‹បុត្ររបស់បិតានៅស្ថានសួគ៌សុខចិត្តបើកសម្ដែងឲ្យស្គាល់លោក›
«គ្មានអ្នកណាស្គាល់ព្រះដែលជាបិតាច្បាស់ជាងបុត្ររបស់លោក និងអ្នកដែលបុត្ររបស់លោកសុខចិត្តបើកសម្ដែងឲ្យស្គាល់នោះទេ»។—លូក. ១០:២២
តើអ្នកនឹងឆ្លើយយ៉ាងណា?
ហេតុអ្វីលោកយេស៊ូអាចបើកសម្ដែងឲ្យស្គាល់បិតាតាមរបៀបដ៏ពិសេស?
តើតាមរបៀបណាដែលលោកយេស៊ូបើកសម្ដែងឲ្យអ្នកឯទៀតស្គាល់បិតារបស់លោក?
តើតាមរបៀបណាដែលអ្នកអាចយកតម្រាប់តាមលោកយេស៊ូ ក្នុងការបើកសម្ដែងឲ្យស្គាល់បិតា?
១, ២. តើមនុស្សជាច្រើនមានការងឿងឆ្ងល់អំពីសំណួរអ្វី? ហើយហេតុអ្វី?
តើព្រះជានរណា? សំណួរនេះធ្វើឲ្យមនុស្សជាច្រើនងឿងឆ្ងល់។ ជាឧទាហរណ៍ ទោះជាពួកអ្នកដែលអះអាងថាខ្លួនជាគ្រិស្តសាសនិកជឿថាព្រះជាព្រះបីអង្គរួមជាព្រះតែមួយក៏ដោយ មនុស្សជាច្រើនទទួលស្គាល់ថាសេចក្ដីបង្រៀននេះមិនអាចយល់បានទេ។ អ្នកនិពន្ធម្នាក់ដែលជាគ្រូគង្វាលបានទទួលស្គាល់ថា សេចក្ដីបង្រៀនអំពីព្រះបីអង្គរួមជាព្រះតែមួយគឺមិនអាចពន្យល់បានទេ ពីព្រោះមានរឿងខ្លះមនុស្សមិនអាចយល់បានឡើយ។ ផ្ទុយទៅវិញ មនុស្សភាគច្រើនដែលជឿលើទ្រឹស្តីនៃការវិវត្តន៍ជឿថាគ្មានព្រះទេ។ ពួកគេគិតថាអ្វីៗដ៏អស្ចារ្យដែលព្រះបានបង្កើតគឺកើតឡើងដោយចៃដន្យ។ ទោះជាយ៉ាងនេះក៏ដោយ ជាជាងបដិសេធថាគ្មានព្រះ លោកឆាលដាវីនបាននិយាយថា៖ «សេចក្ដីសន្និដ្ឋានដ៏ត្រឹមត្រូវបំផុតចំពោះខ្ញុំគឺថា មនុស្សគ្មានសមត្ថភាពយល់ដឹងអំពីរឿងទាំងអស់ដែលទាក់ទងនឹងព្រះទេ»។
២ មនុស្សភាគច្រើនទោះជាមានជំនឿបែបណាក៏ដោយ ពួកគេបានពិចារណាសំណួរដែលថា តើពិតជាមានព្រះឬទេ? ក៏ប៉ុន្តែ ពេលដែលពួកគេរកចម្លើយដែលគាប់ចិត្តមិនបាន នៅទីបំផុតពួកគេបានឈប់ស្វែងរកព្រះតែម្ដង។ តាមពិត គឺសាថានបាន«ធ្វើឲ្យគំនិតរបស់ពួកអ្នកមិនជឿទៅជាងងឹត»។ (២កូ. ៤:៤) មិនមែនជាការចម្លែកទេដែលមនុស្សជាតិភាគច្រើនគ្មានចំណេះដឹង ហើយមិនយល់ច្បាស់អំពីសេចក្ដីពិតស្តីអំពីបិតា ដែលជាអ្នកបង្កើតសកលលោក។—អេ. ៤៥:១៨
៣. (ក) តើអ្នកណាបានបើកសម្ដែងឲ្យយើងស្គាល់ព្រះដែលជាអ្នកបង្កើត? (ខ) តើសំណួរអ្វីខ្លះដែលយើងនឹងពិចារណា?
