អត្ថបទសិក្សា ២១
តើសៀវភៅការបើកបង្ហាញជាប់ទាក់ទងនឹងអនាគតរបស់អ្នកយ៉ាងដូចម្ដេច?
«អាមេន! លោកម្ចាស់យេស៊ូ សូមអញ្ជើញមក»។—បប. ២២:២០
ចម្រៀងលេខ១៤២ ចូររក្សាសេចក្ដីសង្ឃឹមជានិច្ច
សេចក្ដីសង្ខេបa
១. តើមនុស្សទាំងអស់ត្រូវធ្វើការសម្រេចចិត្តដ៏សំខាន់អ្វី?
នៅសព្វថ្ងៃនេះ មនុស្សត្រូវធ្វើការសម្រេចចិត្តដ៏សំខាន់មួយ។ តើពួកគេនឹងគាំទ្រព្រះយេហូវ៉ាដែលជាអ្នកមានសិទ្ធិគ្រប់គ្រងសកលលោកនេះ ឬតើពួកគេនឹងគាំទ្រមេកំណាចសាថានដែលជាសត្រូវដ៏ឃោរឃៅរបស់លោក? មនុស្សគ្រប់រូបត្រូវជ្រើសរើសយកមួយ។ ពួកគេមិនអាចនៅកណ្ដាលបានទេ។ ពួកគេអាចរស់ជារៀងរហូតបានឬមិនបាន អាស្រ័យទៅលើការសម្រេចចិត្តរបស់ពួកគេ។ (ម៉ាថ. ២៥:៣១-៣៣, ៤៦) ក្នុងអំឡុង«គ្រាទុក្ខវេទនាជាខ្លាំង» អ្នកបម្រើស្មោះត្រង់របស់ព្រះយេហូវ៉ានឹងទទួលសញ្ញាសម្គាល់ដើម្បីរួចជីវិត។ (បប. ៧:១៤; អេគ. ៩:៤, ៦) រីឯពួកអ្នកដែលមានសញ្ញារបស់សត្វសាហាវវិញ ពួកគេនឹងត្រូវបំផ្លាញចោល។—បប. ១៤:៩-១១
២. (ក) តើហេប្រឺ ១០:៣៥-៣៩លើកទឹកចិត្តយើងឲ្យធ្វើអ្វី? (ខ) តើសៀវភៅការបើកបង្ហាញអាចជួយយើងយ៉ាងដូចម្ដេច?
២ សូមអាន ហេប្រឺ ១០:៣៥-៣៩។ បើអ្នកបានសម្រេចចិត្តគាំទ្រការគ្រប់គ្រងរបស់ព្រះយេហូវ៉ា អ្នកបានធ្វើការសម្រេចចិត្តដ៏ឈ្លាសវៃមែន! ឥឡូវ អ្នកចង់ជួយអ្នកឯទៀតឲ្យធ្វើការសម្រេចចិត្តដ៏ត្រឹមត្រូវដែរ។ យ៉ាងនេះ អ្នកអាចប្រើព័ត៌មានក្នុងសៀវភៅការបើកបង្ហាញដើម្បីជួយពួកគេ។ សៀវភៅដ៏គួរឲ្យចាប់អារម្មណ៍នេះ ប្រាប់អំពីអ្វីដែលនឹងកើតឡើងចំពោះពួកអ្នកដែលប្រឆាំងនឹងព្រះយេហូវ៉ា ប៉ុន្តែក៏ប្រាប់អំពីពរដែលពួកអ្នកគាំទ្រការគ្រប់គ្រងរបស់លោកយ៉ាងស្មោះត្រង់នឹងទទួលផងដែរ។ យើងគួរសិក្សាសេចក្ដីពិតដ៏សំខាន់ទាំងនេះ។ ការធ្វើដូច្នេះនឹងពង្រឹងការតាំងចិត្តរបស់យើងឲ្យបន្តបម្រើព្រះយេហូវ៉ា។ បន្ថែមទៅទៀត យើងអាចប្រើព័ត៌មាននេះដើម្បីជួយអ្នកឯទៀតឲ្យធ្វើការសម្រេចចិត្តត្រឹមត្រូវ និងបន្តធ្វើតាមការសម្រេចចិត្តនោះ។
៣. តើយើងនឹងពិចារណាអ្វីខ្លះក្នុងអត្ថបទនេះ?
