ហោរាសាស្ត្រនិងការទស្សន៍ទាយ—តើឆ្លុះបញ្ចាំងអំពីអនាគតឬទេ?
ហោរាសាស្ត្រ
ហោរាសាស្ត្រគឺជាក្បួនគន់គូរទស្សន៍ទាយថាផ្កាយ ព្រះចន្ទ និងភពនានាមានឥទ្ធិពលយ៉ាងខ្លាំងមកលើជីវិតរបស់មនុស្សនៅលើផែនដី។ ពួកហោរាសាស្ត្រអះអាងថាទីតាំងនៃភពនិងផ្កាយទាំងនោះបញ្ជាក់អំពីចរិតលក្ខណៈនិងអនាគតរបស់មនុស្ស។
ទោះជាឫសគល់នៃហោរាសាស្ត្រមានប្រភពមកពីក្រុងបាប៊ីឡូនសម័យបុរាណក្ដី តែវានៅតែពេញនិយម។ យោងទៅតាមការស្ទង់មតិកាលពីឆ្នាំ២០១២នៅសហរដ្ឋអាម៉េរិក ៣៣ភាគរយនៃមនុស្សជឿថាហោរាសាស្ត្រ«ស្របតាមវិទ្យាសាស្ត្រខ្លះដែរ» ហើយ១០ភាគរយថា«ស្របតាមវិទ្យាសាស្ត្រទាំងស្រុង»។ តើពិតទេ? គឺមិនមែនទេ។ សូមពិចារណាមូលហេតុដូចតទៅ។
ភពនិងផ្កាយមិនបញ្ចេញថាមពលដែលមានឥទ្ធិពលលើមនុស្សដូចដែលពួកហោរាសាស្ត្រនិយាយនោះទេ។
ការព្យាករណ៍ភាគច្រើនគឺទូលំទូលាយណាស់បានជាអាចសំដៅលើអ្នកណាក៏បាន។
សព្វថ្ងៃនេះ ការគន់គូរហោរាសាស្ត្រគឺស្របទៅតាមជំនឿសម័យបុរាណដែលថាភពក្នុងប្រព័ន្ធព្រះអាទិត្យវិលជុំវិញផែនដី។ តែតាមពិត ភពទាំងនោះវិលជុំវិញព្រះអាទិត្យ។
ពួកហោរាផ្សេងៗព្យាករណ៍ខុសគ្នាចំពោះបុគ្គលម្នាក់។
ហោរាសាស្ត្របែងចែកមនុស្សក្នុង១២ក្រុម ឬចក្ររាសី យោងទៅតាមថ្ងៃខែឆ្នាំកំណើតរបស់ពួកគេ។ ដោយសារទីតាំងផែនដីក្នុងលំហផ្លាស់ប្ដូរពីមួយសតវត្សរ៍ទៅមួយសតវត្សរ៍ នោះឆ្នាំសត្វនានាក្នុងហោរាសាស្ត្រលែងស្របតាមពេលវេលាដែលព្រះអាទិត្យធ្វើដំណើរកាត់កញ្ចុំផ្កាយដែលជាតំណាងសត្វទាំងនោះ។
គេនិយាយថាសត្វនានាទាំងនោះក្នុងចក្ររាសីប្រាប់ឲ្យដឹងអំពីចរិតលក្ខណៈរបស់មនុស្ស។ តែតាមពិត មនុស្សដែលមានថ្ងៃខែឆ្នាំកំណើតដូចគ្នាមិនមានចរិតលក្ខណៈដូចគ្នាទេ ដូច្នេះថ្ងៃខែឆ្នាំកំណើតមិនបានបង្ហាញអំពីចរិតលក្ខណៈរបស់មនុស្សទេ។ ជាជាងមើលធាតុពិតរបស់មនុស្ស ពួកហោរាសាស្ត្រវិនិច្ឆ័យមនុស្សថាមានចរិតនិងបុគ្គលិកលក្ខណៈបែបណាតាមរយៈការសន្និដ្ឋានទៅលើថ្ងៃខែឆ្នាំកំណើតរបស់ពួកគេ។ នេះជាការរើសអើងមួយ មែនទេ?