៣ ក៏ប៉ុន្តែ ជាការសំខាន់ណាស់ដែលមនុស្សរៀនសេចក្ដីពិតអំពីព្រះ។ ហេតុអ្វី? ពីព្រោះមានតែពួកអ្នកដែល ហៅរក«នាមព្រះយេហូវ៉ា»ប៉ុណ្ណោះដែលនឹងត្រូវសង្គ្រោះ។ (រ៉ូម ១០:១៣) ដើម្បីហៅរកនាមរបស់ព្រះ នោះតម្រូវឲ្យស្គាល់បុគ្គលិកលក្ខណៈរបស់ព្រះ។ លោកយេស៊ូបានផ្ដល់ចំណេះដ៏សំខាន់នេះដល់អ្នកកាន់តាមលោក។ លោកបានបើកសម្ដែងអំពីបិតាដល់ពួកគេ។ (សូមអាន លូកា ១០:២២) ហេតុអ្វីលោកយេស៊ូអាចបើកសម្ដែងឲ្យស្គាល់បិតា ច្បាស់ជាងអ្នកឯទៀត? តើតាមរបៀបណាដែលលោកយេស៊ូបានបើកសម្ដែងឲ្យស្គាល់បិតា? ហើយតើតាមរបៀបណាដែលយើងអាចយកតម្រាប់តាមលោកយេស៊ូ ក្នុងការបើកសម្ដែងឲ្យអ្នកឯទៀតស្គាល់បិតា? សូមឲ្យយើងពិចារណានូវសំណួរទាំងនេះ។
ហេតុអ្វីលោកយេស៊ូអាចបើកសម្ដែងឲ្យស្គាល់បិតាតាមរបៀបដ៏ពិសេស
៤, ៥. ហេតុអ្វីលោកយេស៊ូអាចបើកសម្ដែងឲ្យស្គាល់បិតាតាមរបៀបដ៏ពិសេស?
៤ គ្មានអ្នកណាអាចបើកសម្ដែងឲ្យស្គាល់បិតាច្បាស់ជាងលោកយេស៊ូទេ។ តើហេតុអ្វី? ដោយសារមុនអ្វីៗទាំងអស់ដែលមានជីវិតបានកើតមក បុគ្គលវិញ្ញាណដែលក្រោយមកបានក្លាយជាលោកយេស៊ូបានរស់នៅស្ថានសួគ៌ជា«បុត្រតែមួយរបស់ព្រះ»។ (យ៉ូន. ១:១៤; ៣:១៨) នេះពិតជាឱកាសដ៏អស្ចារ្យមែន! ក្នុងអំឡុងពេលដែលមិនទាន់មានភាវរស់ឯទៀត លោកយេស៊ូបានទទួលការយកចិត្តទុកដាក់យ៉ាងកក់ក្ដៅពីបិតារបស់លោក ហើយបានរៀនអំពីបិតានិងគុណសម្បត្ដិរបស់លោក។ ព្រះយេហូវ៉ានិងលោកយេស៊ូច្បាស់ជាបានប្រាស្រ័យទាក់ទងគ្នាយ៉ាងជិតស្និទ្ធ ហើយបានបណ្ដុះសេចក្ដីស្រឡាញ់យ៉ាងជ្រាលជ្រៅចំពោះគ្នាទៅវិញទៅមកអស់រយៈពេលដ៏យូរលង់។ (យ៉ូន. ៥:២០; ១៤:៣១) លោកយេស៊ូពិតជាមានចំណេះដ៏ជ្រៅជ្រះអំពីបុគ្គលិកលក្ខណៈរបស់បិតាលោកមែន!—សូមអាន កូឡុស ១:១៥-១៧
៥ បិតាបានជ្រើសរើសបុត្រលោកជាអ្នកនាំពាក្យពោលគឺ«បណ្ដាំរបស់ព្រះ»។ (បប. ១៩:១៣) ហេតុនេះលោកយេស៊ូអាចបើកសម្ដែងឲ្យស្គាល់បិតាតាមរបៀបដ៏ពិសេស។ ដូច្នេះជាការត្រឹមត្រូវដែលយ៉ូហានដែលជាអ្នកសរសេរដំណឹងល្អ បានរៀបរាប់ពីលោកយេស៊ូថាជា៖ «បណ្ដាំ»និងជាអ្នកដែល«នៅជិតដើមទ្រូងរបស់បិតា»។ (យ៉ូន. ១:១, ១៨) តាមរយៈពាក្យនេះ យ៉ូហានចង់សំដៅទៅទម្លាប់ធម្មតាមួយនៅពេលបរិភោគអាហារនាសម័យរបស់គាត់។ ភ្ញៀវម្នាក់អង្គុយទម្រេតខ្លួននៅជិតដើមទ្រូងរបស់ភ្ញៀវម្នាក់ទៀតនៅលើកៅអីទម្រេតវែងតែមួយ។ ដោយអង្គុយជិតគ្នាបែបនេះ អ្នកទាំងពីរនាក់នោះអាចងាយស្រួលសន្ទនាគ្នា។ ដូច្នេះ លោកយេស៊ូដែល«នៅជិតដើមទ្រូងរបស់បិតា»បានសន្ទនាជាមួយនឹងបិតាលោកយ៉ាងស្និទ្ធស្នាល។
៦, ៧. តើចំណងមេត្រីភាពរវាងព្រះយេហូវ៉ានិងលោកយេស៊ូកាន់តែជិតស្និទ្ធឡើងៗតាមរបៀបណា?