៣ ក្នុងអត្ថបទនេះ យើងនឹងពិចារណាចម្លើយចំពោះសំណួរដូចតទៅ៖ តើអ្វីនឹងកើតឡើងចំពោះពួកអ្នកដែលគាំទ្រការគ្រប់គ្រងរបស់ព្រះ? ចុះយ៉ាងណាពួកអ្នកដែលគាំទ្រសត្វសាហាវសម្បុរក្រហមឆ្អៅដែលបានត្រូវរៀបរាប់នៅសៀវភៅការបើកបង្ហាញ តើអ្វីនឹងកើតឡើងចំពោះពួកគេ?
តើអ្វីនឹងកើតឡើងចំពោះមនុស្សដែលស្មោះត្រង់នឹងព្រះយេហូវ៉ា?
៤. តើសាវ័កយ៉ូហានឃើញក្រុមណានៅជាមួយលោកយេស៊ូនាស្ថានសួគ៌?
៤ ក្នុងការបើកបង្ហាញដែលសាវ័កយ៉ូហានបានឃើញក្នុងគំនិត គាត់ឃើញក្រុមពីរដែលគាំទ្រការគ្រប់គ្រងរបស់ព្រះយេហូវ៉ា ព្រមទាំងទទួលជីវិតដែលគ្មានទីបញ្ចប់។ ក្រុមទី១មានចំនួន១៤៤.០០០នាក់។ (បប. ៧:៤) ពួកគេបានត្រូវយកមកពីផែនដីដើម្បីធ្វើជារដ្ឋាភិបាលឬរាជាណាចក្រមួយនៅស្ថានសួគ៌ជាមួយលោកយេស៊ូ។ ពួកគេនឹងគ្រប់គ្រងមកលើផែនដីជាមួយលោក។ (បប. ៥:៩, ១០; ១៤:៣, ៤) ក្នុងការបើកបង្ហាញឲ្យឃើញក្នុងគំនិត យ៉ូហានបានឃើញពួក១៤៤.០០០នាក់និងលោកយេស៊ូឈរនៅលើភ្នំស៊ីយ៉ូននាស្ថានសួគ៌។—បប. ១៤:១
៥. មិនយូរទៀត តើអ្វីនឹងកើតឡើងដល់ពួកអ្នកដែលនៅសល់ពី១៤៤.០០០នាក់?
៥ តាំងពីសម័យរបស់ពួកសាវ័ករហូតដល់សព្វថ្ងៃនេះ មានមនុស្សរាប់ពាន់នាក់ដែលបានត្រូវជ្រើសរើសឲ្យធ្វើជាសមាជិក១៤៤.០០០នាក់។ (លូក. ១២:៣២; រ៉ូម ៨:១៧) ប៉ុន្តែយ៉ូហានបានឮថា មានពួកអ្នករើសតាំងចំនួនតិចប៉ុណ្ណោះដែលនឹងនៅរស់ក្នុងអំឡុងគ្រាចុងក្រោយបង្អស់នេះ។ បន្តិចមុនគ្រាទុក្ខវេទនាជាខ្លាំងចាប់ផ្ដើម «ពួកអ្នកដែលនៅសល់»ទាំងនេះនឹងទទួលការ«បោះត្រា»ចុងក្រោយ ដែលបញ្ជាក់ថាព្រះយេហូវ៉ាពេញចិត្តពួកគេ។ (បប. ៧:២, ៣; ១២:១៧) បន្ទាប់មក នៅពេលណាមួយក្នុងអំឡុងគ្រាទុក្ខវេទនាជាខ្លាំង ពួកអ្នកដែលនៅសល់ទាំងនេះនឹងត្រូវយកទៅស្ថានសួគ៌ដើម្បីនៅជាមួយនឹងអ្នកឯទៀតដែលជាសមាជិក១៤៤.០០០នាក់ដែលបានរក្សាភាពស្មោះត្រង់រហូតដល់ស្លាប់។ ពួកគេនឹងគ្រប់គ្រងជាមួយលោកយេស៊ូក្នុងរាជាណាចក្ររបស់ព្រះ។—ម៉ាថ. ២៤:៣១; បប. ៥:៩, ១០
៦-៧. (ក) តើយ៉ូហានឃើញក្រុមណាបន្ទាប់មក ហើយតើយើងរៀនអ្វីអំពីពួកគេ? (ខ) ហេតុអ្វីពួកអ្នករើសតាំងដែលនៅសល់និង«មនុស្សមួយក្រុមធំ»គួរចាប់អារម្មណ៍សៀវភៅការបើកបង្ហាញ ជំពូកទី៧?
