អត្ថបទសិក្សា ២
ចម្រៀងលេខ១៩ អាហារល្ងាចរបស់លោកម្ចាស់
តើអ្នកត្រៀមខ្លួនសម្រាប់ថ្ងៃដ៏សំខាន់បំផុតប្រចាំឆ្នាំហើយឬនៅ?
«ចូរបន្តធ្វើដូច្នេះ ដើម្បីរំលឹកដល់ខ្ញុំ»។—លូក. ២២:១៩
ចំណុចផ្ដោត
សូមគិតអំពីមូលហេតុដែលពិធីរំលឹកគឺសំខាន់ណាស់ របៀបដែលយើងអាចត្រៀមខ្លួនសម្រាប់ពិធីនោះ និងរបៀបដែលយើងអាចជួយអ្នកឯទៀតឲ្យចូលរួម។
១. ហេតុអ្វីពិធីរំលឹកគឺជាថ្ងៃដ៏សំខាន់បំផុតប្រចាំឆ្នាំ? (លូកា ២២:១៩, ២០)
ចំពោះរាស្ត្ររបស់ព្រះយេហូវ៉ា ពិធីរំលឹកមរណភាពរបស់គ្រិស្តគឺជាថ្ងៃដ៏សំខាន់បំផុតប្រចាំឆ្នាំ។ មានតែពិធីនោះប៉ុណ្ណោះដែលលោកយេស៊ូបានបង្គាប់ពួកអ្នកកាន់តាមលោកឲ្យធ្វើ។ (សូមអាន លូកា ២២:១៩, ២០) យើងទន្ទឹងរង់ចាំពិធីរំលឹកដោយសារមូលហេតុមួយចំនួន។ សូមយើងពិចារណាមូលហេតុទាំងនោះខ្លះ។
២. តើមានមូលហេតុអ្វីខ្លះដែលយើងទន្ទឹងរង់ចាំពិធីរំលឹក?
២ ពិធីរំលឹកជួយយើងឲ្យរំពឹងគិតអំពីតម្លៃនៃថ្លៃលោះ។ ពិធីនេះរំលឹកយើងអំពីរបៀបដែលយើងអាចបង្ហាញចិត្តកតញ្ញូចំពោះគ្រឿងបូជារបស់លោកយេស៊ូ។ (២កូ. ៥:១៤, ១៥) នេះក៏ផ្ដល់ឱកាសឲ្យយើង«លើកទឹកចិត្តគ្នាទៅវិញទៅមក»ជាមួយបងប្អូនរួមជំនឿផងដែរ។ (រ៉ូម ១:១២) រាល់ឆ្នាំ បងប្អូនអសកម្មជាច្រើននាក់ចូលរួមពិធីនេះ។ អ្នកខ្លះថែមទាំងចង់ត្រឡប់មកឯព្រះយេហូវ៉ាវិញ ដោយសារការស្វាគមន៍យ៉ាងកក់ក្ដៅដែលពួកគេទទួល។ ម្យ៉ាងទៀត អ្នកចាប់អារម្មណ៍ជាច្រើននាក់ចង់ចាប់ផ្ដើមដើរនៅលើផ្លូវទៅឯជីវិត ដោយសារអ្វីដែលពួកគេឃើញនិងឮ។ អ្វីទាំងអស់នេះធ្វើឲ្យពិធីរំលឹកពិសេសខ្លាំងណាស់ចំពោះយើង!
