ឪពុកម្ដាយទាំងឡាយ តើអ្នកកំពុងជួយកូនរបស់អ្នកឲ្យរីកចម្រើនរហូតដល់ទទួលការជ្រមុជទឹកឬទេ?
«ហេតុអ្វីបានជាអ្នកកំពុងបង្អង់ដូច្នេះ? ចូរក្រោកឡើង ទៅទទួលការជ្រមុជទឹក»។—សកម្មភាព ២២:១៦
១. មុនកូនទទួលការជ្រមុជទឹក តើឪពុកម្ដាយដែលជាគ្រិស្តសាសនិកពិតចង់ធ្វើឲ្យប្រាកដអំពីអ្វី?
បងស្រីប្លសិម ប្រាណ្ដបានរៀបរាប់អំពីអ្វីដែលបានកើតឡើងពេលដែលគាត់សម្រេចចិត្តថាគាត់ចង់ទទួលការជ្រមុជទឹក។ គាត់និយាយថា៖ «អស់ជាច្រើនខែ ខ្ញុំបានប្រាប់ឪពុកម្ដាយខ្ញុំម្ដងហើយម្ដងទៀតថាខ្ញុំចង់ទទួលការជ្រមុជទឹក ហើយពួកគាត់ច្រើនតែបាននិយាយជាមួយខ្ញុំអំពីរឿងនេះ។ ពួកគាត់ចង់ធ្វើឲ្យប្រាកដថាខ្ញុំដឹងថានេះជាការសម្រេចចិត្តដ៏សំខាន់ណាស់។ ខ្ញុំបានសម្រេចអ្វីដ៏អស្ចារ្យនេះក្នុងជីវិតរបស់ខ្ញុំ នៅថ្ងៃទី៣១ ខែធ្នូ ឆ្នាំ១៩៣៤»។ នៅសព្វថ្ងៃនេះដែរ ឪពុកម្ដាយចង់ជួយកូនៗរបស់ពួកគេឲ្យធ្វើការសម្រេចចិត្តដ៏ឈ្លាសវៃ។ បើកូនរង់ចាំទទួលការជ្រមុជទឹកដោយគ្មានមូលហេតុត្រឹមត្រូវ នោះអាចបង្ខូចចំណងមិត្តភាពរបស់កូនជាមួយនឹងព្រះយេហូវ៉ា។ (យ៉ាកុប ៤:១៧) មុនកូនរបស់ពួកគេទទួលការជ្រមុជទឹក ឪពុកម្ដាយដែលមានប្រាជ្ញាចង់ធ្វើឲ្យប្រាកដថាកូនមានគុណសម្បត្ដិគ្រប់គ្រាន់ដើម្បីធ្វើជាអ្នកកាន់តាមគ្រិស្ត។
២. (ក) តើមានបញ្ហាអ្វីដែលអ្នកត្រួតពិនិត្យប្រចាំមណ្ឌលខ្លះបានឃើញ? (ខ) តើយើងនឹងពិចារណាអ្វីនៅក្នុងអត្ថបទនេះ?
២ អ្នកត្រួតពិនិត្យប្រចាំមណ្ឌលខ្លះបានឃើញថាប្អូនៗវ័យក្មេងជាច្រើននាក់ ដែលមានអាយុប្រហែលជាជិត២០ឆ្នាំឬ២០ឆ្នាំប្លាយ មិនទាន់ទទួលការជ្រមុជទឹក ទោះជាពួកគេបានត្រូវចិញ្ចឹមអប់រំក្នុងសេចក្ដីពិតក៏ដោយ។ តាមធម្មតា ប្អូនៗវ័យក្មេងទាំងនោះទៅកិច្ចប្រជុំ ចូលរួមក្នុងកិច្ចបម្រើផ្សាយ ហើយចាត់ទុកខ្លួនជាសាក្សីព្រះយេហូវ៉ា។ ប៉ុន្តែដោយសារមូលហេតុណាមួយ ពួកគេមិនបានប្រគល់ខ្លួនជូនព្រះយេហូវ៉ានិងទទួលការជ្រមុជទឹកទេ។ ជួនកាល នេះគឺដោយសារឪពុកម្ដាយរបស់ពួកគេគិតថាកូនមិនទាន់មានអាយុនិងគុណសម្បត្ដិគ្រប់គ្រាន់ដើម្បីទទួលការជ្រមុជទឹក។ ក្នុងអត្ថបទនេះ យើងនឹងពិចារណាអំពីការព្រួយបារម្ភបួនដែលបានរារាំងឪពុកម្ដាយខ្លះពីការលើកទឹកចិត្តកូនរបស់ពួកគេឲ្យទទួលការជ្រមុជទឹក។
តើកូនរបស់ខ្ញុំក្មេងពេកឬទេ?
