវត្តន៍ ដោយសារពួកគេបានរៀនអំពីរឿងនោះនៅឯសាលារៀន។
សូមពិចារណាអំពីសំណួរ៦យ៉ាង
គម្ពីរចែងថា៖ «ពិតមែនតែផ្ទះទាំងអស់មានអ្នកសង់ ប៉ុន្តែអ្នកដែលបានសង់អ្វីៗទាំងអស់គឺព្រះ»។ (ហេប្រឺ ៣:៤) តើនេះសមហេតុសមផលទេ?
ការអះអាងថាជីវិតគ្មានអ្នកបង្កើត គឺប្រៀបដូចជាការនិយាយថាផ្ទះនេះ កើតឡើងដោយគ្មានអ្នកសង់
ការអះអាង: អ្វីៗទាំងអស់ក្នុងសកលលោកនេះកើតឡើងដោយសារការផ្ទុះដ៏ធំមួយ។
១. តើអ្នកណាឬអ្វីដែលបណ្ដាលឲ្យមានការផ្ទុះដ៏ធំនេះ?
២. តើមួយណាសមហេតុផលជាងថាអ្វីៗទាំងអស់កើតឡើងដោយឯកឯង ឬថាមានអ្នកបង្កើត?
ការអះអាង: មនុស្សវិវត្តន៍មកពីសត្វ។
៣. បើមនុស្សវិវត្តន៍មកពីសត្វដូចជាអម្បូរសត្វស្វា ហេតុអ្វីបានជាប្រាជ្ញារបស់មនុស្សនិងអម្បូរសត្វស្វានោះខុសគ្នាឆ្ងាយម្ល៉េះ?
៤. បើមនុស្សដែលមានប្រាជ្ញាអាចបង្កើតមនុស្សយន្ត ចុះយ៉ាងណាកោសិកាដ៏តូចបំផុតដែលមានលក្ខណៈស្មុគស្មាញ តើមិនមានអ្នកបង្កើតដែរទេឬ?
ការអះអាង: ការវិវត្តន៍គឺជាការពិត។
៥. តើអ្នកដែលអះអាងដូច្នេះបានស្វែងរកភ័ស្តុតាងដើម្បីបញ្ជាក់អំពីរឿងនេះឬទេ?
៦. តើមនុស្សខ្លះបានជឿលើទ្រឹស្តីវិវត្តន៍ដោយសារតែពួកគេឮថាអ្នកចេះដឹងទាំងអស់ក៏ជឿលើរឿងនោះដែរឬ?
ប្អូនស្រីម្នាក់ឈ្មោះជូលានិយាយថា៖ «ឧទាហរណ៍ បើអ្នកដើរចូលក្នុងព្រៃ ស្រាប់តែឃើញផ្ទះដ៏ស្អាតមួយ តើអ្នកគិតថា ‹ផ្ទះដ៏ស្អាតនោះបានកើតឡើងដោយសារដើមឈើដួលរលំលើគ្នាហើយចេញជាផ្ទះឬ›? ប្រាកដជាមិនដូច្នោះឡើយ! ការគិតដូច្នោះគឺមិនសមហេតុផលទាល់តែសោះ។ ដូច្នេះ ហេតុអ្វីយើងគួរជឿថាអ្វីៗទាំងអស់ក្នុងសកលលោកនេះបានកើតឡើងដោយចៃដន្យ?»។
យុវតីម្នាក់ឈ្មោះរចនានិយាយថា៖ «សូមស្រមៃគិតថា អ្នកណាម្នាក់បានប្រាប់អ្នកថាមានការផ្ទុះក្នុងរោងចក្របោះពុម្ពមួយ ហើយទឹកថ្នាំបានខ្ទាតចេញជាតួអក្សរនិងពាក្យលើជញ្ជាំង ពិតាន និងក្រដាស . . .។ តើអ្នកនឹងជឿទេ?»។
ហេតុអ្វីយើងគួរជឿលើព្រះ?
