តើព្រះយេស៊ូមានព្រះជន្មរស់ឡើងវិញមែនឬ?
មេអេវ៉ែកនៅស្រុកខេនថឺបារី ដែលមានឋានៈដ៏ខ្ពង់ខ្ពស់ខាងសាសនារបស់ប្រទេសអង់គ្លេស លោកបានមានប្រសាសន៍ថា៖ «ខ្ញុំអាចប្រាប់អ្នកយ៉ាងត្រង់ថា ថ្វីបើយើងដឹងយ៉ាងប្រាកដថា ព្រះយេស៊ូបានមានព្រះជន្មរស់មែន . . . តែយើងមិនអាចនិយាយយ៉ាងប្រាកដក្នុងចិត្តមួយរយភាគរយទេថា ព្រះបានប្រោសទ្រង់ឲ្យរស់ពីស្លាប់ឡើងវិញនោះ»។
សាវ័កប៉ុលមិនដែលមានចិត្តសង្ស័យដូចនោះឡើយ។ ក្នុងជំពូកទី១៥នៃសំបុត្រទីមួយដែលប៉ុលបានសរសេរដោយវិញ្ញាណបរិសុទ្ធរបស់ព្រះបណ្ដាលឲ្យតែងនោះ ជាសំបុត្រផ្ញើទៅគ្រីស្ទានគ្នីគ្នានៅទីក្រុងកូរិនថូសពីបុរាណ គាត់បានសរសេរថា៖ «មុនដំបូង ខ្ញុំបានប្រាប់មកអ្នករាល់គ្នា តាមសេចក្ដីដែលខ្ញុំបានទទួលដែរ គឺថាព្រះគ្រីស្ទបានសុគត ដោយព្រោះបាបរបស់យើងរាល់គ្នា តាមបទគម្ពីរ ហើយថា ទ្រង់ត្រូវគេបញ្ចុះក្នុងផ្នូរ រួចដល់ថ្ងៃទី៣ នោះទ្រង់មានព្រះជន្មរស់ឡើងវិញ ក៏តាមបទគម្ពីរ»។—កូរិនថូសទី១ ១៥:៣, ៤
ជំនឿទៅលើដំណើររស់ឡើងវិញនោះឯងរបស់ព្រះយេស៊ូគ្រីស្ទ ជាអ្វីដែលបានជំរុញសិស្សទ្រង់ឲ្យផ្សព្វផ្សាយដំណឹងល្អនោះទូទាំងតំបន់របស់ជនជាតិក្រិកនិងជនជាតិរ៉ូម គឺថា«ដល់គ្រប់ទាំងមនុស្ស ដែលកើតក្រោមមេឃ»។ (កូល៉ុស ១:២៣) តាមការពិត ដំណើររស់ឡើងវិញរបស់ព្រះយេស៊ូ ជាមូលដ្ឋាននៃជំនឿគ្រីស្ទានតែម្ដង។
ក៏ប៉ុន្តែ តាំងពីដំបូងមក ដំណើររស់ឡើងវិញរបស់ព្រះយេស៊ូបានត្រូវគេសង្ស័យនិងរហូតដល់មិនជឿទៀតផង។ ជនជាតិយូដាទូទៅបានចាត់ទុកពាក្យរបស់អ្នកកាន់តាមព្រះយេស៊ូ ដែលអះអាងថា បុគ្គលដែលត្រូវបានចងព្យួរនោះជាព្រះមេស្ស៊ី គឺជាពាក្យប្រមាថមើលងាយទៅវិញ។ ចំពោះជនជាតិក្រិកភាគច្រើនវិញ ដែលជាអ្នករៀនបានខ្ពង់ខ្ពស់ ទាំងជឿទៅលើព្រលឹងអមតៈ ក៏បានចាត់ទុកនូវដំណើររស់ឡើងវិញជាទីស្អប់ខ្ពើមដែរ។—កិច្ចការ ១៧:៣២-៣៤
អ្នកសង្ស័យនៅសម័យទំនើបនេះ
នាឆ្នាំថ្មីៗនេះ វិជ្ជាករខ្លះៗដែលអះអាងថា ខ្លួនជាគ្រីស្ទានដែរ បាននិពន្ធសៀវភៅនិងអត្ថបទនានាដែលបន្ទាបនូវដំណើររស់ឡើងវិញរបស់ព្រះយេស៊ូជារឿងប្រឌិត ទាំងបានផ្ដើមនូវសេចក្ដីផ្ចាញ់ផ្ចាលជាខ្លាំងអំពីរឿងនេះ។ ក្នុងការស្វែងរក«ព្រះយេស៊ូតាមប្រវត្ដិសាស្ត្រ» វិជ្ជាករផ្សេងៗចោទថា សេចក្ដីដែលសៀវភៅដំណឹងល្អរៀបរាប់អំពីផ្នូរដែលនៅទទេនោះ និងអំពីការលេចខ្លួនឡើងរបស់ព្រះយេស៊ូក្រោយពីបានរស់ឡើងវិញ នោះជារឿងប្រលោមលោកទាំងស្រុង ដែលបានប្រឌិតឡើងជាយូរយារមកហើយ ក្រោយពីការសោយទិវង្គតរបស់ទ្រង់ ដើម្បីគាំទ្រនូវការអះអាងថា ទ្រង់នឹងមានអំណាចនៅស្ថានសួគ៌។