៦ ចំណងមេត្រីភាពរវាងព្រះយេហូវ៉ានិងលោកយេស៊ូបានកាន់តែរឹងមាំឡើងៗ។ លោកយេស៊ូ«ជាទីគាប់ព្រះហឫទ័យទ្រង់[ព្រះ]រាល់ៗថ្ងៃ»។ (សូមអាន សុភាសិត ៨:២២, ២៣, ៣០, ៣១) ដូច្នេះ ជាការសមហេតុសមផលដែលចំណងមេត្រីភាពរវាងលោកទាំងពីរកាន់តែរឹងមាំ កាលដែលលោកទាំងពីរធ្វើការជាមួយគ្នា ហើយកាលដែលលោកយេស៊ូបានរៀនយកតម្រាប់តាមគុណសម្បត្ដិរបស់បិតាលោក។ ក្រោយការបង្កើតពួកទេវតានិងមនុស្សជាតិ លោកយេស៊ូបានឃើញអំពីរបៀបដែលព្រះយេហូវ៉ាប្រព្រឹត្តចំពោះទេវតានីមួយៗ ហើយលោកប្រាកដជាស្រឡាញ់បុគ្គលិកលក្ខណៈរបស់ព្រះយេហូវ៉ាកាន់តែខ្លាំងឡើង។
៧ សូម្បីតែនៅពេលដែលសាថានបានប្រឆាំងនឹងសិទ្ធិគ្រប់គ្រងរបស់ព្រះយេហូវ៉ាក៏ដោយ លោកយេស៊ូអាចរៀនអំពីរបៀបដែលព្រះយេហូវ៉ាបង្ហាញសេចក្ដីស្រឡាញ់ យុត្ដិធម៌ ប្រាជ្ញា និងឫទ្ធានុភាព ពេលប្រឈមមុខនឹងស្ថានភាពដ៏ពិបាក។ ជាលទ្ធផល នេះច្បាស់ជាបានជួយលោកយេស៊ូឲ្យត្រៀមលក្ខណៈដើម្បីប្រឈមមុខនឹងការពិបាកដែលលោកនឹងជួបប្រទះក្រោយមក ក្នុងកិច្ចបម្រើផ្សាយរបស់លោកនៅផែនដី។—យ៉ូន. ៥:១៩
៨. តើការរៀបរាប់ក្នុងសៀវភៅដំណឹងល្អជួយយើងឲ្យរៀនបានច្រើនអំពីគុណសម្បត្ដិរបស់ព្រះយេហូវ៉ាយ៉ាងដូចម្ដេច?
៨ ដោយសារលោកយេស៊ូមានចំណងមិត្តភាពយ៉ាងជិតស្និទ្ធជាមួយនឹងព្រះយេហូវ៉ា លោកអាចពន្យល់អំពីបិតារបស់លោកបានល្អិតល្អន់ ជាងអ្នកណាឯទៀតទាំងអស់។ គ្មានរបៀបប្រសើរជាងដែលអាចជួយយើងឲ្យស្គាល់ព្រះយេហូវ៉ា ក្រៅពីពិចារណាអ្វីដែលបុត្រតែមួយរបស់លោកបានបង្រៀននិងប្រព្រឹត្តនោះទេ។ ជាឧទាហរណ៍ បើយើងគ្រាន់តែបើកមើលអត្ថន័យក្នុងវចនានុក្រមប៉ុណ្ណោះយើងពិបាកយល់ឲ្យបានច្បាស់នូវអត្ថន័យនៃពាក្យ«សេចក្ដីស្រឡាញ់» មែនទេ? ក៏ប៉ុន្តែ ដោយសញ្ជឹងគិតអំពីកំណត់ហេតុដែលអ្នកសរសេរសៀវភៅដំណឹងល្អបានរៀបរាប់យ៉ាងរស់រវើកអំពីកិច្ចបម្រើផ្សាយរបស់លោកយេស៊ូ និងរបៀបដែលលោកបង្ហាញការយកចិត្តទុកដាក់ចំពោះអ្នកឯទៀត នោះយើងអាចយល់យ៉ាងច្បាស់នូវពាក្យថា«ព្រះគឺជាសេចក្ដីស្រឡាញ់»។ (១យ៉ូន. ៤:៨, ១៦) តាមវិធីដូចគ្នាដែរ យើងអាចយល់អំពីគុណសម្បត្ដិឯទៀតរបស់ព្រះ ដែលលោកយេស៊ូបានបើកសម្ដែងឲ្យអ្នកកាន់តាមលោកស្គាល់ក្នុងអំឡុងពេលលោកនៅផែនដី។