គម្ពីរលើកទឹកចិត្តប្អូនឲ្យប្រើ«សមត្ថភាពរិះគិត»។ (រ៉ូម ១២:១) នេះមានន័យថាជំនឿរបស់ប្អូនលើព្រះមិនគួរមានមូលដ្ឋានលើ
អារម្មណ៍ (ខ្ញុំគ្រាន់តែមានអារម្មណ៍ថាប្រាកដជាមានព្រះ)
ទំនៀមទម្លាប់ (ខ្ញុំរស់នៅក្នុងតំបន់ដែលមនុស្សជាច្រើនជឿលើព្រះ)
ការអប់រំ (ឪពុកម្ដាយរបស់ខ្ញុំអប់រំខ្ញុំឲ្យជឿលើព្រះ ដូច្នេះខ្ញុំគ្មានជម្រើសទេ)
ផ្ទុយទៅវិញ ជំនឿរបស់ប្អូនលើព្រះគួរមានមូលហេតុត្រឹមត្រូវ។
យុវសិស្សម្នាក់ឈ្មោះរីសានិយាយថា៖ «នៅក្នុងថ្នាក់រៀន ពេលខ្ញុំស្ដាប់គ្រូពន្យល់អំពីសរីរាង្គនីមួយៗនៃរូបកាយ ខ្ញុំជឿជាក់យ៉ាងខ្លាំងថាមានព្រះដែលជាអ្នកបង្កើត។ ផ្នែកនីមួយៗនៃរូបកាយយើងមានតួនាទីរៀងៗខ្លួន សូម្បីតែសរីរាង្គដ៏តូចបំផុតក៏មានតួនាទីរបស់វាដែរ ហើយសរីរាង្គខ្លះមានដំណើរការដោយយើងមិនដឹងខ្លួន។ រូបកាយរបស់មនុស្សយើងពិតជាអស្ចារ្យណាស់!»។
យុវជនម្នាក់ឈ្មោះរីឆាដនិយាយថា៖ «ពេលខ្ញុំឃើញអគារខ្ពស់ កប៉ាល់ ឬឡាន ខ្ញុំសួរខ្លួនឯងថា ‹តើអ្នកណាបង្កើតរបស់ទាំងនេះ?›។ ជាឧទាហរណ៍ ដើម្បីផលិតឡានមួយត្រូវការមនុស្សដែលមានប្រាជ្ញា ពីព្រោះដើម្បីឲ្យឡានទៅមុខបាន នោះគ្រឿងតូចៗក្នុងឡានត្រូវតែមានដំណើរការស៊ីសង្វាក់គ្នាទាំងស្រុង។ ដូច្នេះ បើឡានមានអ្នកផលិត មនុស្សក៏ច្បាស់ជាមានអ្នកបង្កើតដែរ»។
យុវជនម្នាក់ទៀតឈ្មោះណារ៉េតនិយាយថា៖ «ពេលខ្ញុំសិក្សាកាន់តែច្រើនអំពីវិទ្យាសាស្ត្រ ខ្ញុំឃើញថាគឺគ្មានភ័ស្តុតាងដែលអាចជឿលើទ្រឹស្តីវិវត្តន៍បានឡើយ . . . តាមយោបល់ខ្ញុំ មានភ័ស្តុតាងច្រើនជាងដែលនាំឲ្យជឿទៅលើព្រះដែលជាអ្នកបង្កើត ជាជាងជឿទៅលើទ្រឹស្តីវិវត្តន៍»។
សូមពិចារណា
ទោះជាអ្នកវិទ្យាសាស្ត្របានស្រាវជ្រាវអស់រាប់ទសវត្សរ៍មកហើយក្ដី ពួកគេនៅតែមិនយល់ស្របគ្នាអំពីទ្រឹស្តីវិវត្តន៍ឡើយ។ បើពួកអ្នកវិទ្យាសាស្ត្រមិនអាចយល់ស្របគ្នាអំពីរឿងនោះ សូម្បីតែពួកគេជាអ្នកជំនាញទៅហើយ ដូច្នេះតើជាការខុសទេដែលប្អូនសង្ស័យលើទ្រឹស្តីវិវត្តន៍?