សំបុត្រពីគណៈអភិបាល
សូមជំរាបជូនបងប្អូនប្រុសស្រីជាទីរាប់អាន :
យើងពិតជារីករាយណាស់ដែលអាចសរសេរសំបុត្រមកផ្ញើបងប្អូន! យើងសូមសរសើរអ្នករាល់គ្នាចំពោះសេចក្ដីស្រឡាញ់និងស្មារតីពលិកម្មខ្លួនដែលបងប្អូនបង្ហាញជានិច្ច។ បើមើលសៀវភៅប្រចាំឆ្នាំសំរាប់ឆ្នាំនេះ អ្នកនឹងឃើញថាកិច្ចការជាច្រើនណាស់បានត្រូវសម្រេចក្នុងកំឡុងឆ្នាំកិច្ចបំរើកន្លងទៅនេះ។ យើងសូមលើកឡើងម្ដងទៀតថា យើងបានចំណាយជាង១ពាន់លានម៉ោងក្នុងកិច្ចផ្សព្វផ្សាយនិងការបង្រៀន ដោយទៅជួបមនុស្សផ្ទាល់ដើម្បីលើកទឹកចិត្តពួកគេឲ្យចូលទៅជិតព្រះយេហូវ៉ា។ យើងមានឯកសិទ្ធិដ៏ធំណាស់ ដោយអាចរួមធ្វើការជាមួយព្រះដ៏រុងរឿងនិងដែលជាព្រះវរបិតារបស់យើងនៅស្ថានសួគ៌ មែនទេ?—១កូ. ៣:៩
ពេលយើងសម្លឹងមើលកិច្ចការដែលស្ថិតនៅខាងមុខ យើងជឿជាក់ថា អ្នកនឹងបន្តយកតម្រាប់តាមចិត្តខ្នះខ្នែងនិងជំនឿរបស់អ្នកបំរើព្រះដែលរៀបរាប់ក្នុងកំណត់ហេតុព្រះគម្ពីរ។ ជាឧទាហរណ៍ សាវ័កប៉ុលមានចំណង់យ៉ាងខ្លាំងចំពោះការបង្កើនប្រសិទ្ធភាពរបស់គាត់ឲ្យដល់កំពូលក្នុងការជួយកិច្ចការព្រះរាជាណាចក្រឲ្យរីកចំរើនទៅមុខ។ តាមមើលទៅ ឆ្នាំចុងក្រោយដែលគាត់ស្នាក់នៅទីក្រុងអេភេសូរ គឺជាពេលដែលគាត់សរសេរសំបុត្រទីមួយផ្ញើទៅក្រុមជំនុំគ្រីស្ទាននៅទីក្រុងកូរិនថូស។ ស្តីអំពីគម្រោងការរបស់គាត់នៅពេលនោះ គាត់បានសរសេរថា៖«ខ្ញុំត្រូវស្នាក់នៅអេភេសូរ នេះរហូតដល់បុណ្យថ្ងៃទីហាសិប ដ្បិតទ្វារបើកចំហយ៉ាងធំ សំរាប់អោយខ្ញុំបំពេញកិច្ចការនៅទីនោះ ទោះបីមានអ្នកប្រឆាំងច្រើនយ៉ាងណាក៏ដោយ»។—១កូ. ១៦:៨, ៩, ព្រះគម្ពីរភាសាខ្មែរសម្រាយ
ប៉ុលបំរុងនឹងទៅតំបន់ម៉ាសេដូននិងទីក្រុងកូរិនថូស។ ក៏ប៉ុន្តែ គាត់យល់ឃើញថា បើបន្តស្នាក់នៅអេភេសូរមួយរយៈនោះ គាត់នឹងមានឱកាសសម្រេចកិច្ចការដែលមានប្រយោជន៍ថែមទៀត។ ប៉ុលចេះប្រែប្រួលទៅតាមកាលៈទេសៈ។ គាត់ឃើញថា នៅកន្លែងដែលគាត់កំពុងតែស្នាក់នៅនោះ ពេលវេលាបានអំណោយផលឲ្យគាត់ជួយក្នុងកិច្ចការព្រះរាជាណាចក្រឲ្យមានការរីកចំរើនថែមទៀត ដូច្នេះគាត់បានកែប្រែកាលវិភាគឲ្យសមស្រប។ ទ្វារមួយយ៉ាងធំដែលឲ្យប៉ុលបំពេញកិច្ចបំរើបានបើកជាចំហ ហើយគាត់ចង់ចូលតាមទ្វារនោះណាស់។