៣. តើពិធីរំលឹកធ្វើឲ្យយើងមានសាមគ្គីភាពជាមួយបងប្អូនរួមជំនឿនៅទូទាំងពិភពលោកយ៉ាងដូចម្ដេច? (សូមមើលរូបភាពផងដែរ)
៣ សូមគិតផងដែរអំពីរបៀបដែលពិធីរំលឹកធ្វើឲ្យយើងមានសាមគ្គីភាពជាមួយបងប្អូនរួមជំនឿនៅទូទាំងពិភពលោក។ សាក្សីព្រះយេហូវ៉ានៅទូទាំងពិភពលោកជួបជុំគ្នាធ្វើពិធីរំលឹក កាលដែលថ្ងៃលិចពីកន្លែងមួយទៅកន្លែងមួយ។ យើងទាំងអស់គ្នាស្ដាប់សុន្ទរកថាដែលបញ្ជាក់អំពីសារៈសំខាន់នៃថ្លៃលោះ។ យើងច្រៀងចម្រៀងសរសើរតម្កើងពីរបទ ហុចវត្ថុតំណាង និងនិយាយយ៉ាងអស់ពីចិត្តថា«អាមេន»ចំពោះសេចក្ដីអធិដ្ឋានបួន។ ក្នុងរយៈពេល២៤ម៉ោង ក្រុមជំនុំទាំងអស់នឹងបានត្រូវធ្វើតាមលំនាំដូចគ្នា។ តើអ្នកអាចស្រមៃឃើញអំណរដែលព្រះយេហូវ៉ានិងលោកយេស៊ូច្បាស់ជាមាន ពេលឃើញយើងរួបរួមគ្នាសរសើរតម្កើងលោកទាំងពីរតាមរបៀបនេះឬទេ?
ពិធីរំលឹកធ្វើឲ្យយើងមានសាមគ្គីភាពជាមួយបងប្អូននៅទូទាំងពិភពលោក (សូមមើលវគ្គ៣)f
៤. តើយើងនឹងពិចារណាអ្វីខ្លះក្នុងអត្ថបទនេះ?
៤ ក្នុងអត្ថបទនេះ យើងនឹងពិចារណាសំណួរដូចតទៅនេះ៖ តើយើងអាចត្រៀមចិត្តសម្រាប់ពិធីរំលឹកយ៉ាងដូចម្ដេច? តើតាមរបៀបណាយើងអាចជួយអ្នកឯទៀតឲ្យទទួលប្រយោជន៍ពីពិធីនោះ? ម្យ៉ាងទៀត តើយើងអាចជួយពួកអ្នកអសកម្មយ៉ាងដូចម្ដេច? ចម្លើយចំពោះសំណួរទាំងនេះនឹងជួយយើងឲ្យត្រៀមខ្លួនសម្រាប់ពិធីដ៏ពិសិដ្ឋនេះ។
តើយើងអាចត្រៀមចិត្តសម្រាប់ពិធីរំលឹកយ៉ាងដូចម្ដេច?
៥. (ក) ហេតុអ្វីយើងគួររំពឹងគិតអំពីតម្លៃនៃថ្លៃលោះ? (ចម្រៀងសរសើរព្រះ ៤៩:៧, ៨) (ខ) តើអ្នករៀនអ្វីពីវីដេអូហេតុអ្វីលោកយេស៊ូបានស្លាប់?
៥ របៀបសំខាន់បំផុតមួយដែលយើងអាចត្រៀមចិត្តសម្រាប់ពិធីរំលឹក គឺដោយរំពឹងគិតអំពីតម្លៃនៃគ្រឿងបូជាលោះរបស់លោកយេស៊ូគ្រិស្ត។ គ្មានអ្វីដែលយើងអាចធ្វើដើម្បីរំដោះខ្លួនពីការខុសឆ្គងនិងសេចក្ដីស្លាប់ទេ។ (សូមអាន ចម្រៀងសរសើរព្រះ ៤៩:៧, ៨; សូមមើលផងដែរនូវវីដេអូដែលមានចំណងជើងថា ហេតុអ្វីលោកយេស៊ូបានស្លាប់?)a ដូច្នេះ ព្រះយេហូវ៉ាបានរៀបចំឲ្យលោកយេស៊ូផ្ដល់ជីវិតខ្លួនដើម្បីសង្គ្រោះយើង។ ទាំងព្រះយេហូវ៉ាទាំងលោកយេស៊ូបានធ្វើការលះបង់ដ៏ធំធេង។ (រ៉ូម ៦:២៣) កាលដែលយើងកាន់តែរំពឹងគិតអំពីអ្វីដែលព្រះយេហូវ៉ានិងលោកយេស៊ូបានលះបង់ដើម្បីយើង យើងនឹងកាន់តែឲ្យតម្លៃចំពោះថ្លៃលោះ។ យើងនឹងពិចារណាអំពីអ្វីដ៏ពិបាកមួយចំនួនដែលព្រះយេហូវ៉ានិងលោកយេស៊ូសុខចិត្តធ្វើដើម្បីយើង។ ប៉ុន្តែដំបូងយើងនឹងពិចារណាថា តើថ្លៃលោះរួមបញ្ចូលអ្វី?
