អត្ថបទសិក្សា ៤១
ចូររក្សាភាពស្មោះត្រង់ក្នុងអំឡុងគ្រា«ទុក្ខវេទនាជាខ្លាំង»
«ព្រះយេហូវ៉ាទ្រង់ការពារមនុស្សស្មោះត្រង់»។—ទំនុក. ៣១:២៣
ចម្រៀងលេខ១២៩ យើងនឹងស៊ូទ្រាំ
សេចក្ដីសង្ខេបa
១-២. (ក) មិនយូរទៀត តើពួកអ្នកដឹកនាំក្នុងពិភពលោកនឹងប្រកាសអ្វី? (ខ) តើមានសំណួរអ្វីខ្លះដែលត្រូវឆ្លើយ?
សូមស្រមៃគិតថា ពួកអ្នកដឹកនាំក្នុងពិភពលោកបានប្រកាសថា«មានសន្ដិភាពនិងសន្ដិសុខហើយ»ដូចដែលគម្ពីរបានប្រាប់ទុកជាមុន។ ពួកគេប្រហែលជាអួតថា ពិភពលោកមានសេចក្ដីសុខសាន្តដែលមិនធ្លាប់មាន។ ពួកអ្នកដឹកនាំទាំងនោះនឹងចង់ឲ្យយើងគិតថាពួកគេអាចដោះស្រាយបញ្ហាទាំងអស់របស់ពិភពលោកបាន។ ប៉ុន្តែពួកគេគ្មានសមត្ថភាពបញ្ឈប់អ្វីដែលនឹងកើតឡើងបន្ទាប់មកឡើយ! ហេតុអ្វី? ពីព្រោះគម្ពីរប្រាប់ទុកជាមុនថា ក្រោយពីពួកគេប្រកាសដូច្នោះ «នោះស្រាប់តែសេចក្ដីហិនវិនាសនឹងកើតមានដល់ពួកគេភ្លាម . . . ពួកគេនឹងគេចមិនផុតឡើយ»។—១ថែ. ៥:៣
២ មានសំណួរសំខាន់ខ្លះដែលត្រូវឆ្លើយដូចជា៖ តើអ្វីនឹងកើតឡើងក្នុងអំឡុងគ្រា«ទុក្ខវេទនាជាខ្លាំង»? តើព្រះយេហូវ៉ានឹងតម្រូវឲ្យយើងធ្វើអ្វីនៅពេលនោះ? តើយើងអាចត្រៀមខ្លួនយ៉ាងដូចម្ដេចនៅឥឡូវនេះ ដើម្បីរក្សាភាពស្មោះត្រង់ក្នុងអំឡុងគ្រាទុក្ខវេទនាជាខ្លាំង?—ម៉ាថ. ២៤:២១
តើអ្វីនឹងកើតឡើងក្នុងអំឡុងគ្រា«ទុក្ខវេទនាជាខ្លាំង»?
៣. យោងទៅតាមការបើកបង្ហាញ ១៧:៥, ១៥-១៨ តើព្រះនឹងបំផ្លាញ«បាប៊ីឡូនដ៏ខ្លាំងក្លា»យ៉ាងដូចម្ដេច?
៣ សូមអាន ការបើកបង្ហាញ ១៧:៥, ១៥-១៨។ «បាប៊ីឡូនដ៏ខ្លាំងក្លា»នឹងត្រូវបំផ្លាញចោល! ដូចបានត្រូវរៀបរាប់នៅខាងលើ ពួកអ្នកដឹកនាំក្នុងពិភពលោកមិនអាចទប់ស្កាត់អ្វីដែលនឹងកើតឡើងនៅគ្រានោះបានឡើយ។ ហេតុអ្វី? ពីព្រោះ«ព្រះ[នឹង]បណ្ដាលចិត្តពួកគេឲ្យធ្វើតាមគំនិតរបស់លោក»។ តើគំនិតនោះជាអ្វី? គឺបំផ្លាញសាសនាមិនពិតទាំងអស់នៅទូទាំងពិភពលោក រួមទាំងពិភពគ្រិស្តសាសនាbផងដែរ។ ព្រះនឹងបណ្ដាលចិត្តរបស់«ស្នែងទាំងដប់»នៃ«សត្វសាហាវមួយដែលមានសម្បុរក្រហមឆ្អៅ» ឲ្យធ្វើតាមគំនិតរបស់លោក។ ស្នែងទាំងដប់ជាតំណាងរដ្ឋាភិបាលទាំងឡាយដែលគាំទ្រ«សត្វសាហាវ»នោះ ឬអង្គការសហប្រជាជាតិ។ (បប. ១៧:៣, ១១-១៣; ១៨:៨) ពេលរដ្ឋាភិបាលទាំងនោះវាយប្រហារសាសនាមិនពិត នោះបង្ហាញថាគ្រាទុក្ខវេទនាជាខ្លាំងបានចាប់ផ្ដើមហើយ។ នោះជាព្រឹត្ដិការណ៍មួយដែលនឹងកើតឡើងភ្លាមៗ ហើយធ្វើឲ្យមនុស្សក្នុងពិភពលោកតក់ស្លុត។
៤. (ក) តើពួកអ្នកដឹកនាំក្នុងពិភពលោកប្រហែលជាមានហេតុផលអ្វីចំពោះការវាយប្រហារលើសាសនាមិនពិតទាំងឡាយ? (ខ) តើបុគ្គលដែលធ្លាប់ជាសមាជិកសាសនាទាំងនោះនឹងទំនងជានិយាយយ៉ាងណា?
