អ្នកអាចជ្រើសរើសអនាគតរបស់អ្នក
ច្រើនជាង៣.៥០០ឆ្នាំមុន ព្រះយេហូវ៉ាបានប្រាប់អ្នកដែលគោរពប្រណិប័តន៍លោកអំពីអ្វីដែលពួកគេត្រូវធ្វើ ដើម្បីទទួលបានអនាគតដ៏ល្អប្រសើរ។ លោកមានប្រសាសន៍ថា៖ «ខ្ញុំបានដាក់ជីវិតនិងសេចក្ដីស្លាប់ ពរនិងបណ្ដាសានៅមុខអ្នករាល់គ្នាហើយ ដូច្នេះចូរជ្រើសយកជីវិតចុះ ដើម្បីអ្នករាល់គ្នានិងកូនចៅរបស់អ្នករាល់គ្នាអាចរស់រានមានជីវិត»។—ការបំភ្លឺច្បាប់ ៣០:១៩
ដើម្បីមានអនាគតល្អបែបនេះ ពួកគេត្រូវធ្វើការសម្រេចចិត្តដែលត្រឹមត្រូវ។ សព្វថ្ងៃនេះយើងក៏មានជម្រើសដូចគ្នាដែរ។ គម្ពីរពន្យល់អំពីរបៀបដែលយើងអាចជ្រើសរើសអនាគតដ៏ល្អប្រសើរដោយចែងថា៖ «ចូរស្រឡាញ់ព្រះយេហូវ៉ាជាព្រះនៃអ្នករាល់គ្នា ព្រមទាំងស្ដាប់តាមលោក»។—ការបំភ្លឺច្បាប់ ៣០:២០
តើយើងអាចស្រឡាញ់និងស្ដាប់ព្រះយេហូវ៉ាយ៉ាងដូចម្ដេច?
រៀនពីគម្ពីរ: ដើម្បីស្រឡាញ់ព្រះយេហូវ៉ា ដំបូងអ្នកត្រូវរៀនអំពីលោកតាមរយៈគម្ពីរ។ តាមរបៀបនេះ អ្នកនឹងឃើញថាលោកជាព្រះដែលប្រកបដោយសេចក្ដីស្រឡាញ់ ហើយចង់ឲ្យអ្នកទទួលប្រយោជន៍ច្រើនបំផុត។ លោកអញ្ជើញអ្នកឲ្យអធិដ្ឋានទៅលោក «ពីព្រោះលោករមែងគិតអំពីអ្នករាល់គ្នា»។ (ពេត្រុសទី១ ៥:៧) គម្ពីរសន្យាថាបើអ្នកព្យាយាមចូលទៅជិតលោក នោះ«លោកនឹងចូលមកជិតអ្នក»។—យ៉ាកុប ៤:៨
ធ្វើតាមអ្វីដែលអ្នករៀន: ការស្ដាប់ព្រះមានន័យថាអ្នកធ្វើតាមការណែនាំដែលប្រកបដោយប្រាជ្ញារបស់លោកដែលមាននៅក្នុងគម្ពីរ។ បើអ្នកធ្វើដូច្នេះ «អ្នកនឹងប្រព្រឹត្តដោយប្រាជ្ញា ហើយជីវិតរបស់អ្នកនឹងបានជោគជ័យ»។—យ៉ូស្វេ ១:៨