របៀបដែលលោកយេស៊ូបើកសម្ដែង ឲ្យស្គាល់បិតារបស់លោក
៩. (ក) តើលោកយេស៊ូបើកសម្ដែងឲ្យស្គាល់បិតាលោកតាមរយៈវិធីពីរយ៉ាងអ្វី? (ខ) សូមលើកឧទាហរណ៍មួយដែលបង្ហាញអំពីរបៀបដែលលោកយេស៊ូបានបើកសម្ដែងឲ្យស្គាល់បិតាតាមរយៈការបង្រៀនរបស់លោក។
៩ លោកយេស៊ូបានបើកសម្ដែងឲ្យអ្នកកាន់តាម និងពួកអ្នកដែលក្រោយមកក្លាយជាអ្នកកាន់តាមលោកស្គាល់បិតា។ តើតាមវិធីណា? លោកបានធ្វើដូច្នេះតាមវិធីពីរយ៉ាងគឺ តាមរយៈការបង្រៀននិងការប្រព្រឹត្តរបស់លោក។ មុនដំបូង សូមយើងពិចារណាអំពីសេចក្ដីបង្រៀនរបស់លោកយេស៊ូ។ អ្វីដែលលោកយេស៊ូបានបង្រៀនអ្នកកាន់តាមលោកបានសឲ្យឃើញការយល់ធ្លុះជ្រៅនូវគំនិត អារម្មណ៍ និងការប្រព្រឹត្តរបស់បិតាលោក។ ជាឧទាហរណ៍ លោកយេស៊ូបានប្រដូចបិតារបស់លោកទៅនឹងបុរសម្នាក់ដែលមានចៀមមួយហ្វូង ដែលចេញទៅស្វែងរកចៀមមួយដែលវង្វេងបាត់។ លោកបានមានប្រសាសន៍ថា ពេលដែលបុរសនោះរកឃើញចៀមដែលបានបាត់នោះ «គាត់មានអំណរចំពោះចៀមមួយនោះ ខ្លាំងជាងចំពោះចៀមកៅសិបប្រាំបួនក្បាលដែលមិនបានវង្វេងបាត់» តើឧទាហរណ៍នេះបញ្ជាក់អំពីអ្វី? លោកយេស៊ូបានពន្យល់ថា៖ «ដូចគ្នាដែរ បិតារបស់ខ្ញុំដែលស្ថិតនៅស្ថានសួគ៌មិនចង់ឲ្យអ្នកតូចណាម្នាក់បែបនេះវិនាសឡើយ»។ (ម៉ាថ. ១៨:១២-១៤) តើអ្នកអាចរៀនអ្វីខ្លះអំពីព្រះយេហូវ៉ាតាមរយៈឧទាហរណ៍នេះ? សូម្បីតែជួនកាលអ្នកមានអារម្មណ៍ថាខ្លួនអ្នកមិនសូវមានតម្លៃ ហើយមិនសូវមានគេយកចិត្តទុកដាក់ក៏ដោយ បិតារបស់អ្នកនៅស្ថានសួគ៌យកចិត្តទុកដាក់ចំពោះអ្នក ហើយថែរក្សាអ្នក។ ចំពោះលោក អ្នកគឺជាបុគ្គលម្នាក់ក្នុងចំណោម«អ្នកតូច»ទាំងនេះរបស់ព្រះ។
១០. តើលោកយេស៊ូបានបើកសម្ដែងឲ្យស្គាល់បិតារបស់លោកយ៉ាងដូចម្ដេច តាមរយៈការប្រព្រឹត្តរបស់លោក?
