តើអ្នកជឿជាក់ថាអ្នកមានសេចក្ដីពិតឬទេ? ហេតុអ្វី?
«[ចូរ]ពិសោធមើលដោយខ្លួនអ្នកឲ្យដឹងនូវបំណងប្រាថ្នាដ៏ប្រសើរ សមរម្យ និងល្អឥតខ្ចោះរបស់ព្រះ»។—រ៉ូម ១២:២
១. តើអ្នកដឹកនាំសាសនាកាតូលិកនិងអ្នកដឹកនាំសាសនាប្រូតេស្តង់បានធ្វើអ្វីក្នុងអំឡុងពេលមានសង្គ្រាម?
តើព្រះចង់ឲ្យគ្រិស្តសាសនិកធ្វើសង្គ្រាម ហើយសម្លាប់មនុស្សនៅប្រទេសផ្សេងទៀតឬទេ? កាលពី១០០ឆ្នាំកន្លងទៅ មនុស្សជាច្រើនដែលបានហៅខ្លួនជាគ្រិស្តសាសនិកបានសម្លាប់គ្នាទៅវិញទៅមកនៅក្នុងសង្គ្រាម។ អ្នកកាន់សាសនាកាតូលិកបានសម្លាប់អ្នកកាន់សាសនាកាតូលិក ហើយអ្នកកាន់សាសនាប្រូតេស្តង់បានសម្លាប់អ្នកកាន់សាសនាប្រូតេស្តង់។ អ្នកដឹកនាំសាសនាកាតូលិកនិងអ្នកដឹកនាំសាសនាប្រូតេស្តង់ថែមទាំងបានឲ្យពរដល់កងទ័ពនិងអាវុធសម្រាប់សង្គ្រាមទៀតផង។ ក្នុងអំឡុងសង្គ្រាមលោកលើកទី២ អំពើឃោរឃៅនេះបានកើតឡើងម្ដងហើយម្ដងទៀតនៅក្នុងចំណោមមនុស្សដែលហៅខ្លួនជាគ្រិស្តសាសនិក។
២, ៣. តើសាក្សីព្រះយេហូវ៉ាបានធ្វើអ្វីក្នុងអំឡុងសង្គ្រាមលោកលើកទី២និងសង្គ្រាមឯទៀតក្រោយពីនោះ? ហេតុអ្វី?
២ តើសាក្សីព្រះយេហូវ៉ាបានធ្វើអ្វីក្នុងអំឡុងសង្គ្រាមលោកលើកទី២? ពួកគេបានរក្សាអព្យាក្រឹតភាពរបស់ពួកគេ។ ពួកគេមិនបានចូលរួមក្នុងសង្គ្រាមនោះរវាងប្រជាជាតិនានាទេ។ ហេតុអ្វី? ពីព្រោះពួកគេចង់ធ្វើតាមសេចក្ដីបង្រៀនរបស់លោកយេស៊ូ ហើយយកតម្រាប់លោកក្នុងការបង្ហាញសេចក្ដីស្រឡាញ់ចំពោះអ្នកឯទៀត។ លោកយេស៊ូបានមានប្រសាសន៍ថា៖ «យ៉ាងនេះ មនុស្សគ្រប់គ្នានឹងដឹងថាអ្នករាល់គ្នាជាអ្នកកាន់តាមខ្ញុំ បើអ្នករាល់គ្នាស្រឡាញ់គ្នា»។ (យ៉ូហាន ១៣:៣៥) សាក្សីព្រះយេហូវ៉ាក៏បានចាំគោលការណ៍នៅក្នុងពាក្យរបស់ប៉ូលទៅគ្រិស្តសាសនិកនៅក្រុងកូរិនថូសដែរ ហើយបានអនុវត្តគោលការណ៍ទាំងនេះក្នុងស្ថានភាពរបស់ពួកគេ។—សូមអាន កូរិនថូសទី២ ១០:៣, ៤
៣ គ្រិស្តសាសនិកពិតប្រើគម្ពីរដើម្បីណែនាំពួកគេអំពីអ្វីដែលត្រូវនិងអ្វីដែលខុស ដូច្នេះសមត្ថភាពវិនិច្ឆ័យរបស់ពួកគេមិនអនុញ្ញាតឲ្យពួកគេទៅចូលរួមធ្វើសង្គ្រាម ឬរៀនធ្វើសង្គ្រាមឡើយ។ ដោយសារសាក្សីព្រះយេហូវ៉ាព្យាយាមរស់នៅជាគ្រិស្តសាសនិកពិត ពួកគេរាប់ពាន់នាក់បានទទួលការបៀតបៀន។ សាក្សីទាំងក្មេងទាំងចាស់ ទាំងប្រុសទាំងស្រី បានរងទុក្ខវេទនាក្នុងគុក និងជំរំដែលគេបង្ខំឲ្យធ្វើការ។ នៅសង្គ្រាមលោកលើកទី២ ពេលដែលពួកណាត្ស៊ីបានគ្រប់គ្រងប្រទេសអាឡឺម៉ង់ សាក្សីខ្លះថែមទាំងបានត្រូវគេសម្លាប់ទៀតផង។ ក្នុងអំឡុងការបៀតបៀនទាំងអស់នៅទ្វីបអឺរ៉ុប សាក្សីព្រះយេហូវ៉ាមិនបានភ្លេចភារកិច្ចរបស់ពួកគេក្នុងការផ្សព្វផ្សាយដំណឹងល្អនៃរាជាណាចក្រព្រះយេហូវ៉ាទេ។ ពួកគេបានបន្តផ្សព្វផ្សាយនៅពេលណាដែលពួកគេអាចផ្សព្វផ្សាយបាន សូម្បីតែពេលពួកគេនៅក្នុងគុកនិងនៅជំរំឃុំឃាំង ហើយពេលពួកគេត្រូវនិរទេសក៏ដោយ។ ច្រើនឆ្នាំក្រោយមក នៅឆ្នាំ១៩៩៤ សាក្សីព្រះយេហូវ៉ាមិនបានចូលរួមក្នុងការសម្លាប់រង្គាលនៅប្រទេសរ្វ៉ាន់ដាទេ។ ពួកគេក៏បានរក្សាអព្យាក្រឹតភាពដែរនៅក្នុងសង្គ្រាមដែលបានបែងចែកអតីតប្រទេសយូហ្គោស្លាវី។
មនុស្សជាច្រើនជុំវិញពិភពលោកនិយាយថាសាក្សីព្រះយេហូវ៉ាពិតជាស្រឡាញ់ព្រះនិងអ្នកជិតខាងរបស់ពួកគេ
៤. ពេលមនុស្សឃើញថាសាក្សីព្រះយេហូវ៉ាកាន់អព្យាក្រឹតភាព តើពួកគេច្រើនតែនិយាយយ៉ាងណា?
៤ ដោយសារសាក្សីព្រះយេហូវ៉ាបានកាន់អព្យាក្រឹតភាពក្នុងអំឡុងពេលមានសង្គ្រាម មនុស្សជាច្រើនជុំវិញពិភពលោកនិយាយថាសាក្សីព្រះយេហូវ៉ាពិតជាស្រឡាញ់ព្រះនិងអ្នកជិតខាងរបស់ពួកគេ ហើយថាពួកគេគឺជាគ្រិស្តសាសនិកពិត។ តើអ្វីជាមូលហេតុផ្សេងទៀតដែលមនុស្សជឿថាសាក្សីព្រះយេហូវ៉ាជាគ្រិស្តសាសនិកពិត?
កិច្ចការអប់រំដ៏ធំធេងបំផុតនៅក្នុងប្រវត្ដិសាស្ត្រ
៥. តើការផ្លាស់ប្ដូរអ្វីដែលពួកអ្នកកាន់តាមលោកយេស៊ូត្រូវសម្របខ្លួនតាម?
៥ លោកយេស៊ូបានធ្វើឲ្យមនុស្សឯទៀតយល់ច្បាស់ថាការផ្សព្វផ្សាយដំណឹងល្អនៃរាជាណាចក្ររបស់ព្រះគឺជាកិច្ចការដ៏សំខាន់បំផុតនៅផែនដី។ មិនយូរប៉ុន្មានក្រោយពីលោកបានចាប់ផ្ដើមកិច្ចបម្រើផ្សាយរបស់លោក លោកបានជ្រើសរើសអ្នកកាន់តាមលោក១២នាក់ដើម្បីចាប់ផ្ដើមកិច្ចការផ្សព្វផ្សាយនេះដែលក្រោយមកនឹងធ្វើឡើងនៅទូទាំងផែនដី។ ក្រោយពីនោះ លោកយេស៊ូបានបង្ហាត់បង្រៀនអ្នកកាន់តាមលោក៧០នាក់ទៀត។ (លូកា ៦:១៣; ១០:១) លោកយេស៊ូបានបង្រៀនអ្នកកាន់តាមលោកអំពីរបៀបធ្វើជាអ្នកបង្រៀន។ ដំបូងលោកយេស៊ូបានបង្គាប់ពួកគេឲ្យបង្រៀនជនជាតិយូដាឯទៀត ប៉ុន្តែក្រោយមក លោកបានប្រាប់ពួកគេឲ្យចាប់ផ្ដើមផ្សព្វផ្សាយដំណឹងល្អដល់មនុស្សដែលជាជនជាតិផ្សេងទៀត។ ចំពោះអ្នកកាន់តាមដែលជាជនជាតិយូដា ការផ្សព្វផ្សាយដល់មនុស្សដែលមិនមែនជាជនជាតិយូដាគឺជាការផ្លាស់ប្ដូរដ៏ធំមួយ!—សកម្មភាព ១:៨
៦. តើអ្វីបានជួយពេត្រុសឲ្យយល់ថាព្រះមិនគិតថាជាតិមួយគឺប្រសើរជាងជាតិមួយទៀត?