៣. តើឪពុកម្ដាយរបស់បងប្លសិមបានព្រួយបារម្ភអំពីអ្វី?
៣ ឪពុកម្ដាយរបស់បងប្លសិមដែលបានត្រូវរៀបរាប់ក្នុងវគ្គទី១ បានបារម្ភថាតើគាត់មានអាយុគ្រប់គ្រាន់ឬយ៉ាងណាដើម្បីយល់អត្ថន័យនៃការជ្រមុជទឹក ហើយយល់ថានោះគឺសំខាន់ណាស់។ តើតាមរបៀបណាឪពុកម្ដាយអាចដឹងថាកូនរបស់ពួកគេមានគុណសម្បត្ដិគ្រប់គ្រាន់ដើម្បីប្រគល់ខ្លួនជូនព្រះយេហូវ៉ា?
៤. តើបង្គាប់របស់លោកយេស៊ូនៅម៉ាថាយ ២៨:១៩, ២០ អាចជួយឪពុកម្ដាយយ៉ាងដូចម្ដេចនៅសព្វថ្ងៃនេះ?
៤ សូមអាន ម៉ាថាយ ២៨:១៩, ២០។ គម្ពីរមិនបានចែងថាមានការកំណត់អាយុសម្រាប់បុគ្គលណាម្នាក់ដើម្បីទទួលការជ្រមុជទឹកទេ។ ប៉ុន្តែ ជាការល្អដែលឪពុកម្ដាយគិតយ៉ាងដិតដល់អំពីអ្វីដែលលោកយេស៊ូបានមានប្រសាសន៍នៅម៉ាថាយ ២៨:១៩ដែលថា៖ ‹ចូរបង្រៀនមនុស្សឲ្យក្លាយទៅជាអ្នកកាន់តាម›។ ពាក្យទាំងនេះមានន័យថា បង្រៀនបុគ្គលណាម្នាក់ដោយមានគោលដៅជួយគាត់ឲ្យក្លាយទៅជាសិស្សឬទៅជាអ្នកកាន់តាម។ អ្នកកាន់តាមលោកយេស៊ូគឺជាបុគ្គលដែលរៀននិងយល់អ្វីដែលលោកបានបង្រៀន ហើយដែលចង់ស្ដាប់បង្គាប់លោក។ ដូច្នេះ តាំងពីពេលដែលកូនៗកើតមក ឪពុកម្ដាយគួរបង្រៀនពួកគេដោយមានគោលដៅជួយពួកគេឲ្យប្រគល់ខ្លួនជូនព្រះយេហូវ៉ានិងក្លាយទៅជាអ្នកកាន់តាមគ្រិស្ត។ ពិតមែនថាទារកមិនមានគុណសម្បត្ដិគ្រប់គ្រាន់ដើម្បីទទួលការជ្រមុជទឹក តែគម្ពីរបង្ហាញថាសូម្បីតែកូនក្មេងក៏អាចយល់និងស្រឡាញ់សេចក្ដីពិតក្នុងគម្ពីរ។
៥, ៦. (ក) តើការរៀបរាប់ក្នុងគម្ពីរអំពីធីម៉ូថេនាំឲ្យយើងសន្និដ្ឋានយ៉ាងណាអំពីការជ្រមុជទឹករបស់គាត់? (ខ) តើអ្វីជារបៀបដ៏ល្អបំផុតដែលឪពុកម្ដាយអាចជួយកូន?