៦. តើថ្លៃលោះរួមបញ្ចូលអ្វី?
៦ ថ្លៃលោះគឺជាតម្លៃដែលបានត្រូវបង់ដើម្បីទិញអ្វីមួយមកវិញ។ បុរសដំបូងឈ្មោះអាដាមគឺជាមនុស្សល្អឥតខ្ចោះពេលគាត់បានត្រូវបង្កើតមក។ ប៉ុន្តែ ពេលគាត់បានប្រព្រឹត្តអំពើខុសឆ្គង គាត់បានបាត់បង់ឱកាសរស់ជារៀងរហូត មិនគ្រាន់តែគាត់ម្នាក់ប៉ុណ្ណោះទេ តែនោះក៏នាំឲ្យកូនរបស់គាត់ទាំងអស់បាត់បង់ឱកាសនោះដែរ។ ដើម្បីទិញអ្វីដែលអាដាមបានបាត់បង់មកវិញ លោកយេស៊ូបានជូនជីវិតល្អឥតខ្ចោះរបស់ខ្លួនជាគ្រឿងបូជា។ អស់មួយជីវិតរបស់លោកយេស៊ូនៅផែនដី លោក«មិនដែលប្រព្រឹត្តអំពើខុសឆ្គងសោះ ក៏មិនដែលមានពាក្យបោកបញ្ឆោតចេញពីមាត់លោកដែរ»។ (១ពេ. ២:២២) នៅពេលលោកយេស៊ូទទួលមរណភាព ជីវិតល្អឥតខ្ចោះរបស់លោកមានតម្លៃស្មើគ្នាបេះបិទនឹងជីវិតដែលអាដាមបានបាត់បង់។—១កូ. ១៥:៤៥; ១ធី. ២:៦
៧. តើលោកយេស៊ូបានជួបការពិបាកអ្វីខ្លះកាលដែលនៅផែនដី?
៧ ពេលនៅផែនដី លោកយេស៊ូបានបន្តស្ដាប់បង្គាប់បិតារបស់លោកនៅស្ថានសួគ៌យ៉ាងល្អឥតខ្ចោះ ទោះជានៅពេលពិបាកឲ្យធ្វើដូច្នេះក្ដី។ កាលដែលនៅក្មេង លោកយេស៊ូត្រូវចុះចូលក្រោមអំណាចរបស់ឪពុកម្ដាយលោកដែលជាមនុស្សមិនល្អឥតខ្ចោះ ទោះជាលោកបានកើតមកជាមនុស្សល្អឥតខ្ចោះក្ដី។ (លូក. ២:៥១) កាលដែលនៅវ័យជំទង់ លោកត្រូវទប់ទល់នឹងការបង្ខិតបង្ខំពីអ្នកឯទៀតដែលប្រហែលជាចង់ឲ្យលោកមិនស្ដាប់បង្គាប់ឪពុកម្ដាយឬមិនស្មោះត្រង់នឹងព្រះយេហូវ៉ា។ ម្យ៉ាងទៀត កាលដែលពេញវ័យ លោកយេស៊ូត្រូវទប់ទល់នឹងការល្បួងពីមេកំណាចសាថាន រួមទាំងការវាយប្រហារចំៗលើភក្ដីភាពរបស់លោកចំពោះព្រះ។ (ម៉ាថ. ៤:១-១១) សាថានបានតាំងចិត្តធ្វើឲ្យលោកយេស៊ូប្រព្រឹត្តអំពើខុសឆ្គងដើម្បីលោកមិនអាចបង់ថ្លៃលោះ។
៨. តើលោកយេស៊ូបានស៊ូទ្រាំនឹងការល្បងលផ្សេងទៀតអ្វី?
