សំណួរពីអ្នកអាន
តើឪពុកម្ដាយគួរបង្រៀនកូនអំពីការរួមភេទឬទេ?
▪ ឪពុកម្ដាយជាច្រើនខំប្រឹងយ៉ាងខ្លាំងដើម្បីការពារកូនកុំឲ្យឆ្លងជំងឺផ្សេងៗ។ ស្រដៀងគ្នាដែរ ឪពុកម្ដាយក៏ត្រូវខំប្រឹងការពារកូនកុំឲ្យចាប់ផ្ដើមមានចិត្តគំនិតដែលអាចបង្ខូចសីលធម៌របស់ពួកគេដែរ។ វិធីមួយដែលឪពុកម្ដាយអាចធ្វើដូច្នេះបាន គឺដោយអប់រំកូនយ៉ាងត្រឹមត្រូវអំពីការរួមភេទ។ (សុភាសិត ៥:៣-២៣) ការណែនាំកូនអំពីសីលធម៌និងការបង្ហាត់បង្រៀនពីឪពុកម្ដាយ គឺសំខាន់ចាំបាច់ដោយសារក្នុងទូរទស្សន៍ អ៊ីនធឺណិត សៀវភៅផ្សេងៗ និងសៀវភៅរឿងតុក្កតា កូនក្មេងឃើញរូបភាពឬក៏ឈុតកាន់តែច្រើនឡើងដែលបង្ហាញយ៉ាងច្បាស់អំពីអ្វីដែលពាក់ព័ន្ធនឹងការរួមភេទ។
ដាយអេន លេវីនដែលជាសាស្ដ្រាចារ្យម្នាក់ខាងផ្នែកអប់រំនិងជាអ្នកនិពន្ធបានពន្យល់ថា៖ «បញ្ហាសព្វថ្ងៃនេះមិនមែនមកពីកូនៗរបស់យើងរៀនអំពីការរួមភេទទេ តែមកពីអ្វីៗដែលពួកគេកំពុងរៀន វ័យដែលពួកគេកំពុងរៀននោះ និងមនុស្សដែលកំពុងបង្រៀនពួកគេអំពីរឿងនោះ។ អ្វីៗដែលកូនក្មេងរៀនពីបណ្ដាញផ្សាយព័ត៌មាននិងពីទស្សនៈដែលមនុស្សនិយមទូទៅស្តីអំពីការរួមភេទ មានឥទ្ធិពលខ្លាំង ហើយបង្ខូចចិត្តគំនិតរបស់ពួកគេ»។
ឪពុកម្ដាយត្រូវការពារកូនកុំឲ្យទទួលឥទ្ធិពលពីគំនិតខុសឆ្គងនិងទស្សនៈប្រាសចាកសីលធម៌ដែលកំពុងបំផ្លាញសង្គម។ (សុភាសិត ៥:១; អេភេសូរ ៦:៤) កូនក្មេងត្រូវដឹងអំពីតួនាទីនៃអវយវៈរាងកាយ វិធីសម្អាតខ្លួនប្រាណ និងរបៀបការពារខ្លួនពីមនុស្សដែលប្រព្រឹត្តអំពើប្រាសចាកសីលធម៌។ មុនពេលដែលកូនៗចូលវ័យបន្តពូជ កូនស្រីត្រូវដឹងអំពីការប្រែប្រួលនៃរាងកាយរបស់នាង ហើយត្រូវយល់អំពីមូលហេតុនិងអ្វីដែលកើតឡើងនៅពេលមានរដូវ។ រីឯក្មេងប្រុសក៏គួរដឹងជាមុនថានៅពេលខ្លះ អវយវៈភេទរបស់គាត់នឹងបញ្ចេញទឹកកាមនៅពេលយប់ដោយឯកឯង។ ពេលកូននៅតូច ឪពុកម្ដាយអាចចាប់ផ្ដើមបង្រៀនពួកគេអំពីឈ្មោះត្រឹមត្រូវនៃអវយវៈនីមួយៗនៃរូបកាយ។ ឪពុកម្ដាយដែលមានសេចក្ដីស្រឡាញ់បង្រៀនកូនមេរៀនដ៏សំខាន់បីអំពីអវយវៈទាំងនេះគឺ: (១) អវយវៈទាំងនេះជាអ្វីដែលពិសេស។ (២) មិនត្រូវនិយាយអំពីអវយវៈទាំងនេះដោយគ្មានភាពថ្លៃថ្នូរទេ។ (៣) ជាទូទៅ មិនត្រូវឲ្យគេប៉ះឬបង្ហាញឲ្យគេឃើញឡើយ។ ពេលដែលកូនធំឡើងបន្ដិច ឪពុកម្ដាយត្រូវដឹងអំពីពេលណាដែលគួរពន្យល់កូនអំពីរបៀបដែលស្ត្រីម្នាក់មានផ្ទៃពោះ។a
តើឪពុកម្ដាយគួរចាប់ផ្ដើមបង្រៀនកូនអំពីរឿងនេះនៅពេលណា? ចម្លើយចំពោះសំណួរនោះគឺខុសពីអ្វីដែលមនុស្សជាច្រើននឹកស្មានដល់។ ក្មេងស្រីម្នាក់អាចមករដូវជាលើកដំបូងនៅអាយុ១០ឆ្នាំឬក៏មានអាយុតិចជាងនេះ។ ក្មេងប្រុសអាចចេញទឹកកាមជាលើកដំបូងនៅអាយុ១១ឬ១២ឆ្នាំ។ សភាពប្រែប្រួលទាំងនេះអាចធ្វើឲ្យក្មេងៗខ្វល់ខ្វាយនិងមានអារម្មណ៍មិនស្រួល បើពួកគេមិនបានដឹងថានេះជាអ្វីដែលកើតឡើងជាធម្មតាចំពោះរាងកាយ។ ក្មេងៗត្រូវដឹងអំពីរឿងនេះជាមុនដើម្បីពង្រឹងទំនុកចិត្តរបស់ពួកគេថា ការធំលូតលាស់ខាងរាងកាយរបស់ពួកគេមិនមែនជាបញ្ហាអ្វីទេ។ នេះក៏ជាពេលដែលឪពុកម្ដាយត្រូវអប់រំកូនឲ្យយល់តម្លៃនិងសារៈសំខាន់នៃការធ្វើតាមគោលការណ៍សីលធម៌ក្នុងគម្ពីរ។ គោលការណ៍សីលធម៌ទាំងនេះជាអ្វីដែលកម្មវិធីអប់រំភាគច្រើនរបស់ពិភពលោកនេះមិនបានបង្រៀនទេ។—សុភាសិត ៦:២៧-៣៥
[កំណត់សម្គាល់]
a ឪពុកម្ដាយអាចទទួលព័ត៌មានបន្ថែមដែលអាចជួយពួកគេស្តីអំពីរឿងនេះ ក្នុងសៀវភៅដែលបោះពុម្ពដោយសាក្សីព្រះយេហូវ៉ា ដូចជាទស្សនាវដ្ដីប៉មយាម ថ្ងៃទី១ ខែធ្នូ ឆ្នាំ២០១០ ទំព័រ៩-១១ ដែលមានចំណងជើងថា«គន្លឹះសុភមង្គលគ្រួសារ ចូរពិគ្រោះជាមួយកូនអ្នកអំពីទំនាក់ទំនងខាងផ្លូវភេទ»។