៥ ធីម៉ូថេជាអ្នកកាន់តាមម្នាក់របស់លោកយេស៊ូដែលបានសម្រេចចិត្តបម្រើព្រះយេហូវ៉ាពេលដែលគាត់នៅក្មេង។ សាវ័កប៉ូលបាននិយាយថាធីម៉ូថេបានចាប់ផ្ដើមរៀនសេចក្ដីពិតពីបណ្ដាំរបស់ព្រះតាំងពីគាត់«ជាទារកនៅឡើយ»។ ឪពុករបស់ធីម៉ូថេមិនមែនជាអ្នកបម្រើព្រះយេហូវ៉ាទេ តែម្ដាយនិងយាយរបស់ធីម៉ូថេបានជួយគាត់ឲ្យស្រឡាញ់បណ្ដាំរបស់ព្រះ។ ម្ល៉ោះហើយ គាត់មានជំនឿមាំមួន។ (ធីម៉ូថេទី២ ១:៥; ៣:១៤, ១៥) គាត់ប្រហែលជាមានអាយុជិត២០ឆ្នាំឬ២០ឆ្នាំប្លាយ ពេលគាត់មានគុណសម្បត្ដិគ្រប់គ្រាន់ដើម្បីទទួលភារកិច្ចពិសេសក្នុងក្រុមជំនុំ។—សកម្មភាព ១៦:១-៣
៦ កូនម្នាក់ៗគឺខុសៗគ្នា។ ពួកគេក៏មានភាពចាស់ទុំនៅអាយុខុសៗគ្នាដែរ។ កូនខ្លះយល់សេចក្ដីពិត ចេះធ្វើការសម្រេចចិត្តដ៏ឈ្លាសវៃ ហើយចង់ទទួលការជ្រមុជទឹកពេលដែលពួកគេនៅវ័យក្មេង។ កូនខ្លះទៀត ប្រហែលជាមិនធ្វើដូច្នេះរហូតដល់ពួកគេមានអាយុច្រើនជាងនោះបន្ដិច។ ឪពុកម្ដាយដែលមានប្រាជ្ញាមិនបង្ខំកូនរបស់ពួកគេឲ្យទទួលការជ្រមុជទឹកទេ។ ផ្ទុយទៅវិញ ពួកគេជួយកូនម្នាក់ៗឲ្យរីកចម្រើនតាមសមត្ថភាពរបស់កូន។ ឪពុកម្ដាយសប្បាយចិត្តពេលកូនធ្វើតាមពាក្យនៅសុភាសិត ២៧:១១។ (សូមអាន) ប៉ុន្តែ ពួកគេត្រូវចាំថាគោលដៅរបស់ពួកគេគឺជួយកូនឲ្យក្លាយទៅជាអ្នកកាន់តាមលោកយេស៊ូ។ ដោយយល់ដូច្នេះ ពួកគេគួរសួរខ្លួនថា ‹តើកូនរបស់ខ្ញុំមានចំណេះគ្រប់គ្រាន់ដើម្បីប្រគល់ខ្លួនជូនព្រះនិងទទួលការជ្រមុជទឹកឬទេ?›។
តើកូនរបស់ខ្ញុំមានចំណេះគ្រប់គ្រាន់ឬទេ?
៧. តើបុគ្គលម្នាក់ត្រូវស្គាល់ចំណុចល្អិតល្អន់ទាំងអស់នៃសេចក្ដីបង្រៀនក្នុងគម្ពីរមុនគាត់អាចទទួលការជ្រមុជទឹកឬទេ? សូមពន្យល់។
អ្នកកាន់តាមម្នាក់ៗរបស់គ្រិស្តត្រូវបន្តរៀន សូម្បីតែក្រោយពីពេលដែលពួកគេបានទទួលការជ្រមុជទឹក
៧ កាលដែលឪពុកម្ដាយបង្រៀនកូន ពួកគេជួយកូនឲ្យស្គាល់សេចក្ដីពិតយ៉ាងច្បាស់។ ចំណេះនេះនឹងជំរុញចិត្តកូនឲ្យប្រគល់ខ្លួនជូនព្រះ។ ប៉ុន្តែ នេះមិនមានន័យថាកូនត្រូវស្គាល់ព័ត៌មានទាំងអស់អំពីសេចក្ដីបង្រៀននីមួយៗក្នុងគម្ពីរមុនដែលគាត់អាចប្រគល់ខ្លួននិងទទួលការជ្រមុជទឹកទេ។ អ្នកកាន់តាមម្នាក់ៗរបស់គ្រិស្តត្រូវបន្តរៀន សូម្បីតែក្រោយពីពេលដែលពួកគេបានទទួលការជ្រមុជទឹក។ (សូមអាន កូឡុស ១:៩, ១០) ដូច្នេះ តើបុគ្គលណាម្នាក់ត្រូវមានចំណេះច្រើនយ៉ាងណាមុនគាត់អាចទទួលការជ្រមុជទឹក?
