ជំពូកទី៣០
អ្វីដែលលោកអ្នកត្រូវតែធ្វើដើម្បីរស់នៅជានិរន្តរ៍
១ (ក) តើមានផ្លូវពីរណាបើកឲ្យលោកអ្នក? (ខ) តើលោកអ្នកអាចជ្រើសរើសយកផ្លូវត្រឹមត្រូវបានយ៉ាងណា?
ព្រះយេហូវ៉ាទ្រង់ប្រទានឲ្យលោកអ្នកនូវអ្វីមួយដ៏អស្ចារ្យ—គឺជីវិតអស់កល្បជានិច្ចក្នុងរបបថ្មីដ៏សុចរិតរបស់ទ្រង់។ (ពេត្រុសទី២ ៣:១៣) ប៉ុន្តែ ការរស់នៅទីនោះ គឺស្រេចទៅលើអ្នកក្នុងការធ្វើតាមព្រះហឫទ័យរបស់ព្រះនៅក្នុងបច្ចុប្បន្នកាលនេះ។ លោកីយ៍ដ៏អាក្រក់ជួជាតិក្នុងសម័យបច្ចុប្បន្ននេះ រួមទាំងពួកអ្នកទាំងអស់ដែលជាផ្នែករបស់វា គឺជិតនឹងហិនវិនាសហើយ «តែអ្នកណាដែលធ្វើតាមព្រះហឫទ័យព្រះ នោះនឹងនៅជាប់អស់កល្បជានិច្ចវិញ»។ (យ៉ូហានទី១ ២:១៧) ដូច្នេះ លោកអ្នកត្រូវជ្រើសរើសរវាងផ្លូវទាំងពីរនេះ។ ផ្លូវមួយនាំទៅឯសេចក្ដីស្លាប់ ហើយផ្លូវមួយទៀតទៅជីវិតជាអនន្ត។ (ចោទិយកថា ៣០:១៩, ២០) តើលោកអ្នកនឹងជ្រើសយកផ្លូវមួយណា?
២ (ក) ប្រសិនបើលោកអ្នកមានជំនឿពិតប្រាកដនោះ តើលោកអ្នកនឹងជឿជាក់ទៅលើអ្វីខ្លះ? (ខ) តើការទុកចិត្តលើព្រះដូចជាកូនទុកចិត្តលើឪពុកដែលពេញដោយសេចក្ដីស្រឡាញ់ នឹងជួយអ្នកឲ្យបម្រើទ្រង់បានយ៉ាងណា?
២ តើលោកអ្នកអាចបង្ហាញយ៉ាងណាថា អ្នកជ្រើសរើសយកផ្លូវជីវិតនោះ? ជាបឋម លោកអ្នកត្រូវតែមានជំនឿទៅលើព្រះយេហូវ៉ានិងកិច្ចសន្យារបស់ទ្រង់។ តើលោកអ្នកជឿយ៉ាងមុតមាំថា ពិតជាមានព្រះមែនទេ «ហើយថា ទ្រង់ប្រទានរង្វាន់ ដល់អស់អ្នកដែលស្វែងរកទ្រង់»ទេ? (ហេព្រើរ ១១:៦) លោកអ្នកត្រូវតែទុកចិត្តលើព្រះ ដូចជាកូនប្រុសឬកូនស្រីទុកចិត្តលើឪពុកដែលប្រកបដោយសេចក្ដីស្រឡាញ់និងសេចក្ដីមេត្ដានោះដែរ។ (ទំនុកដំកើង ១០៣:១៣, ១៤; សុភាសិត ៣:១១, ១២) ការមានជំនឿបែបនេះ នឹងញ៉ាំងឲ្យលោកអ្នកលែងមានការសង្ស័យពីរឿងដែលថា ដំបូន្មានរបស់ទ្រង់ជាការមានប្រាជ្ញា ឬផ្លូវរបស់ទ្រង់ជាការត្រឹមត្រូវនោះ ទោះបីជួនកាលបើលោកអ្នក មិនទាន់យល់រឿងនោះឲ្យបានពេញលេញក៏ដោយ។
៣ (ក) ក្រៅពីសេចក្ដីជំនឿ តើអ្វីទៀតដែលជាការចាំបាច់នោះ? (ខ) តើការប្រព្រឹត្តណាដែលត្រូវការជាចាំបាច់ ដើម្បីបង្ហាញថា លោកអ្នកនឹងជ្រើសរើសយកផ្លូវជីវិតនោះ?
