យោបល់សម្រាប់សិក្សា
សូមព្យាយាមរៀនអ្វីថ្មី
ពេលយើងត្រៀមខ្លួនដើម្បីសិក្សា យើងអាចសួរខ្លួនថា ‹តើខ្ញុំគិតថាខ្ញុំនឹងរៀនអ្វី?›។ ទោះជាយើងរំពឹងថាយើងនឹងរៀនអ្វីមួយក្ដី យើងត្រូវចាំថាព្រះយេហូវ៉ាប្រហែលជាចង់បង្រៀនយើងអ្វីថ្មី។ ដូច្នេះ ពេលយើងសិក្សា តើយើងអាចព្យាយាមរៀនអ្វីថ្មីយ៉ាងដូចម្ដេច?
ចូរអធិដ្ឋានសុំប្រាជ្ញា។ សូមសុំព្រះយេហូវ៉ាឲ្យជួយអ្នកស្វែងយល់អំពីអ្វីដែលលោកចង់ឲ្យអ្នករៀននៅឥឡូវនេះ។ (យ៉ា. ១:៥) សូមកុំស្កប់ចិត្តនឹងអ្វីដែលអ្នកស្គាល់រួចហើយ។—សុភ. ៣:៥, ៦
ចូរអនុញ្ញាតឲ្យឫទ្ធានុភាពនៃបណ្ដាំរបស់ព្រះមានឥទ្ធិពលមកលើជីវិតអ្នក។ «បណ្ដាំរបស់ព្រះគឺមានជីវិតរស់នៅ»។ (ហេ. ៤:១២) ដូច្នេះ រាល់ដងដែលយើងអានគម្ពីរ យើងអាចរៀនអ្វីថ្មី ហើយគម្ពីរអាចជួយយើងតាមរបៀបផ្សេងៗ។ ប៉ុន្តែ នោះអាចកើតឡើងបាន លុះត្រាតែយើងទទួលស្គាល់ថា អ្វីដែលព្រះបង្រៀនយើងគឺជាអ្វីដែលយើងត្រូវការ។
សូមឲ្យតម្លៃចំពោះអ្វីៗទាំងអស់ដែលព្រះយេហូវ៉ាផ្ដល់ឲ្យដើម្បីបង្រៀនយើង។ សេចក្ដីបង្រៀនរបស់លោកប្រៀបដូចជា«អាហារប្រណីតៗ»។ (អេ. ២៥:៦) សូមកុំរំលងប្រធានបទដែលអ្នកគិតថាអ្នកនឹងមិនចូលចិត្តអានឡើយ។ យ៉ាងនេះ អ្នកនឹងអនុញ្ញាតឲ្យព្រះជួយអ្នកឲ្យមានបុគ្គលិកលក្ខណៈប្រសើរជាង ហើយអ្នកនឹងកាន់តែចូលចិត្តសិក្សា។