ការចូលតាមទ្វារនេះតម្រូវឲ្យគាត់ធ្វើកិច្ចការច្រើន គឺការផ្សាយដំណឹងល្អនិងការពង្រឹងក្រុមជំនុំនៅអេភេសូរ។ ក្រោយមក ប៉ុលប្រាប់អ្នកចាស់ទុំនៅទីក្រុងនោះថា៖«ខ្ញុំមិនបានខាននឹងប្រាប់សេចក្ដីអ្វី ដែលមានប្រយោជន៍ដល់អ្នករាល់គ្នាដែរ គឺបានបង្រៀនដល់អ្នករាល់គ្នានៅកណ្ដាលជំនុំវិញ ហើយពីផ្ទះ១ទៅផ្ទះ១ផង ក៏ធ្វើបន្ទាល់អស់ពីចិត្ត ដល់ទាំងពួកសាសន៍យូដា នឹងពួកសាសន៍ក្រេកផង គឺពីការប្រែចិត្តទៅឯព្រះហើយពីសេចក្ដីជំនឿជឿដល់ព្រះអម្ចាស់យេស៊ូវគ្រីស្ទនៃយើងរាល់គ្នា»។—កិច្ច. ២០:២០, ២១
បងប្អូនជាទីស្រឡាញ់អើយ! អ្នកក៏នៅក្នុងចំណោមបងប្អូនជាច្រើនដែលបានធ្វើស្រដៀងគ្នានេះដែរ ដោយឆ្លៀតយកប្រយោជន៍ពីឱកាសដែលបានហុចឲ្យ។ ក្នុងកំឡុងឆ្នាំកិច្ចបំរើកន្លងទៅនេះ ជាមធ្យមមាន៧៩៨.៩៣៨នាក់ដែលមានសមត្ថភាពរៀបចំកាលៈទេសៈរបស់ខ្លួនឲ្យចូលរួមកិច្ចបំរើត្រួសត្រាយ។ អ្នកខ្លះបានធ្វើដំណើរឆ្ងាយដល់ចុងផែនដីបំផុតដើម្បីបំរើជាសាសនទូត។ បងប្អូនកំពុងតែខ្នះខ្នែងផ្សព្វផ្សាយដំណឹងល្អនិងពង្រឹងក្រុមជំនុំផ្សេងៗ។ អ្នកឯទៀតបានរៀនភាសាមួយទៀតដើម្បីជួយមនុស្សនៅតំបន់របស់ខ្លួនដែលនិយាយភាសាផ្សេងទៀត។ អ្នកផ្សេងទៀតបានកែប្រែកាលៈទេសៈរបស់ខ្លួនដើម្បីផ្សាយនៅតំបន់ដែលមិនបានកំណត់ឲ្យក្រុមជំនុំណាមួយឬទៅបំរើនៅកន្លែងដែលមានសេចក្ដីត្រូវការខ្លាំងជាង។ អ្នកខ្លះរហូតដល់ឃើញមានទ្វារយ៉ាងធំបើកចំហឲ្យអ្នកបំពេញកិច្ចបំរើនៅសាលារៀន នៅកន្លែងធ្វើការ ឬកន្លែងផ្សេងទៀតដែលអនុញ្ញាតឲ្យធ្វើបន្ទាល់ដោយប្រសិទ្ធភាព ដូចជាការផ្សាយតាមទូរស័ព្ទជាដើម។ បទពិសោធន៍បងប្អូនជុំវិញពិភពលោកជាភស្តុតាងបង្ហាញថា រាស្ត្ររបស់ព្រះ ទាំងចាស់ទាំងក្មេងកំពុងតែសង្វាតរកនិងបានឃើញនូវឱកាសប្រាប់មនុស្សនៅគ្រប់ទីកន្លែងអំពីសេចក្ដីពិត។
ចូរមានទំនុកចិត្តថាព្រះយេហូវ៉ាទតឃើញនិងសព្វព្រះហឫទ័យណាស់នឹងការព្យាយាមរបស់អ្នក។ ព្រះគម្ពីរចែងថា៖«ព្រះទ្រង់មិនមែនជាអ្នករមិលគុណ ដែលទ្រង់នឹងភ្លេចការអ្នករាល់គ្នាធ្វើ នឹងសេចក្ដីស្រឡាញ់ ដែលអ្នករាល់គ្នាបានសំដែងដល់ព្រះនាមទ្រង់»។ (ហេ. ៦:១០) ចូរបន្តប្រុងប្រៀបឆ្លៀតយកឱកាសដើម្បីជួយឲ្យការថ្វាយបង្គំពិតមានការរីកចំរើនតទៅមុខទៀត។ អ្នកខ្លះប្រហែលជាអាចពង្រីកកិច្ចបំរើរបស់ខ្លួន។ យើងទាំងអស់គ្នាអាចខំធ្វើឲ្យកិច្ចបំរើរបស់យើងប្រកបទៅដោយប្រសិទ្ធភាពថែមទៀតបាន។