៦ ក្រោយពីយ៉ូហានឃើញក្រុមនៅស្ថានសួគ៌ គាត់ឃើញ«មនុស្សមួយក្រុមធំ»។ ខុសពី១៤៤.០០០នាក់ គ្មានអ្នកណាអាចរាប់ចំនួនក្រុមនេះបានទេ។ (បប. ៧:៩, ១០) តើយើងរៀនអ្វីអំពីពួកគេ? យ៉ូហានបានឮថា៖ «អ្នកទាំងនោះគឺជាអ្នកដែលចេញផុតពីគ្រាទុក្ខវេទនាជាខ្លាំង ហើយពួកគេបានបោកសម្អាតអាវវែងរបស់ពួកគេឲ្យសក្នុងឈាមរបស់កូនចៀម»។ (បប. ៧:១៤) ក្រោយពីរួចជីវិតពីគ្រាទុក្ខវេទនាជាខ្លាំង «មនុស្សមួយក្រុមធំ»នេះនឹងរស់នៅលើផែនដី ហើយទទួលពរដ៏អស្ចារ្យជាច្រើន។—ចសព. ៣៧:៩-១១, ២៧-២៩; សុភ. ២:២១, ២២; បប. ៧:១៦, ១៧
៧ មិនថាយើងបានត្រូវជ្រើសរើសឲ្យឡើងទៅស្ថានសួគ៌ ឬមានសេចក្ដីសង្ឃឹមរស់នៅលើផែនដីក្ដី យើងគួរតែស្រមៃឃើញខ្លួនយើងនៅក្នុងការរៀបរាប់ដែលបានត្រូវកត់ទុកនៅសៀវភៅការបើកបង្ហាញ ជំពូកទី៧។ នោះជាគ្រាដ៏រំភើបចិត្តចំពោះអ្នកបម្រើព្រះយេហូវ៉ាទាំងពីរក្រុមនេះ! យើងនឹងអរសប្បាយដែលយើងសម្រេចចិត្តគាំទ្រការគ្រប់គ្រងរបស់ព្រះយេហូវ៉ា។ ប៉ុន្តែ តើសៀវភៅការបើកបង្ហាញចែងអ្វីទៀតអំពីគ្រាទុក្ខវេទនាជាខ្លាំង?—ម៉ាថ. ២៤:២១
តើអ្វីនឹងកើតឡើងចំពោះពួកអ្នកដែលប្រឆាំងព្រះ?
៨. តើគ្រាទុក្ខវេទនាជាខ្លាំងនឹងចាប់ផ្ដើមយ៉ាងដូចម្ដេច ហើយតើមនុស្សភាគច្រើននឹងមានប្រតិកម្មយ៉ាងណា?