ជាឧទាហរណ៍ សូមគិតទៅមើលពីទស្សនៈនៃវិជ្ជាករម្នាក់ជនជាតិអាល្លឺម៉ង់ ឈ្មោះហ្កឺតលឺដឺម៉ាន ជាសាស្ដ្រាចារ្យខាងសញ្ញាថ្មី និងជាអ្នកនិពន្ធនូវសៀវភៅអ្វីដែលពិតជាបានកើតឡើងចំពោះព្រះយេស៊ូ ជាការពិនិត្យមើលនូវដំណើររស់ឡើងវិញតាមប្រវត្ដិសាស្ត្រ។ គាត់បញ្ចេញមតិថា ដំណើររស់ឡើងវិញរបស់ព្រះយេស៊ូ ជា«សេចក្ដីដែលឥតមានមូលដ្ឋាន» ហើយអ្នកណាម្នាក់ដែលមាន«ទស្សនៈខាងវិទ្យាសាស្ត្រអំពីលោកីយ៍» ក៏ត្រូវបដិសេធទាស់នឹងដំណើររស់ឡើងវិញនោះដែរ។
សាស្ដ្រាចារ្យលោកលឺដឺម៉ាន អះអាងថា ព្រះគ្រីស្ទដែលមានព្រះជន្មរស់ឡើងវិញនោះ ព្រមទាំងបានលេចខ្លួនឲ្យសាវ័កពេត្រុសឃើញ តាមការពិតទៅជាចក្ខុនិមិត្តដែលជាលទ្ធផលពីចិត្តសោកសង្រេងនិងគំនិតមានទោសដ៏លើសលប់ ដោយព្រោះគាត់បានបដិសេធនឹងព្រះយេស៊ូពីមុន។ យោងទៅតាមលោកលឺដឺម៉ាន ការបង្ហាញខ្លួនរបស់ព្រះយេស៊ូពីមុខអ្នកជឿជាង៥០០នាក់នោះ គ្រាន់តែជា«មនុស្សគ្នាច្រើនដែលមានចិត្តអណ្ដែតអណ្ដូង»ប៉ុណ្ណោះ។ (កូរិនថូសទី១ ១៥:៥, ៦) បើសង្ខេបទៅ វិជ្ជាករជាច្រើននាក់បង្រួមកំណត់ហេតុនានាក្នុងព្រះគម្ពីរអំពីព្រះយេស៊ូដែលបានរស់ឡើងវិញ ទៅជាបទពិសោធន៍មួយៗតាមមតិប៉ុណ្ណោះ ដែលបានជួយសិស្សទ្រង់បង្កើតឲ្យមានទំនុកចិត្តសារជាថ្មីខាងវិញ្ញាណ ព្រមទាំងចិត្តខ្នះខ្នែងធ្វើជាសាសនទូតដែរ។
ទោះជាយ៉ាងណាក៏ដោយ ក៏មិនសូវមានអ្នកណាម្នាក់ចាប់អារម្មណ៍ចង់ដេញដោលពីរឿងមតិទាំងនេះឡើយ។ ក៏ប៉ុន្តែ យើងគ្រប់ៗគ្នាគួរចង់ចាប់អារម្មណ៍នឹងដំណើររស់ឡើងវិញរបស់ព្រះយេស៊ូវិញ។ តើហេតុអ្វី? ពីព្រោះបើទ្រង់មិនបានរស់ឡើងវិញទេ នោះសាសនាគ្រីស្ទានមានមូលដ្ឋានមិនពិត។ ផ្ទុយទៅវិញ បើដំណើររស់ឡើងវិញរបស់ព្រះយេស៊ូជាហេតុការណ៍ពិតតាមប្រវត្ដិសាស្ត្រមែន នោះសាសនាគ្រីស្ទានមានមូលដ្ឋានលើសេចក្ដីពិតវិញដែរ។ ក្រោមកាលៈទេសៈទាំងនោះ គឺមិនត្រឹមតែជាការអះអាងរបស់ព្រះយេស៊ូប៉ុណ្ណោះដែលត្រូវសឲ្យឃើញថាត្រឹមត្រូវនោះទេ តែរួមទាំងសេចក្ដីសន្យារបស់ទ្រង់ផងដែរ។ ម្យ៉ាងវិញទៀត បើមានដំណើររស់ឡើងវិញមែន នោះសេចក្ដីស្លាប់មិនមែនជាអ្វីដែលឈ្នះរហូតនោះទេ តែជាសត្រូវដែលអាចចាញ់បាន។—កូរិនថូសទី១ ១៥:៥៥
[អ្នកផ្ដល់សិទ្ធិឲ្យប្រើរូបភាពនៅទំព័រ៣]
From the Self-Pronouncing Edition of the Holy Bible, containing the King James and the Revised versions