តើសាក្សីព្រះយេហូវ៉ាមានទស្សនៈយ៉ាងណាចំពោះការលែងលះគ្នា?
យើងធ្វើតាមទស្សនៈក្នុងគម្ពីរស្ដីអំពីអាពាហ៍ពិពាហ៍និងការលែងលះគ្នា។ ព្រះបានផ្ដើមឲ្យមានចំណងអាពាហ៍ពិពាហ៍ដ៏ស្ថិតស្ថេរ រវាងប្រុសម្នាក់និងស្រីម្នាក់។ ក្នុងគម្ពីររៀបរាប់អំពីមូលហេតុតែមួយគត់ ដែលគូអាពាហ៍ពិពាហ៍អាចលែងលះគ្នាបាន គឺការប្រព្រឹត្តអំពើប្រាសចាកសីលធម៌ខាងផ្លូវភេទ។—ម៉ាថាយ ១៩:៥, ៦, ៩
តើសាក្សីព្រះយេហូវ៉ាមានការណែនាំសម្រាប់គូអាពាហ៍ពិពាហ៍ដែលកំពុងប្រេះឆាទេ?
មាន! ការណែនាំទាំងនោះមានដូចជា៖
សៀវភៅផ្សេងៗ។ សៀវភៅទាំងនេះមានព័ត៌មានដែលអាចជួយពង្រឹងចំណងអាពាហ៍ពិពាហ៍ សូម្បីតែចំណងអាពាហ៍ពិពាហ៍ដែលមើលទៅមិនអាចស្រោចស្រង់បានក្ដី ក៏អាចជួយបានដែរ។ ជាឧទាហរណ៍ ព័ត៌មានទាំងនោះមានក្នុងអត្ថបទ«សូមតាំងចិត្តស្មោះចំពោះគូអាពាហ៍ពិពាហ៍» «របៀបអភ័យទោស» និង«របៀបពង្រឹងទំនុកចិត្តក្នុងចំណងអាពាហ៍ពិពាហ៍»។
កិច្ចប្រជុំ។ យើងពិភាក្សាអំពីយោបល់ល្អៗក្នុងគម្ពីរដែលទាក់ទងនឹងអាពាហ៍ពិពាហ៍ មិនត្រឹមតែនៅកិច្ចប្រជុំក្រុមជំនុំទេ តែនៅសន្និបាត និងមហាសន្និបាតផងដែរ។
អ្នកចាស់ទុំ។ អ្នកចាស់ទុំក្នុងក្រុមជំនុំជួយគូអាពាហ៍ពិពាហ៍ដោយផ្ដល់ការណែនាំពីគម្ពីរ ដូចជានៅអេភេសូរ ៥:២២-២៥។
តើការលែងលះរបស់សាក្សីព្រះយេហូវ៉ាត្រូវមានការយល់ព្រមពីអ្នកចាស់ទុំក្នុងក្រុមជំនុំឬ?
អត់ទេ។ ទោះជាប្ដីប្រពន្ធដែលមានបញ្ហាក្នុងចំណងអាពាហ៍ពិពាហ៍បានសុំយោបល់ពីអ្នកចាស់ទុំក្ដី អ្នកចាស់ទុំគ្មានសិទ្ធិប្រាប់គូនោះឲ្យសម្រេចចិត្តធ្វើអ្វីទេ។ (កាឡាទី ៦:៥) យ៉ាងណាមិញ បើបុគ្គលនោះសម្រេចចិត្តលែងលះគ្នាតែគ្មានមូលដ្ឋានក្នុងគម្ពីរ គាត់គ្មានសិទ្ធិរៀបការម្ដងទៀតឡើយ។—ធីម៉ូថេទី១ ៣:១, ៥, ១២
តើសាក្សីព្រះយេហូវ៉ាមានទស្សនៈយ៉ាងណាចំពោះការរស់នៅដាច់ដោយឡែកពីគ្នា?
គម្ពីរលើកទឹកចិត្តគូអាពាហ៍ពិពាហ៍ឲ្យបន្តរស់នៅជាមួយគ្នា ទោះជាពួកគេពិបាកចុះសម្រុងគ្នាក្ដី។ (កូរិនថូសទី១ ៧:១០-១៦) បញ្ហាអាពាហ៍ពិពាហ៍ជាច្រើនអាចត្រូវដោះស្រាយបាន ដោយធ្វើតាមគោលការណ៍គម្ពីរ ដោយអធិដ្ឋានអស់ពីចិត្ត និងបង្ហាញសេចក្ដីស្រឡាញ់។—កូរិនថូសទី១ ១៣:៤-៨; កាឡាទី ៥:២២
ទោះជាយ៉ាងនោះក្ដី មានកាលៈទេសៈដ៏ពិបាកមួយចំនួនដែលនាំឲ្យគ្រិស្តសាសនិកខ្លះសម្រេចចិត្តរស់នៅដាច់ដោយឡែកពីគ្នា ដូចជាករណី៖
ការមិនផ្គត់ផ្គង់គ្រួសារ។—ធីម៉ូថេទី១ ៥:៨
ការប្រើអំពើហិង្សានិងវាយធ្វើបាប។—ចម្រៀងសរសើរព្រះ ១១:៥
ការប្រឆាំងយ៉ាងខ្លាំងនឹងជំនឿសាសនា។ ជាឧទាហរណ៍ គូដែលមិនជឿ ប្រហែលជាបង្ខំគូដែលជាសាក្សីឲ្យបំពានច្បាប់ព្រះ ហើយគូដែលរងការគំរាមកំហែង ប្រហែលជាសម្រេចចិត្តរស់នៅដាច់ដោយឡែកពីគាត់ បើនោះជាវិធីតែមួយគត់ដែលខ្លួនអាច«ស្ដាប់បង្គាប់ព្រះជាអ្នកគ្រប់គ្រង ជាជាងមនុស្ស»។—សកម្មភាព ៥:២៩