៨ ដូចបានរៀបរាប់នៅអត្ថបទមុន មិនយូរទៀតប្រព័ន្ធនយោបាយនៃពិភពលោកនេះនឹងវាយប្រហារបាប៊ីឡូនដ៏ខ្លាំងក្លា ដែលជាសាសនាមិនពិតទាំងឡាយ។ (បប. ១៧:១៦, ១៧) នោះជាទីចាប់ផ្ដើមនៃគ្រាទុក្ខវេទនាជាខ្លាំង។ តើមនុស្សជាច្រើននឹងចាប់ផ្ដើមបម្រើព្រះយេហូវ៉ានៅពេលនោះឬទេ? មិនមែនទេ។ ផ្ទុយទៅវិញ ការបើកបង្ហាញ ជំពូកទី៦ប្រាប់ថា នៅគ្រាដ៏លំបាកនោះ មនុស្សដែលមិនបម្រើព្រះយេហូវ៉ានឹងស្វែងរកការការពារពីប្រព័ន្ធនយោបាយនិងពាណិជ្ជកម្មក្នុងពិភពលោកនេះ ដែលបានត្រូវប្រដូចទៅនឹងភ្នំ។ ដោយហេតុថាមនុស្សទាំងនោះមិនគាំទ្ររាជាណាចក្ររបស់ព្រះ នោះព្រះយេហូវ៉ាចាត់ទុកពួកគេថាជាអ្នកប្រឆាំង។—លូក. ១១:២៣; បប. ៦:១៥-១៧
៩. តើរាស្ត្ររបស់ព្រះយេហូវ៉ានឹងខុសប្លែកពីគេយ៉ាងណាក្នុងអំឡុងគ្រាទុក្ខវេទនាជាខ្លាំង ហើយតើនោះនឹងមានលទ្ធផលយ៉ាងណា?
៩ ពិតមែនហើយ អ្នកបម្រើដ៏ស្មោះត្រង់របស់ព្រះយេហូវ៉ានឹងខុសប្លែកពីគេក្នុងអំឡុងគ្រាដ៏លំបាកជាខ្លាំងនោះ។ ពួកគេនឹងធ្វើជាមនុស្សតែមួយក្រុមគត់នៅផែនដីដែលបម្រើព្រះយេហូវ៉ា និងបដិសេធមិនគាំទ្រ«សត្វសាហាវ»។ (បប. ១៣:១៤-១៧) ដោយសារពួកគេរក្សាភាពស្មោះត្រង់ចំពោះព្រះយេហូវ៉ា នោះធ្វើឲ្យពួកអ្នកដែលប្រឆាំងលោកក្ដៅចិត្តយ៉ាងខ្លាំង។ ជាលទ្ធផល ប្រជាជាតិនានាដែលចងសម្ព័ន្ធភាពជាមួយគ្នា នឹងវាយប្រហាររាស្ត្ររបស់ព្រះនៅទូទាំងផែនដី។ គម្ពីរហៅការវាយប្រហារនេះថា ការវាយប្រហារពីកូកនៃស្រុកម៉ាកូក។—អេគ. ៣៨:១៤-១៦
១០. ដូចបានរៀបរាប់នៅការបើកបង្ហាញ ១៩:១៩-២១ តើព្រះយេហូវ៉ានឹងមានប្រតិកម្មយ៉ាងណាចំពោះការវាយប្រហារលើរាស្ត្រលោក?
១០ តើព្រះយេហូវ៉ានឹងមានប្រតិកម្មយ៉ាងណាចំពោះការវាយប្រហារដ៏សាហាវនេះ? លោកប្រាប់យើងថា៖ «កំហឹងដ៏ខ្លាំងរបស់ខ្ញុំនឹងឆួលឡើង»។ (អេគ. ៣៨:១៨, ២១-២៣) សៀវភៅការបើកបង្ហាញ ជំពូក១៩រៀបរាប់អំពីអ្វីដែលនឹងកើតឡើងបន្ទាប់មក។ ព្រះយេហូវ៉ានឹងចាត់បុត្ររបស់លោក ដើម្បីការពាររាស្ត្រលោកនិងយកឈ្នះសត្រូវរបស់លោក។ «បណ្ដាកងទ័ពនៅស្ថានសួគ៌»ដែលជាពួកទេវតាដ៏ស្មោះត្រង់និង១៤៤.០០០នាក់ នឹងរួមដៃជាមួយលោកយេស៊ូដើម្បីប្រយុទ្ធប្រឆាំងនឹងកូកនៃស្រុកម៉ាកូក។ (បប. ១៧:១៤; ១៩:១១-១៥) តើសង្គ្រាមនេះនឹងមានលទ្ធផលយ៉ាងណា? មនុស្សនិងក្រុមទាំងអស់ដែលប្រឆាំងព្រះយេហូវ៉ានឹងត្រូវបំផ្លាញចោលទាំងស្រុង។—សូមអាន ការបើកបង្ហាញ ១៩:១៩-២១
ក្រោយសង្គ្រាម មានពិធីរៀបការ
១១. តើអ្វីជាព្រឹត្តិការណ៍ដ៏គួរឲ្យរំភើបចិត្តបំផុតក្នុងសៀវភៅការបើកបង្ហាញ?