១០ វិធីទី២ដែលលោកយេស៊ូបានបើកសម្ដែងឲ្យអ្នកកាន់តាមលោកស្គាល់បិតាគឺតាមរយៈការប្រព្រឹត្តរបស់លោក។ ដូច្នេះ ពេលដែលសាវ័កភីលីពបានសុំលោកយេស៊ូថា៖ «សូមបង្ហាញឲ្យយើងឃើញបិតានៅស្ថានសួគ៌» លោកយេស៊ូអាចមានប្រសាសន៍យ៉ាងត្រឹមត្រូវថា៖ «អ្នកណាដែលបានឃើញខ្ញុំ អ្នកនោះបានឃើញបិតាដែលនៅស្ថានសួគ៌ហើយ»។ (យ៉ូន. ១៤:៨, ៩) សូមឲ្យយើងពិចារណាគំរូខ្លះស្តីអំពីរបៀបដែលលោកយេស៊ូបានបង្ហាញឲ្យឃើញគុណសម្បត្ដិរបស់បិតាលោក។ នៅពេលដែលបុរសឃ្លង់ម្នាក់បានអង្វរសុំលោកយេស៊ូព្យាបាលគាត់ឲ្យជា លោកយេស៊ូបានពាល់បុរសដែល«កើតឃ្លង់ពេញខ្លួន» ហើយបានប្រាប់គាត់ថា៖ «ខ្ញុំចង់ធ្វើឲ្យអ្នកជាស្អាតមែន។ សូមឲ្យជាស្អាតចុះ»។ ពេលបុរសកើតឃ្លង់នោះបានជាសះស្បើយ គាត់ប្រាកដជាអាចឃើញឫទ្ធានុភាពរបស់ព្រះយេហូវ៉ាតាមរយៈការអស្ចារ្យដែលលោកយេស៊ូបានធ្វើ។ (លូក. ៥:១២, ១៣) ដូចគ្នាដែរ ក្រោយឡាសាស្លាប់ ពួកអ្នកកាន់តាមលោកយេស៊ូច្បាស់ជាបានឃើញសេចក្ដីមេត្ដាករុណារបស់ព្រះយេហូវ៉ា នៅពេលដែលលោកយេស៊ូ«មានចិត្តក្ដុកក្ដួលក៏រំជួលចិត្តយ៉ាងខ្លាំង» ហើយ«ស្រក់ទឹកភ្នែក»។ ទោះជាលោកដឹងថាលោកនឹងប្រោសឡាសាឲ្យរស់ឡើងវិញក៏ដោយ លោកបានយល់យ៉ាងច្បាស់នូវទុក្ខសោករបស់ក្រុមគ្រួសារនិងមិត្តភក្ដិរបស់ឡាសា។ (យ៉ូន. ១១:៣២-៣៥, ៤០-៤៣) អ្នកច្បាស់ជាមានកំណត់ហេតុក្នុងគម្ពីរដែលអ្នកចូលចិត្តជាងគេ ដែលជួយអ្នកឲ្យឃើញសេចក្ដីមេត្ដាករុណារបស់ព្រះយេហូវ៉ាតាមរយៈគំរូនិងការប្រព្រឹត្តរបស់លោកយេស៊ូ។
១១. (ក) ពេលលោកយេស៊ូបានសម្អាតវិហារ តើលោកបើកសម្ដែងអ្វីខ្លះអំពីបិតាលោក? (ខ) ហេតុអ្វីកំណត់ហេតុស្តីអំពីលោកយេស៊ូសម្អាតវិហារលើកទឹកចិត្តយើង?
១១ តើអ្នកទាញមេរៀនអ្វីខ្លះ ពេលអ្នកអានកំណត់ហេតុអំពីលោកយេស៊ូសម្អាតវិហារ? សូមស្រមៃឃើញទិដ្ឋភាពនេះ: លោកយេស៊ូបានយកខ្សែមកវេញធ្វើជារំពាត់ហើយលោកបានដេញពួកអ្នកដែលកំពុងលក់គោនិងចៀម។ លោកធ្វើឲ្យកាក់របស់ពួកអ្នកដូរប្រាក់ខ្ចាត់ខ្ចាយអស់ ហើយបានផ្កាប់តុរបស់ពួកគេ។ (យ៉ូន. ២:១៣-១៧) ការប្រព្រឹត្តដ៏អង់អាចនេះបានធ្វើឲ្យពួកអ្នកកាន់តាមនឹកឃើញទំនាយរបស់ដាវីឌដែលថា៖ «សេចក្ដីឧស្សាហ៍ដល់ដំណាក់ទ្រង់ បានស៊ីបង្ហិនទូលបង្គំ»។ (ទំនុក. ៦៩:៩) ដោយចាត់វិធានការយ៉ាងម៉ឺងម៉ាត់ លោកយេស៊ូបានបង្ហាញថាលោកចង់ការពារការគោរពប្រណិប័តន៍ពិតខ្លាំងណាស់។ ក្នុងកំណត់ហេតុនេះ តើអ្នកអាចឃើញបុគ្គលិកលក្ខណៈរបស់បិតាឬទេ? នេះរំលឹកយើងថាព្រះមិនគ្រាន់តែមានឫទ្ធានុភាពដែលគ្មានកម្រិតដើម្បីបំបាត់អំពើអាក្រក់ពីផែនដីប៉ុណ្ណោះទេ តែលោកថែមទាំងមានបំណងប្រាថ្នាយ៉ាងខ្លាំងនឹងធ្វើដូច្នេះដែរ។ ការរៀបរាប់អំពីប្រតិកម្មដ៏ខ្លាំងរបស់លោកយេស៊ូចំពោះអំពើខុសឆ្គង បង្ហាញឲ្យឃើញអារម្មណ៍ដែលព្រះយេហូវ៉ាមាន ពេលឃើញមានអំពើអាក្រក់នៅពាសពេញផែនដីសព្វថ្ងៃនេះ។ កំណត់ហេតុនេះពិតជាលើកទឹកចិត្តមែន! ពេលយើងប្រឈមមុខនឹងអំពើអយុត្ដិធម៌។
១២, ១៣. តើអ្នកអាចរៀនអ្វីអំពីព្រះយេហូវ៉ាដោយពិចារណារបៀបដែលលោកយេស៊ូបានប្រព្រឹត្តចំពោះអ្នកកាន់តាមលោក?
