សេចក្ដីផ្ដើមផ្នែកទី៩
ក្នុងផ្នែកនេះ យើងនឹងរៀនអំពីមនុស្សវ័យក្មេង អ្នកប្រកាសទំនាយ និងស្ដេចផ្សេងៗដែលបានបង្ហាញជំនឿដ៏អស្ចារ្យលើព្រះយេហូវ៉ា។ នៅស្រុកស៊ីរី ក្មេងស្រីជនជាតិអ៊ីស្រាអែលម្នាក់ជឿថា អ្នកប្រកាសទំនាយរបស់ព្រះយេហូវ៉ាអាចធ្វើឲ្យណាម៉ានជាពីជំងឺ។ អ្នកប្រកាសទំនាយអេលីសេជឿជាក់ទាំងស្រុងថា ព្រះយេហូវ៉ានឹងការពារគាត់ពីកងទ័ពរបស់សត្រូវ។ សម្ដេចសង្ឃយេហូយ៉ាដាបានប្រថុយជីវិតដើម្បីការពារកុមារយេហូអាស ពីអាថាលៀដែលជាជីដូនចិត្តព្រៃផ្សៃ។ ស្ដេចហេសេគាមានទំនុកចិត្តថា ព្រះយេហូវ៉ានឹងសង្គ្រោះក្រុងយេរូសាឡិម។ ដូច្នេះ គាត់មិនចុះចាញ់ការគំរាមកំហែងរបស់ពួកអាស៊ីរីទេ។ ស្ដេចយ៉ូសៀសបានដកការគោរពបូជារូបព្រះចេញពីទឹកដី ជួសជុលវិហារ ហើយដឹកនាំបណ្ដាជនយូដាឲ្យមកគោរពប្រណិប័តន៍ព្រះពិតម្ដងទៀត។