៦ បុគ្គលមុនគេដែលមិនមែនជាជនជាតិយូដានិងមិនកាត់ចុងស្បែក ហើយដែលបានក្លាយជាគ្រិស្តសាសនិក គឺកូនេលាស។ ព្រះយេហូវ៉ាបានចាត់សាវ័កពេត្រុសឲ្យទៅផ្សព្វផ្សាយដល់កូនេលាសនៅផ្ទះរបស់គាត់។ ពេលនោះពេត្រុសបានយល់ថាព្រះមិនគិតថាជាតិមួយគឺប្រសើរជាងជាតិមួយទៀតឡើយ។ ព្រះយេហូវ៉ាមានបំណងប្រាថ្នាឲ្យប្រជាជាតិនានាឮនិងទទួលយកសេចក្ដីពិត។ ដូច្នេះ ពេត្រុសបានបង្គាប់កូនេលាសនិងញាតិសន្ដានរបស់គាត់ឲ្យទទួលការជ្រមុជទឹក។ (សកម្មភាព ១០:៩-៤៨) ចាប់ពីថ្ងៃនោះមក ពេត្រុសនិងអ្នកកាន់តាមឯទៀតរបស់លោកយេស៊ូបានផ្សព្វផ្សាយដល់មនុស្សពីគ្រប់ជាតិសាសន៍។
៧, ៨. តើសាក្សីព្រះយេហូវ៉ាបានធ្វើអ្វីដើម្បីជួយមនុស្សឲ្យឮដំណឹងល្អ? (សូមមើលរូបភាពនៅដើមអត្ថបទ)។
៧ នៅសម័យយើង ដោយចិត្តខ្នះខ្នែង ពួកអ្នកដែលនាំមុខក្នុងអង្គការរបស់ព្រះយេហូវ៉ាគាំទ្រនិងចាត់ចែងកិច្ចការផ្សព្វផ្សាយនិងការបង្រៀនអំពីដំណឹងល្អនៅទូទាំងពិភពលោក។ ឥឡូវ មានសាក្សីព្រះយេហូវ៉ាជិត៨លាននាក់នៅទូទាំងពិភពលោក។ ពួកគេផ្សព្វផ្សាយយ៉ាងខ្នះខ្នែងជាង៦០០ភាសា ហើយចំនួននេះបន្តកើនឡើង។ ពួកគេផ្សព្វផ្សាយពីផ្ទះមួយទៅផ្ទះមួយនិងនៅតាមផ្លូវ។ ក្នុងកិច្ចផ្សព្វផ្សាយ ជួនកាលពួកគេប្រើតុនិងរទេះដើម្បីតាំងសៀវភៅជាច្រើនភាសា។ មនុស្សអាចស្គាល់សាក្សីព្រះយេហូវ៉ា ពីព្រោះមានតែពួកគេប៉ុណ្ណោះដែលផ្សព្វផ្សាយតាមវិធីទាំងអស់នេះ។
៨ អង្គការរបស់ព្រះយេហូវ៉ាបានបង្ហាត់បង្រៀនបងប្អូនប្រុសស្រីជាង២.៩០០នាក់ដើម្បីបកប្រែគម្ពីរនិងសៀវភៅដែលមានមូលដ្ឋានលើគម្ពីរ។ សៀវភៅទាំងនេះក៏បានត្រូវបកប្រែជាភាសាដែលមនុស្សមិនសូវស្គាល់ដែរ។ ជាឧទាហរណ៍ ឥឡូវ សាក្សីព្រះយេហូវ៉ានៅប្រទេសអេស្ប៉ាញបកប្រែសៀវភៅដែលមានមូលដ្ឋានលើគម្ពីរជាភាសាខាថាឡាន។ ប៉ុន្មានឆ្នាំមុន មនុស្សកាន់តែច្រើនបានចាប់ផ្ដើមប្រើភាសាខាថាឡាននៅក្នុងក្រុងវ៉ាឡេនស៊ា ក្រុងអាលីខេនធី និងនៅប្រជុំកោះបាលីអារិក ព្រមទាំងនៅប្រទេសអង់ដូរ៉ា។ សព្វថ្ងៃនេះ មានមនុស្សរាប់លាននាក់ដែលនិយាយភាសាខាថាឡាន។ ដោយសារកិច្ចការបកប្រែរបស់សាក្សីព្រះយេហូវ៉ា បណ្ដាជនដែលនិយាយភាសាខាថាឡានមានសៀវភៅនិងកិច្ចប្រជុំជាភាសាដែលមានឥទ្ធិពលលើចិត្តរបស់ពួកគេ។