៤ យើងមិនដឹងថាពួកអ្នកដឹកនាំក្នុងពិភពលោកនឹងមានហេតុផលអ្វីចំពោះការវាយប្រហារលើបាប៊ីឡូនដ៏ខ្លាំងក្លាទេ។ ពួកគេប្រហែលជានិយាយថា សាសនាគឺជាឧបសគ្គដែលរារាំងមិនឲ្យពិភពលោកមានសេចក្ដីសុខសាន្ត ហើយថាសាសនាជ្រៀតជ្រែកក្នុងរឿងនយោបាយ។ ឬពួកគេប្រហែលជានិយាយថា សាសនាប្រមូលទ្រព្យសម្បត្ដិយ៉ាងសន្ធឹកសន្ធាប់។ (បប. ១៨:៣, ៧) តាមមើលទៅ ការវាយប្រហារនេះមិនមានន័យថាសមាជិកទាំងឡាយនៃសាសនាទាំងនោះនឹងត្រូវបំផ្លាញឡើយ។ ផ្ទុយទៅវិញ ពួកអ្នកដឹកនាំក្នុងពិភពលោកនឹងបំបាត់ចោលសាសនា។ ពេលសាសនាទាំងនោះបានត្រូវបំបាត់ចោលហើយ បុគ្គលដែលធ្លាប់ជាសមាជិកសាសនាទាំងនោះ នឹងទទួលស្គាល់ថាអ្នកដឹកនាំសាសនាមិនបានធ្វើតាមពាក្យសន្យា ហើយពួកគេទំនងជានឹងនិយាយថា ពួកគេមិនជាប់ពាក់ព័ន្ធជាមួយនឹងសាសនាទាំងនោះឡើយ។
៥. តើព្រះយេហូវ៉ាបានសន្យាអ្វីអំពីគ្រាទុក្ខវេទនាជាខ្លាំង ហើយហេតុអ្វី?
៥ គម្ពីរមិនចែងថាការបំផ្លាញបាប៊ីឡូនដ៏ខ្លាំងក្លានឹងមានរយៈពេលយូរប៉ុន្មានទេ តែយើងដឹងថានោះនឹងមានរយៈពេលដ៏ខ្លី។ (បប. ១៨:១០, ២១) ព្រះយេហូវ៉ាបានសន្យាថាលោកនឹង«កាត់បន្ថយគ្រា[ទុក្ខវេទនាជាខ្លាំង]នោះឲ្យខ្លី» ដើម្បីឲ្យ«ពួកអ្នករើសតាំង»ទទួលសេចក្ដីសង្គ្រោះ ហើយឲ្យសាសនាពិតនៅតែមាន។ (ម៉ាក. ១៣:១៩, ២០) ក៏ប៉ុន្តែ តើព្រះយេហូវ៉ានឹងតម្រូវឲ្យយើងធ្វើអ្វីរវាងការចាប់ផ្ដើមនៃគ្រាទុក្ខវេទនាជាខ្លាំងនិងសង្គ្រាមហាម៉ាគេដូន?
ចូរកាន់ខ្ជាប់តាមការគោរពប្រណិប័តន៍ពិត
៦. ហេតុអ្វីយើងមិនគ្រាន់តែត្រូវញែកខ្លួនចេញពីសាសនាមិនពិតប៉ុណ្ណោះ?
៦ ដូចដែលបានត្រូវរៀបរាប់ក្នុងអត្ថបទមុន ព្រះយេហូវ៉ាតម្រូវឲ្យអ្នកគោរពប្រណិប័តន៍លោកញែកខ្លួនចេញពីបាប៊ីឡូនដ៏ខ្លាំងក្លា។ លើសពីនេះទៀត យើងក៏ត្រូវតាំងចិត្តកាន់ខ្ជាប់តាមសាសនាពិត ពោលគឺការគោរពប្រណិប័តន៍ពិតរបស់ព្រះយេហូវ៉ា។ សូមពិចារណាអំពីរបៀបពីរយ៉ាងដែលយើងអាចធ្វើដូច្នេះ។
សូមយើងកុំគេចវេះពីការប្រជុំគ្នា សូម្បីតែក្នុងគ្រាដ៏ពិបាកក្ដី (សូមមើលវគ្គ៧)f
៧. (ក) តើយើងអាចកាន់ខ្ជាប់តាមខ្នាតតម្រាសីលធម៌ដ៏សុចរិតរបស់ព្រះយេហូវ៉ាយ៉ាងដូចម្ដេច? (ខ) តើហេប្រឺ ១០:២៤, ២៥ បញ្ជាក់យ៉ាងណាអំពីសារៈសំខាន់នៃការជួបជុំគ្នា ជាពិសេសនៅឥឡូវនេះ?