៣ ក៏ប៉ុន្តែ មិនគ្រាន់តែសេចក្ដីជំនឿប៉ុណ្ណោះទេដែលយើងត្រូវការជាចាំបាច់នោះ។ គឺត្រូវតែមានការប្រព្រឹត្តណាមួយ ដើម្បីបង្ហាញនូវអារម្មណ៍ដ៏ពិតប្រាកដរបស់អ្នកចំពោះព្រះយេហូវ៉ាដែរ។ (យ៉ាកុប ២:២០, ២៦) តើលោកអ្នកបានធ្វើអ្វីដើម្បីសម្ដែងថា អ្នកមានចិត្តសោកស្ដាយចំពោះការមិនបានប្រព្រឹត្តត្រឹមត្រូវនៅអតីតកាលទេ? តើលោកអ្នកបានកែប្រែចិត្ត ឬធ្វើការប្រែប្រួលណាមួយដើម្បីធ្វើដំណើរជីវិតរបស់លោកអ្នក ឲ្យស្របតាមព្រះហឫទ័យរបស់ព្រះយេហូវ៉ាទេ? តើលោកអ្នកបានត្រឡប់បែរ គឺថា បោះបង់ចោលនូវផ្លូវអាក្រក់ណាដែលលោកអ្នកបានកាន់ពីដើម ហើយបានចាប់ផ្ដើមធ្វើអំពើអ្វីដែលព្រះបានតម្រូវហើយឬនៅ? (កិច្ចការ ៣:១៩; ១៧:៣០) ការប្រព្រឹត្តដូច្នេះនឹងបង្ហាញថា លោកអ្នកកំពុងជ្រើសរើសយកផ្លូវជីវិតហើយ។
ការថ្វាយខ្លួននិងការធ្វើបុណ្យជ្រមុជទឹក
៤ (ក) តើអ្វីដែលញ៉ាំងលោកអ្នកឲ្យធ្វើតាមព្រះហឫទ័យរបស់ព្រះនោះ? (ខ) ពេលដែលលោកអ្នកសម្រេចចិត្តថា អ្នកចង់បម្រើព្រះ តើអ្វីជាការត្រឹមត្រូវនឹងធ្វើនោះ?
៤ ដោយការធ្វើតាមព្រះហឫទ័យព្រះ តើអ្វីដែលញ៉ាំងលោកអ្នកឲ្យជ្រើសរើសយកជីវិតនោះ? គឺសេចក្ដីអំណរគុណ។ សូមអញ្ជើញគិតមើល៖ ព្រះយេហូវ៉ាទ្រង់បានធ្វើឲ្យមានលទ្ធភាព ចំពោះការរំដោះលោកអ្នកពីជម្ងឺទាំងអស់ ពីការរងទុក្ខលំបាក និងសូម្បីតែសេចក្ដីស្លាប់ទៀតផង! ដោយសារអំណោយទានដ៏មានតម្លៃនៃព្រះរាជបុត្រាទ្រង់ ទ្រង់បានបើកផ្លូវឲ្យលោកអ្នកទទួលជីវិតដែលគ្មានទីបញ្ចប់ក្នុងសួនមនោរម្យនៅលើផែនដីនេះ។ (កូរិនថូសទី១ ៦:១៩, ២០; ៧:២៣; យ៉ូហាន ៣:១៦) ពេលដែលសេចក្ដីស្រឡាញ់របស់ព្រះយេហូវ៉ាញ៉ាំងលោកអ្នកឲ្យស្រឡាញ់ទ្រង់វិញនោះ តើលោកអ្នកត្រូវធ្វើយ៉ាងណា? (យ៉ូហានទី១ ៤:៩, ១០; ៥:២, ៣) លោកអ្នកគួរតែអធិស្ឋានទៅព្រះក្នុងព្រះនាមព្រះយេស៊ូវ ហើយទូលប្រាប់ទ្រង់ថា អ្នកចង់ទៅជាអ្នកបម្រើទ្រង់ ហើយចង់ទៅជារបស់ផងទ្រង់ដែរ។ នេះជារបៀបដែលលោកអ្នកអាចថ្វាយខ្លួនអ្នកផ្ទាល់ដល់ទ្រង់។ នេះជារឿងផ្ទាល់ខ្លួន ជារឿងឯកជន។ គឺគ្មានអ្នកណាផ្សេងទៀតអាចធ្វើការនេះជូនលោកអ្នកបានឡើយ។