៨, ៩. តើអ្វីបានកើតឡើងដល់អ្នកយាមគុកនៅក្រុងភីលីព ហើយតើយើងអាចរៀនអ្វីពីបទពិសោធន៍របស់គាត់?
៨ បទពិសោធន៍របស់ក្រុមគ្រួសារមួយនៅអតីតកាលអាចជួយឪពុកម្ដាយនៅសព្វថ្ងៃនេះ។ (សកម្មភាព ១៦:២៥-៣៣) នៅឆ្នាំ៥០ គ.ស. ប៉ូលបានទៅក្រុងភីលីពក្នុងដំណើរលើកទី២របស់គាត់ជាសាសនាទូត។ នៅពេលដែលគាត់នៅទីនោះ គាត់និងស៊ីឡាសបានត្រូវគេចោទប្រកាន់មិនពិត ចាប់ខ្លួន ហើយបញ្ជូនទៅគុក។ ក្នុងអំឡុងយប់នោះ មានរញ្ជួយដីដ៏ខ្លាំងដែលបានធ្វើឲ្យទ្វារគុកទាំងអស់របើកឡើង។ អ្នកយាមគុកបានគិតថាអ្នកទោសទាំងអស់បានរត់គេចខ្លួន ហេតុនេះគាត់ចង់សម្លាប់ខ្លួន។ ប៉ុន្តែ ប៉ូលបានឃាត់គាត់។ បន្ទាប់មកប៉ូលនិងស៊ីឡាសបានបង្រៀនអ្នកយាមគុកនោះនិងក្រុមគ្រួសាររបស់គាត់នូវសេចក្ដីពិតអំពីលោកយេស៊ូ។ ពួកគេជឿអ្វីដែលពួកគេបានរៀនអំពីលោកយេស៊ូ ហើយបានទទួលស្គាល់ថាគឺសំខាន់ណាស់ឲ្យពួកគេស្ដាប់បង្គាប់លោក។ ដូច្នេះ ពួកគេបានទទួលការជ្រមុជទឹកភ្លាមៗ។ តើយើងអាចរៀនអ្វីពីបទពិសោធន៍របស់ពួកគេ?
៩ អ្នកយាមគុកប្រហែលជាទាហានរ៉ូមម្នាក់ដែលបានចូលនិវត្តន៍។ គាត់មិនស្គាល់បណ្ដាំរបស់ព្រះទេ។ ដូច្នេះដើម្បីទៅជាគ្រិស្តសាសនិក គាត់ត្រូវរៀនសេចក្ដីពិតបឋមៗពីគម្ពីរ យល់អ្វីដែលព្រះយេហូវ៉ាតម្រូវពីអ្នកបម្រើរបស់លោក ហើយគាត់ត្រូវមានចិត្តចង់ធ្វើតាមសេចក្ដីបង្រៀនរបស់លោកយេស៊ូ។ អ្វីដែលគាត់បានរៀនក្នុងរយៈពេលដ៏ខ្លីនោះបានជំរុញចិត្តគាត់ឲ្យចង់ទទួលការជ្រមុជទឹក។ គាត់ច្បាស់ជាបានបន្តរៀនថែមទៀតក្រោយពីគាត់បានទទួលការជ្រមុជទឹក។ ដូច្នេះ ពេលកូនប្រាប់អ្នកថាកូនចង់ទទួលការជ្រមុជទឹកដោយសារកូនស្រឡាញ់ព្រះយេហូវ៉ានិងចង់ស្ដាប់បង្គាប់លោក តើអ្នកអាចធ្វើអ្វី? អ្នកប្រហែលជានឹងឲ្យគាត់ទៅនិយាយជាមួយនឹងអ្នកចាស់ទុំដើម្បីពួកគាត់អាចសម្រេចចិត្តថាគាត់មានគុណសម្បត្ដិគ្រប់គ្រាន់ឬយ៉ាងណាដើម្បីទទួលការជ្រមុជទឹក។a (សូមមើលកំណត់សម្គាល់) ដូចគ្រិស្តសាសនិកទាំងអស់ដែលបានទទួលការជ្រមុជទឹក គាត់នឹងបន្តរៀនថែមទៀតអំពីព្រះយេហូវ៉ាអស់មួយជីវិតរបស់គាត់ ថែមទាំងជារៀងរហូត។—រ៉ូម ១១:៣៣, ៣៤
តើអ្វីគឺជាការអប់រំដ៏ល្អបំផុតសម្រាប់កូនរបស់ខ្ញុំ?
