សំណួរពីយុវវ័យ
តើខ្ញុំគួរទទួលការជ្រមុជទឹកឬទេ? ភាគទី២: ត្រៀមខ្លួនដើម្បីជ្រមុជទឹក
បើប្អូនកំពុងធ្វើតាមខ្នាតតម្រាគម្ពីរនិងកំពុងបណ្ដុះចំណងមិត្តភាពជាមួយនឹងព្រះ គឺជាធម្មតាទេដែលប្អូនគិតអំពីការជ្រមុជទឹក។ តើប្អូនដឹងយ៉ាងដូចម្ដេចថាប្អូនបានត្រៀមខ្លួនហើយ?a
ក្នុងអត្ថបទនេះ យើងនឹងពិចារណា
តើខ្ញុំត្រូវមានចំណេះប៉ុណ្ណា?
ការត្រៀមខ្លួនដើម្បីទទួលការជ្រមុជទឹកមិនមានន័យថាយើងត្រូវទន្ទេញចាំព័ត៌មាន ដូចជាសិស្សម្នាក់ប្រហែលជាធ្វើដើម្បីប្រឡងជាប់ទេ។ ប៉ុន្តែ ប្អូននឹងត្រូវប្រើ«សមត្ថភាពរិះគិត»របស់ប្អូន ដើម្បីឲ្យកាន់តែជឿជាក់ថាអ្វីដែលគម្ពីរបង្រៀនជាសេចក្ដីពិត។ (រ៉ូម ១២:១) ជាឧទាហរណ៍៖
តើប្អូនជឿថាមានព្រះ ហើយថាលោកសមនឹងទទួលការគោរពប្រណិប័តន៍ពីប្អូនទេ?
គម្ពីរចែងថា៖ «អ្នកដែលចូលទៅជិតព្រះ ត្រូវតែជឿថាមានព្រះ ហើយជឿថាលោកឲ្យរង្វាន់ដល់អ្នកដែលខំស្វែងរកលោកអស់ពីចិត្ត»។—ហេប្រឺ ១១:៦
សូមសួរខ្លួនថា៖ ‹ហេតុអ្វីខ្ញុំជឿថាមានព្រះ?›។ (ហេប្រឺ ៣:៤) ‹ហេតុអ្វីខ្ញុំគួរគោរពប្រណិប័តន៍លោក?›។—ការបើកបង្ហាញ ៤:១១
ស្វែងយល់ថែមទៀត សូមមើលអត្ថបទដែលមានចំណងជើងថា«អ្វីៗទាំងអស់មានអ្នកបង្កើតឬវិវត្តន៍ដោយខ្លួនឯង? ភាគទី១ ហេតុអ្វីជឿថាមានព្រះ?»។
តើប្អូនជឿថាព័ត៌មានក្នុងគម្ពីរមកពីព្រះទេ?
គម្ពីរចែងថា៖ «គ្រប់ទាំងបទគម្ពីរបានត្រូវសរសេរក្រោមការដឹកនាំរបស់ព្រះ ក៏មានប្រយោជន៍សម្រាប់បង្រៀន កែតម្រង់ ធ្វើឲ្យត្រឹមត្រូវឡើងវិញ និងប្រដៅក្នុងផ្លូវសុចរិត»។—ធីម៉ូថេទី២ ៣:១៦
សូមសួរខ្លួនថា៖ ‹ហេតុអ្វីខ្ញុំជឿថាព័ត៌មានក្នុងគម្ពីរមិនមែនជាគំនិតរបស់មនុស្ស?›។—អេសាយ ៤៦:១០; ថែស្សាឡូនិចទី១ ២:១៣
ស្វែងយល់ថែមទៀត សូមមើលអត្ថបទដែលមានចំណងជើងថា«តើគម្ពីរបានជួយខ្ញុំយ៉ាងណា? ភាគទី១ សិក្សាស្រាវជ្រាវក្នុងគម្ពីររបស់អ្នក»។
តើប្អូនជឿថាព្រះយេហូវ៉ាប្រើក្រុមជំនុំគ្រិស្តសាសនិកដើម្បីបំពេញកិច្ចការរបស់លោកទេ?
គម្ពីរចែងថា៖ «សូមឲ្យ[ព្រះ]ទទួលការសរសើរតម្កើងតាមរយៈក្រុមជំនុំ និងតាមរយៈគ្រិស្តយេស៊ូ នៅគ្រប់ជំនាន់ជារៀងរហូតតទៅ»។—អេភេសូរ ៣:២១
សូមសួរខ្លួនថា៖ ‹តើខ្ញុំជឿថាអ្វីដែលខ្ញុំរៀនពីគម្ពីរនៅកិច្ចប្រជុំមកពីមនុស្សឬពីព្រះយេហូវ៉ា?›។ (ម៉ាថាយ ២៤:៤៥) ‹ពេលឪពុកម្ដាយរបស់ខ្ញុំមិនអាចចូលរួមកិច្ចប្រជុំ តើខ្ញុំនៅតែចូលរួមទេ បើពួកគាត់អនុញ្ញាត?›។—ហេប្រឺ ១០:២៤, ២៥
ស្វែងយល់ថែមទៀត សូមមើលអត្ថបទដែលមានចំណងជើងថា«ហេតុអ្វីចូលរួមប្រជុំនៅសាលប្រជុំ?»។
តើខ្ញុំគួរធ្វើអ្វីខ្លះ?
