សំណួរពីយុវវ័យ
ហេតុអ្វីគួរប្រព្រឹត្តទៀងត្រង់?
មូលហេតុដែលអ្នកខ្លះប្រព្រឹត្តមិនទៀងត្រង់
មនុស្សសព្វថ្ងៃនេះប្រហែលជាគិតថា ទៀងត្រង់ពេកគ្មានប្រយោជន៍ទេ។ សូមពិចារណាមូលហេតុដែលពួកគេគិតដូច្នោះ។
‹បើខ្ញុំមិនកុហកឪពុកម្ដាយខ្ញុំទេ ពួកគាត់ច្បាស់ជាដាក់ពិន័យខ្ញុំមិនខាន›។
‹បើខ្ញុំមិនលួចមើលទេ ខ្ញុំអាចប្រឡងធ្លាក់›។
‹បើខ្ញុំមិនលួចរបស់នេះទេ ខ្ញុំត្រូវសន្សំលុយទើបទិញបាន›។
មនុស្សខ្លះនិយាយថា៖‹មិនមែនរឿងធំដុំអីទេ! មនុស្សទាំងអស់ប្រព្រឹត្តមិនទៀងត្រង់ដែរតើ!›។
ការគិតដូច្នោះគឺមិនត្រឹមត្រូវទេ។ ព្រោះមនុស្សជាច្រើនរួមទាំងប្អូនៗយុវវ័យ ជឿថាការប្រព្រឹត្តទៀងត្រង់នៅតែមានប្រយោជន៍ ហើយពួកគេមានមូលហេតុដែលជឿដូច្នោះ។ គម្ពីរចែងថា៖«មនុស្សទទួលផលតាមតែអ្វីដែលគេសាបព្រោះ»។ (កាឡាទី ៦:៧) បើនិយាយឲ្យចំទៅ យើងទទួលផលតាមការប្រព្រឹត្តរបស់យើង មិនថាលទ្ធផលល្អឬអាក្រក់ក្ដី។
ជាឧទាហរណ៍ សូមគិតអំពីលទ្ធផលមិនល្អដែលមកពីការនិយាយកុហក។
ប្អូនអានីតាបានរៀបរាប់ថា៖«ខ្ញុំបាននិយាយទូរសព្ទជាមួយប្រុសម្នាក់ ពេលម៉ាក់ខ្ញុំសួរថាជាអ្នកណា ខ្ញុំមិនបានប្រាប់ការពិតដល់គាត់ទេ។ ប៉ុន្តែ ម៉ាក់ខ្ញុំដឹងច្បាស់ថាខ្ញុំកំពុងកុហកគាត់។ ក្រោយពីគាត់ចាប់បានអស់បីដងថាខ្ញុំកុហកគាត់ គាត់ខឹងខ្ញុំខ្លាំងណាស់ ហើយបានដាក់ពិន័យមិនឲ្យខ្ញុំចេញទៅក្រៅអស់ពីរសប្ដាហ៍ និងមិនឲ្យប្រើទូរសព្ទឬមើលទូរទស្សន៍អស់មួយខែ។ តាំងពីពេលនោះមក ខ្ញុំលែងនិយាយកុហកឪពុកម្ដាយខ្ញុំទៀតហើយ!»។
សូមពិចារណា៖ ហេតុអ្វីប្រហែលជាត្រូវការពេលដើម្បីឲ្យម្ដាយរបស់ប្អូនអានីតាទុកចិត្តគាត់ឡើងវិញ?
គម្ពីរចែងថា៖ «ដោយសារអ្នករាល់គ្នាបានបោះបង់ចោលពាក្យមិនពិតរួចហើយ ចូរអ្នករាល់គ្នាម្នាក់ៗនិយាយសេចក្ដីពិតទៅអ្នកជិតខាងខ្លួន»។—អេភេសូរ ៤:២៥
ប្អូនអានថូនីបានរៀបរាប់ថា៖«ខ្ញុំបានកុហកឪពុកម្ដាយខ្ញុំ ហើយខ្ញុំគិតថាខ្ញុំរួចខ្លួនហើយ។ ប៉ុន្តែក្រោយមក ពេលពួកគាត់សួរនាំខ្ញុំម្ដងទៀត ពួកគាត់ចាប់បានថាខ្ញុំនិយាយកុហក ដោយសារអ្វីដែលខ្ញុំនិយាយនោះខុសពីលើកមុន ព្រោះខ្ញុំមិនចាំពាក្យសម្ដីទាំងអស់ដែលខ្ញុំបាននិយាយទេ។ ដូច្នេះល្អបំផុតឲ្យយើងនិយាយការពិតតាំងពីដំបូង ជៀសវាងមានបញ្ហានៅពេលក្រោយ!»។
សូមពិចារណា៖ តើប្អូនអានថូនីអាចធ្វើអ្វីដើម្បីកុំឲ្យជួបស្ថានភាពដ៏គួរឲ្យខ្មាសដូចនោះ?
គម្ពីរចែងថា៖ «ព្រះយេហូវ៉ាស្អប់មនុស្សកុហក តែលោកពេញចិត្តមនុស្សស្មោះត្រង់»។—សុភាសិត ១២:២២
ប្អូនអ៊ីវ៉នបានរៀបរាប់ថា៖«ខ្ញុំមានមិត្តម្នាក់ដែលតែងតែនិយាយពន្លើស។ គាត់ចូលចិត្តនិយាយពន្លើសរឿងគ្រប់យ៉ាង។ ខ្ញុំមិនស្អប់គាត់ទេ ហើយអ្វីដែលគាត់និយាយខ្ញុំមិនចង់គិតច្រើនដែរ។ ទោះជាអ៊ីចឹងក៏ដោយ ខ្ញុំពិបាកជឿឬទុកចិត្តគាត់ណាស់»។
សូមពិចារណា៖ តើការនិយាយពន្លើសសូម្បីតែតិចតួចក៏ដោយ អាចប៉ះពាល់យ៉ាងណាដល់កេរ្តិ៍ឈ្មោះរបស់មិត្តអ៊ីវ៉ន?