១០, ១១. (ក) តើឪពុកម្ដាយខ្លះមានទស្សនៈបែបណា? (ខ) តើអ្វីពិតជាការពារកូន?
១០ ឪពុកម្ដាយខ្លះគិតថាគឺជាការល្អឲ្យកូនទទួលការអប់រំខ្ពស់និងមានការងារល្អជាមុនសិន ទើបឲ្យកូនទទួលការជ្រមុជទឹក។ ឪពុកម្ដាយទាំងនេះប្រហែលជាមានបំណងល្អ តែពួកគេគួរសួរខ្លួនឯងថា ‹តើនេះនឹងជួយកូនរបស់ខ្ញុំឲ្យទទួលជោគជ័យពិតប្រាកដក្នុងជីវិតឬទេ? តើនេះសមស្របតាមអ្វីដែលយើងរៀនពីគម្ពីរឬទេ? តើព្រះយេហូវ៉ាចង់ឲ្យយើងប្រើជីវិតរបស់យើងយ៉ាងដូចម្ដេច?›។—សូមអាន សាស្ដា ១២:១
១១ គឺសំខាន់ឲ្យយើងចាំថាពិភពលោកនេះនិងអ្វីៗដែលនៅក្នុងពិភពលោកនេះគឺប្រឆាំងនឹងគោលបំណងនិងទស្សនៈរបស់ព្រះយេហូវ៉ា។ (យ៉ាកុប ៤:៧, ៨; យ៉ូហានទី១ ២:១៥-១៧; ៥:១៩) ចំណងមិត្តភាពជិតស្និទ្ធជាមួយនឹងព្រះយេហូវ៉ាគឺជាអ្វីដែលការពារកូនយ៉ាងល្អបំផុតពីសាថាន ពិភពលោកនេះ និងរបៀបគិតគូរដ៏អាក្រក់របស់ពិភពលោក។ បើឪពុកម្ដាយចាត់ទុកការអប់រំនិងការងារល្អថាសំខាន់បំផុតក្នុងជីវិត នោះកូនរបស់ពួកគេទំនងជានឹងគិតថាអ្វីៗក្នុងពិភពលោកនេះគឺសំខាន់ជាងចំណងមិត្តភាពជិតស្និទ្ធជាមួយនឹងព្រះយេហូវ៉ា។ នេះនាំឲ្យមានគ្រោះថ្នាក់។ ក្នុងនាមជាឪពុកម្ដាយដែលស្រឡាញ់កូន តើអ្នកពិតជាចង់ឲ្យពិភពលោកនេះបង្រៀនកូនរបស់អ្នកអំពីអ្វីដែលគេគិតថានឹងនាំឲ្យកូនសប្បាយឬទេ? របៀបតែមួយគត់ដើម្បីមានអំណរពិតប្រាកដនិងមានជោគជ័យគឺដោយចាត់ទុកព្រះយេហូវ៉ាថាសំខាន់បំផុតក្នុងជីវិតរបស់យើង។—សូមអាន ទំនុកតម្កើង ១:២, ៣
ចុះបើកូនរបស់ខ្ញុំប្រព្រឹត្តអំពើខុសឆ្គង?
១២. ហេតុអ្វីឪពុកម្ដាយខ្លះមានទស្សនៈថាគឺជាការល្អប្រសើរឲ្យកូនរបស់ពួកគេពន្យារពេលទទួលការជ្រមុជទឹក?