៥ (ក) ក្រោយពីលោកអ្នកបានធ្វើការថ្វាយខ្លួនដល់ព្រះហើយ តើទ្រង់តម្រូវឲ្យលោកអ្នកធ្វើអ្វី? (ខ) តើមានជំនួយអ្វីចំពោះលោកអ្នក ក្នុងការធ្វើតាមការថ្វាយខ្លួនរបស់លោកអ្នកនោះ?
៥ ក្រោយពីលោកអ្នកបានធ្វើការថ្វាយខ្លួនទៅព្រះរួចហើយ ទ្រង់នឹងតម្រូវឲ្យអ្នកធ្វើតាមការនោះ។ ដូច្នេះ សូមសម្ដែងជាភស្តុតាងថាអ្នកជាបុគ្គលដែលចាំនូវពាក្យសំដីរបស់ខ្លួន ដោយកាន់ជាប់នូវការសម្រេចចិត្ត ឬការថ្វាយខ្លួននេះ ដរាបណាដែលលោកអ្នកនៅរស់។ (ទំនុកដំកើង ៥០:១៤) ប្រសិនបើលោកអ្នកនៅជាប់នឹងអង្គការដែលមើលឃើញរបស់ព្រះ នោះពួកគ្រីស្ទានគ្នាឯងអាចជួយលោកអ្នកបាន ដោយផ្ដល់ឲ្យអ្នកនូវការលើកទឹកចិត្តនឹងការជ្រោមជ្រែងដោយសេចក្ដីស្រឡាញ់ផង។—ថែស្សាឡូនីចទី១ ៥:១១
៦ (ក) នៅពេលដែលលោកអ្នកបានថ្វាយជីវិតរបស់អ្នកទៅព្រះហើយនោះ តើជំហានអ្វីដែលជាចាំបាច់បន្ទាប់មកនោះ? តើការធ្វើបុណ្យជ្រមុជទឹកមានន័យយ៉ាងណា?
៦ ប៉ុន្តែ លោកអ្នកត្រូវធ្វើអ្វីថែមទៀត គឺមិនត្រឹមតែការទូលប្រាប់ព្រះយេហូវ៉ាក្នុងចិត្តថា អ្នកចង់ទៅជារបស់ផងទ្រង់ប៉ុណ្ណោះទេ។ លោកអ្នកត្រូវតែបង្ហាញនៅចំពោះមុខអ្នកដទៃថា លោកអ្នកបានធ្វើការថ្វាយខ្លួនដើម្បីបម្រើទ្រង់ហើយ។ តើលោកអ្នកត្រូវធ្វើយ៉ាងណា? គឺត្រូវធ្វើបុណ្យជ្រមុជទឹក។ ការធ្វើបុណ្យជ្រមុជទឹកបែបនេះជាការបង្ហាញជាសាធារណៈថា បុគ្គលម្នាក់បានថ្វាយជីវិតខ្លួនទៅព្រះយេហូវ៉ានិងប្រគល់ខ្លួនគាត់ដើម្បីធ្វើតាមព្រះហឫទ័យព្រះ។
៧ (ក) តើគំរូអ្វី ដែលព្រះយេស៊ូវបានទុកឲ្យពួកគ្រីស្ទាន? (ខ) ហេតុអ្វីក៏ការធ្វើបុណ្យជ្រមុជទឹកដែលបានបញ្ជាដោយព្រះយេស៊ូវ មិនមែនសំរាប់កូនង៉ាទេនោះ?
