របៀបរស់នៅជាគ្រិស្តសាសនិក

សូមជ្រើសរើសការកម្សាន្តរបស់អ្នកដោយឈ្លាសវៃ

ហេតុអ្វីយើងត្រូវជ្រើសរើសការកម្សាន្តដោយឈ្លាសវៃ? ពីព្រោះពេលយើងជ្រើសរើសភាពយន្តដើម្បីទស្សនា ចម្រៀងដើម្បីស្ដាប់ គេហទំព័រដើម្បីមើល សៀវភៅដើម្បីអាន ឬវីដេអូហ្គេមដើម្បីលេង យើងកំពុងជ្រើសរើសអ្វីដែលបញ្ចូលក្នុងគំនិតរបស់យើង។ ជម្រើសរបស់យើងមានឥទ្ធិពលលើការប្រព្រឹត្តរបស់យើង។ គួរឲ្យស្ដាយ ការកម្សាន្តភាគច្រើននៅសព្វថ្ងៃនេះមានផ្នែកដែលព្រះយេហូវ៉ាផ្ដន្ទាទោស។ (ទំនុក. ១១:៥; កាឡ. ៥:១៩-២១) ដោយហេតុនេះ គម្ពីរដាស់តឿនយើងឲ្យបន្តពិចារណាអ្វីៗដែលលើកកិត្ដិយសព្រះយេហូវ៉ា។—ភី. ៤:៨

សូមទស្សនាវីដេអូតើខ្ញុំគួរជ្រើសរើសការកម្សាន្តបែបណា? រួចមកឆ្លើយសំណួរដូចតទៅ៖

តើកីឡាដែលមានការប្រកួតប្រជែងដោយបង្ហូរឈាមនៅក្រុងរ៉ូមសម័យបុរាណ និងការកម្សាន្តខ្លះនៅសម័យទំនើបនេះ មានចំណុចស្រដៀងគ្នាអ្វីខ្លះ?
តើតាមរបៀបណាសមាជិកក្នុងក្រុមជំនុំអាចជួយប្អូនៗវ័យក្មេងឲ្យជ្រើសរើសការកម្សាន្តដោយឈ្លាសវៃ?
តើរ៉ូម ១២:៩ គួរមានឥទ្ធិពលយ៉ាងណាលើរបៀបដែលយើងជ្រើសរើសការកម្សាន្ត?
តើមានការកម្សាន្តណាខ្លះក្នុងតំបន់របស់អ្នក?

ការកម្សាន្តបែបមានសកម្មភាពឬការកម្សាន្តបែបគ្មានសកម្មភាព?

ការកម្សាន្តជាច្រើនដែលគេពេញនិយមនៅសព្វថ្ងៃនេះ នាំឲ្យមនុស្សទៅជាគ្មានសកម្មភាពជាជាងមានសកម្មភាព។ ភាពយន្ត សៀវភៅ និងកម្មវិធីទូរទស្សន៍បង្ហាញអំពីការច្នៃប្រឌិតរបស់មនុស្សឯទៀត មិនមែនរបស់ខ្លួនអ្នកទេ។ ទោះជាមានការកម្សាន្តបែបគ្មានសកម្មភាពក៏ដោយ មនុស្សជាច្រើនឃើញថាការកម្សាន្តបែបមានសកម្មភាពគឺមានប្រយោជន៍ជាង។ ជាឧទាហរណ៍ មនុស្សខ្លះចូលចិត្តលេងឧបករណ៍តន្ត្រី ឬគូររូប។ អ្នកខ្លះទៀតចូលចិត្តការកម្សាន្តនៅខាងក្រៅ ដូចជាលេងកីឡា ឡើងភ្នំ ឬបោះតង់ជាដើម។ មិនថាយើងជ្រើសរើសការកម្សាន្តណាក្ដី សូមយើង«ធ្វើអ្វីៗទាំងអស់ដើម្បីឲ្យព្រះទទួលការសរសើរតម្កើង»។—១កូ. ១០:៣១