១២ សូមឲ្យយើងពិចារណាគំរូមួយទៀតពោលគឺ របៀបដែលលោកយេស៊ូប្រព្រឹត្តចំពោះអ្នកកាន់តាមលោក។ ពួកគេបានប្រកែកគ្នាម្ដងហើយម្ដងទៀតអំពីអ្នកណាធំជាង។ (ម៉ាក. ៩:៣៣-៣៥; ១០:៤៣; លូក. ៩:៤៦) ដោយសារលោកយេស៊ូធ្លាប់រស់នៅយ៉ាងយូរជាមួយបិតារបស់លោក លោកយេស៊ូដឹងថាព្រះយេហូវ៉ាមានអារម្មណ៍យ៉ាងណាចំពោះមោទនភាពបែបនេះ។ (២សាំ. ២២:២៨; ទំនុក. ១៣៨:៦) បន្ថែមទៅទៀត លោកយេស៊ូបានឃើញចិត្តគំនិតបែបនេះដែលមេកំណាចសាថានបានបង្ហាញ។ បុគ្គលដែលអួតខ្លួននោះយកចិត្តទុកដាក់យ៉ាងខ្លាំងចំពោះមុខមាត់ធំដុំនិងឋានៈខ្ពស់។ ហេតុនេះ លោកយេស៊ូពិតជាព្រួយចិត្តណាស់ ពេលឃើញពួកអ្នកកាន់តាមដែលលោកបានបង្ហាត់បង្រៀននៅតែបង្ហាញចិត្តគំនិតអួតខ្លួន! សូម្បីតែក្នុងចំណោមពួកអ្នកកាន់តាមដែលលោកបានជ្រើសរើសជាសាវ័កក៏មានចិត្តគំនិតបែបនេះដែរ។ ពួកគាត់បានបង្ហាញចិត្តគំនិតអួតខ្លួនរហូតដល់ថ្ងៃចុងក្រោយនៃជីវិតរបស់លោកយេស៊ូលើផែនដី។ (លូក. ២២:២៤-២៧) ក៏ប៉ុន្តែ លោកយេស៊ូនៅតែបន្តកែតម្រង់ពួកគេដោយសប្បុរស ដោយសង្ឃឹមជានិច្ចថា នៅទីបំផុតពួកគាត់នឹងរៀនបង្ហាញចិត្តគំនិតរាបទាបដូចលោក។—ភី. ២:៥-៨
១៣ ពេលលោកយេស៊ូកែតម្រង់យ៉ាងអត់ធ្មត់នូវចិត្តគំនិតមិនត្រឹមត្រូវរបស់ពួកអ្នកកាន់តាមលោក តើអ្នកអាចឃើញបុគ្គលិកលក្ខណៈរបស់ព្រះយេហូវ៉ាឬទេ? តាមរយៈការប្រព្រឹត្តនិងពាក្យសម្ដីរបស់លោកយេស៊ូ តើអ្នករៀនអ្វីអំពីព្រះយេហូវ៉ាដែលមិនបោះបង់ចោលរាស្ត្ររបស់លោកទោះជាពួកគេធ្វើខុសម្ដងហើយម្ដងទៀតក៏ដោយ? ចំណេះដឹងនេះអំពីគុណសម្បត្ដិរបស់ព្រះលើកទឹកចិត្តយើងឲ្យប្រែចិត្ត ហើយអធិដ្ឋានសុំព្រះយេហូវ៉ាអភ័យទោសឲ្យយើង ពេលយើងធ្វើខុស។
បុត្ររបស់លោកបានស្ម័គ្រចិត្តបើកសម្ដែងឲ្យស្គាល់បិតា
១៤. តើលោកយេស៊ូបង្ហាញយ៉ាងដូចម្ដេចថា លោកសុខចិត្តបើកសម្ដែងឲ្យស្គាល់បិតារបស់លោក?