១១ សូមព្យាយាមស្រមៃគិតអំពីអារម្មណ៍របស់ពួកអ្នកស្មោះត្រង់នៅផែនដី ដែលបានរួចជីវិតពីការបំផ្លាញចោលពួកសត្រូវរបស់ព្រះ! នោះជាគ្រាដ៏សប្បាយមែន។ ទោះជានៅស្ថានសួគ៌មានសំឡេងស្រែកអរសាទរ ដោយសារបាប៊ីឡូនដ៏ខ្លាំងក្លាបានត្រូវបំផ្លាញចោលក្ដី មានអ្វីមួយទៀតដែលនឹងធ្វើឲ្យអរសប្បាយជាងនេះទៅទៀត! (បប. ១៩:១-៣) នេះគឺជាព្រឹត្តិការណ៍ដ៏គួរឲ្យរំភើបចិត្តបំផុតនៅក្នុងសៀវភៅការបើកបង្ហាញ ពោលគឺ«ពិធីរៀបការរបស់កូនចៀម»។—បប. ១៩:៦-៩
១២. ដូចបានត្រូវបញ្ជាក់នៅការបើកបង្ហាញ ២១:១, ២ តើពិធីរៀបការរបស់កូនចៀមនឹងធ្វើឡើងនៅពេលណា?
១២ តើពិធីរៀបការរបស់កូនចៀមនឹងកើតឡើងនៅពេលណា? សមាជិកគ្រប់រូបនៃ១៤៤.០០០នាក់នឹងនៅស្ថានសួគ៌បន្តិចមុនសង្គ្រាមអាម៉ាគេដូនចាប់ផ្ដើម។ ប៉ុន្តែ ពិធីរៀបការរបស់កូនចៀមនឹងមិនទាន់ធ្វើឡើងនៅពេលនោះទេ។ (សូមអាន ការបើកបង្ហាញ ២១:១, ២) ពិធីរៀបការនេះនឹងកើតឡើងបន្ទាប់ពីសង្គ្រាមអាម៉ាគេដូនបានត្រូវធ្វើឡើង សត្រូវទាំងអស់របស់ព្រះនៅផែនដីបានត្រូវបំផ្លាញចោល ហើយសាថាននិងពួកវិញ្ញាណកំណាចបានត្រូវបោះទៅក្នុងទីជ្រៅបំផុត។—ចសព. ៤៥:៣, ៤, ១៣-១៧
១៣. តើពិធីរៀបការរបស់កូនចៀមមានន័យយ៉ាងណាចំពោះពួកអ្នកដែលជាប់ពាក់ព័ន្ធ?
១៣ តើពិធីរៀបការរបស់កូនចៀមមានន័យយ៉ាងណាចំពោះពួកអ្នកដែលជាប់ពាក់ព័ន្ធ? ដូចការរៀបការផ្សំផ្គុំបុរសម្នាក់និងស្ត្រីម្នាក់ នោះពិធីរៀបការរបស់កូនចៀមក៏បង្រួបបង្រួមលោកយេស៊ូគ្រិស្តដែលជាស្ដេចនិង«កូនក្រមុំ»របស់លោក គឺពួក១៤៤.០០០នាក់។ ព្រឹត្តិការណ៍ដ៏គួរឲ្យរំភើបចិត្តនោះ បញ្ជាក់អំពីទីចាប់ផ្ដើមនៃការគ្រប់គ្រង១.០០០ឆ្នាំរបស់ពួក១៤៤.០០០នាក់ជាមួយលោកយេស៊ូ។—បប. ២០:៦
ក្រុងដ៏រុងរឿងនិងអនាគតរបស់អ្នក