ដើម្បីទទួលការជ្រមុជទឹកប្អូនមិនចាំបាច់ត្រូវល្អឥតខ្ចោះទេ។ ប៉ុន្តែ ប្អូនគួរបង្ហាញឲ្យឃើញថាប្អូនពិតជាចង់‹ជៀសចេញពីការធ្វើអាក្រក់ ហើយប្រព្រឹត្តការល្អវិញ›។ (ចម្រៀងសរសើរព្រះ ៣៤:១៤) ជាឧទាហរណ៍៖
តើប្អូនកំពុងរស់នៅស្របតាមខ្នាតតម្រារបស់ព្រះយេហូវ៉ាឬទេ?
គម្ពីរចែងថា៖ «កុំធ្វើអ្វីដែលនាំឲ្យសមត្ថភាពវិនិច្ឆ័យផ្ដន្ទាទោសឡើយ»។—ពេត្រុសទី១ ៣:១៦
សូមសួរខ្លួនថា៖ ‹តើខ្ញុំបង្ហាញថា«សមត្ថភាពវែកញែក»របស់ខ្ញុំបានត្រូវបង្វឹកបង្ហាត់«ដើម្បីសម្គាល់អ្វីដែលខុសនិងអ្វីដែលត្រូវ»ឬទេ?›។ (ហេប្រឺ ៥:១៤) ‹តើខ្ញុំអាចនឹកឃើញពេលមួយដែលខ្ញុំបានយកឈ្នះការបង្ខិតបង្ខំពីមិត្តភក្តិដែលប្រព្រឹត្តមិនល្អឬទេ? តើមិត្តខ្ញុំលើកទឹកចិត្តខ្ញុំឲ្យធ្វើអ្វីដែលត្រឹមត្រូវឬទេ?›។—សុភាសិត ១៣:២០
ស្វែងយល់ថែមទៀត សូមមើលអត្ថបទដែលមានចំណងជើងថា«តើតាមរបៀបណាខ្ញុំអាចបង្វឹកបង្ហាត់សមត្ថភាពវិនិច្ឆ័យរបស់ខ្ញុំ?»។
តើប្អូនយល់ថាប្អូនត្រូវទទួលខុសត្រូវចំពោះព្រះយេហូវ៉ានូវអ្វីដែលប្អូនធ្វើឬទេ?
គម្ពីរចែងថា៖ «ព្រះនឹងវិនិច្ឆ័យយើងម្នាក់ៗតាមការប្រព្រឹត្តរបស់យើង»។—រ៉ូម ១៤:១២
សូមសួរខ្លួនថា៖ ‹តើខ្ញុំស្មោះត្រង់ចំពោះខ្លួនឯងនិងចំពោះអ្នកឯទៀតឬទេ?›។ (ហេប្រឺ ១៣:១៨) ‹តើខ្ញុំសារភាពកំហុសឬក៏ព្យាយាមលាក់បាំងឬបន្ទោសអ្នកឯទៀតចំពោះកំហុសនោះទេ?›។—សុភាសិត ២៨:១៣
ស្វែងយល់ថែមទៀត សូមមើលអត្ថបទដែលមានចំណងជើងថា«តើខ្ញុំគួរធ្វើយ៉ាងណាពេលធ្វើខុស?»។
តើប្អូនកំពុងពង្រឹងចំណងមិត្តភាពជាមួយព្រះយេហូវ៉ាឬទេ?
គម្ពីរចែងថា៖ «ចូរចូលទៅជិតព្រះ នោះលោកនឹងចូលមកជិតអ្នករាល់គ្នា»។—យ៉ាកុប ៤:៨
សូមសួរខ្លួនថា៖ ‹តើតាមរបៀបណាខ្ញុំចូលទៅជិតព្រះយេហូវ៉ា?›។ ជាឧទាហរណ៍ ‹តើខ្ញុំឧស្សាហ៍អានគម្ពីរទេ?›។ (ចម្រៀងសរសើរព្រះ ១:១, ២) ‹តើខ្ញុំអធិដ្ឋានជាទៀងទាត់ឬទេ?›។ (ថែស្សាឡូនិចទី១ ៥:១៧) ‹តើខ្ញុំអធិដ្ឋានចំៗដល់កម្រិតណា? តើមិត្តភក្តិខ្ញុំជាមិត្តភក្តិរបស់ព្រះយេហូវ៉ាទេ?›។—ចម្រៀងសរសើរព្រះ ១៥:១, ៤
ស្វែងយល់ថែមទៀត សូមមើលអត្ថបទដែលមានចំណងជើងថា«តើគម្ពីរអាចជួយខ្ញុំយ៉ាងដូចម្ដេច? ភាគទី២: ធ្វើឲ្យការអានគម្ពីរជាអ្វីដែលសប្បាយរីករាយ» និងអត្ថបទ«ហេតុអ្វីខ្ញុំគួរអធិដ្ឋាន?»។
យោបល់៖ ដើម្បីជួយប្អូនឲ្យត្រៀមខ្លួនសម្រាប់ការជ្រមុជទឹក សូមអានជំពូកទី៣៧ ក្នុងសៀវភៅសំណួរយុវវ័យចង់ដឹង និងចម្លើយដែលស្រាយចម្ងល់ ក្បាលទី២។ សូមកត់សម្គាល់ជាពិសេសក្នុងក្រដាសលំហាត់ នៅទំព័រទី៣០៨និង៣០៩។
a សូមអានអត្ថបទដែលមានចំណងជើងថា«តើខ្ញុំគួរទទួលការជ្រមុជទឹកឬទេ? ភាគទី១»។ អត្ថបទនេះនឹងបកស្រាយអត្ថន័យនិងសារៈសំខាន់នៃការប្រគល់ខ្លួនជូនព្រះនិងទទួលការជ្រមុជទឹក។