១៤ អ្នកគ្រប់គ្រងផ្ដាច់ការជាច្រើនបានខំប្រឹងលាក់ព័ត៌មានមិនឲ្យបណ្ដាជនដឹង ដើម្បីទុកពួកគេឲ្យនៅក្រោមអំណាចរបស់ខ្លួន។ ផ្ទុយទៅវិញ លោកយេស៊ូសុខចិត្តប្រាប់ព័ត៌មានដែលលោកបានដឹងអំពីបិតាលោក ដោយបើកសម្ដែងឲ្យអ្នកឯទៀតស្គាល់បិតាយ៉ាងពេញលេញ។ (សូមអាន ម៉ាថាយ ១១:២៧) បន្ថែមទៅទៀត លោកយេស៊ូបានឲ្យពួកគេនូវ«សមត្ថភាពយល់ដឹង ដើម្បីឲ្យ[ពួកគេ]អាចទទួលចំណេះអំពីព្រះពិត»ពោលគឺព្រះយេហូវ៉ា។ (១យ៉ូន. ៥:២០) តើនេះមានន័យយ៉ាងណា? លោកយេស៊ូបានបើកចិត្តគំនិតពួកអ្នកកាន់តាមលោក ដើម្បីឲ្យពួកគេអាចយល់សេចក្ដីបង្រៀនអំពីបិតាលោក។ លោកមិនបានលាក់មិនឲ្យពួកគេស្គាល់បិតាលោកតាមរយៈសេចក្ដីបង្រៀនដ៏ស្មុគស្មាញដោយបង្រៀនថា ព្រះជាព្រះបីអង្គរួមជាព្រះតែមួយដែលរកយល់ពុំបាននោះទេ។
១៥. ហេតុអ្វីលោកយេស៊ូមិនទាន់ប្រាប់ព័ត៌មានខ្លះអំពីបិតាលោក?
១៥ តើលោកយេស៊ូបានបើកសម្ដែងអ្វីៗទាំងអស់ដែលលោកបានដឹងអំពីបិតាលោកឬទេ? មិនមែនទេ លោកមិនបានប្រាប់រឿងជាច្រើនដែលលោកបានដឹងនោះទេ។ (សូមអាន យ៉ូហាន ១៦:១២) ហេតុអ្វី? ពីព្រោះនៅពេលនោះ ពួកអ្នកកាន់តាមលោក«មិនអាចយល់បានឡើយ»អំពីសេចក្ដីទាំងនេះ។ ទោះជាយ៉ាងនេះក៏ដោយ ដូចលោកយេស៊ូបានពន្យល់ ចំណេះជាច្រើននឹងបានត្រូវបើកសម្ដែងពេលដែល«អ្នកជួយ»មកដល់ ពោលគឺសកម្មពលរបស់ព្រះ ដែលនឹងជួយពួកគាត់ឲ្យ«យល់សេចក្ដីពិតយ៉ាងពេញលេញ»។ (យ៉ូន. ១៦:៧, ១៣) ឪពុកម្ដាយដែលមានប្រាជ្ញា ប្រហែលជាមិនប្រាប់ព័ត៌មានខ្លះឲ្យកូនដឹងរហូតដល់កូនធំល្មមអាចយល់បាន។ ស្រដៀងគ្នាដែរ លោកយេស៊ូបានចាំរហូតដល់អ្នកកាន់តាមលោកមានភាពចាស់ទុំ ហើយអាចយល់កាន់តែច្បាស់នូវសេចក្ដីពិតអំពីបិតា។ លោកយេស៊ូបានបង្ហាញសេចក្ដីសប្បុរសដោយយល់អំពីកម្រិតសមត្ថភាពរបស់អ្នកកាន់តាមលោក។
ចូរយកតម្រាប់តាមលោកយេស៊ូដោយជួយអ្នកឯទៀតឲ្យស្គាល់ព្រះយេហូវ៉ា
១៦, ១៧. ហេតុអ្វីយើងអាចបើកសម្ដែងឲ្យអ្នកឯទៀតស្គាល់បិតា?
១៦ ពេលអ្នកស្គាល់មនុស្សម្នាក់ច្បាស់ ហើយចូលចិត្តបុគ្គលិកលក្ខណៈដែលគួរឲ្យស្រឡាញ់របស់គាត់ នេះនឹងជំរុញអ្នកឲ្យប្រាប់អ្នកឯទៀតអំពីគាត់។ ពេលដែលលោកយេស៊ូនៅលើផែនដី លោកបានប្រាប់អ្នកឯទៀតអំពីបិតារបស់លោក។ (យ៉ូន. ១៧:២៥, ២៦) តើយើងអាចយកតម្រាប់តាមលោកយេស៊ូដោយបើកសម្ដែងឲ្យអ្នកឯទៀតស្គាល់ព្រះយេហូវ៉ាឬទេ?