សៀវភៅការបើកបង្ហាញ ជំពូក២១ពណ៌នាថា ក្រុងយេរូសាឡិមថ្មីដែលជានិមិត្តរូប «ចុះមកពីព្រះនៅស្ថានសួគ៌»។ ក្នុងអំឡុងការគ្រប់គ្រង១.០០០ឆ្នាំរបស់លោកយេស៊ូ ក្រុងនោះនឹងនាំមកនូវពរជាច្រើនដល់មនុស្សដែលស្ដាប់បង្គាប់ (សូមមើលអត្ថបទសិក្សាទី២១ វគ្គ១៤-១៦)
១៤-១៥. តើការបើកបង្ហាញ ជំពូក២១ប្រដូច១៤៤.០០០នាក់ទៅនឹងអ្វី? (សូមមើលរូបភាពនៅក្រប)
១៤ បន្ទាប់មក សៀវភៅការបើកបង្ហាញ ជំពូក២១ប្រដូចពួក១៤៤.០០០នាក់ទៅនឹងក្រុងដ៏ស្រស់ស្អាតមួយ ដែលបានត្រូវហៅថា«ក្រុងយេរូសាឡិមថ្មី»។ (បប. ២១:២, ៩) ក្រុងនេះមានថ្មគ្រឹះ១២ ហើយនៅលើថ្មគ្រឹះទាំងនេះ«មានឈ្មោះសាវ័កទាំង១២របស់កូនចៀម»។ ហេតុអ្វីនេះធ្វើឲ្យយ៉ូហានចាប់អារម្មណ៍? គឺដោយសារយ៉ូហានឃើញឈ្មោះរបស់គាត់បានត្រូវសរសេរនៅលើថ្មមួយ។ នេះពិតជាឯកសិទ្ធិដ៏វិសេសវិសាលមែន!—បប. ២១:១០-១៤; អេភ. ២:២០
១៥ ក្រុងនេះខុសប្លែកពីក្រុងណាទាំងអស់។ ក្រុងនេះមានរាងបួនជ្រុងស្មើគ្នា មានផ្លូវធំដែលធ្វើពីមាសសុទ្ធ មានទ្វារ១២ធ្វើពីគជ់ខ្យង ព្រមទាំងមានកំពែងនិងគ្រឹះធ្វើពីត្បូងថ្លៃវិសេស។ (បប. ២១:១៥-២១) ប៉ុន្តែ យ៉ូហានឃើញថាក្រុងនោះខ្វះអ្វីមួយ។ សូមកត់សម្គាល់អ្វីដែលគាត់និយាយក្រោយមកថា៖ «ខ្ញុំមិនឃើញវិហារនៅក្នុងក្រុងនោះទេ ព្រោះព្រះយេហូវ៉ាដែលជាព្រះមានឫទ្ធានុភាពខ្លាំងក្លាបំផុត លោកនិងកូនចៀមជាវិហារនៃក្រុងនោះ។ ក្រុងនោះមិនត្រូវការដួងអាទិត្យឬដួងខែបំភ្លឺទេ ពីព្រោះសិរីរុងរឿងរបស់ព្រះបានបំភ្លឺក្រុងនោះ ហើយកូនចៀមជាចង្កៀងនៃក្រុងនោះ»។ (បប. ២១:២២, ២៣) អស់អ្នកដែលជាសមាជិកនៃក្រុងយេរូសាឡិមថ្មីនឹងនៅជាមួយព្រះយេហូវ៉ា។ (ហេ. ៧:២៧; បប. ២២:៣, ៤) ដូច្នេះ ព្រះយេហូវ៉ានិងលោកយេស៊ូគឺជាវិហារនៃក្រុងនោះ។
តើអ្នកណានឹងទទួលប្រយោជន៍ពីអ្វីៗដែលបានត្រូវតំណាងដោយ«ទន្លេ»និង«ដើមឈើ»? (សូមមើលវគ្គ១៦-១៧)
១៦. តើមនុស្សនឹងមានជីវិតបែបណាក្នុងអំឡុងការគ្រប់គ្រង១.០០០ឆ្នាំនៃរាជាណាចក្រព្រះ?