៧ ដែលថាបុណ្យជ្រមុជទឹកជាសេចក្ដីតម្រូវដ៏សំខាន់មួយនោះ គឺបានបង្ហាញមកដោយគំរូរបស់ព្រះយេស៊ូវគ្រីស្ទ។ ព្រះយេស៊ូវទ្រង់មិនគ្រាន់តែបានទូលប្រាប់ព្រះវរបិតាទ្រង់ថា ទ្រង់បានយាងមកដើម្បីធ្វើតាមព្រះហឫទ័យទ្រង់ប៉ុណ្ណោះទេ។ (ហេព្រើរ ១០:៧) ពេលដែលទ្រង់រៀបនឹងចាប់ផ្ដើមកិច្ចបម្រើរបស់ទ្រង់ជាអ្នកផ្សាយនៃព្រះរាជាណាចក្ររបស់ព្រះនោះ ព្រះយេស៊ូវបានថ្វាយអង្គទ្រង់ដល់ព្រះយេហូវ៉ា ហើយបានធ្វើបុណ្យជ្រមុជទឹក។ (ម៉ាថាយ ៣:១៣-១៧) ដោយព្រះយេស៊ូវបានទុកជាគំរូឲ្យនោះ សព្វថ្ងៃនេះ ជនណាដែលថ្វាយខ្លួនចំពោះព្រះយេហូវ៉ាដើម្បីធ្វើតាមព្រះហឫទ័យទ្រង់ នោះត្រូវតែធ្វើបុណ្យជ្រមុជទឹកជាចាំបាច់។ (ពេត្រុសទី១ ២:២១; ៣:២១) តាមការពិត ព្រះយេស៊ូវបានបញ្ជាពួកអ្នកកាន់តាមទ្រង់ឲ្យបញ្ចុះបញ្ចូលឲ្យមានសិស្សពីមនុស្សគ្រប់សាសន៍ ហើយបន្ទាប់មកឲ្យធ្វើបុណ្យជ្រមុជទឹកសិស្សថ្មីទាំងនេះ។ នេះមិនមែនជាការធ្វើបុណ្យជ្រមុជទឹកកូនង៉ាទេ។ តែជាការធ្វើបុណ្យជ្រមុជទឹកបុគ្គលណាដែលបានទៅជាអ្នកជឿ ដែលបានសម្រេចចិត្តនឹងបម្រើព្រះយេហូវ៉ារួចហើយ។—ម៉ាថាយ ២៨:១៩; កិច្ចការ ៨:១២
៨ ប្រសិនបើលោកអ្នកចង់ធ្វើបុណ្យជ្រមុជទឹកនោះ តើអ្នកណានៅក្នុងក្រុមជំនុំដែលលោកអ្នកត្រូវតែជំរាបប្រាប់ពីរឿងនេះ ហើយហេតុអ្វី?