៧ ទី១ យើងត្រូវកាន់ខ្ជាប់តាមខ្នាតតម្រាសីលធម៌ដ៏សុចរិតរបស់ព្រះយេហូវ៉ា។ យើងមិនព្រមទទួលខ្នាតតម្រារបស់ពិភពលោកនេះទេ។ ជាឧទាហរណ៍ យើងមិនពេញចិត្តឡើយចំពោះអំពើប្រាសចាកសីលធម៌ខាងផ្លូវភេទគ្រប់បែបយ៉ាង រួមទាំងការរៀបអាពាហ៍ពិពាហ៍រវាងមនុស្សដែលមានភេទដូចគ្នា និងការមានទំនាក់ទំនងស្នេហាជាមួយមនុស្សដែលមានភេទដូចគ្នា។ (ម៉ាថ. ១៩:៤, ៥; រ៉ូម ១:២៦, ២៧) ទី២ យើងត្រូវបន្តគោរពប្រណិប័តន៍ព្រះជាមួយនឹងគ្រិស្តសាសនិកពិតឯទៀត។ យើងធ្វើដូច្នេះនៅកន្លែងណាដែលយើងអាចធ្វើបាន ទោះជានៅឯសាលប្រជុំ ឬក៏ពេលចាំបាច់ នៅក្នុងផ្ទះរបស់សាក្សីឯទៀត ឬថែមទាំងធ្វើដោយលួចលាក់ក្ដី។ មិនថាមានរឿងអ្វីកើតឡើងក៏ដោយ យើងនឹងមិនឈប់ទៅកិច្ចប្រជុំឡើយ។ តាមពិត យើងត្រូវជួបជុំគ្នា«កាន់តែខ្លាំងឡើងពេលដែល[យើង]ឃើញថ្ងៃនោះកាន់តែខិតចូលមកដល់»។—សូមអាន ហេប្រឺ ១០:២៤, ២៥
៨. តើដំណឹងដែលយើងផ្សាយទំនងជានឹងត្រូវផ្លាស់ប្ដូរយ៉ាងដូចម្ដេចនៅពេលអនាគត?
៨ ក្នុងអំឡុងគ្រាទុក្ខវេទនាជាខ្លាំង ដំណឹងដែលយើងផ្សាយទំនងជានឹងត្រូវផ្លាស់ប្ដូរ។ នៅសព្វថ្ងៃនេះ យើងកំពុងផ្សព្វផ្សាយដំណឹងល្អអំពីរាជាណាចក្រព្រះ ហើយយើងក៏ព្យាយាមជួយអ្នកឯទៀតឲ្យក្លាយទៅជាអ្នកកាន់តាមលោកយេស៊ូ។ ប៉ុន្តែនៅថ្ងៃអនាគត យើងប្រហែលជានឹងផ្សព្វផ្សាយអំពីដំណឹងមួយយ៉ាងចំៗ។ គម្ពីរប្រដូចដំណឹងនោះទៅនឹងដុំព្រិល។ (បប. ១៦:២១) យើងប្រហែលជានឹងផ្សព្វផ្សាយថាឆាប់ៗនេះ ពិភពលោកសាថាននឹងត្រូវបំផ្លាញចោលគ្មានសេសសល់។ មិនយូរមិនឆាប់ យើងនឹងដឹងច្បាស់ថាយើងត្រូវផ្សព្វផ្សាយដំណឹងអ្វី និងរបៀបដែលយើងនឹងផ្សព្វផ្សាយដំណឹងនោះ។ តើយើងនឹងប្រើវិធីផ្សព្វផ្សាយនិងបង្រៀនអ្នកឯទៀត ដូចដែលយើងធ្លាប់ប្រើអស់មួយរយឆ្នាំជាងឬទេ? ឬតើយើងនឹងប្រើវិធីផ្សេងទៀតវិញ? យើងមិនទាន់ដឹងទេ។ ទោះជាយើងផ្សព្វផ្សាយតាមរបៀបណាក៏ដោយ តាមមើលទៅយើងនឹងមានឯកសិទ្ធិប្រកាសផ្សាយដោយចិត្តអង់អាចអំពីការវិនិច្ឆ័យរបស់ព្រះយេហូវ៉ា!—អេស. ២:៣-៥
៩. តើប្រជាជាតិនានាប្រហែលជាមានប្រតិកម្មយ៉ាងណាចំពោះដំណឹងដែលយើងផ្សាយ ប៉ុន្តែតើយើងអាចប្រាកដអំពីអ្វី?