១៦ ពួកអ្នករើសតាំងរំភើបចិត្តគិតអំពីក្រុងនេះ។ ប៉ុន្តែ ពួកអ្នកដែលមានសេចក្ដីសង្ឃឹមរស់នៅលើផែនដីក៏គួរចាប់អារម្មណ៍នឹងក្រុងនេះដែរ។ ក្នុងអំឡុងការគ្រប់គ្រង១.០០០ឆ្នាំរបស់រាជាណាចក្រព្រះ ក្រុងយេរូសាឡិមថ្មីនឹងនាំមកនូវពរច្រើនរាប់មិនអស់។ យ៉ូហានឃើញពរទាំងនេះហូរដូចជា«ទន្លេដែលមានទឹកដែលផ្ដល់ជីវិត»។ នៅខាងនាយនិងខាងអាយទន្លេនោះ «មានដើមឈើដែលផ្ដល់ជីវិត» ដែលដុះស្លឹក«សម្រាប់ធ្វើឲ្យប្រជាជាតិនានាជាសះស្បើយ»។ (បប. ២២:១, ២) មនុស្សទាំងអស់ដែលរស់នៅពេលនោះនឹងមានឱកាសទទួលប្រយោជន៍ពីអ្វីល្អទាំងនេះ។ បន្តិចម្ដងៗ មនុស្សគ្រប់គ្នាដែលស្ដាប់បង្គាប់នឹងទៅជាមនុស្សល្អឥតខ្ចោះ។ ជំងឺ ការឈឺចាប់ និងការយំសោកនឹងលែងមានទៀត។—បប. ២១:៣-៥
១៧. ដូចរៀបរាប់នៅការបើកបង្ហាញ ២០:១១-១៣ តើអ្នកណានឹងទទួលប្រយោជន៍ពីការគ្រប់គ្រង១.០០០ឆ្នាំ?
១៧ តើអ្នកណាខ្លះនឹងទទួលប្រយោជន៍ពីអ្វីៗដ៏អស្ចារ្យទាំងនេះ? ដំបូងគឺមនុស្សមួយក្រុមធំដែលរួចជីវិតពីសង្គ្រាមអាម៉ាគេដូន ព្រមទាំងកូនៗណាដែលទំនងជានឹងកើតមកក្នុងពិភពលោកថ្មី។ ប៉ុន្តែ ការបើកបង្ហាញ ជំពូកទី២០ក៏សន្យាថាមនុស្សស្លាប់នឹងត្រូវប្រោសឲ្យរស់ឡើងវិញ។ (សូមអាន ការបើកបង្ហាញ ២០:១១-១៣) «មនុស្សសុចរិត»ដ៏ស្មោះត្រង់ដែលបានស្លាប់នៅអតីតកាល និង«មនុស្សមិនសុចរិត»ដែលមិនមានឱកាសរៀនអំពីព្រះយេហូវ៉ា នឹងត្រូវប្រោសឲ្យរស់ឡើងវិញនៅផែនដី។ (សកម្ម. ២៤:១៥; យ៉ូន. ៥:២៨, ២៩) តើនេះមានន័យថាមនុស្សគ្រប់រូបនឹងត្រូវប្រោសឲ្យរស់ឡើងវិញក្នុងអំឡុងការគ្រប់គ្រង១.០០០ឆ្នាំឬ? មិនមែនទេ។ មនុស្សទុច្ចរិតដែលមិនព្រមទទួលយកឱកាសដើម្បីបម្រើព្រះយេហូវ៉ាមុនពួកគេស្លាប់ នឹងមិនត្រូវប្រោសឲ្យរស់ឡើងវិញឡើយ។ ពួកគេមានឱកាស ប៉ុន្តែពួកគេបានបង្ហាញថាពួកគេមិនសមនឹងទទួលជីវិតនៅផែនដីជាសួនឧទ្យានឡើយ។—ម៉ាថ. ២៥:៤៦; ២ថែ. ១:៩; បប. ១៧:៨; ២០:១៥
ការសាកល្បងចុងក្រោយ
១៨. តើផែនដីនឹងមានស្ថានភាពបែបណានៅដំណាច់គ្រា១.០០០ឆ្នាំ?