៨ ក្នុងអំឡុងកិច្ចបម្រើរបស់លោកយេស៊ូនៅផែនដី លោកបានស៊ូទ្រាំនឹងការល្បងលផ្សេងទៀត។ លោកបានជួបការបៀតបៀននិងការគំរាមកំហែងដល់អាយុជីវិតរបស់លោក។ (លូក. ៤:២៨, ២៩; ១៣:៣១) លោកត្រូវស៊ូទ្រាំនឹងភាពមិនល្អឥតខ្ចោះរបស់ពួកអ្នកកាន់តាមលោក។ (ម៉ាក. ៩:៣៣, ៣៤) ពេលលោកត្រូវគេវិនិច្ឆ័យក្ដី លោកបានត្រូវគេធ្វើទារុណកម្មនិងចំអកមើលងាយ។ បន្ទាប់មក លោកបានត្រូវគេប្រហារជីវិតតាមរបៀបដ៏ឈឺចាប់និងគួរឲ្យអាម៉ាស់យ៉ាងខ្លាំង។ (ហេ. ១២:១-៣) លោកត្រូវស៊ូទ្រាំនឹងផ្នែកចុងក្រោយនៃទុក្ខលំបាករបស់លោកដោយខ្លួនលោកផ្ទាល់ ពោលគឺដោយមិនមានការការពារពីព្រះយេហូវ៉ា។b—ម៉ាថ. ២៧:៤៦
៩. តើយើងមានអារម្មណ៍យ៉ាងណាចំពោះការលះបង់របស់លោកយេស៊ូ? (ពេត្រុសទី១ ១:៨)
៩ លោកយេស៊ូពិតជាបានរងទុក្ខជាច្រើនដើម្បីផ្ដល់ថ្លៃលោះ។ យើងមានសេចក្ដីស្រឡាញ់ដ៏ជ្រាលជ្រៅចំពោះលោកយេស៊ូ ពេលយើងរំពឹងគិតអំពីរបៀបដែលលោកសុខចិត្តលះបង់អ្វីជាច្រើនដើម្បីជាប្រយោជន៍ដល់យើង មែនទេ?—សូមអាន ពេត្រុសទី១ ១:៨
១០. តើព្រះយេហូវ៉ាលះបង់អ្វីដើម្បីផ្ដល់ថ្លៃលោះ?
១០ ចុះយ៉ាងណាព្រះយេហូវ៉ាវិញ? តើលោកសុខចិត្តលះបង់អ្វីដើម្បីលោកយេស៊ូអាចបង់ថ្លៃលោះ? ព្រះយេហូវ៉ានិងលោកយេស៊ូមានទំនាក់ទំនងជិតស្និទ្ធបំផុតដែលអាចមានរវាងឪពុកនិងកូន។ (សុភ. ៨:៣០) យ៉ាងនេះ សូមគិតអំពីអារម្មណ៍របស់ព្រះយេហូវ៉ាពេលដែលលោកឃើញលោកយេស៊ូកំពុងស៊ូទ្រាំទុក្ខលំបាកជាច្រើនកាលដែលនៅផែនដី។ ព្រះយេហូវ៉ាច្បាស់ជាមានអារម្មណ៍ឈឺចាប់ជាខ្លាំង ពេលឃើញបុត្ររបស់លោកត្រូវគេធ្វើបាប មិនព្រមទទួលស្គាល់ និងរងទុក្ខវេទនា។
១១. សូមលើកឧទាហរណ៍ដើម្បីបង្ហាញអំពីអារម្មណ៍របស់ព្រះយេហូវ៉ាពេលលោកយេស៊ូបានត្រូវគេប្រហារជីវិត។
១១ ឪពុកម្ដាយដែលបាត់បង់កូនក្នុងសេចក្ដីស្លាប់យល់ច្បាស់អំពីអារម្មណ៍កើតទុក្ខជាខ្លាំងដែលមកពីការបាត់បង់កូន។ យើងមានជំនឿរឹងមាំទៅលើការប្រោសឲ្យរស់ឡើងវិញ ប៉ុន្តែនេះមិនបំបាត់អារម្មណ៍ឈឺចាប់ដែលយើងមានពេលបុគ្គលជាទីស្រឡាញ់ស្លាប់ឡើយ។ ឧទាហរណ៍នេះជួយយើងឲ្យយល់អំពីអារម្មណ៍ដែលព្រះយេហូវ៉ាច្បាស់ជាមានពេលលោកឃើញបុត្រជាទីស្រឡាញ់របស់លោករងទុក្ខនិងស្លាប់នៅថ្ងៃទី១៤ ខែណែសាន ឆ្នាំ៣៣ គ.ស។c—ម៉ាថ. ៣:១៧
១២. តើយើងអាចធ្វើអ្វីក្នុងប៉ុន្មានសប្ដាហ៍មុនពិធីរំលឹក?