៨ ប្រសិនបើលោកអ្នកបានសម្រេចចិត្តថានឹងបម្រើព្រះយេហូវ៉ា ហើយចង់ធ្វើបុណ្យជ្រមុជទឹកនោះ តើលោកអ្នកត្រូវធ្វើយ៉ាងណា? លោកអ្នកត្រូវតែប្រាប់ចំណង់ចិត្តរបស់អ្នកដល់ប្រធានត្រួតត្រាក្រុមជំនុំនៃស្មរបន្ទាល់ព្រះយេហូវ៉ាដែលលោកអ្នកកំពុងតែចូលរួបរួមជាមួយនោះ។ គាត់ជាមួយនឹងពួកអ្នកចាស់ទុំផ្សេងទៀតនៅក្នុងក្រុមជំនុំ នឹងមានចិត្តរីករាយក្នុងការពិភាក្សាសាឡើងវិញជាមួយលោកអ្នកអំពីពត៌មានដែលលោកអ្នកត្រូវតែដឹងជាចាំបាច់ ដើម្បីឲ្យអាចបម្រើព្រះតាមរបៀបដែលទ្រង់សព្វព្រះហឫទ័យនោះ។ បន្ទាប់មក គេអាចរៀបចំចាត់ចែងជូនលោកអ្នកឲ្យធ្វើបុណ្យជ្រមុជទឹកបាន។
ព្រះហឫទ័យរបស់ព្រះចំពោះលោកអ្នកសព្វថ្ងៃនេះ
៩ តើលោកណូអេបានធ្វើអ្វីមុនទឹកជំនន់ ដែលជាព្រះហឫទ័យរបស់ព្រះចំពោះលោកអ្នកឲ្យធ្វើក្នុងពេលបច្ចុប្បន្ននេះ?
៩ មុនពេលទឹកជំនន់ ព្រះយេហូវ៉ាបានប្រើលោកណូអេ «ជាអ្នកប្រកាសប្រាប់ពីសេចក្ដីសុចរិត» ដើម្បីព្រមានពីសេចក្ដីហិនវិនាសដែលនឹងមកដល់ ហើយបង្ហាញថាមានកន្លែងផុតពីគ្រោះថ្នាក់តែមួយទេ គឺទូកធំ។ (ម៉ាថាយ ២៤:៣៧-៣៩; ពេត្រុសទី២ ២:៥; ហេព្រើរ ១១:៧) ព្រះហឫទ័យរបស់ព្រះ គឺថា នៅក្នុងពេលបច្ចុប្បន្ននេះ លោកអ្នកក៏ធ្វើកិច្ចការផ្សាយស្រដៀងគ្នានេះដែរ។ ព្រះយេស៊ូវបានមានបន្ទូលទាយចំពោះសម័យយើងនេះថា៖ «ដំណឹងល្អនេះ ដែលសំដែងពីនគរ នឹងត្រូវប្រកាសប្រាប់ទួទៅគ្រប់ក្នុងលោកីយ ទុកជាទីបន្ទាល់ដល់អស់ទាំងសាសន៍ នោះទើបនឹងបានដល់ចុងបំផុត»។ (ម៉ាថាយ ២៤:១៤) អ្នកផ្សេងទៀតត្រូវតែដឹងអំពីអ្វីៗដែលលោកអ្នកបានរៀនអំពីព្រះរាជបំណងរបស់ព្រះ ប្រសិនបើពួកគេចង់រួចរស់ជីវិតពីទីបញ្ចប់នៃរបបនេះ និងរស់នៅជានិរន្តរ៍នោះ។ (យ៉ូហាន ១៧:៣) តើចិត្តរបស់លោកអ្នកមិនរំជួលចង់ចូលរួមក្នុងការចែកចាយតម្រិះវិជ្ជាដែលផ្ដល់ឲ្យជីវិតនេះជាមួយអ្នកដទៃទេឬ?
១០ (ក) តើសេចក្ដីស្រឡាញ់ចំពោះមនុស្សលោក ញ៉ាំងយើងឲ្យយកតម្រាប់តាមគំរូរបស់ព្រះយេស៊ូវមួយណា? (ខ) តើកិច្ចការប្រកាសផ្សាយជាច្រើនបានធ្វើឡើងយ៉ាងណា?