១២ ម្ដាយម្នាក់បានពន្យល់អំពីមូលហេតុដែលគាត់មិនចង់ឲ្យកូនស្រីរបស់គាត់ទទួលការជ្រមុជទឹក។ គាត់និយាយថា៖ «មូលហេតុសំខាន់ចម្បងគឺដោយសារខ្ញុំបារម្ភហួសហេតុពេកថាកូនខ្ញុំនឹងត្រូវបណ្ដាច់មិត្តភាព»។ ដូចបងស្រីនោះ ឪពុកម្ដាយខ្លះមានអារម្មណ៍ថាគឺជាការល្អប្រសើរឲ្យរង់ចាំរហូតដល់កូនចាស់ចិត្តចាស់គំនិតដើម្បីធ្វើការសម្រេចចិត្តត្រឹមត្រូវនិងមិនធ្វើអ្វីផ្ដេសផ្ដាស។ (លោកុប្បត្តិ ៨:២១; សុភាសិត ២២:១៥) ឪពុកម្ដាយទាំងនោះប្រហែលជាមានទស្សនៈថាបើកូនរបស់ពួកគេមិនបានទទួលការជ្រមុជទឹក កូនក៏មិនអាចត្រូវបណ្ដាច់មិត្តភាពដែរ។ ប៉ុន្តែ ហេតុអ្វីទស្សនៈនេះគឺមិនត្រឹមត្រូវ?—យ៉ាកុប ១:២២
១៣. បើបុគ្គលម្នាក់មិនទទួលការជ្រមុជទឹក តើនេះមានន័យថាគាត់មិនត្រូវទទួលខុសត្រូវចំពោះព្រះយេហូវ៉ាឬទេ? សូមពន្យល់។
១៣ ពិតមែនថាឪពុកម្ដាយមិនចង់ឲ្យកូនទទួលការជ្រមុជទឹកមុនដែលគាត់មានគុណសម្បត្ដិគ្រប់គ្រាន់ដើម្បីប្រគល់ជីវិតរបស់ខ្លួនជូនព្រះយេហូវ៉ា តែគឺជាការយល់ច្រឡំបើមានទស្សនៈថាកូនមិនត្រូវទទួលខុសត្រូវចំពោះព្រះយេហូវ៉ារហូតដល់គាត់ទទួលការជ្រមុជទឹក។ កូនត្រូវទទួលខុសត្រូវចំពោះព្រះពេលដែលគាត់ដឹងអំពីអ្វីដែលព្រះយេហូវ៉ាចាត់ទុកថាខុសនិងអ្វីដែលលោកចាត់ទុកថាត្រូវ។ (សូមអាន យ៉ាកុប ៤:១៧) ឪពុកម្ដាយដែលមានប្រាជ្ញាមិននិយាយអ្វីដែលធ្វើឲ្យកូនគិតថាកូនមិនគួរទទួលការជ្រមុជទឹកទេ។ សូម្បីតែពេលដែលកូននៅក្មេងក្ដី ពួកគេបង្រៀនកូនឲ្យស្រឡាញ់អ្វីដែលព្រះយេហូវ៉ាចាត់ទុកថាត្រឹមត្រូវ ហើយស្អប់អ្វីដែលលោកចាត់ទុកថាខុស ដូចដែលពួកគេធ្វើដែរ។ (លូកា ៦:៤០) សេចក្ដីស្រឡាញ់ដែលកូនមានចំពោះព្រះយេហូវ៉ានឹងការពារកូនមិនឲ្យប្រព្រឹត្តអំពើខុសឆ្គងធ្ងន់ធ្ងរ ដោយសារកូនចង់ធ្វើអ្វីដែលព្រះយេហូវ៉ាចាត់ទុកថាត្រឹមត្រូវ។—អេសាយ ៣៥:៨
អ្នកឯទៀតអាចជួយ
១៤. តើអ្នកចាស់ទុំអាចគាំទ្រឪពុកម្ដាយយ៉ាងដូចម្ដេច?