ការទស្សន៍ទាយ
តាំងពីសម័យបុរាណ មនុស្សជាច្រើនទៅជួបគ្រូទាយ។ ពួកហោរាសាស្ត្រខ្លះខំទាយដោយមើលអ្វីផ្សេងៗដូចជាគ្រឿងក្នុងរបស់សត្វនិងរបស់មនុស្ស ឬរបៀបដែលមាន់ចិកចំណីជាដើម។ ខ្លះទៀតទាយអំពីអនាគតដោយប្រើស្លឹកតែឬគ្រាប់កាហ្វេ។ សព្វថ្ងៃនេះ ពួកហោរាសាស្ត្រប្រើសន្លឹកបៀ គ្រាប់ឡុកឡាក់ និងវិធីសាស្ត្រឯទៀតដើម្បីទាយអំពីអនាគតរបស់អ្នកណាម្នាក់។ តើការទស្សន៍ទាយជាវិធីដ៏គួរឲ្យទុកចិត្តដើម្បីដឹងអំពីអនាគតឬទេ? មិនមែនទេ។ ហេតុអ្វី? សូមពិចារណាមូលហេតុ។
សូមគិតពិចារណាអំពីបញ្ហាការព្យាករណ៍ដែលមិនស្របគ្នា។ ការទស្សន៍ទាយតាមវិធីផ្សេងៗច្រើនតែចេញមកមិនស្របគ្នា។ សូម្បីតែពេលប្រើវិធីតែមួយក៏ដោយ តែទំនាយខុសគ្នា។ ជាឧទាហរណ៍ បើបុគ្គលម្នាក់សុំគ្រូទាយពីរនាក់ឲ្យទាយសន្លឹកបៀអំពីអនាគតរបស់គាត់ ចម្លើយគួរតែស្របគ្នា ប៉ុន្តែផ្ទុយទៅវិញច្រើនតែខុសគ្នា។
វិធីដែលគ្រូទាយប្រើឬបំណងចិត្តរបស់ពួកគេមិនគួរឲ្យទុកចិត្តនោះទេ។ អ្នករិះគន់និយាយថាសន្លឹកបៀនិងរបស់ផ្សេងទៀតគ្រាន់តែជាអ្វីដើម្បីបំបែរអារម្មណ៍របស់មនុស្សប៉ុណ្ណោះ ហើយថាគ្រូទាយមើលតាមប្រតិកម្មរបស់មនុស្សជាជាងមើលរបស់របរទាំងនោះ។ ជាឧទាហរណ៍ គ្រូទាយដែលប៉ិនប្រសប់នឹងសួរសំណួរទូទៅ ហើយសង្កេតមើលយ៉ាងយកចិត្តទុកដាក់នូវកាយវិការ ហើយស្ដាប់ពាក្យសម្ដីដើម្បីដឹងអ្វីមួយអំពីភ្ញៀវ។ គ្រូទាយនឹងអះអាងថាខ្លួនដឹងហេតុការណ៍និងស្ថានភាពរបស់ភ្ញៀវ តែតាមពិតភ្ញៀវនោះបានបញ្ជាក់ដោយមិនដឹងខ្លួន។ ដោយសារភ្ញៀវទុកចិត្តគ្រូទាយ គ្រូទាយខ្លះអាចបោកលុយជាច្រើនពីភ្ញៀវទាំងនោះ។
តើគម្ពីរប្រាប់យើងយ៉ាងណា?
ហោរាសាស្ត្រនិងការទស្សន៍ទាយខំអះអាងថាអនាគតរបស់យើងគឺបានត្រូវកំណត់ទុកជាមុន។ តែតើជាការពិតទេ? គម្ពីរប្រាប់យើងថាយើងមានសមត្ថភាពសម្រេចចិត្តថាចង់ជឿទៅលើអ្វីឬចង់ធ្វើអ្វី ហើយថាការសម្រេចចិត្តរបស់យើងមានឥទ្ធិពលទៅលើអនាគតរបស់យើង។—យ៉ូស្វេ ២៤:១៥
អ្នកគោរពប្រណិប័តន៍ព្រះពិត មានមូលហេតុផ្សេងទៀតដែលពួកគេជៀសវាងពីហោរាសាស្ត្រនិងការទស្សន៍ទាយ។ មូលហេតុនោះគឺព្រះផ្ដន្ទាទោសចំពោះអ្វីទាំងនោះ។ យើងអាចឃើញពាក្យនេះក្នុងគម្ពីរដែលថា៖ «ក្នុងចំណោមអ្នករាល់គ្នា មិនត្រូវឲ្យមាន . . . ការទស្សន៍ទាយ ឬមានគ្រូវេទមន្ត គ្រូមើលប្រផ្នូល គ្រូធ្មប់ គ្រូដាក់អំពើណាឡើយ។ អ្នករាល់គ្នាក៏មិនត្រូវទៅរកគ្រូខាប គ្រូទាយ ឬគ្រូអន្ទងខ្មោចដែរ។ ព្រោះអ្នកដែលប្រព្រឹត្តអំពើទាំងនេះ គឺជាទីស្អប់ខ្ពើមដល់ព្រះយេហូវ៉ាណាស់»។a—ការបំភ្លឺច្បាប់ ១៨:១០-១២
a យេហូវ៉ាជានាមរបស់‹ព្រះដែលខ្ពង់ខ្ពស់បំផុតលើផែនដីទាំងមូល›។—ចម្រៀងសរសើរព្រះ ៨៣:១៨