៩, ១០. តើមានឧទាហរណ៍អ្វីខ្លះដែលបង្ហាញថាអង្គការរបស់ព្រះយេហូវ៉ាចង់ឲ្យមនុស្សទាំងអស់រៀនសេចក្ដីពិត?
៩ កិច្ចការបកប្រែនេះនៃសៀវភៅដែលមានមូលដ្ឋានលើគម្ពីរនិងការបង្រៀនមនុស្សជាភាសារបស់ពួកគេកំពុងធ្វើឡើងនៅទូទាំងពិភពលោក។ ជាឧទាហរណ៍ នៅក្នុងប្រទេសម៉ិចស៊ិក មនុស្សភាគច្រើននិយាយភាសាអេស្ប៉ាញ ប៉ុន្តែមនុស្សជាច្រើនធំឡើងដោយនិយាយភាសាមួយទៀតនៅផ្ទះ។ ភាសាម៉ាយ៉ាគឺជាភាសាមួយក្នុងចំណោមភាសាទាំងនេះ។ ក្រុមបកប្រែភាសាម៉ាយ៉ាបានត្រូវចាត់ឲ្យទៅរស់នៅតំបន់មួយនៃប្រទេសម៉ិចស៊ិកដែលគេនិយាយភាសាម៉ាយ៉ា។ ដោយសារអ្នកបកប្រែអាចឮនិងនិយាយភាសាម៉ាយ៉ារាល់ថ្ងៃ នោះសៀវភៅបានត្រូវបកប្រែតាមរបៀបដែលមនុស្សនិយាយភាសាម៉ាយ៉ាអាចយល់យ៉ាងស្រួល។ ឧទាហរណ៍មួយទៀតគឺនៅប្រទេសនេប៉ាល់។ នៅប្រទេសនោះ មានប្រហែលជា១២០ភាសាខុសៗគ្នាដែលមនុស្សនិយាយ។ ប្រទេសនេប៉ាល់មានប្រជាជនជាង២៩លាននាក់។ នៅទីនោះមនុស្សជាង១០លាននាក់និយាយភាសានេប៉ាល់ជាភាសាទី១របស់ពួកគេ ហើយមនុស្សជាច្រើនទៀតនិយាយភាសានេប៉ាល់ជាភាសាទី២។ បងប្អូនរួមជំនឿរបស់យើងបកប្រែសៀវភៅដែលមានមូលដ្ឋានលើគម្ពីរជាភាសានេប៉ាល់។
១០ សព្វថ្ងៃនេះ កិច្ចការបកប្រែដែលកំពុងធ្វើឡើងជាច្រើនភាសាបង្ហាញថាអង្គការរបស់ព្រះយេហូវ៉ាចាត់ទុកភារកិច្ចផ្សព្វផ្សាយដំណឹងល្អនៅទូទាំងពិភពលោកជាភារកិច្ចដ៏សំខាន់។ សាក្សីព្រះយេហូវ៉ាបានចែកចាយខិត្តប័ណ្ណ សៀវភៅស្តើង ព្រមទាំងទស្សនាវដ្ដីរាប់លានក្បាល ប៉ុន្តែពួកគេមិនលក់សៀវភៅទាំងនោះទេ។ ផ្ទុយទៅវិញ សាក្សីព្រះយេហូវ៉ាគាំទ្រកិច្ចការនេះដោយវិភាគទានស្ម័គ្រចិត្តរបស់ពួកគេ។ ពួកគេធ្វើតាមការណែនាំរបស់លោកយេស៊ូដែលថា៖ «អ្នករាល់គ្នាបានទទួលដោយឥតបង់ថ្លៃ ចូរឲ្យដោយឥតគិតថ្លៃដែរ»។—ម៉ាថាយ ១០:៨
១១, ១២. ដោយសារយើងផ្សព្វផ្សាយនិងបង្រៀននៅទូទាំងពិភពលោក តើមនុស្សជាច្រើននិយាយយ៉ាងណាអំពីយើង?