៩ ដំណឹងដែលយើងផ្សាយទំនងជានឹងបណ្ដាលឲ្យប្រជាជាតិនានាខំអស់ពីសមត្ថភាព ដើម្បីបញ្ឈប់កិច្ចបម្រើផ្សាយរបស់យើងតែម្ដង។ ដូចដែលយើងពឹងផ្អែកលើព្រះយេហូវ៉ាឲ្យគាំទ្រយើងក្នុងកិច្ចបម្រើផ្សាយនៅឥឡូវនេះ យើងក៏នឹងត្រូវការការគាំទ្រពីលោកនៅពេលនោះដែរ។ យើងអាចប្រាកដថា ព្រះរបស់យើងនឹងផ្ដល់កម្លាំងឲ្យយើងយ៉ាងបរិបូរ ដើម្បីសម្រេចគោលបំណងរបស់លោក។—មីកា ៣:៨
ចូរត្រៀមខ្លួនចំពោះការវាយប្រហារលើរាស្ត្រព្រះ
១០. ដូចបានប្រាប់ទុកជាមុននៅលូកា ២១:២៥-២៨ តើមនុស្សភាគច្រើននឹងមានអារម្មណ៍យ៉ាងណាចំពោះអ្វីដែលកើតឡើងក្នុងអំឡុងគ្រាទុក្ខវេទនាជាខ្លាំង?
១០ សូមអាន លូកា ២១:២៥-២៨។ ក្នុងអំឡុងគ្រាទុក្ខវេទនាជាខ្លាំង មនុស្សនឹងតក់ស្លុតកាលដែលពួកគេឃើញអ្វីៗដែលពួកគេធ្លាប់គិតថានឹងនៅគង់វង្ស តែបែរជាចាប់ផ្ដើមឈានទៅរកការវិនាសសាបសូន្យទៅវិញ។ ពួកគេនឹង«មានទុក្ខ» ហើយខ្លាចថាពួកគេនឹងបាត់បង់ជីវិតក្នុងអំឡុងគ្រាដ៏លំបាកបំផុតក្នុងប្រវត្ដិសាស្ត្ររបស់មនុស្ស។ (សេផ. ១:១៤, ១៥) នៅពេលនោះ សូម្បីតែរាស្ត្ររបស់ព្រះយេហូវ៉ាក៏ទំនងជានឹងជួបការពិបាកកាន់តែច្រើនក្នុងជីវិតដែរ។ ដោយសារយើងមិនរួមចំណែកក្នុងពិភពលោក នោះយើងប្រហែលជានឹងរងទុក្ខលំបាកខ្លះ។ យើងប្រហែលជានឹងមិនមានអ្វីមួយចំនួនដែលយើងត្រូវការនោះទេ។
១១. (ក) ហេតុអ្វីមនុស្សឯទៀតនឹងផ្ដោតអារម្មណ៍ទៅលើសាក្សីព្រះយេហូវ៉ា? (ខ) ហេតុអ្វីយើងមិនចាំបាច់ភ័យខ្លាចចំពោះគ្រាទុក្ខវេទនាជាខ្លាំង?
១១ នៅពេលមួយ ក្រោយពីសាសនាមិនពិតទាំងឡាយបានត្រូវបំផ្លាញចោលអស់ហើយ នោះសមាជិកសាសនាទាំងនោះប្រហែលជាមានចិត្តក្ដៅក្រហាយ ដោយសារមានតែសាក្សីព្រះយេហូវ៉ាប៉ុណ្ណោះដែលនៅបន្តសកម្មភាពសាសនារបស់ខ្លួន។ យើងអាចស្រមៃឃើញថា ពួកគេទំនងជាខឹងខ្លាំងដល់ម្ល៉េះ បានជាពួកគេផ្សាយអំពីយើងតាមវិធីផ្សេងៗ ដូចជាតាមបណ្ដាញគេហទំព័រសម្រាប់ទាក់ទងគ្នាជាដើម។ ប្រជាជាតិនានានិងសាថានដែលជាអ្នកគ្រប់គ្រងរបស់ពួកគេ នឹងស្អប់យើងដោយសារមានតែសាសនាយើងប៉ុណ្ណោះដែលនៅស្ថិតស្ថេរ។ ពួកគេនឹងមិនបានសម្រេចគោលដៅរបស់ពួកគេក្នុងការបំផ្លាញចោលសាសនាទាំងអស់ឲ្យសូន្យបាត់ពីផែនដីទេ។ ដូច្នេះ ពួកគេនឹងផ្ដោតអារម្មណ៍មកលើយើង។ នៅពេលនោះ ប្រជាជាតិនានានឹងទៅជាកូកនៃស្រុកម៉ាកូក។c ពួកគេនឹងប្រមូលគ្នាវាយប្រហាររាស្ត្ររបស់ព្រះយេហូវ៉ាដោយអស់ពីសមត្ថភាព។ (អេស. ៣៨:២, ១៤-១៦) យើងប្រហែលជាចាប់ផ្ដើមព្រួយបារម្ភអំពីអ្វីដែលអាចកើតឡើងក្នុងអំឡុងគ្រាទុក្ខវេទនាជាខ្លាំង ជាពិសេសដោយសារយើងមិនដឹងព័ត៌មានល្អិតល្អន់អំពីរឿងនោះឡើយ។ ទោះជាយ៉ាងនេះក្ដី អ្វីមួយដែលយើងអាចប្រាកដ គឺយើងមិនចាំបាច់ភ័យខ្លាចចំពោះគ្រាទុក្ខវេទនាជាខ្លាំងទេ។ ព្រះយេហូវ៉ានឹងផ្ដល់ឲ្យយើងនូវការណែនាំដែលអាចសង្គ្រោះជីវិតយើង។ (ទំនុក. ៣៤:១៩) យ៉ាងនេះ យើងនឹងអាច«ឈរឲ្យត្រង់ខ្លួនហើយងើបមុខឡើង» ព្រោះយើងដឹងថា«សេចក្ដីសង្គ្រោះរបស់[យើង]គឺជិតដល់ហើយ»។d
១២. តើ«ខ្ញុំបម្រើដ៏ស្មោះត្រង់ហើយចេះពិចារណា»បានជួយយើងឲ្យត្រៀមខ្លួនចំពោះអ្វីដែលនឹងកើតឡើងនៅថ្ងៃអនាគតយ៉ាងដូចម្ដេច?