គម្ពីរចែងថា៖ «យើងចង់ធ្វើការទាំងអស់ដោយទៀងត្រង់»។—ហេប្រឺ ១៣:១៨
គ្រឹះអគារដែលប្រេះស្រាំអាចបង្ខូចអគារទាំងមូល។ ស្រដៀងគ្នាដែរ ការប្រព្រឹត្តមិនទៀងត្រង់អាចបង្ខូចកេរ្តិ៍ឈ្មោះរបស់ប្អូន
ប្រយោជន៍ដែលមកពីការប្រព្រឹត្តទៀងត្រង់
ឥឡូវ សូមគិតពិចារណាអំពីលទ្ធផលល្អដែលប្អូនអាចទទួលពីការប្រព្រឹត្តទៀងត្រង់។
ប្អូនវីវេនបានរៀបរាប់ថា៖«ខ្ញុំបានឃើញស្ត្រីម្នាក់ជ្រុះលុយ។ ខ្ញុំបានស្រែកហៅគាត់ ហើយរើសលុយនោះឲ្យគាត់វិញ។ គាត់សប្បាយចិត្តណាស់ ហើយសរសើរខ្ញុំថា៖‹កម្រឃើញមនុស្សទៀងត្រង់ដូចប្អូនណាស់ អរគុណប្អូន›។ ពេលឃើញគេឲ្យតម្លៃចំពោះភាពទៀងត្រង់របស់ខ្ញុំ ខ្ញុំមានអារម្មណ៍ល្អមែនទែន»។
សូមពិចារណា៖ ហេតុអ្វីស្ត្រីនោះភ្ញាក់ផ្អើលពេលឃើញប្អូនវីវេនប្រព្រឹត្តទៀងត្រង់? តើការប្រព្រឹត្តទៀងត្រង់ផ្ដល់ប្រយោជន៍អ្វីដល់ប្អូនវីវេន?
គម្ពីរចែងថា៖ «មានសុភមង្គលហើយ អស់អ្នកដែល . . . តែងតែធ្វើអ្វីដែលត្រឹមត្រូវជានិច្ច»។—ចម្រៀងសរសើរព្រះ ១០៦:៣
ប្អូនជូលាបានរៀបរាប់ថា៖«ក្រុមគ្រួសារយើងធ្វើការខាងផ្នែកសម្អាត ជួនកាលពេលយើងសម្អាតក្នុងការិយាល័យ យើងឃើញកាក់ជ្រុះនៅលើឥដ្ឋ។ រាល់ដងដែលយើងរើសបាន យើងតែងយកទៅទុកលើតុ។ ពេលឃើញដូច្នោះ បុគ្គលិកម្នាក់នៅទីនោះនឹកហួសចិត្ត ហើយនិយាយថា៖‹ទុកធ្វើអី គ្រាន់តែកាក់តូចមួយហ្នឹង!›។ ប៉ុន្តែ ដោយសារភាពទៀងត្រង់នេះហើយ ដែលធ្វើឲ្យបុគ្គលិកនោះទុកចិត្តយើង»។
សូមពិចារណា៖ ដោយសារប្អូនជូលាមានកេរ្តិ៍ឈ្មោះជាអ្នកប្រព្រឹត្តទៀងត្រង់ តើមានប្រយោជន៍យ៉ាងណាពេលនាងត្រូវស្វែងរកការងារមួយទៀត?
គម្ពីរចែងថា៖ «ចូរខំប្រឹងអស់ពីសមត្ថភាពដើម្បីបង្ហាញខ្លួនអ្នកនៅចំពោះមុខព្រះថា អ្នកជាមនុស្សដែលលោកពេញចិត្ត និងជាអ្នកធ្វើការដែលគ្មានហេតុអៀនខ្មាស»។—ធីម៉ូថេទី២ ២:១៥
ប្អូនបេថានីបានរៀបរាប់ថា៖«ខ្ញុំបានធ្វើការ៦៤ម៉ោង តែគេច្រឡំបើកប្រាក់ខែឲ្យខ្ញុំលើស គឺជាប្រាក់ខែសម្រាប់៨០ម៉ោង។ តាមពិត ខ្ញុំអាចទុកលុយលើសនោះបាន ហើយបើខ្ញុំទុក ក្រុមហ៊ុនក៏មិនរលំដែរ។ តែបើខ្ញុំធ្វើដូច្នោះ ប្រៀបដូចជាខ្ញុំលួចលុយក្រុមហ៊ុនអ៊ីចឹង ដូច្នេះហើយខ្ញុំបានប្រាប់ប្រធានគណនេយ្យអំពីរឿងនេះ គាត់ដឹងគុណខ្ញុំណាស់»។
សូមពិចារណា៖ តើការលួចពីក្រុមហ៊ុនមិនសូវធ្ងន់ធ្ងរដូចលួចពីបុគ្គលណាម្នាក់ឬ?
គម្ពីរចែងថា៖ «ព្រះយេហូវ៉ាស្អប់ខ្ពើមជនដែលមានល្បិចកល តែលោកជាមិត្តជិតស្និទ្ធរបស់មនុស្សទៀងត្រង់»។—សុភាសិត ៣:៣២