តើពិភពលោកនេះជិតដល់ទីបញ្ចប់ឬ? តើអ្វីទៅជាទីបញ្ចប់នៃពិភពលោក?
ពេលអ្នកឮពាក្យ«ទីបញ្ចប់នៃពិភពលោក» តើអ្នកស្រមៃគិតអំពីអ្វី? អ្នកប្រហែលជាគិតអំពីការរលាយពិភពលោក ឬប្រហែលទីបញ្ចប់នៃជីវិតទាំងឡាយ។ អ្នកខ្លះជឿថាពិភពលោកនេះកំពុងឆ្ពោះទៅរកការហិនវិនាស ដូចជាមានគ្រោះមហន្តរាយជាដើម ជាពិសេសពេលពួកគេអានព័ត៌មានដូចខាងក្រោម៖
«សង្គ្រាមនុយក្លេអ៊ែរអាចមានលទ្ធភាពផ្ទុះឡើងយ៉ាងងាយ មិនថាដោយចេតនា ឬដោយចៃដន្យ ឬដោយសារមានការយល់ច្រឡំក្ដី»(Bulletin of the Atomic Scientists)។
«តាំងពី១០ឆ្នាំកន្លងមកនេះ មានការបំផ្លិចបំផ្លាញជាច្រើនដោយខ្យល់ព្យុះ ភ្លើងឆេះព្រៃ គ្រោះរាំងស្ងួត ការបង្ខូចផ្កាថ្ម រលកកម្ដៅ និងទឹកជំនន់នៅទូទាំងពិភពលោក»(National Geographic)។
«ហ្វូងកណ្ដូបនៅទ្វីបអាហ្វ្រិកកាន់តែធំឡើងៗ ហើយវាស៊ីបំផ្លាញផលដំណាំអស់ជាច្រើនឆ្នាំ»(The Associated Press)។
តើផែនដីនឹងត្រូវបំផ្លាញពេលដែលទីបញ្ចប់មកដល់ឬ? តើគម្ពីរចែងយ៉ាងណា?
តើភពផែនដីនឹងត្រូវបំផ្លាញឬ?
មិនមែនទេ។ គម្ពីរដែលជាបណ្ដាំរបស់ព្រះផ្ដល់ការធានាថាផែនដីនឹងនៅស្ថិតស្ថេរជារៀងរហូត។ (អ្នកទូន្មាន ១:៤) ព្រះមិនបំផ្លាញផែនដីទេ ផ្ទុយទៅវិញ លោកនឹង«បំផ្លាញពួកអ្នកដែលកំពុងបង្ខូចផែនដី»។—ការបើកបង្ហាញ ១១:១៨
តើពិភពលោកនេះកំពុងជិតដល់ទីបញ្ចប់ឬ?
យោងទៅតាមគម្ពីរ ពាក្យ«ពិភពលោក»ដែលនឹងដល់ទីបញ្ចប់ គឺសំដៅទៅសង្គមមនុស្សដែលមិនអើពើនឹងការណែនាំពីព្រះ ហើយចង់ធ្វើតាមទំនើងចិត្តរបស់ពួកគេ។ នៅសម័យណូអេ ព្រះបានបំផ្លាញ‹ពិភពលោកនៃមនុស្សដែលមិនកោតខ្លាចលោក›។ ហេតុនេះ លោកក៏ធ្វើដូច្នោះដែរទៅលើសង្គមមនុស្សសព្វថ្ងៃ។—ពេត្រុសទី២ ២:៥; ៣:៧
យ៉ូហានទី១ ២:១៧ ចែងថា៖«ពិភពលោកនេះនិងសេចក្ដីប៉ងប្រាថ្នារបស់វា កំពុងឈានទៅរកការសាបសូន្យ»។ ខនេះបង្ហាញថាព្រះនឹងមិនបំផ្លាញផែនដីទេ តែលោកនឹងបំផ្លាញមនុស្សដែលបន្តធ្វើអំពើអាក្រក់។
តើពេលណាទីបញ្ចប់នឹងមកដល់?