១០ សូមកាន់តាមគំរូរបស់ព្រះគ្រីស្ទចុះ។ ទ្រង់មិនរង់ចាំឲ្យប្រជារាស្ត្រមកឯទ្រង់ទេ ប៉ុន្តែទ្រង់បានយាងទៅស្វែងរកពួកណាដែលចង់ស្ដាប់សារព្រះរាជាណាចក្រនេះ។ ហើយទ្រង់បានបង្រៀនពួកអ្នកកាន់តាមទ្រង់—ពួកគេទាំងអស់—ឲ្យធ្វើដូចនេះដែរ។ (ម៉ាថាយ ២៨:១៩; កិច្ចការ ៤:១៣; រ៉ូម ១០:១០-១៥) ក្នុងការកាន់តាមសេចក្ដីបង្រៀននិងគំរូរបស់ព្រះគ្រីស្ទ ពួកគ្រីស្ទានពីដើមបានទៅជួបប្រជាជននៅតាមផ្ទះរបស់គេ។ ពួកគេបានទៅ«ពីផ្ទះ១ទៅផ្ទះ១»ផ្សព្វផ្សាយសារព្រះរាជាណាចក្រ។ (លូកា ១០:១-៦; កិច្ចការ ២០:២០) នេះក៏នៅតែជារបៀបដ៏សំខាន់បំផុត ដែលពួកគ្រីស្ទានពិតប្រាកដប្រតិបត្ដិកិច្ចបម្រើរបស់ពួកគេនៅសព្វថ្ងៃនេះដែរ។
១១ (ក) ហេតុអ្វីក៏ត្រូវតែមានសេចក្ដីក្លាហានដើម្បីប្រកាសអំពីព្រះរាជាណាចក្ររបស់ព្រះ ហើយហេតុអ្វីក៏យើងមិនចាំបាច់ភ័យខ្លាចនោះ? (ខ) តើព្រះយេហូវ៉ាមានទស្សនៈយ៉ាងណា ចំពោះការងារដែលយើងធ្វើនេះ?
១១ ត្រូវតែមានសេចក្ដីក្លាហានដើម្បីធ្វើកិច្ចការនេះ។ សាតាំងនិងលោកីយ៍របស់វាពិតជាខំព្យាយាមបញ្ឈប់លោកអ្នក ក៏ដូចជាពេលដែលពួកវាបានខំព្យាយាមបញ្ឈប់ការប្រកាសផ្សាយនៃពួកអ្នកកាន់តាមព្រះគ្រីស្ទពីដើមដែរ។ (កិច្ចការ ៤:១៧-២១; ៥:២៧-២៩, ៤០-៤២) ប៉ុន្តែលោកអ្នកមិនចាំបាច់ភ័យខ្លាចទេ។ ព្រះយេហូវ៉ាបានគាំទ្រនិងចម្រើនកម្លាំងដល់ពួកគ្រីស្ទានពីដើម ទ្រង់ក៏នឹងធ្វើដូច្នេះចំពោះលោកអ្នកនៅសព្វថ្ងៃនេះដែរ។ (ធីម៉ូថេទី២ ៤:១៧) សូមឲ្យមានសេចក្ដីក្លាហានឡើង! សូមសម្ដែងជាភស្តុតាងថា លោកអ្នកពិតជាស្រឡាញ់ព្រះយេហូវ៉ានិងមនុស្សគ្នាឯង ដោយការចូលរួបរួមក្នុងកិច្ចការផ្សាយនិងបង្រៀនដែលជួយសង្គ្រោះជីវិតនេះ។ (កូរិនថូសទី១ ៩:១៦; ធីម៉ូថេទី១ ៤:១៦) ព្រះយេហូវ៉ាទ្រង់នឹងមិនភ្លេចការងាររបស់លោកអ្នកទេ ប៉ុន្តែនឹងផ្ដល់រង្វាន់ជាច្រើនដល់លោកអ្នកវិញ។—ហេព្រើរ ៦:១០-១២; ទីតុស ១:២
១២ តើយើងអាចរៀនដឹងអ្វីខ្លះអំពីគំរូរបស់ប្រពន្ធលោកឡុតនោះ?