១៧ ដូចយើងបានពិចារណារួចហើយ លោកយេស៊ូមានចំណេះអំពីបិតាលោកច្រើនជាងអ្នកណាទាំងអស់។ ប៉ុន្តែ លោកសុខចិត្តប្រាប់រឿងខ្លះដែលលោកបានដឹង ថែមទាំងឲ្យអ្នកកាន់តាមលោកមានសមត្ថភាពយល់ដឹងយ៉ាងជ្រាលជ្រៅអំពីបុគ្គលិកលក្ខណៈរបស់ព្រះ។ ដោយមានជំនួយពីលោកយេស៊ូ នោះយើងអាចស្គាល់បិតារបស់យើងក្នុងកម្រិតមួយដែលមនុស្សជាច្រើនសព្វថ្ងៃនេះមិនស្គាល់លោក។ យើងពិតជាមានចិត្តកតញ្ញូមែនដោយសារលោកយេស៊ូសុខចិត្តបើកសម្ដែងឲ្យយើងស្គាល់បិតាលោក តាមរយៈការបង្រៀននិងការប្រព្រឹត្តរបស់លោក! តាមការពិត យើងអាចអួតយ៉ាងត្រឹមត្រូវដោយសារយើងបានស្គាល់បិតារបស់យើង។ (យេ. ៩:២៤; ១កូ. ១:៣១) ពេលដែលយើងព្យាយាមចូលទៅជិតព្រះយេហូវ៉ា នោះលោកនឹងចូលមកជិតយើងដែរ។ (យ៉ា. ៤:៨) ដូច្នេះ ឥឡូវនេះជាពេលដែលយើងត្រូវប្រាប់អ្នកឯទៀតនូវអ្វីដែលយើងដឹងអំពីព្រះយេហូវ៉ា។ តើយើងអាចធ្វើដូច្នេះតាមរបៀបណា?
១៨, ១៩. តើតាមរបៀបណាដែលអ្នកអាចបើកសម្ដែងឲ្យអ្នកឯទៀតស្គាល់បិតា? សូមពន្យល់។
១៨ យើងត្រូវយកតម្រាប់តាមលោកយេស៊ូដោយបើកសម្ដែងឲ្យអ្នកឯទៀតស្គាល់បិតា តាមរយៈពាក្យសម្ដីនិងការប្រព្រឹត្តរបស់យើង។ សូមចាំក្នុងចិត្តថា មនុស្សជាច្រើនដែលយើងជួបពេលផ្សព្វផ្សាយមិនស្គាល់ព្រះទេ។ សេចក្ដីបង្រៀនមិនពិតប្រហែលបានធ្វើឲ្យពួកគេយល់ច្រឡំអំពីព្រះ។ យើងអាចប្រាប់ពួកគេនូវអ្វីដែលយើងដឹងអំពីនាមរបស់ព្រះ គោលបំណងរបស់លោកសម្រាប់មនុស្សជាតិ និងបុគ្គលិកលក្ខណៈរបស់លោក ដែលគម្ពីរបានបើកសម្ដែងឲ្យដឹង។ បន្ថែមទៅទៀត យើងអាចពិភាក្សាជាមួយបងប្អូនរួមជំនឿនូវកំណត់ហេតុខ្លះក្នុងគម្ពីរដែលបង្ហាញអំពីបុគ្គលិកលក្ខណៈរបស់ព្រះដែលយើងមិនបានយល់ពីមុន។ ការពិភាក្សាបែបនេះប្រហែលជាធ្វើឲ្យពួកគាត់ទទួលការលើកទឹកចិត្ត។
១៩ យើងគួរយកតម្រាប់តាមលោកយេស៊ូ ហើយបើកសម្ដែងឲ្យស្គាល់បិតាតាមរយៈការប្រព្រឹត្តរបស់យើង។ ពេលមនុស្សឃើញសេចក្ដីស្រឡាញ់របស់គ្រិស្ត តាមរយៈការប្រព្រឹត្តរបស់យើង នោះពួកគេនឹងចូលទៅជិតព្រះយេហូវ៉ានិងលោកយេស៊ូដែរ។ (អេភ. ៥:១, ២) សាវ័កប៉ូលបានលើកទឹកចិត្តយើងឲ្យ‹យកតម្រាប់តាមគាត់ ដូចគាត់យកតម្រាប់តាមគ្រិស្ត›។ (១កូ. ១១:១) យើងពិតជាមានឯកសិទ្ធិដ៏អស្ចារ្យមែន! ក្នុងការជួយមនុស្សឲ្យឃើញព្រះយេហូវ៉ាតាមរយៈការប្រព្រឹត្តរបស់យើង។ សូមឲ្យយើងទាំងអស់គ្នាបន្តយកតម្រាប់តាមលោកយេស៊ូ ដោយបើកសម្ដែងឲ្យអ្នកឯទៀតស្គាល់បិតា។