១៤ អ្នកចាស់ទុំអាចគាំទ្រឪពុកម្ដាយដោយនិយាយល្អៗអំពីគោលដៅក្នុងកិច្ចបម្រើព្រះយេហូវ៉ា។ បងស្រីម្នាក់ចាំថាបងប្រុសរ៉ាសិលបាននិយាយជាមួយនឹងគាត់ពេលគាត់អាយុ៦ឆ្នាំ។ បងស្រីនោះនិយាយថា៖ «គាត់បានចំណាយពេលនិយាយជាមួយខ្ញុំ១៥នាទីអំពីគោលដៅរបស់ខ្ញុំក្នុងកិច្ចបម្រើព្រះ»។ តើការសន្ទនានោះនាំឲ្យមានលទ្ធផលអ្វី? បងស្រីនោះបានទៅជាអ្នកត្រួសត្រាយ ហើយគាត់បានត្រួសត្រាយអស់រយៈពេលជាង៧០ឆ្នាំ! យើងឃើញច្បាស់ថា ពាក្យសម្ដីល្អនិងការលើកទឹកចិត្តអាចមានឥទ្ធិពលទៅលើមនុស្សម្នាក់អស់មួយជីវិតរបស់គាត់។ (សុភាសិត ២៥:១១) អ្នកចាស់ទុំក៏អាចអញ្ជើញឪពុកម្ដាយនិងកូនរបស់ពួកគេឲ្យជួយធ្វើកិច្ចការផ្សេងៗនៅសាលប្រជុំ។ អ្នកចាស់ទុំអាចសុំកូនក្មេងឲ្យធ្វើអ្វីដែលសមនឹងអាយុនិងសមត្ថភាពរបស់ពួកគេ។
១៥. តើអ្នកឯទៀតក្នុងក្រុមជំនុំអាចជួយប្អូនៗវ័យក្មេងយ៉ាងដូចម្ដេច?
១៥ តើអ្នកឯទៀតក្នុងក្រុមជំនុំអាចជួយយ៉ាងម្ដេច? ដោយបង្ហាញចំណាប់អារម្មណ៍ចំពោះប្អូនៗវ័យក្មេងតាមរបៀបដ៏សមរម្យ។ ជាឧទាហរណ៍ អ្នកអាចសង្កេតមើលការប្រព្រឹត្តរបស់ប្អូនៗឲ្យដឹងថាពួកគេកំពុងចូលទៅជិតព្រះយេហូវ៉ាឬយ៉ាងណា។ តើមានប្អូនណាម្នាក់បានឆ្លើយល្អនៅកិច្ចប្រជុំឬទេ? ឬតើគាត់មានផ្នែកណាមួយក្នុងកិច្ចប្រជុំសម្រាប់កិច្ចបម្រើនិងជីវិតជាគ្រិស្តសាសនិកឬទេ? តើគាត់បានផ្សព្វផ្សាយដល់អ្នកណាម្នាក់នៅសាលាឬទេ? ឬតើគាត់បានធ្វើអ្វីដែលត្រឹមត្រូវទោះជាគាត់មានចិត្តចង់ធ្វើខុសក៏ដោយ? បើដូច្នេះ សូមប្រាប់គាត់ថាគាត់បានធ្វើល្អណាស់! យើងអាចមានគោលដៅនិយាយជាមួយនឹងប្អូនៗវ័យក្មេងមុននិងក្រោយកិច្ចប្រជុំ។ ពេលយើងធ្វើដូច្នេះ កូនក្មេងនឹងមានអារម្មណ៍ថាពួកគេរួមចំណែកក្នុង«ពួកជំនុំធំ»។—ទំនុកតម្កើង ៣៥:១៨
ចូរជួយកូនឲ្យរីកចម្រើនរហូតដល់ទទួលការជ្រមុជទឹក
១៦, ១៧. (ក) ហេតុអ្វីការទទួលការជ្រមុជទឹកគឺសំខាន់? (ខ) តើឪពុកម្ដាយជាគ្រិស្តសាសនិកពិតអាចមានអំណរដោយសារអ្វី? (សូមមើលរូបភាពនៅដើមអត្ថបទ)