១២ គ្មានអ្វីដែលមានតម្លៃពិតប្រាកដ ដែលរបបចាស់នេះអាចផ្ដល់ឲ្យទេ ដូច្នេះ សូមកុំនឹកស្មានថា លោកអ្នកនឹងបាត់បង់អ្វីមួយដោយសារការបោះបង់ចោលរបបនេះនោះ។ ព្រះយេស៊ូវបានមានបន្ទូលថា៖ «ចូរនឹកចាំពីប្រពន្ធលោកឡុត»។ (លូកា ១៧:៣២) ក្រោយពេលដែលនាងនិងគ្រួសាររបស់នាងបានរត់ចេញពីទីក្រុងសូដុំម នាងបានក្រឡេកមើលដោយចិត្តចង់បានជាខ្លាំងនូវរបស់របរដែលនាងបានទុកចោល។ ព្រះបានទតឃើញពីសភាពនៃចិត្តរបស់នាង ហើយនាងក៏បានទៅជាបង្គោលអំបិលមួយទៅ។ (លោកុប្បត្តិ ១៩:២៦) សូមកុំឲ្យដូចប្រពន្ធលោកឡុតឲ្យសោះ! សូមសម្លឹងមើលទៅអ្វីដែលនៅខាងមុខជានិច្ច គឺ«ជីវិតអស់កល្បជានិច្ច»នៅក្នុងរបបថ្មីដ៏សុចរិតរបស់ព្រះ។—ធីម៉ូថេទី១ ៦:១៩
សូមជ្រើសរើសយកជីវិតជាអនន្តក្នុងសួនមនោរម្យនៅលើផែនដី
១៣ តើព្រះយេស៊ូវបានបង្ហាញយ៉ាងណា អំពីការជ្រើសរើសដែលយើងគ្រប់ៗគ្នាត្រូវធ្វើនោះ?
១៣ តាមពិតទៅ មានការជ្រើសរើសតែពីរទេ។ ព្រះគ្រីស្ទបានប្រៀបធៀបរឿងនេះ ទៅនឹងការជ្រើសរើសយកផ្លូវមួយរវាងផ្លូវពីរ។ ទ្រង់បានមានបន្ទូលថា ផ្លូវមួយ«ធំ ហើយទូលាយផង»។ នៅលើផ្លូវនោះអ្នកដំណើរបានត្រូវអនុញ្ញាតឲ្យមានសេរីភាពសំរាប់បំពេញចិត្តខ្លួនឯង។ ប៉ុន្តែ ផ្លូវមួយទៀតជាផ្លូវ«ចង្អៀត»។ មែនហើយ ពួកណាដែលនៅលើផ្លូវនេះ បានតម្រូវឲ្យគោរពតាមសេចក្ដីបង្រៀននិងក្រិត្យវិន័យរបស់ព្រះ។ ព្រះយេស៊ូវបានសម្គាល់ឃើញថា មនុស្សភាគច្រើនកំពុងតែយកផ្លូវធំ មានតែភាគតិចទេដែលយកផ្លូវចង្អៀតនេះ។ តើផ្លូវមួយណាដែលលោកអ្នកនឹងជ្រើសរើសយក? ក្នុងការសម្រេចចិត្តជ្រើសរើសនេះ សូមលោកអ្នកចងចាំថា៖ ផ្លូវធំនឹងភ្លាមនោះមកដល់ទីបញ្ចប់—សេចក្ដីហិនវិនាស! ផ្ទុយទៅវិញ ផ្លូវចង្អៀតនឹងនាំលោកអ្នកឆ្ពោះត្រង់ទៅក្នុងរបបថ្មីរបស់ព្រះ។ នៅទីនោះលោកអ្នកអាចចូលរួមក្នុងការកសាងផែនដីឲ្យទៅជាសួនមនោរម្យដ៏រុងរឿងមួយ ដែលលោកអ្នកអាចរស់នៅជានិរន្តរ៍ ដោយសុភមង្គលបាន។
១៤ តើលោកអ្នកត្រូវតែទៅជាផ្នែកនៃអង្គការណា ដើម្បីឲ្យអាចរួចរស់ជីវិតចូលទៅក្នុងរបបថ្មីរបស់ព្រះនោះ?