១២ ក្នុងរយៈពេលចាប់ពីឥឡូវនេះដល់ពិធីរំលឹក សូមសិក្សាផ្ទាល់ខ្លួនឬគោរពប្រណិប័តន៍ជាក្រុមគ្រួសារដោយផ្ដោតអារម្មណ៍ទៅលើថ្លៃលោះ។ សូមប្រើជំនួយស្រាវជ្រាវសម្រាប់សាក្សីព្រះយេហូវ៉ា ឬសៀវភៅផ្សេងទៀតដើម្បីរកឃើញព័ត៌មានថែមទៀតអំពីថ្លៃលោះ។d ម្យ៉ាងទៀត សូមធ្វើឲ្យប្រាកដថាអ្នកធ្វើតាមកាលវិភាគអំណានគម្ពីរសម្រាប់ពិធីរំលឹកដែលមាននៅក្នុងកិច្ចបម្រើនិងជីវិតជាគ្រិស្តសាសនិក កំណត់សម្រាប់កិច្ចប្រជុំ។ មួយវិញទៀត នៅថ្ងៃពិធីរំលឹក សូមកុំភ្លេចមើលកម្មវិធីគោរពប្រណិប័តន៍ពេលព្រឹកពិសេស។ ពេលយើងត្រៀមចិត្តសម្រាប់ពិធីរំលឹក យើងនឹងអាចជួយអ្នកឯទៀតឲ្យទទួលប្រយោជន៍ពីកម្មវិធីនោះដែរ។—អែស. ៧:១០
ចូរជួយអ្នកឯទៀតឲ្យទទួលប្រយោជន៍
១៣. តើអ្វីជាជំហានដំបូងដើម្បីជួយអ្នកឯទៀតឲ្យទទួលប្រយោជន៍ពីពិធីរំលឹក?
១៣ តើយើងអាចជួយអ្នកឯទៀតឲ្យទទួលប្រយោជន៍ពីពិធីរំលឹកតាមរបៀបណា? ដំបូង គឺដោយអញ្ជើញពួកគេ។ ក្រៅពីទាក់ទងពួកអ្នកដែលយើងជួបក្នុងកិច្ចបម្រើផ្សាយធម្មតា យើងអាចធ្វើបញ្ជីមួយអំពីមនុស្សដែលយើងចង់អញ្ជើញ។ បុគ្គលទាំងនេះអាចរួមមានសាច់ញាតិរបស់យើង អ្នករួមការងារ សិស្សរួមថ្នាក់ និងអ្នកឯទៀត។ ទោះជាយើងមិនមានលិខិតអញ្ជើញគ្រប់គ្រាន់ក្ដី យើងអាចផ្ញើតំណភ្ជាប់លិខិតអញ្ជើញជាឯកសារអេឡិចត្រូនិក។ យើងមិនដឹងថានឹងមានមនុស្សច្រើនយ៉ាងណាចូលរួមនោះទេ។—អទ. ១១:៦
១៤. សូមលើកឧទាហរណ៍ដែលបង្ហាញថាការអញ្ជើញដោយផ្ទាល់មានប្រសិទ្ធភាព។
១៤ សូមកុំមើលស្រាលឥទ្ធិពលនៃការអញ្ជើញអ្នកណាម្នាក់ឲ្យមកពិធីរំលឹក។ នៅថ្ងៃមួយ បងស្រីម្នាក់ដែលរស់នៅក្នុងក្រុមគ្រួសារដែលមិនកាន់សាសនាដូចគ្នាបានភ្ញាក់ផ្អើល ពេលប្ដីបានប្រាប់នាងដោយមានមោទនភាពថា គាត់នឹងទៅពិធីរំលឹកជាមួយនាង។ ហេតុអ្វីបងស្រីនោះភ្ញាក់ផ្អើល? ពីព្រោះពីមុនអស់ជាច្រើនដង បងស្រីនោះបានលើកទឹកចិត្តប្ដីឲ្យចូលរួម ប៉ុន្តែគាត់មិនដែលទៅទេ។ តើមានអ្វីខុសគ្នានៅលើកនេះ? ប្ដីនាងបាននិយាយថា៖ «ខ្ញុំបានទទួលការអញ្ជើញដោយផ្ទាល់» ហើយពន្យល់ថាអ្នកចាស់ទុំដែលគាត់ធ្លាប់ស្គាល់នៅតំបន់នោះបានអញ្ជើញគាត់។ ប្ដីនោះបានចូលរួមនៅឆ្នាំនោះ ហើយក៏បានចូលរួមអស់ជាច្រើនឆ្នាំបន្ទាប់មកដែរ។
១៥. តើយើងចង់ចាំអ្វីពេលអញ្ជើញអ្នកឯទៀតឲ្យចូលរួមពិធីរំលឹក?