១១ សាក្សីព្រះយេហូវ៉ាជឿជាក់ខ្លាំងដល់ម្ល៉េះថាពួកគេមានសេចក្ដីពិត បានជាពួកគេលះបង់ប្រយោជន៍ផ្ទាល់ខ្លួនយ៉ាងច្រើនដើម្បីផ្សព្វផ្សាយដល់មនុស្សគ្រប់ជាតិសាសន៍និងគ្រប់វប្បធម៌។ សាក្សីជាច្រើននាក់បានធ្វើឲ្យជីវិតរបស់ពួកគេសាមញ្ញ បានរៀនភាសាផ្សេងទៀត ហើយបានសម្របខ្លួនទៅតាមវប្បធម៌ផ្សេង។ ដោយសារយើងផ្សព្វផ្សាយនិងបង្រៀននៅទូទាំងពិភពលោក មនុស្សជាច្រើននិយាយថាសាក្សីព្រះយេហូវ៉ាគឺជាអ្នកកាន់តាមពិតរបស់លោកយេស៊ូគ្រិស្ត។
១២ សាក្សីព្រះយេហូវ៉ាធ្វើអ្វីទាំងអស់នេះ ដោយសារពួកគេជឿជាក់ថាពួកគេបានរកឃើញសេចក្ដីពិត។ ប៉ុន្តែ ជាពិសេសតើអ្វីធ្វើឲ្យបងប្អូនប្រុសស្រីរបស់យើងជឿជាក់ថាពួកគាត់មានសេចក្ដីពិត?—សូមអាន រ៉ូម ១៤:១៧, ១៨
មូលហេតុដែលសាក្សីព្រះយេហូវ៉ាជឿជាក់ថា ពួកគាត់មានសេចក្ដីពិត
១៣. តើតាមរបៀបណាសាក្សីព្រះយេហូវ៉ារក្សាអង្គការរបស់ពួកគេឲ្យស្អាតស្អំ?
១៣ បងប្អូនប្រុសស្រីរបស់យើងប្រាប់មូលហេតុផ្សេងៗជាច្រើនដែលពួកគាត់ជឿជាក់ថាពួកគាត់មានសេចក្ដីពិត។ បងប្រុសម្នាក់ដែលបម្រើព្រះយេហូវ៉ាអស់រយៈពេលជាយូរបាននិយាយថា៖ «អង្គការរបស់ព្រះយេហូវ៉ាខំប្រឹងអស់ពីសមត្ថភាពដើម្បីរក្សាភាពស្អាតស្អំនិងឥតសៅហ្មងខាងរឿងសីលធម៌ ទោះជាត្រូវប្រដៅឬឲ្យឱវាទទៅអ្នកណាក៏ដោយ»។ តើតាមរបៀបណារាស្ត្ររបស់ព្រះយេហូវ៉ារក្សាខ្នាតតម្រាដ៏ខ្ពង់ខ្ពស់នេះ? ពួកគេម្នាក់ៗខំអស់ពីសមត្ថភាពដើម្បីធ្វើតាមអ្វីដែលព្រះមានប្រសាសន៍នៅក្នុងគម្ពីរ និងដើម្បីយកតម្រាប់លោកយេស៊ូនិងអ្នកកាន់តាមលោក។ មានសាក្សីតែមួយចំនួនតិចប៉ុណ្ណោះដែលមិនព្រមធ្វើតាមខ្នាតតម្រារបស់ព្រះអំពីអ្វីដែលត្រូវនិងអ្វីដែលខុស ហើយបានត្រូវបណ្ដាច់មិត្តភាព ពោលគឺដកចេញពីក្រុមជំនុំ។ សាក្សីព្រះយេហូវ៉ាភាគច្រើនរស់នៅតាមរបៀបដែលស្អាតស្អំតាមទស្សនៈព្រះយេហូវ៉ា។ មនុស្សជាច្រើនដែលពីមុនបានធ្វើអ្វីដែលព្រះមិនពេញចិត្ត បានកែប្រែ ហើយឥឡូវធ្វើតាមខ្នាតតម្រារបស់ព្រះ។—សូមអាន កូរិនថូសទី១ ៦:៩-១១
១៤. ក្រោយពីពួកគេបានត្រូវដកចេញពីក្រុមជំនុំ តើមនុស្សជាច្រើនបានធ្វើការកែប្រែអ្វី? តើមានលទ្ធផលយ៉ាងណា?