១២ «ខ្ញុំបម្រើដ៏ស្មោះត្រង់ហើយចេះពិចារណា»បានជួយយើងឲ្យត្រៀមខ្លួន ដើម្បីរក្សាភាពស្មោះត្រង់ក្នុងអំឡុងគ្រាទុក្ខវេទនាជាខ្លាំង។ (ម៉ាថ. ២៤:៤៥) ពួកគាត់ធ្វើដូច្នេះតាមរបៀបជាច្រើន ដូចជាកម្មវិធីមហាសន្និបាតរបស់យើងពីឆ្នាំ២០១៦-២០១៨ជាដើម។ តាមរយៈកម្មវិធីទាំងនោះ យើងបានទទួលការលើកទឹកចិត្តឲ្យពង្រឹងគុណសម្បត្ដិដែលយើងត្រូវការ កាលដែលថ្ងៃរបស់ព្រះយេហូវ៉ាកាន់តែជិតមកដល់។ សូមយើងសង្ខេបឡើងវិញអំពីគុណសម្បត្ដិទាំងនេះ។
ចូរមានភក្ដីភាព ការស៊ូទ្រាំ និងចិត្តក្លាហានកាន់តែខ្លាំងឡើង
ចូរត្រៀមខ្លួនឥឡូវនេះដើម្បីរួចជីវិត នៅគ្រា«ទុក្ខវេទនាជាខ្លាំង» (សូមមើលវគ្គ១៣-១៦)g
១៣. តើតាមរបៀបណាយើងអាចមានភក្ដីភាពចំពោះព្រះយេហូវ៉ាកាន់តែខ្លាំងឡើង ហើយហេតុអ្វីយើងត្រូវធ្វើដូច្នេះនៅឥឡូវនេះ?
១៣ ភក្ដីភាព: កម្មវិធីមហាសន្និបាតឆ្នាំ២០១៦មានប្រធានថា «ចូររក្សាភក្ដីភាពចំពោះព្រះយេហូវ៉ា!»។ កម្មវិធីនោះបង្រៀនយើងថា បើយើងមានចំណងមិត្តភាពរឹងមាំជាមួយនឹងព្រះយេហូវ៉ា យើងនឹងរក្សាភក្ដីភាពចំពោះលោក។ យើងបានត្រូវរំលឹកថា យើងអាចចូលទៅជិតព្រះយេហូវ៉ា តាមរយៈសេចក្ដីអធិដ្ឋានដ៏ស្មោះអស់ពីចិត្ត និងការសិក្សាបណ្ដាំរបស់លោកដោយចិត្តខ្នះខ្នែង។ ការធ្វើដូច្នេះផ្ដល់កម្លាំងឲ្យយើងយកឈ្នះការពិបាកផ្សេងៗ សូម្បីតែការពិបាកធំៗក៏ដោយ។ កាលដែលរបៀបរបបពិភពលោកសាថានកាន់តែជិតមកដល់ទីបញ្ចប់ យើងអាចរំពឹងថាយើងនឹងប្រឈមមុខនឹងស្ថានភាពផ្សេងៗ ដែលធ្វើឲ្យយើងកាន់តែពិបាករក្សាភក្ដីភាពចំពោះព្រះ និងចំពោះរាជាណាចក្ររបស់លោក។ យើងទំនងជានឹងត្រូវគេចំអកឡកឡឺយ។ (២ពេ. ៣:៣, ៤) នេះគឺដោយសារតែយើងមិនគាំទ្រពិភពលោករបស់សាថានក្នុងរឿងផ្សេងៗឡើយ។ យើងត្រូវមានភក្ដីភាពកាន់តែខ្លាំងឡើងនៅឥឡូវនេះ ដើម្បីយើងនឹងនៅតែមានភក្ដីភាពក្នុងអំឡុងគ្រាទុក្ខវេទនាជាខ្លាំង។
១៤. (ក) តើនឹងមានការផ្លាស់ប្ដូរអ្វីស្តីអំពីបងប្រុសៗដែលជាអ្នកនាំមុខរាស្ត្ររបស់ព្រះ? (ខ) ហេតុអ្វីយើងត្រូវមានភក្ដីភាពនៅពេលនោះ?