១៥ សូមចាំថាពួកអ្នកដែលយើងអញ្ជើញប្រហែលជាមានសំណួរផ្សេងៗ ជាពិសេសបើពួកគេមិនដែលចូលរួមកិច្ចប្រជុំរបស់យើង។ គឺជាការល្អឲ្យយើងគិតអំពីសំណួរដែលពួកគេប្រហែលជាមាន ហើយត្រៀមខ្លួនដើម្បីឆ្លើយសំណួរទាំងនោះ។ (កូឡ. ៤:៦) ជាឧទាហរណ៍ អ្នកខ្លះប្រហែលជាឆ្ងល់ថា ‹តើអ្វីនឹងកើតឡើងនៅកម្មវិធីនោះ?› ‹តើកម្មវិធីនោះមានរយៈពេលប៉ុន្មាន?› ‹តើខ្ញុំគួរស្លៀកពាក់បែបណា?› ‹តើខ្ញុំត្រូវបង់លុយដើម្បីចូលរួមឬទេ?› ‹តើនឹងមានការរៃអង្គាសលុយឬ?›។ ពេលអញ្ជើញបុគ្គលណាម្នាក់ឲ្យចូលរួមពិធីរំលឹក យើងអាចសួរថា «តើបងមានសំណួរណាទេ?» ហើយក្រោយមកឆ្លើយសំណួរណាដែលគាត់មាន។ យើងក៏អាចប្រើវីដេអូចូរនឹកចាំមរណភាពលោកយេស៊ូ និងតើមានកម្មវិធីអ្វីខ្លះនៅសាលប្រជុំរបស់យើង? ដើម្បីជួយបុគ្គលនោះឲ្យយល់អំពីរបៀបដែលកិច្ចប្រជុំរបស់យើងបានត្រូវធ្វើឡើង។ ម្យ៉ាងទៀត មេរៀនទី២៨ក្នុងសៀវភៅសប្បាយនឹងជីវិតដែលគ្មានទីបញ្ចប់! មានចំណុចល្អជាច្រើនដែលយើងអាចប្រាប់ពួកគេ។
១៦. តើពួកអ្នកដែលចូលរួមពិធីរំលឹកប្រហែលជាមានសំណួរអ្វីខ្លះទៀត?