១៤ គម្ពីរណែនាំគ្រិស្តសាសនិកឲ្យដកអ្នកដែលមិនព្រមស្ដាប់បង្គាប់ព្រះចេញពីក្រុមជំនុំ។ ប៉ុន្តែ មនុស្សរាប់ពាន់នាក់បានស្ដាយក្រោយយ៉ាងខ្លាំងចំពោះការប្រព្រឹត្តរបស់ពួកគេ ហើយបានត្រឡប់មកក្រុមជំនុំវិញ។ (សូមអាន កូរិនថូសទី២ ២:៦-៨) ដោយសារសាក្សីព្រះយេហូវ៉ាប្រើគម្ពីរជានិច្ចដើម្បីដឹកនាំការប្រព្រឹត្តរបស់ពួកគេ នោះក្រុមជំនុំអាចរក្សាភាពស្អាតស្អំ។ នេះធ្វើឲ្យពួកគេជឿជាក់ថាអង្គការរបស់ពួកគេគឺជាអង្គការដែលព្រះពេញចិត្ត។ ទោះជាសាសនាជាច្រើនក្នុងពិភពគ្រិស្តសាសនាអនុញ្ញាតឲ្យសមាជិករបស់ពួកគេធ្វើអ្វីក៏ដោយដែលពួកគេចង់ធ្វើ តែសាក្សីព្រះយេហូវ៉ាកំពុងរស់នៅស្របតាមខ្នាតតម្រារបស់ព្រះយេហូវ៉ា។ នេះបានធ្វើឲ្យមនុស្សជាច្រើនជឿជាក់ថាសាក្សីព្រះយេហូវ៉ាមានសេចក្ដីពិត។
ទោះជាសាសនាជាច្រើនក្នុងពិភពគ្រិស្តសាសនាអនុញ្ញាតឲ្យសមាជិករបស់ពួកគេធ្វើអ្វីក៏ដោយដែលពួកគេចង់ធ្វើ តែសាក្សីព្រះយេហូវ៉ារស់នៅស្របតាមខ្នាតតម្រារបស់ព្រះយេហូវ៉ា
១៥. តើអ្វីខ្លះធ្វើឲ្យបងប្រុសម្នាក់ជឿជាក់ថាគាត់មានសេចក្ដីពិត?
១៥ ហេតុអ្វីសាក្សីឯទៀតជឿថាពួកគេមានសេចក្ដីពិត? បងប្រុសម្នាក់ដែលមានអាយុ៥៤ឆ្នាំបានបម្រើព្រះយេហូវ៉ាតាំងពីគាត់នៅជាក្មេងជំទង់។ គាត់និយាយថាជំនឿរបស់គាត់គឺផ្អែកទៅលើការពិតសំខាន់បីយ៉ាងគឺ ទី(១) មានព្រះ ទី(២) គម្ពីរគឺមកពីព្រះ ហើយទី(៣) នៅផែនដីសព្វថ្ងៃនេះ សាក្សីព្រះយេហូវ៉ាគឺជាអ្នកដែលកំពុងធ្វើតាមបំណងប្រាថ្នារបស់ព្រះ។ គាត់និយាយថា៖ «កាលដែលខ្ញុំបានរៀនអស់ជាច្រើនឆ្នាំ ខ្ញុំព្យាយាមជានិច្ចដើម្បីសាកល្បងការពិតទាំងនោះ ហើយបានសួរខ្លួនឯងថាការពិតទាំងនោះពិតជាមានមូលដ្ឋានច្បាស់លាស់ឬយ៉ាងណា។ ទីសំអាងនៃការពិតនីមួយៗមានកាន់តែច្រើនឡើងពីមួយឆ្នាំទៅមួយឆ្នាំ នេះពង្រឹងជំនឿរបស់ខ្ញុំ ហើយធ្វើឲ្យខ្ញុំកាន់តែជឿជាក់ថាយើងពិតជាមានសេចក្ដីពិត»។
១៦. ហេតុអ្វីបងស្រីម្នាក់ជឿជាក់ថាគាត់មានសេចក្ដីពិត?