គម្ពីរមិនប្រាប់យើងយ៉ាងជាក់លាក់អំពីពេលណាដែលទីបញ្ចប់នឹងមកដល់នោះទេ។ (ម៉ាថាយ ២៤:៣៦) ប៉ុន្តែ គម្ពីរប្រាប់ថាទីបញ្ចប់នឹងមកនាពេលឆាប់ៗខាងមុខ។ គម្ពីរបានប្រកាសទុកជាមុននូវព្រឹត្តិការណ៍ដូចតទៅ៖
មានព្រឹត្តិការណ៍ដូចជា សង្គ្រាម ការអត់ឃ្លាន រោគរាតត្បាត និងមានការរញ្ជួយដី«ពីកន្លែងមួយទៅកន្លែងមួយ»។—ម៉ាថាយ ២៤:៣, ៧, ១៤; លូកា ២១:១០, ១១; ការបើកបង្ហាញ ៦:១-៨
មនុស្សជាទូទៅនឹងបង្ហាញភាពអាត្មានិយម។ ជាឧទាហរណ៍ ពួកគេនឹង«ស្រឡាញ់ប្រាក់»«រមិលគុណ»និង«មិនចេះទប់ចិត្ត»។—ធីម៉ូថេទី២ ៣:១-៥
មនុស្សជាច្រើនយល់ស្របថាតាំងពីឆ្នាំ១៩១៤ ស្ថានភាពពិភពលោកបានកើតឡើងដូចអ្វីដែលគម្ពីរបានប្រកាសទុកជាមុនមែន ហើយថាទីបញ្ចប់គឺជិតណាស់ហើយ។ ដើម្បីទទួលបានព័ត៌មានថែមទៀត សូមមើលអត្ថបទដែលមានចំណងជើងថា«តើប្រវត្តិហេតុក្នុងគម្ពីរបញ្ជាក់អ្វីខ្លះអំពីឆ្នាំ១៩១៤?» និងអត្ថបទចំណងជើងថា«តើអ្វីជាសញ្ញាសម្គាល់នៃ‹គ្រាចុងក្រោយបង្អស់› ឬ‹ទីបញ្ចប់ពិភពលោក›?»។
តើសៀវភៅចុងក្រោយក្នុងគម្ពីរប្រកាសទុកជាមុនតែអំពីការបំផ្លាញឬ?
សៀវភៅចុងក្រោយក្នុងគម្ពីរលើកបញ្ជាក់អំពីគ្រានៃ«ការបើកបង្ហាញដោយលោកយេស៊ូគ្រិស្ត»ដែលនឹងកើតឡើងពេលលោកយេស៊ូមកក្នុងនាមជាបុគ្គលមួយរូបដែលមានអំណាចដកចេញអំពើអាក្រក់សព្វបែបយ៉ាងពីផែនដី ហើយផ្ដល់រង្វាន់ដល់អស់អ្នកដែលគោរពប្រណិប័តន៍ព្រះ។—ថែស្សាឡូនិចទី២ ១:៦, ៧; ពេត្រុសទី១ ១:៧, ១៣
សៀវភៅនេះបើកបង្ហាញអំពីព្រឹត្តិការណ៍ផ្សេងៗនៅថ្ងៃអនាគត។ (ការបើកបង្ហាញ ១:១) សៀវភៅនេះមានដំណឹងល្អនិងសេចក្ដីសង្ឃឹម។ (ការបើកបង្ហាញ ១:៣) សៀវភៅនេះបង្ហាញថាព្រះនឹងបំបាត់ចោលអំពើអយុត្តិធម៌ទាំងអស់ ហើយលោកនឹងធ្វើឲ្យផែនដីក្លាយទៅជាសួនឧទ្យាន។ នៅគ្រានោះ មនុស្សជាតិនឹងលែងមានការឈឺចាប់ ទុក្ខវេទនា ឬសេចក្ដីស្លាប់ទៀតហើយ។—ការបើកបង្ហាញ ២១:៣, ៤
តើលោកអ្នកចង់រៀនថែមទៀតអំពីសេចក្ដីសង្ឃឹមដ៏អស្ចារ្យទាំងនេះទេ? សាក្សីព្រះយេហូវ៉ាមានវគ្គសិក្សាគម្ពីរដោយឥតគិតថ្លៃដែលអាចជួយលោកអ្នក។ លោកអ្នកអាចទាក់ទងទៅពួកគេនៅថ្ងៃនេះក៏បាន។