១៨ មកដល់ដំណាច់គ្រា១.០០០ឆ្នាំ អស់អ្នកដែលរស់នៅលើផែនដីបានទៅជាមនុស្សល្អឥតខ្ចោះ។ គ្មាននរណាទទួលឥទ្ធិពលពីការខុសឆ្គងដែលមកពីអាដាមឡើយ។ (រ៉ូម ៥:១២) ការខុសឆ្គងដែលមកពីអាដាមបានត្រូវដកចេញទាំងស្រុង។ យ៉ាងនេះ ពួកអ្នកដែលនៅលើផែនដីនឹង«ទទួលជីវិត»ជាមនុស្សល្អឥតខ្ចោះនៅដំណាច់ការគ្រប់គ្រង១.០០០ឆ្នាំ។—បប. ២០:៥
១៩. ហេតុអ្វីចាំបាច់មានការសាកល្បងចុងក្រោយ?
១៩ យើងដឹងថាលោកយេស៊ូបានរក្សាភាពស្មោះត្រង់ចំពោះព្រះយេហូវ៉ា ទោះជាសាថានបានល្បងលលោកក្ដី។ ប៉ុន្តែ តើមនុស្សល្អឥតខ្ចោះទាំងអស់នឹងសុខចិត្តធ្វើដូច្នេះពេលដែលសាថានព្យាយាមល្បងលពួកគេឬទេ? បុគ្គលម្នាក់ៗនឹងអាចឆ្លើយសំណួរនេះដោយខ្លួនឯង នៅពេលដែលសាថានបានត្រូវដោះលែងពីទីជ្រៅបំផុតភ្លាមៗក្រោយពីគ្រា១.០០០ឆ្នាំផុតទៅ។ (បប. ២០:៧) ពួកអ្នកដែលបង្ហាញភាពស្មោះត្រង់ក្នុងអំឡុងការសាកល្បងចុងក្រោយនេះ នឹងទទួលជីវិតដែលគ្មានទីបញ្ចប់ ហើយមានសេរីភាពពិតប្រាកដ។ (រ៉ូម ៨:២១) ពួកអ្នកបះបោរ នឹងត្រូវបំផ្លាញចោលជារៀងរហូតជាមួយមេកំណាចនិងពួកវិញ្ញាណកំណាចរបស់វា។—បប. ២០:៨-១០
២០. តើអ្នកមានអារម្មណ៍យ៉ាងណាចំពោះទំនាយដ៏គួរឲ្យរំភើបចិត្តនៅក្នុងសៀវភៅការបើកបង្ហាញ?
២០ បន្ទាប់ពីពិចារណាយ៉ាងខ្លីអំពីព័ត៌មានពីសៀវភៅការបើកបង្ហាញ តើអ្នកមានអារម្មណ៍យ៉ាងណា? តើអ្នករំភើបចិត្តឬទេ កាលដែលស្រមៃឃើញខ្លួនអ្នករស់នៅក្នុងពេលដែលទំនាយដ៏អស្ចារ្យទាំងនេះបានត្រូវសម្រេច? នេះច្បាស់ជាជំរុញចិត្តអ្នកឲ្យអញ្ជើញអ្នកឯទៀតឲ្យចូលរួមជាមួយយើងក្នុងការគោរពប្រណិប័តន៍ពិត។ (បប. ២២:១៧) ដោយសារយើងបានពិចារណាអ្វីទាំងនេះដែលនឹងត្រូវកើតឡើងនៅថ្ងៃអនាគត យើងរំភើបចិត្តនិងចង់និយាយដូចសាវ័កយ៉ូហាន ដែលថា៖ «អាមេន! លោកម្ចាស់យេស៊ូ សូមអញ្ជើញមក»។—បប. ២២:២០
ចម្រៀងលេខ២៧ គ្រាដែលកូនព្រះនឹងត្រូវសម្ដែង
a នេះគឺជាអត្ថបទចុងក្រោយនៃអត្ថបទតភាគអំពីសៀវភៅការបើកបង្ហាញ។ ក្នុងអត្ថបទនេះ យើងនឹងឃើញថាពួកអ្នកដែលរក្សាចិត្តស្មោះត្រង់ចំពោះព្រះយេហូវ៉ានឹងមានអនាគតត្រចះត្រចង់ រីឯពួកអ្នកដែលប្រឆាំងការគ្រប់គ្រងរបស់លោកនឹងត្រូវបំផ្លាញចោលយ៉ាងអាម៉ាស់មុខ។