១៦ ក្រោយពីពួកអ្នកចាប់អារម្មណ៍ថ្មីចូលរួមពិធីរំលឹក ពួកគេប្រហែលជាមានសំណួរថែមទៀត។ ពួកគេប្រហែលជាឆ្ងល់ថា ហេតុអ្វីគ្មានអ្នកណាបរិភោគនំប៉័ងនិងពិសាស្រាទំពាំងបាយជូរ? ឬហេតុអ្វីមានមនុស្សតែប៉ុន្មាននាក់ប៉ុណ្ណោះបានធ្វើដូច្នេះ? ពួកគេក៏ប្រហែលជាឆ្ងល់ថា តើយើងធ្វើពិធីរំលឹកញឹកញាប់ប៉ុណ្ណា? ម្យ៉ាងទៀត ពួកគេប្រហែលជាចង់ដឹងថា តើកិច្ចប្រជុំទាំងអស់របស់សាក្សីព្រះយេហូវ៉ាបានត្រូវធ្វើឡើងដូចនេះឬទេ? ទោះជាចំណុចជាច្រើនទាំងនេះបានត្រូវពិគ្រោះក្នុងអំឡុងសុន្ទរកថាសម្រាប់ពិធីរំលឹកក្ដី ពួកអ្នកថ្មីប្រហែលជាត្រូវការការពន្យល់ថែមទៀត។ អត្ថបទនៅគេហទំព័រjw.org/kmដែលមានចំណងជើងថា «ហេតុអ្វីសាក្សីព្រះយេហូវ៉ាធ្វើពិធីអាហារល្ងាចរបស់លោកម្ចាស់ខុសពីរបៀបដែលសាសនាឯទៀតធ្វើ?» អាចជួយយើងឲ្យឆ្លើយសំណួរខ្លះរបស់ពួកគេ។ យើងចង់ធ្វើអ្វីណាក៏ដោយដែលយើងអាចធ្វើបាន មុន ក្នុងអំឡុង និងក្រោយពិធីរំលឹកដើម្បីជួយពួកអ្នកដែល«មានចិត្តគំនិតត្រឹមត្រូវ»ឲ្យទទួលប្រយោជន៍ពីកម្មវិធីនេះ។—សកម្ម. ១៣:៤៨
ចូរជួយពួកអ្នកអសកម្ម
១៧. តើពួកអ្នកចាស់ទុំអាចជួយពួកអ្នកដែលអសកម្មតាមរបៀបណា? (អេសេគាល ៣៤:១២, ១៦)
១៧ ក្នុងអំឡុងរដូវពិធីរំលឹក តើពួកអ្នកចាស់ទុំអាចជួយពួកអ្នកដែលអសកម្មតាមរបៀបណា? សូមបង្ហាញការយកចិត្តទុកដាក់យ៉ាងកក់ក្ដៅចំពោះពួកគេ។ (សូមអាន អេសេគាល ៣៤:១២, ១៦) មុនពិធីរំលឹក សូមប្រាកដថាអ្នកទាក់ទងទៅពួកគេជាច្រើននាក់តាមដែលអាចធ្វើបាន។ សូមពង្រឹងទំនុកចិត្តរបស់ពួកអ្នកទាំងនោះថា អ្នកស្រឡាញ់ពួកគេនិងចង់ជួយពួកគេ។ សូមអញ្ជើញពួកគេឲ្យចូលរួមពិធីរំលឹក។ បើពួកគេចូលរួម សូមស្វាគមន៍ពួកគេយ៉ាងកក់ក្ដៅ។ ក្រោយពីពិធីរំលឹក សូមបន្តទៅជួបឬទូរស័ព្ទទៅបងប្អូនជាទីស្រឡាញ់ទាំងនេះ ហើយផ្ដល់ជំនួយណាដែលពួកគេត្រូវការដើម្បីត្រឡប់មកព្រះយេហូវ៉ាវិញ។—១ពេ. ២:២៥
១៨. តើយើងទាំងអស់គ្នាអាចជួយពួកអ្នកអសកម្មតាមរបៀបណា? (រ៉ូម ១២:១០)
១៨ បងប្អូនទាំងអស់ក្នុងក្រុមជំនុំអាចជួយពួកអ្នកអសកម្មដែលចូលរួមពិធីរំលឹក។ តើតាមរបៀបណា? គឺដោយប្រព្រឹត្តចំពោះពួកគេដោយសេចក្ដីស្រឡាញ់ សេចក្ដីសប្បុរស និងការគោរព។ (សូមអាន រ៉ូម ១២:១០) សូមចាំថាចៀមជាទីស្រឡាញ់ទាំងនេះប្រហែលជាបានស្ទាក់ស្ទើរក្នុងការត្រឡប់មកកិច្ចប្រជុំវិញ។ ប្រហែលជាពួកគេខ្លាចអំពីអ្វីដែលបងប្អូនក្នុងក្រុមជំនុំនឹងនិយាយទៅកាន់ពួកគេ ឬនិយាយអំពីពួកគេ។e ដូច្នេះ សូមកុំសួរពួកគេនូវសំណួរដែលប្រហែលជានាំឲ្យពួកគេអៀនខ្មាស ឬកុំនិយាយអ្វីដែលអាចនាំឲ្យពួកគេឈឺចិត្ត។ (១ថែ. ៥:១១) បងប្អូនទាំងនេះជាបងប្អូនរួមជំនឿរបស់យើង។ យើងសប្បាយគោរពប្រណិប័តន៍ជាមួយពួកគេម្ដងទៀត!—ចសព. ១១៩:១៧៦; សកម្ម. ២០:៣៥
១៩. តើការនឹកចាំអំពីមរណភាពរបស់លោកយេស៊ូមានប្រយោជន៍យ៉ាងណាខ្លះ?
