ការរស់នៅទាំងមានការប្រថុយផ្សេងៗ
«ជាធម្មតាក្នុងមួយថ្ងៃៗ គ្មានអ្វីសោះដែលយើងអាចធ្វើ ដែលមិនប្រកបទៅដោយការប្រថុយដល់ជីវិតយើង សូម្បីតែពេលសម្រាន្តក៏ដូចគ្នាដែរ»។—ទស្សនាវដ្ដី ឌីសខូវើរ
ជីវិតបានត្រូវប្រៀបប្រដូចនឹងការដើរឆ្លងកាត់វាលមួយដែលពោរពេញទៅដោយគ្រាប់មីន ដ្បិតយើងអាចត្រូវរបួសឬក៏អាចស្លាប់នៅពេលណាក៏បាន ដែលច្រើនតែមកដោយគ្មានការព្រមានទុកជាមុនទេ។ កត្ដាដែលនាំឲ្យមានការប្រថុយនោះ គឺខុសគ្នាពីប្រទេសមួយទៅប្រទេសមួយ។ កត្ដានោះរួមបញ្ចូលគ្រោះថ្នាក់ចរាចរណ៍ សង្គ្រាមស៊ីវិល ការអត់បាយ ជម្ងឺអេដស៍ រោគមហារីក ជម្ងឺបេះដូង និងអ្វីៗជាច្រើនទៀត។ ជាឧទាហរណ៍ នៅទ្វីបអាហ្វ្រិក នៅតំបន់ខាងត្បូងវាលខ្សាច់សាហារ៉ា ជម្ងឺអេដស៍បានក្លាយជាឃាតករទី១ ហើយយោងទៅតាមទស្សនាវដ្ដីពត៌មានសហរដ្ឋ និងសេចក្ដីរាយការណ៍ពិភពលោក (ជាភាសាអង់គ្លេស) នៅថ្មីៗនេះក្នុងមួយឆ្នាំ«បានសម្លាប់អស់២លាន២សែននាក់ ដែលជាចំនួនអ្នកត្រូវបាត់បង់ជីវិតក្នុងសង្គ្រាមស៊ីវិល ១០ដងច្រើនជាងសង្គ្រាមទាំងអស់នៅទ្វីបអាហ្វ្រិក»។
ទន្ទឹមគ្នានឹងនេះ ពិភពលោកទាំងមូលចំណាយរាប់សិបកោដិដុល្លារទៅលើការពន្យាជីវិត និងការកាត់បន្ថយនូវលទ្ធភាពឆ្លងជម្ងឺនិងការធ្លាក់ខ្លួនពិការ។ គំនិតជាច្រើនដែលត្រូវគាំទ្រផ្សព្វផ្សាយ ដូចជាចំពោះការផឹក ការបរិភោគដែលនាំឲ្យមានសុខភាពល្អនិងការហាត់ប្រាណ ក៏អាចបង្កើតលទ្ធផលល្អខ្លះៗ។ ក៏ប៉ុន្តែ មានប្រភពមួយ ដែលមានពត៌មានដ៏គួរឲ្យទុកចិត្ត ស្តីអំពីរាល់ផ្នែកដ៏សំខាន់នៃជីវិត ដែលអាចជួយអ្នកមានជីវិតប្រកបទៅដោយសុវត្ថិភាពនិងសន្ដិសុខច្រើនជាង។ ប្រភពនោះគឺជាព្រះគម្ពីរ។ ព្រះគម្ពីរមានការណែនាំដែលទាក់ទងនឹងការដោះស្រាយរឿងច្រើនបែបច្រើនយ៉ាង ដែលទាក់ទងនឹងសុខភាពហើយសុខុមាលភាពរបស់យើង។ មែនហើយ ព្រះគម្ពីរមិនរៀបរាប់យ៉ាងល្អិតល្អន់អំពីបញ្ហាទាំងអស់ទេ។ ក៏ប៉ុន្តែ ព្រះគម្ពីរផ្ដល់នូវគោលការណ៍ដ៏ល្អប្រពៃ ដែលអាចណែនាំផ្លូវយើងក្នុងរឿងដូចជាការបរិភោគ សុខភាពខាងរាងកាយ ចិត្តគំនិត ការរួមភេទ ការញ៉ាំស្រា ការប្រើថ្នាំជក់និងថ្នាំដែលត្រូវហៅជាថ្នាំកំសាន្ត ព្រមទាំងរឿងជាច្រើនទៀត។
ជីវិតរបស់មនុស្សជាច្រើននាក់គឺពោរពេញទៅដោយភាពឥតស្ថេរភាពខាងសេដ្ឋកិច្ច។ ក្នុងរឿងនេះ ព្រះគម្ពីរក៏ជួយដែរ។ ព្រះគម្ពីរមិនគ្រាន់តែលើកទឹកចិត្តឲ្យមានទស្សនៈត្រឹមត្រូវចំពោះលុយនិងការចាយលុយទេ ក៏ប៉ុន្តែ ថែមទាំងបង្ហាញពីរបៀបដែលយើងអាចធ្វើជានិយោជិតឬនិយោជកម្នាក់ដ៏ល្អជាង។ បើនិយាយឲ្យចំទៅ ព្រះគម្ពីរជាសៀវភៅណែនាំមួយសំរាប់ជីវិតតែម្ដង មិនគ្រាន់តែសំរាប់ការណែនាំចំពោះបញ្ហាស្ថេរភាពខាងសេដ្ឋកិច្ចនិងសុខុមាលភាពខាងរាងកាយប៉ុណ្ណោះទេ។ តើអ្នកចង់ដឹងអំពីប្រយោជន៍ដែលមកពីព្រះគម្ពីរនៅសព្វថ្ងៃនេះទេ? អ៊ីចឹង សូមអានបន្តទៅទៀត។