១៤ ក្នុងអំឡុងគ្រាទុក្ខវេទនាជាខ្លាំង នឹងមានការផ្លាស់ប្ដូរស្តីអំពីបងប្រុសៗដែលជាអ្នកនាំមុខរាស្ត្ររបស់ព្រះ។ នៅពេលមួយ អស់អ្នកដែលព្រះបានរើសតាំងដែលនៅសល់នៅផែនដី នឹងត្រូវប្រមូលយកទៅស្ថានសួគ៌ ដើម្បីរួមចំណែកក្នុងសង្គ្រាមហាម៉ាគេដូន។ (ម៉ាថ. ២៤:៣១; បប. ២:២៦, ២៧) នេះមានន័យថានឹងលែងមានគណៈអភិបាលនៅផែនដីជាមួយយើងទៀត។ ទោះជាយ៉ាងនេះក៏ដោយ មនុស្សមួយក្រុមធំនឹងនៅតែមានរបៀបរៀបរយ។ បងប្រុសៗដែលមានគុណសម្បត្ដិគ្រប់គ្រាន់ពីក្នុងចំណោមចៀមឯទៀតនឹងធ្វើជាអ្នកនាំមុខវិញ។ យើងនឹងត្រូវបង្ហាញថាយើងមានភក្ដីភាពចំពោះព្រះយេហូវ៉ា ដោយគាំទ្របងប្រុសទាំងនោះ និងដោយធ្វើតាមការណែនាំដែលពួកគេទទួលពីព្រះ។ យើងត្រូវធ្វើតាមការណែនាំរបស់ពួកគេ បើយើងចង់រួចជីវិត!
១៥. តើយើងអាចបង្កើនសមត្ថភាពស៊ូទ្រាំរបស់យើងយ៉ាងដូចម្ដេច ហើយហេតុអ្វីគឺសំខាន់ដែលយើងធ្វើដូច្នេះនៅឥឡូវនេះ?
១៥ ការស៊ូទ្រាំ: កម្មវិធីមហាសន្និបាតឆ្នាំ២០១៧មានប្រធានថា «ចូរកុំឈប់ព្យាយាម!»។ កម្មវិធីនោះបានជួយយើងឲ្យកាន់តែចេះស៊ូទ្រាំនឹងទុក្ខលំបាក។ យើងបានរៀនថាការចេះស៊ូទ្រាំមិនអាស្រ័យទៅលើស្ថានភាពល្អទេ។ យើងអាចបង្កើនសមត្ថភាពស៊ូទ្រាំរបស់យើងដោយពឹងផ្អែកលើព្រះយេហូវ៉ា។ (រ៉ូម ១២:១២) សូមយើងចាំជានិច្ចអំពីសេចក្ដីសន្យារបស់លោកយេស៊ូ ដែលថា៖ «អ្នកណាដែលស៊ូទ្រាំរហូតដល់ទីបញ្ចប់ អ្នកនោះនឹងត្រូវសង្គ្រោះ»។ (ម៉ាថ. ២៤:១៣) សេចក្ដីសន្យានេះមានន័យថាយើងត្រូវរក្សាភាពស្មោះត្រង់ ទោះជាយើងជួបទុក្ខលំបាកណាក៏ដោយ។ បើយើងស៊ូទ្រាំនឹងទុក្ខលំបាកទាំងអស់របស់យើងនៅឥឡូវនេះ ជំនឿរបស់យើងនឹងកាន់តែមាំមួន មុនគ្រាទុក្ខវេទនាជាខ្លាំងចាប់ផ្ដើម។
១៦. តើអ្វីធ្វើឲ្យយើងមានចិត្តក្លាហាន ហើយតើយើងអាចមានចិត្តក្លាហានកាន់តែខ្លាំងនៅឥឡូវនេះតាមរបៀបណា?