១៤ សូមកុំសន្និដ្ឋានថា មានវិថីឬផ្លូវផ្សេងៗជាច្រើនដែលលោកអ្នកអាចដើរតាមដើម្បីឲ្យបានជីវិតនៅក្នុងរបបថ្មីរបស់ព្រះឡើយ។ គឺមានផ្លូវតែមួយទេ។ គឺមានទូកធំតែមួយទេ ដែលបានឆ្លងផុតពីទឹកជំនន់នោះ មិនមែនមានទូកជាច្រើនទេ។ ហើយក៏នឹងមានអង្គការតែមួយ—អង្គការមើលឃើញរបស់ព្រះ—ដែលនឹងឆ្លងផុតពី«សេចក្ដីវេទនាជាខ្លាំង»ដែលកំពុងតែខិតមកជិតយ៉ាងលឿននេះ។ គឺមិនពិតទេ ដែលថាសាសនាទាំងអស់ដឹកនាំទៅរកទិសដៅដូចគ្នានោះ។ (ម៉ាថាយ ៧:២១-២៣; ២៤:២១) លោកអ្នកត្រូវតែទៅជាផ្នែកនៃអង្គការរបស់ព្រះយេហូវ៉ា ធ្វើតាមព្រះហឫទ័យរបស់ទ្រង់ ដើម្បីឲ្យអាចទទួលនូវពររបស់ទ្រង់ ដែលជាជីវិតអស់កល្បជានិច្ច។—ទំនុកដំកើង ១៣៣:១-៣
១៥ (ក) តើយើងត្រូវធ្វើអ្វីជារៀងរាល់ថ្ងៃ? (ខ) តើសេចក្ដីសង្ឃឹមមួយណា ដែលមិនមែនជាការយល់សប្ដិនោះ?
១៥ ដូច្នេះ សូមចងចាំទុករូបភាពនៃរបបថ្មីដែលព្រះបានសន្យានោះ ឲ្យបានច្បាស់នៅក្នុងសតិនិងចិត្តរបស់លោកអ្នកជានិច្ចចុះ។ ជារៀងរាល់ថ្ងៃ សូមគិតអំពីរង្វាន់ដ៏ធំដែលព្រះយេហូវ៉ាទ្រង់ទុកសំរាប់លោកអ្នក—គឺការរស់នៅជានិរន្តរ៍ក្នុងសួនមនោរម្យនៅលើផែនដី។ នេះមិនមែនជាការយល់សប្ដិទេ។ នេះជាការពិតមែន! ពីព្រោះសេចក្ដីសន្យានៃបទគម្ពីរនឹងពិតជាបានសម្រេចជាមិនខាន គឺ៖ «ពួកអ្នកសុចរិតនឹងបានស្រុក[ផែនដី]ទុកជាមរដក ហើយនឹងនៅក្នុងស្រុកនោះជានិច្ច . . . នៅគ្រាដែលមនុស្សអាក្រក់ត្រូវកាត់ចេញ នោះអ្នកនឹងបានឃើញហើយ»។—ទំនុកដំកើង ៣៧:២៩, ៣៤
[រូបភាពនៅទំព័រ២៥១]
សូមថ្វាយខ្លួនអ្នកដល់ព្រះយេហូវ៉ា . . . ហើយសូមធ្វើបុណ្យជ្រមុជទឹក
[រូបភាពនៅទំព័រ២៥៣]
«ចូរនឹកចាំពីប្រពន្ធលោកឡុត»
[រូបភាពនៅទំព័រ២៥៤]
សូមចងចាំរបបថ្មីរបស់ព្រះឲ្យបានច្បាស់នៅក្នុងសតិនិងចិត្តរបស់អ្នកជានិច្ចចុះ