១៦ ឯកសិទ្ធិដ៏ធំបំផុតមួយដែលឪពុកម្ដាយមានគឺការបង្រៀនកូនឲ្យស្រឡាញ់ព្រះយេហូវ៉ា។ (ទំនុកតម្កើង ១២៧:៣; អេភេសូរ ៦:៤) ក្នុងប្រជាជាតិអ៊ីស្រាអែលកូនបានត្រូវប្រគល់ជូនព្រះយេហូវ៉ាពេលដែលពួកគេកើតមក។ ប៉ុន្តែ កូនរបស់យើងគឺមិនដូចគ្នាទេ។ ទោះជាឪពុកម្ដាយស្រឡាញ់ព្រះយេហូវ៉ានិងសេចក្ដីពិតក្ដី នេះមិនមានន័យថាកូនរបស់ពួកគេនឹងធ្វើដូច្នេះឡើយ។ ចាប់ពីថ្ងៃដែលកូនកើតមក ឪពុកម្ដាយត្រូវមានគោលដៅជួយកូនឲ្យក្លាយទៅជាអ្នកកាន់តាមលោកយេស៊ូ ប្រគល់ខ្លួនជូនព្រះ និងទទួលការជ្រមុជទឹក។ គ្មានអ្វីសំខាន់ជាងនេះទេ។ ការប្រគល់ខ្លួនជូនព្រះយេហូវ៉ា ការជ្រមុជទឹក និងការបម្រើលោកយ៉ាងស្មោះត្រង់ នឹងបើកឱកាសឲ្យបុគ្គលដែលបានធ្វើអ្វីទាំងនេះទទួលសេចក្ដីសង្គ្រោះក្នុងអំឡុងគ្រាទុក្ខវេទនាជាខ្លាំង។—ម៉ាថាយ ២៤:១៣
ឪពុកម្ដាយត្រូវមានគោលដៅជួយកូន ឲ្យក្លាយទៅជាអ្នកកាន់តាមលោកយេស៊ូ (សូមមើលវគ្គ១៦, ១៧)
១៧ ពេលដែលបងប្លសិម ប្រាណ្ដចង់ទទួលការជ្រមុជទឹក ឪពុកម្ដាយរបស់គាត់ចង់ធ្វើឲ្យប្រាកដថាគាត់មានគុណសម្បត្ដិគ្រប់គ្រាន់។ ពេលពួកគាត់ឃើញថាកូនមានគុណសម្បត្ដិគ្រប់គ្រាន់ហើយ នោះពួកគាត់បានគាំទ្រការសម្រេចចិត្តរបស់កូន។ បងប្លសិមបានពន្យល់អំពីអ្វីដែលឪពុករបស់គាត់បានធ្វើនៅយប់មុនដែលគាត់ទទួលការជ្រមុជទឹក។ គាត់និយាយថា៖ «ប៉ាឲ្យយើងទាំងអស់គ្នាលុតជង្គង់ចុះ រួចមកគាត់បានអធិដ្ឋាន។ គាត់ប្រាប់ព្រះយេហូវ៉ាថាគាត់សប្បាយចិត្តដែលកូនស្រីរបស់គាត់បានសម្រេចចិត្តប្រគល់ជីវិតជូនលោក»។ ជាង៦០ឆ្នាំក្រោយមក បងប្លសិមនិយាយថា៖ «ខ្ញុំនឹងមិនភ្លេចយប់នោះ អស់មួយជីវិតរបស់ខ្ញុំ!»។ ឪពុកម្ដាយទាំងឡាយ សូមឲ្យអ្នកមានអំណរនិងស្កប់ចិត្ត ពេលដែលអ្នកឃើញកូនរបស់អ្នកប្រគល់ខ្លួននិងទទួលការជ្រមុជទឹកជាអ្នកបម្រើរបស់ព្រះយេហូវ៉ា។
a ឪពុកម្ដាយអាចនិយាយជាមួយនឹងកូនអំពីព័ត៌មានក្នុងអត្ថបទដែលមានចំណងជើងថា «ហេតុអ្វីអ្នកគួរប្រគល់ខ្លួនជូនព្រះយេហូវ៉ា?»ក្នុងទស្សនាវដ្ដីប៉មយាម ថ្ងៃទី១ ខែមករា ឆ្នាំ២០១០ ទំព័រ៩-១៣ និង«ប្រអប់សំណួរ» នៅក្នុងកិច្ចបម្រើព្រះ ខែមេសា ឆ្នាំ២០១១ ទំព័រ២។