១៦ ចិត្តក្លាហាន: កម្មវិធីមហាសន្និបាតឆ្នាំ២០១៨មានប្រធានថា «ចូរ‹មានចិត្តក្លាហាន›!»។ កម្មវិធីនោះរំលឹកយើងថាយើងមានចិត្តក្លាហានមិនមែនដោយសារសមត្ថភាពរបស់យើងនោះទេ។ ដូចការស៊ូទ្រាំដែរ ចិត្តក្លាហានពិតប្រាកដគឺមកពីការពឹងផ្អែកលើព្រះយេហូវ៉ា។ តើយើងអាចពឹងផ្អែកលើលោកកាន់តែខ្លាំងឡើងយ៉ាងដូចម្ដេច? គឺដោយអានបណ្ដាំរបស់ព្រះរាល់ថ្ងៃ និងរំពឹងគិតអំពីរបៀបដែលព្រះយេហូវ៉ាបានសង្គ្រោះរាស្ត្ររបស់លោកនៅសម័យមុន។ (ទំនុក. ៦៨:២០; ២ពេ. ២:៩) ពេលដែលពួកអ្នកដឹកនាំក្នុងពិភពលោកវាយប្រហារយើងក្នុងអំឡុងគ្រាទុក្ខវេទនាជាខ្លាំង យើងនឹងត្រូវការចិត្តក្លាហាន ហើយទុកចិត្តលើព្រះយេហូវ៉ាខ្លាំងជាងពេលមុនៗទៅទៀត។ (ទំនុក. ១១២:៧, ៨; ហេ. ១៣:៦) បើយើងពឹងផ្អែកលើព្រះយេហូវ៉ានៅឥឡូវនេះ យើងនឹងមានចិត្តក្លាហានដែលយើងត្រូវការដើម្បីប្រឈមមុខនឹងការវាយប្រហាររបស់កូក។e
ចូរទន្ទឹងរង់ចាំសេចក្ដីសង្គ្រោះរបស់អ្នក
មិនយូរទៀត លោកយេស៊ូនិងកងទ័ពរបស់លោកនៅស្ថានសួគ៌នឹងធ្វើសង្គ្រាមហាម៉ាគេដូនដើម្បីបំផ្លាញសត្រូវរបស់ព្រះ! (សូមមើលវគ្គ១៧)
១៧. ហេតុអ្វីយើងមិនចាំបាច់ភ័យខ្លាចចំពោះសង្គ្រាមហាម៉ាគេដូន? (សូមមើលរូបភាពនៅក្រប)
១៧ ដូចដែលបានត្រូវរៀបរាប់នៅអត្ថបទមុន យើងភាគច្រើនបានកើតក្នុងអំឡុងគ្រាចុងក្រោយបង្អស់។ ប៉ុន្តែយើងក៏មានសេចក្ដីសង្ឃឹមរួចជីវិតនៅគ្រាទុក្ខវេទនាជាខ្លាំងដែរ។ សង្គ្រាមហាម៉ាគេដូនគឺជាទីបញ្ចប់នៃរបៀបរបបពិភពលោកនេះ។ តែយើងមិនចាំបាច់ភ័យខ្លាចឡើយ។ ហេតុអ្វី? ពីព្រោះនេះគឺជាសង្គ្រាមរបស់ព្រះយេហូវ៉ា ហើយយើងនឹងមិនចាំបាច់ប្រយុទ្ធទេ។ (សុភ. ១:៣៣; អេស. ៣៨:១៨-២០; សាក. ១៤:៣) ដោយមានបង្គាប់ពីព្រះយេហូវ៉ា លោកយេស៊ូគ្រិស្តនឹងនាំមុខកងទ័ពរបស់ព្រះក្នុងការប្រយុទ្ធ។ នៅក្បែរលោក មានអ្នករើសតាំងដែលបានត្រូវប្រោសឲ្យរស់ឡើងវិញនិងទេវតារាប់ម៉ឺនរូប។ ពួកគេនឹងរួមគ្នាច្បាំងនឹងសាថាន ពួកវិញ្ញាណកំណាចរបស់វា និងកងទ័ពរបស់ពួកវានៅផែនដី។—ដាន. ១២:១; បប. ៦:២; ១៧:១៤
១៨. (ក) តើព្រះយេហូវ៉ាបានធានាអ្វី? (ខ) តើតាមរបៀបណាការបើកបង្ហាញ ៧:៩, ១៣-១៧ ជួយអ្នកឲ្យមានទំនុកចិត្តអំពីថ្ងៃអនាគត?
១៨ ព្រះយេហូវ៉ាបានធានាថា៖ «គ្រឿងសស្ដ្រាវុធណាដែលគេធ្វើឡើង នោះគ្មានណាមួយនឹងអាចទាស់នឹងឯងបានឡើយ»។ (អេ. ៥៤:១៧) «មនុស្សមួយក្រុមធំ»ដែលជាអ្នកគោរពប្រណិប័តន៍ព្រះយេហូវ៉ាយ៉ាងស្មោះត្រង់ នឹង«ចេញផុតពីគ្រាទុក្ខវេទនាដ៏ខ្លាំង»ទាំងមានជីវិត! ពួកគេនឹងបន្តបំពេញកិច្ចបម្រើពិសិដ្ឋជូនលោក។ (សូមអាន ការបើកបង្ហាញ ៧:៩, ១៣-១៧) គម្ពីរផ្ដល់មូលហេតុជាច្រើនឲ្យយើងមានទំនុកចិត្តថា យើងនឹងទទួលសេចក្ដីសង្គ្រោះនៅថ្ងៃអនាគត! យើងដឹងថា«ព្រះយេហូវ៉ាទ្រង់ការពារមនុស្សស្មោះត្រង់»។ (ទំនុក. ៣១:២៣) អស់អ្នកដែលស្រឡាញ់និងសរសើរតម្កើងព្រះយេហូវ៉ានឹងសប្បាយចិត្ត ពេលឃើញលោកជម្រះអស់ទាំងការតិះដៀលចំពោះនាមរបស់លោក។—អេស. ៣៨:២៣
១៩. មិនយូរទៀត តើយើងនឹងមានអនាគតដ៏អស្ចារ្យបែបណា?
