មន្ត្រីនាយកដ្ឋានសុខាភិបាលបានព្រមានអំពីឥទ្ធិពលនៃបណ្ដាញសង្គមទៅលើក្មេងជំទង់ តើគម្ពីរចែងយ៉ាងណា?

នៅថ្ងៃទី២៣ ខែឧសភា ឆ្នាំ២០២៣ មន្ត្រីនាយកដ្ឋានសុខាភិបាលនៅសហរដ្ឋអាម៉េរិកបានព្រមានសាធារណជនថា បណ្ដាញសង្គមកំពុងមានឥទ្ធិពលអាក្រក់ទៅលើក្មេងជំទង់ជាច្រើន។

ប្រភពព័ត៌មានមួយនៅសហរដ្ឋអាម៉េរិកបានរៀបរាប់ថា៖«ទោះជាបណ្ដាញសង្គមប្រហែលជាអាចមានប្រយោជន៍សម្រាប់កុមារនិងក្មេងជំទង់មួយចំនួនក្ដី តែក៏មានភ័ស្តុតាងជាច្រើនដែលបង្ហាញថាបណ្ដាញសង្គមអាចមានផលអាក្រក់ទៅលើសុខភាពផ្លូវចិត្តនិងផ្លូវកាយរបស់កុមារនិងក្មេងជំទង់ដែរ»ចេញឆ្នាំ២០២៣ (Social Media and Youth Mental Health: The U.S. Surgeon General’s Advisory)។

ប្រភពព័ត៌មាននោះបានលើកឡើងមូលហេតុដែលយើងគួរព្រួយបារម្ភអំពីរឿងនេះ។

ក្មេងជំទង់ចាប់ពី១២ដល់១៥ឆ្នាំ«ដែលចំណាយពេលច្រើនជាង៣ម៉ោងជារៀងរាល់ថ្ងៃក្នុងការប្រើបណ្ដាញសង្គម នឹងប្រឈមបញ្ហាផ្លូវចិត្តទ្វេរជាពីរ រួមមានអាការនៃជំងឺធ្លាក់ទឹកចិត្តនិងថប់បារម្ភ»។
ពេលក្មេងជំទង់អាយុ១៤ឆ្នាំ«ចំណាយពេលច្រើនមើលបណ្ដាញសង្គម នោះពួកគេច្រើនតែពិបាកចូលគេង រងការសម្លុតធ្វើបាបតាមអ៊ីនធឺណិត មិនពេញចិត្តនឹងរូបរាងរបស់ខ្លួន មានអារម្មណ៍ថាខ្លួនគ្មានតម្លៃ និងធ្លាក់ទឹកចិត្តជាដើម។ នេះច្រើនតែកើតឡើងចំពោះក្មេងស្រីជាងក្មេងប្រុស»។

តើតាមរបៀបណាឪពុកម្ដាយអាចការពារកូនរបស់ពួកគេពីគ្រោះថ្នាក់ទាំងនោះ? គម្ពីរផ្ដល់ដំបូន្មានដ៏មានប្រយោជន៍ជាច្រើន។

អ្វីដែលឪពុកម្ដាយអាចធ្វើ

សូមពិចារណាប្រយោជន៍និងផលវិបាក។ ឪពុកម្ដាយត្រូវពិចារណាអំពីគ្រោះថ្នាក់ រួចសម្រេចចិត្តថាគួរឲ្យកូនប្រើបណ្ដាញសង្គមឬអត់។

គោលការណ៍គម្ពីរ៖«ចូរបង្ហាត់បង្រៀនកូនក្មេងឲ្យដើរតាមផ្លូវត្រឹមត្រូវ»។—សុភាសិត ២២:៦
ដើម្បីរៀនថែមទៀតសូមអានអត្ថបទចំណងជើងថា«តើកូនរបស់ខ្ញុំគួរប្រើបណ្ដាញសង្គមទេ?»។

បើអ្នកអនុញ្ញាតឲ្យកូនរបស់អ្នកប្រើបណ្ដាញសង្គមសូមស្គាល់ពីគ្រោះថ្នាក់ដែលអាចកើតឡើង និងស្គាល់អំពីរបៀបដែលកូនប្រើបណ្ដាញសង្គម។ តើអ្នកអាចធ្វើដូច្នេះតាមរបៀបណា?

ការពារកូនពីអ្វីដែលគ្រោះថ្នាក់។ បង្រៀនកូនរបស់អ្នកឲ្យស្គាល់ និងចៀសវាងពីអ្វីដែលមានគ្រោះថ្នាក់ក្នុងបណ្ដាញសង្គម។

គោលការណ៍គម្ពីរ៖«អ្នករាល់គ្នាមិនត្រូវនិយាយទាល់តែសោះអំពីរឿងប្រាសចាកសីលធម៌ខាងផ្លូវភេទ អំពើស្មោកគ្រោក ឬការលោភលន់ណាឡើយ . . . អ្នករាល់គ្នាក៏មិនត្រូវមានការប្រព្រឹត្តដែលគួរឲ្យខ្មាស ការនិយាយពាក្យផ្ដេសផ្ដាស ការនិយាយកំប្លែងអាសអាភាស»។—អេភេសូរ ៥:៣, ៤
ដើម្បីទទួលយោបល់ថែមទៀតសូមអានអត្ថបទចំណងជើងថា«ចូរបង្រៀនកូនជំទង់របស់អ្នកអំពីរបៀបប្រើបណ្ដាញសង្គមដោយសុវត្ថិភាព»។

ដាក់កម្រិត។ ជាឧទាហរណ៍ អ្នកអាចដាក់ច្បាប់ថាពេលណាឬរយៈពេលប៉ុណ្ណាដែលកូនអាចប្រើបណ្ដាញសង្គម។

គោលការណ៍គម្ពីរ៖«ចូរយកចិត្តទុកដាក់ឲ្យដិតដល់ចំពោះការប្រព្រឹត្តរបស់ខ្លួន . . . ប្រព្រឹត្តដូចមនុស្សដែលមានប្រាជ្ញាវិញ ដោយប្រើគ្រប់ឱកាសឲ្យកើតប្រយោជន៍ច្រើនបំផុត»។—អេភេសូរ ៥:១៥, ១៦
សូមបង្ហាញវីដេអូគំនូរជីវចលលើក្ដារខៀនចំណងជើងថាចូរប្រើអ៊ីនធឺណិតដោយឈ្លាសវៃ ដើម្បីជួយកូនឲ្យយល់មូលហេតុដែលពួកគេត្រូវដាក់កម្រិតក្នុងការប្រើបណ្ដាញសង្គម។