១៩ យើងអាចយល់អំពីមូលហេតុដែលលោកយេស៊ូបានរៀបចំឲ្យយើងធ្វើពិធីរំលឹកមរណភាពរបស់លោកជារៀងរាល់ឆ្នាំ មែនទេ? ពេលយើងធ្វើដូច្នេះ យើងផ្ទាល់និងអ្នកឯទៀតទទួលប្រយោជន៍ជាច្រើន។ (អេ. ៤៨:១៧, ១៨) យើងបង្កើនសេចក្ដីស្រឡាញ់របស់យើងចំពោះព្រះយេហូវ៉ានិងលោកយេស៊ូ។ យើងបង្ហាញថាយើងមានចិត្តកតញ្ញូខ្លាំងយ៉ាងណាចំពោះអ្វីដែលលោកទាំងពីរបានធ្វើសម្រាប់យើង។ យើងពង្រឹងចំណងមិត្តភាពរបស់យើងជាមួយបងប្អូនរួមជំនឿ។ ម្យ៉ាងទៀត យើងប្រហែលជាអាចជួយអ្នកឯទៀតឲ្យរៀនអំពីរបៀបដែលពួកគេក៏អាចទទួលពរដែលមកពីថ្លៃលោះដែរ។ យ៉ាងនេះ សូមយើងខំអស់ពីសមត្ថភាពដើម្បីត្រៀមខ្លួនសម្រាប់ពិធីរំលឹកឆ្នាំនេះ ពោលគឺថ្ងៃដ៏សំខាន់បំផុតប្រចាំឆ្នាំ!
តើតាមរបៀបណាយើងអាច . . .
ត្រៀមចិត្តសម្រាប់ពិធីរំលឹក?
ជួយអ្នកឯទៀតឲ្យទទួលប្រយោជន៍ពីពិធីនោះ?
ជួយពួកអ្នកអសកម្ម?
ចម្រៀងលេខ១៨ ចូរដឹងគុណព្រះសម្រាប់ថ្លៃលោះ
a សូមប្រើប្រអប់ស្វែងរកនៅគេហទំព័រjw.org/km ដើម្បីរកឃើញអត្ថបទនិងវីដេអូដែលបានត្រូវលើកឡើងក្នុងអត្ថបទនេះ។
b សូមមើលអត្ថបទ«សំណួរពីអ្នកអាន»ក្នុងទស្សនាវដ្ដីប៉មយាម ខែមេសា ឆ្នាំ២០២១។
c សូមមើលសៀវភៅចូរចូលទៅជិតព្រះយេហូវ៉ា ជំ.២៣ វ.៨-៩។
d សូមមើលប្រអប់ដែលមានចំណងជើងថា «យោបល់សម្រាប់ស្រាវជ្រាវ»។
e សូមមើលរូបភាពនិងប្រអប់ដែលមានចំណងជើងថា «តើក្រុមជំនុំមានប្រតិកម្មយ៉ាងណា?» បងប្រុសម្នាក់ដែលអសកម្មស្ទាក់ស្ទើរចូលសាលប្រជុំ ប៉ុន្តែគាត់យកឈ្នះអារម្មណ៍នោះ។ គាត់បានត្រូវស្វាគមន៍យ៉ាងកក់ក្ដៅ ហើយសប្បាយនៅជាមួយបងប្អូន។
f ការពណ៌នាអំពីរូបភាព៖ ពេលដែលរាស្ត្ររបស់ព្រះយេហូវ៉ានៅកន្លែងមួយធ្វើពិធីរំលឹក បងប្អូនរបស់ពួកគេដែលនៅកន្លែងផ្សេងៗទៀតលើផែនដីកំពុងរៀបចំនិងត្រៀមខ្លួនសម្រាប់ពិធីដ៏ពិសេសនោះ។