១៩ សូមស្រមៃគិតបើធីម៉ូថេទី២ ៣:២-៥ រៀបរាប់អំពីមនុស្សនៅក្នុងពិភពលោកថ្មីដែលមិននៅក្រោមឥទ្ធិពលរបស់សាថាន តើបទគម្ពីរនោះនឹងរៀបរាប់យ៉ាងណាវិញ? (សូមមើលប្រអប់ដែលមានចំណងជើងថា «លក្ខណៈរបស់មនុស្សនៅថ្ងៃអនាគត»)។ បងប្រុសចច ហ្គានហ្គាស ដែលបានបម្រើជាសមាជិកគណៈអភិបាល រៀបរាប់អំពីរឿងនេះថា៖ «ពេលមនុស្សទាំងអស់គឺជាបងប្អូនរួមជំនឿ នោះពិភពលោកនឹងអស្ចារ្យយ៉ាងណាទៅ! មិនយូរទៀត អ្នកនឹងមានឯកសិទ្ធិរស់នៅក្នុងរបៀបរបបពិភពលោកថ្មី។ អ្នកនឹងរស់នៅយូរអង្វែងដូចព្រះយេហូវ៉ា។ យើងនឹងរស់ជារៀងរហូត»។ នេះពិតជាសេចក្ដីសង្ឃឹមដ៏អស្ចារ្យមែន!
ចម្រៀងលេខ១២២ ចូរពង្រឹងជំហរឲ្យមាំមួនឡើង!
a យើងដឹងថាមិនយូរទៀត មនុស្សជាតិនឹងជួប«ទុក្ខវេទនាជាខ្លាំង»។ តើអ្វីនឹងកើតឡើងដល់អ្នកបម្រើព្រះយេហូវ៉ាក្នុងអំឡុងគ្រានោះ? តើព្រះយេហូវ៉ានឹងតម្រូវឲ្យយើងធ្វើអ្វី? តើយើងត្រូវមានគុណសម្បត្ដិអ្វីខ្លះឲ្យកាន់តែខ្លាំងឡើងនៅឥឡូវនេះ ដើម្បីរក្សាភាពស្មោះត្រង់ក្នុងអំឡុងគ្រាទុក្ខវេទនាជាខ្លាំង? ក្នុងអត្ថបទនេះ យើងនឹងពិចារណាអំពីចម្លើយចំពោះសំណួរទាំងនេះ។
b ការពន្យល់ពាក្យ: ពិភពគ្រិស្តសាសនាគឺជាសាសនាដែលអះអាងថាជាអ្នកកាន់តាមគ្រិស្ត តែមិនបង្រៀនមនុស្សឲ្យគោរពប្រណិប័តន៍ព្រះយេហូវ៉ាសមស្របតាមខ្នាតតម្រារបស់លោកទេ។
c ការពន្យល់ពាក្យ: ពាក្យកូកនៃស្រុកម៉ាកូក (ហៅកាត់ថា កូក) សំដៅលើប្រជាជាតិផ្សេងៗដែលចងសម្ព័ន្ធជាមួយគ្នា ដែលនឹងវាយប្រហារអ្នកគោរពប្រណិប័តន៍ព្រះយេហូវ៉ាក្នុងអំឡុងគ្រាទុក្ខវេទនាជាខ្លាំង។
d ដើម្បីទទួលព័ត៌មានថែមទៀតអំពីព្រឹត្ដិការណ៍ទាំងឡាយដែលនឹងនាំទៅដល់សង្គ្រាមហាម៉ាគេដូន សូមមើលជំពូកទី២១ ក្នុងសៀវភៅរាជាណាចក្ររបស់ព្រះចាប់ផ្ដើមគ្រប់គ្រងហើយ! ហើយដើម្បីទទួលព័ត៌មានថែមទៀតអំពីការវាយប្រហាររបស់កូកនៃស្រុកម៉ាកូក និងអំពីរបៀបដែលព្រះយេហូវ៉ានឹងការពាររាស្ត្ររបស់លោកក្នុងអំឡុងសង្គ្រាមហាម៉ាគេដូន សូមមើលទស្សនាវដ្ដីប៉មយាម ថ្ងៃទី១៥ ខែកក្កដា ឆ្នាំ២០១៥ ទំព័រ៩-១៥។
f ការពណ៌នាអំពីរូបភាព: ក្នុងអំឡុងគ្រាទុក្ខវេទនាជាខ្លាំង សាក្សីមួយក្រុមតូចជួបជុំគ្នាដោយចិត្តក្លាហាននៅក្នុងព្រៃដើម្បីធ្វើកិច្ចប្រជុំក្រុមជំនុំ។
g ការពណ៌នាអំពីរូបភាព: មនុស្សមួយក្រុមធំ ដែលជាអ្នកគោរពប្រណិប័តន៍ព្រះយេហូវ៉ាយ៉ាងស្មោះត្រង់ នឹងចេញផុតពីគ្រាទុក្ខវេទនាជាខ្លាំងដោយអរសប្បាយទាំងមានជីវិត!