១៦ បងស្រីម្នាក់ដែលបានរៀបការហើយ ដែលធ្វើការនៅមន្ទីរចាត់ការពិភពលោករបស់សាក្សីព្រះយេហូវ៉ានាក្រុងញូវយ៉កបាននិយាយអំពីអ្វីដែលធ្វើឲ្យគាត់ជឿជាក់ថាគាត់មានសេចក្ដីពិត។ គាត់និយាយថាមានតែអង្គការរបស់ព្រះយេហូវ៉ាប៉ុណ្ណោះដែលប្រាប់មនុស្សឯទៀតអំពីនាមរបស់ព្រះយេហូវ៉ា ដែលមាននៅក្នុងគម្ពីរប្រហែលជា៧.០០០ដង។ គាត់ក៏បានទទួលការលើកទឹកចិត្តពីខគម្ពីរនៅរបាក្សត្រទី២ ១៦:៩ ដែលចែងថា៖ «ព្រះនេត្រនៃព្រះយេហូវ៉ាចេះតែទតច្រវាត់នៅគ្រប់លើផែនដីទាំងមូល ដើម្បីនឹងសំដែងព្រះចេស្ដាជួយដល់អស់អ្នកណាដែលមានចិត្តស្មោះត្រង់ចំពោះទ្រង់»។ គាត់រៀបរាប់ថា៖ «សេចក្ដីពិតបានបង្ហាញខ្ញុំអំពីរបៀបដែលខ្ញុំអាចមានចិត្តស្មោះ ដើម្បីព្រះយេហូវ៉ាអាចសម្ដែងឫទ្ធានុភាពរបស់លោកដោយឥតស្ទាក់ស្ទើរចំពោះខ្ញុំ។ ចំណងមិត្តភាពជាមួយព្រះយេហូវ៉ាគឺជាអ្វីដ៏មានតម្លៃបំផុតចំពោះខ្ញុំ ហើយខ្ញុំឲ្យតម្លៃចំពោះតួនាទីរបស់លោកយេស៊ូក្នុងការផ្ដល់ចំណេះជ្រាលជ្រៅអំពីព្រះ ដែលលើកទឹកចិត្តខ្ញុំ»។
១៧. តើបងប្រុសម្នាក់ដែលធ្លាប់ជឿថាមិនមានព្រះជឿជាក់អ្វី ហើយហេតុអ្វី?
១៧ បងប្រុសម្នាក់ដែលធ្លាប់ជាអ្នកមិនជឿថាមានព្រះ បាននិយាយថា៖ «អ្វីៗដែលព្រះបានបង្កើតធ្វើឲ្យខ្ញុំជឿជាក់ថាព្រះចង់ឲ្យមនុស្សជាតិសប្បាយនឹងជីវិត ហេតុនេះលោកនឹងមិនអនុញ្ញាតឲ្យមានទុក្ខវេទនាជារៀងរហូតទេ។ ម្យ៉ាងទៀត កាលដែលមនុស្សក្នុងពិភពលោកកាន់តែឥតកោតខ្លាចព្រះ រាស្ត្ររបស់ព្រះយេហូវ៉ាមានជំនឿ ចិត្តខ្នះខ្នែងនិងសេចក្ដីស្រឡាញ់កាន់តែខ្លាំងឡើង។ មានតែសកម្មពលរបស់ព្រះយេហូវ៉ាប៉ុណ្ណោះអាចធ្វើការអស្ចារ្យនេះនៅសម័យយើងបាន»។—សូមអាន ពេត្រុសទី១ ៤:១-៤
១៨. ហេតុអ្វីបងប្រុសពីរនាក់ជឿថាពួកគាត់មានសេចក្ដីពិត? តើអ្នកមានអារម្មណ៍យ៉ាងណាចំពោះបទពិសោធន៍របស់ពួកគាត់?
