-
មូលហេតុដែលព្រះមិនទាន់ដកចេញមនុស្សអាក្រក់ទស្សនាវដ្ដីប៉មយាម ២០០៧ | ១ តុលា
-
-
គម្ពីររៀបរាប់ពីអ្វីដែលបានកើតឡើង។ សាតាំងដែលជាមេកំណាចបាននិយាយជាមួយនាងអេវ៉ា ដោយធ្វើហាក់ដូចជាសត្វពស់កំពុងនិយាយ។ សាតាំងសួរនាងថា៖ ‹តើព្រះមិនឲ្យអ្នកបរិភោគផ្លែឈើណាសោះនៅក្នុងសួនច្បារមែនឬ?›។ ក្រោយអេវ៉ាបានរៀបរាប់យ៉ាងច្បាស់ពីបង្គាប់របស់ព្រះ សាតាំងពោលប្រាប់នាងថា៖ ‹អ្នកនឹងមិនស្លាប់ទេ! ព្រះយេហូវ៉ាជ្រាបថា នៅថ្ងៃណាដែលអ្នកបរិភោគ នោះភ្នែកអ្នកនឹងបានភ្លឺឡើង ហើយអ្នកនឹងបានដូចជាព្រះដែរ ព្រមទាំងដឹងការខុសត្រូវផង›។ ជាលទ្ធផល អេវ៉ាចង់បានផ្លែឈើនោះណាស់! ដល់ម្ល៉េះបានជា‹នាងយកផ្លែមកបរិភោគ›មែន។ កំណត់ហេតុក្នុងគម្ពីររៀបរាប់ទៀតថា ក្រោយនោះមក នាងក៏‹ចែកឲ្យប្ដីដែរ ហើយគាត់ក៏បរិភោគតាម›។ (លោកុប្បត្តិ ៣:១-៦) ពេលធ្វើដូច្នេះ អ័ដាមនិងអេវ៉ាបានធ្វើអំពើបាបដោយមិនស្ដាប់បង្គាប់ព្រះយេហូវ៉ា។ ព្រះយេហូវ៉ាមិនដែលមានបំណងឲ្យពួកគេប្រើចិត្តសេរីបែបនោះទេ។
តើលោកអ្នកយល់ថា ទង្វើទាំងប៉ុន្មាននោះមានកំហុសធ្ងន់ប៉ុណ្ណាទេ? មុនដំបូង មេកំណាចបាននិយាយខុសផ្ទុយពីអ្វីដែលព្រះយេហូវ៉ាមានប្រសាសន៍ទៅកាន់អ័ដាម។ ពាក្យរបស់សាតាំងក៏ញុះញង់អ័ដាមនិងអេវ៉ាឲ្យគិតថា ពេលសម្រេចចិត្តអំពីអ្វីដែលខុសនិងត្រូវ នោះពួកគេមិនចាំបាច់ពឹងផ្អែកទៅលើព្រះយេហូវ៉ាទេ។ ដូច្នេះ រឿងដែលសាតាំងបង្កឡើងនោះ នាំឲ្យសង្ស័យថា តើព្រះយេហូវ៉ាពិតជាមានសិទ្ធិគ្រប់គ្រងទៅលើមនុស្សជាតិមែនឬ? រឿងនោះសំខាន់ណាស់! ពីព្រោះវាចោទថា មនុស្សមិនត្រូវការព្រះយេហូវ៉ាជាអ្នកគ្រប់គ្រងទេ។ តើព្រះយេហូវ៉ាដោះស្រាយរឿងនោះដោយរបៀបណា?
-
-
មូលហេតុដែលព្រះមិនទាន់ដកចេញមនុស្សអាក្រក់ទស្សនាវដ្ដីប៉មយាម ២០០៧ | ១ តុលា
-
-
ប្រមាណ៦.០០០ឆ្នាំបានកន្លងផុតទៅ តាំងពីសាតាំងចោទថា ព្រះយេហូវ៉ាគ្មានសិទ្ធិគ្រប់គ្រង។ តើប្រវត្ដិមនុស្សបង្ហាញយ៉ាងណា? សូមគិតអំពីគំនិតពីរយ៉ាងរបស់សាតាំងក្នុងការប្រឆាំងនឹងព្រះយេហូវ៉ា។ មុនដំបូង សាតាំងនិយាយប្រាប់នាងអេវ៉ាដោយអង់អាចថា៖ ‹អ្នកនឹងមិនស្លាប់ទេ!›។ (លោកុប្បត្តិ ៣:៤) ពេលសាតាំងពោលថា អ័ដាមនិងអេវ៉ានឹងមិនស្លាប់ពេលបរិភោគផ្លែឈើដែលព្រះយេហូវ៉ាអត់ឲ្យពួកគេបរិភោគនោះ នេះគឺហាក់ដូចជាវាចោទថា ព្រះយេហូវ៉ាបានកុហកពួកគេ។ នេះជារឿងសំខាន់មែន! ពីព្រោះបើព្រះយេហូវ៉ានិយាយមិនពិតក្នុងរឿងតូចនេះ ធ្វើដូចម្ដេចឲ្យមនុស្សនិងទេវតាទុកចិត្តទៅលើព្រះក្នុងរឿងឯទៀត? យ៉ាងណាក៏ដោយ តើប្រវត្ដិមនុស្សបង្ហាញយ៉ាងណា?
អ័ដាមនិងអេវ៉ាចាប់ផ្ដើមរងការឈឺចាប់ ចេះតែចាស់ទៅៗ ហើយនៅទីបំផុតក៏ស្លាប់។ គម្ពីរចែងថា៖ «អាយុអ័ដាមទាំងអស់បាន៩៣០ឆ្នាំ រួចគាត់ក៏ស្លាប់ទៅ»។ (លោកុប្បត្តិ ៣:១៩; ៥:៥) គួរឲ្យស្ដាយណាស់! មនុស្សជាតិទាំងឡាយដែលជាកូនចៅរបស់អ័ដាម បានទទួលផលវិបាកទាំងនេះជាមត៌កពីគាត់។ (រ៉ូម ៥:១២) ប្រវត្ដិមនុស្សបង្ហាញថា សាតាំង«ជាអ្នកកំភូត ហើយជាឪពុក»ឬអ្នកភូតកុហកមុនគេបង្អស់។ ណាមួយទៀត នេះក៏បង្ហាញថា ព្រះយេហូវ៉ាជា«ព្រះនៃសេចក្ដីពិត»។—យ៉ូហាន ៨:៤៤; ទំនុកដំកើង ៣១:៥
-