យើងមិនត្រូវសង្ឃឹមថាយើងនឹងបំពេញភារកិច្ចផ្សព្វផ្សាយរបស់យើងដោយគ្មានការប្រឆាំងនោះទេ។ សូមចាំថា ក្រោយប៉ុលនិយាយអំពីទ្វារយ៉ាងធំដែលឲ្យគាត់បំពេញកិច្ចបំរើ គាត់សរសេរថា៖«មានអ្នកប្រឆាំងច្រើន»។ សំរាប់ប៉ុល អ្នកប្រឆាំងនោះរួមមានសាសន៍យូដានិងសាសន៍ដទៃផងដែរ ដែលមនុស្សខ្លះបៀតបៀនគាត់ដោយចំហ រីឯមនុស្សផ្សេងទៀតឃុបឃិតគ្នាដើម្បីបៀតបៀនគាត់។—កិច្ច. ១៩:២៤-២៨; ២០:១៨, ១៩
យើងប្រឈមមុខស្ថានភាពស្រដៀងគ្នាដែរសព្វថ្ងៃនេះ។ នៅពេលដែលការបំផ្លាញចោលរបបលោកីយ៍ដ៏ទុច្ចរិតនេះឆ្ពោះកាន់តែមកជិត យើងដឹងទុកជាមុនថានឹងមានការប្រឆាំងកាន់តែច្រើន។ សាតាំងកំពុងតែ«មានសេចក្ដីឃោរឃៅជាខ្លាំង» ហើយវាបញ្ចេញសេចក្ដីឃោរឃៅនោះទៅលើអ្នកបំរើព្រះជាពិសេស។ (វិវរ. ១២:១២) កុំភ្លេចថា សាតាំងគឺជា«ចៅហ្វាយរបស់លោកីយនេះ»។ ព្រះយេស៊ូមានបន្ទូលទៅកាន់សិស្សទ្រង់ថា៖«បើអ្នករាល់គ្នាជារបស់ផងលោកីយ នោះលោកីយនឹងស្រឡាញ់អ្នករាល់គ្នា តែដោយព្រោះខ្ញុំបានរើសចេញពីលោកីយមក ហើយអ្នករាល់គ្នាមិនមែនជារបស់ផងលោកីយទៀត នោះបានជាលោកីយស្អប់អ្នករាល់គ្នាវិញ»។—យ៉ូន. ១៤:៣០; ១៥:១៩
យើងតាំងចិត្តមិនឲ្យអ្នកណាម្នាក់សោះធ្វើឲ្យជំនឿរបស់យើងខ្សោយឬក៏ធ្វើឲ្យយើងបង្អង់ដៃក្នុងកិច្ចផ្សព្វផ្សាយឡើយ។ យើងដឹងថានឹងមានអ្នកដែលប្រឆាំងនិងឃុបឃិតគ្នាដើម្បីបៀតបៀនយើង។ តែយើងបន្តឈានទៅមុខជានិច្ចក្នុងកិច្ចផ្សាយដំណឹងល្អអំពីព្រះរាជាណាចក្រ ដោយជឿជាក់ថាព្រះយេស៊ូនឹងកិនកំទេចចោលសាតាំងនិងមនុស្សជាច្រើនដែលចូលខាងវានៅពេលកំណត់របស់ព្រះយេហូវ៉ា។ អ្នកប្រឆាំងមិនអាចបំបិទមាត់ប៉ុលនោះទេ ហើយពួកគេក៏មិនអាចបំបិទមាត់អ្នកបំរើព្រះយេហូវ៉ាសព្វថ្ងៃនេះដែរ។ ទោះបីជាសាតាំងខឹង និងលោកីយ៍ស្អប់យើងក៏ដោយ វិញ្ញាណរបស់ព្រះយេហូវ៉ាកំពុងតែមានសកម្មភាពយ៉ាងខ្លាំងនៅក្នុងចំណោមរាស្ត្ររបស់ទ្រង់។ យើងអរណាស់ដោយដឹងថា មានចំនួនថ្មីរបស់អ្នកផ្សាយដំណឹងល្អបានឡើងដល់កំពូល គឺ៦.៣០៤.៦៤៥នាក់!
យើងអធិស្ឋានសុំឲ្យអ្នកបន្តឆ្លៀតគ្រប់ឱកាសដើម្បីធ្វើឲ្យកិច្ចការព្រះរាជាណាចក្រដ៏ប្រសើរក្រៃលែងរបស់ព្រះយេហូវ៉ាមានការរីកចំរើនទៅមុខទៀត។ យើងសូមឲ្យអ្នកដឹងថា យើងពិតជាស្រឡាញ់និងនឹកនាទៅដល់អ្នករាល់គ្នា នៅពេលដែលយើងឈរដោយ«ព្រមចិត្តគ្នា»ក្នុងការបំរើព្រះដ៏ខ្ពស់បំផុត គឺព្រះយេហូវ៉ា។—សេផា. ៣:៩
ពីបងប្អូនរបស់អ្នក
Governing Body of Jehovah’s Witnesses
(គណៈអភិបាលនៃស្មរបន្ទាល់ព្រះយេហូវ៉ា)