១៨ បងប្រុសម្នាក់ទៀតដែលស្គាល់សេចក្ដីពិតយូរហើយ ប្រាប់មូលហេតុដែលគាត់ជឿថាគាត់មានសេចក្ដីពិត ដោយថា៖ «ការស្រាវជ្រាវអស់ជាច្រើនឆ្នាំបានធ្វើឲ្យខ្ញុំជឿជាក់ថាសាក្សីព្រះយេហូវ៉ាបានព្យាយាមយ៉ាងខ្លាំងដើម្បីធ្វើតាមគំរូរបស់គ្រិស្តសាសនានៅសតវត្សរ៍ទី១។ កាលដែលខ្ញុំបានធ្វើដំណើរជុំវិញពិភពលោក ខ្ញុំបានឃើញដោយផ្ទាល់នូវសាមគ្គីភាពទូទាំងពិភពលោករបស់សាក្សីព្រះយេហូវ៉ា។ សេចក្ដីពិតពីគម្ពីរបានផ្ដល់ឲ្យខ្ញុំនូវការស្កប់ចិត្តនិងសុភមង្គល»។ បងប្រុសម្នាក់ដែលមានអាយុជាង៦០ឆ្នាំបានរៀបរាប់ថាសាក្សីព្រះយេហូវ៉ាពិតជាជឿលើលោកយេស៊ូ។ គាត់បានពន្យល់ថា៖ «យើងបានសិក្សាយ៉ាងយកចិត្តទុកដាក់អំពីជីវិតនិងកិច្ចបម្រើរបស់លោកយេស៊ូ ហើយយើងឲ្យតម្លៃចំពោះគំរូរបស់លោក។ យើងបានកែប្រែរបៀបរស់នៅរបស់យើងដើម្បីចូលទៅកាន់តែជិតព្រះតាមរយៈគ្រិស្តយេស៊ូ។ យើងបានទទួលស្គាល់ថាគ្រឿងបូជាលោះរបស់គ្រិស្តជាមូលដ្ឋានដើម្បីទទួលសេចក្ដីសង្គ្រោះ។ ម្យ៉ាងទៀត យើងដឹងថាលោកបានត្រូវប្រោសឲ្យរស់ឡើងវិញ។ ចំពោះហេតុការណ៍ពិតនោះ យើងមានការបញ្ជាក់របស់សាក្សីជាច្រើនដែលគួរឲ្យទុកចិត្ត»។—សូមអាន កូរិនថូសទី១ ១៥:៣-៨
ចូរប្រាប់អ្នកឯទៀតអំពីសេចក្ដីពិត
១៩, ២០. (ក) ក្នុងសំបុត្ររបស់ប៉ូលទៅក្រុមជំនុំនៅក្រុងរ៉ូម តើគាត់បាននិយាយអំពីភារកិច្ចអ្វី? (ខ) តើអ្នកបម្រើរបស់ព្រះយេហូវ៉ាទាំងអស់ត្រូវធ្វើអ្វី?
១៩ គ្រិស្តសាសនិកពិត ពិតជាស្រឡាញ់មនុស្ស។ នេះជាមូលហេតុដែលយើងត្រូវប្រាប់អ្នកឯទៀតអំពីសេចក្ដីពិតដែលយើងបានរៀន។ ប៉ូលបានប្រាប់ក្រុមជំនុំនៅក្រុងរ៉ូមថាអ្នកកាន់តាមពិតរបស់លោកយេស៊ូមានភារកិច្ចផ្សព្វផ្សាយ។ គាត់បានសរសេរថា៖ «បើអ្នកប្រកាស‹បណ្ដាំដែលនៅក្នុងមាត់របស់អ្នក› ជាសាធារណៈថាលោកយេស៊ូជាម្ចាស់ ហើយអ្នកមានជំនឿក្នុងចិត្តថាព្រះបានប្រោសលោកឲ្យរស់ពីស្លាប់ឡើងវិញ នោះអ្នកនឹងត្រូវសង្គ្រោះ។ ព្រោះដោយមានចិត្តជឿ គេទទួលបានសេចក្ដីសុចរិត ប៉ុន្តែដោយមាត់ប្រកាសជាសាធារណៈអំពីជំនឿនោះ គេទទួលបានសេចក្ដីសង្គ្រោះ»។—រ៉ូម ១០:៩, ១០
២០ សាក្សីព្រះយេហូវ៉ាជឿជាក់ថាពួកគេមានសេចក្ដីពិត ហើយពួកគេដឹងថាការប្រាប់អ្នកឯទៀតអំពីដំណឹងល្អនៃរាជាណាចក្ររបស់ព្រះគឺជាឯកសិទ្ធិ។ ដូច្នេះ សូមមានគោលដៅមិនគ្រាន់តែបង្រៀនអ្នកឯទៀតអំពីគម្ពីរប៉ុណ្ណោះទេ ប៉ុន្តែតាមរយៈរបៀបរស់នៅរបស់អ្នក សូមបង្ហាញពួកគេដែរថាអ្នកជឿជាក់ថាអ្នកមានសេចក្ដីពិត។