បណ្ណាល័យអ៊ីនធឺណិតរបស់ប៉មយាម

ការធ្វើឲ្យព្រះនាមរបស់ព្រះយេហូវ៉ាត្រូវស្គាល់ទូទាំងផែនដី

២០០០ កិច្ចបម្រើព្រះ | មករា
- ការធ្វើឲ្យព្រះនាមរបស់ព្រះយេហូវ៉ាត្រូវស្គាល់ទូទាំងផែនដី
  
  ^១ ពេលព្រះយេស៊ូបានបង្គាប់សិស្សរបស់ទ្រង់ ឲ្យធ្វើជាស្មរបន្ទាល់«រហូតដល់ចុងផែនដីបំផុត»នោះ ទ្រង់បានតាំងគំរូដើម្បីឲ្យគេធ្វើត្រាប់តាម។ (កិច្ចការ ១:៨) នៅកន្លែងណាក៏ដោយនិងពេលណាក៏ដោយដែលទ្រង់បានជួបមនុស្ស ទ្រង់បានមានបន្ទូលប្រាប់អំពីគោលបំណងរបស់ព្រះសំរាប់មនុស្សជាតិ។ ក្នុងការធ្វើតម្រាប់តាមព្រះយេស៊ូ នោះក្រុមអ្នកបំរើស្មោះត្រង់កំពុងតែប្រើវិធីផ្សេងៗ ដើម្បីធ្វើឲ្យព្រះនាមព្រះយេហូវ៉ាត្រូវ«មនុស្សដឹង . . . នៅពេញលើផែនដីផង»។—អេសាយ ១២:៤, ៥
  
  ^២ អ្វីដែលបានធ្វើពីមុន: ក្នុងកំឡុងឆ្នាំមុនៗ នោះធម្មទេសនាធ្លាប់ត្រូវបោះពុម្ពតាមកាសែត «ល្ខោនរូបភាពនៃសេចក្ដីបង្កើត»ត្រូវផលិតហើយត្រូវបញ្ចាំងឲ្យរាប់លាននាក់មើល ឡានឃោសនាធ្លាប់ត្រូវប្រើ ហើយធ្លាប់មានការប្រើយ៉ាងទូលំទូលាយនូវថាសសម្លេង ហើយសំរាប់មួយរយៈក៏បានប្រើវិទ្យុផងដែរ វិធីទាំងអស់នោះគឺដើម្បីផ្សព្វផ្សាយដំណឹងល្អ។ ពិតមែន តាំងពីដើមមក មានការដាក់ទម្ងន់ទៅលើការជួបមនុស្សផ្ទាល់ ដើម្បីអាចតាមដានបានល្អនូវចំណាប់អារម្មណ៍ដែលបានត្រូវរកឃើញ។ ជាលទ្ធផល ការផ្សព្វផ្សាយពីផ្ទះមួយទៅផ្ទះមួយ បានធ្វើជាវិធីមួយដ៏មានប្រសិទ្ធិភាពណាស់ ក្នុងការធ្វើឲ្យព្រះនាមព្រះយេហូវ៉ាត្រូវស្គាល់នៅគ្រប់ទីកន្លែង។—កិច្ចការ ៥:៤២
  
  ^៣ អ្វីៗដែលកំពុងតែត្រូវធ្វើនៅសម័យយើង: ដោយព្រោះមានការប្រែប្រួលជាច្រើននៅសម័យនេះ នោះមនុស្សលោកកាន់តែរវល់ឡើង ហើយនៅកន្លែងជាច្រើនមនុស្សគឺកម្រនៅផ្ទះ។ មនុស្សមួយចំនួនតិចប៉ុណ្ណោះទេ ដែលមានចិត្តចង់ចំណាយពេលទៅលើការអាននិងរំពឹងគិតទៅលើអ្វីៗខាងវិញ្ញាណ។ ហេតុនេះហើយ យើងគួរកែប្រែកិច្ចបំរើរបស់យើង ឲ្យសមស្របទៅតាមកាលៈទេសៈនោះ។ បន្ថែមនឹងការបន្តផ្សព្វផ្សាយពីផ្ទះមួយទៅផ្ទះមួយ យើងក៏ត្រូវលើកទឹកចិត្តឲ្យទៅកន្លែងណាដែលមានមនុស្ស ហើយ«ប្រុងប្រៀបជានិច្ច» ដើម្បីប្រាប់ពីហេតុនៃសេចក្ដីសង្ឃឹមរបស់យើង។ (ពេត្រុសទី១ ៣:១៥) នេះរួមបញ្ចូលការខិតខំផ្សព្វផ្សាយដល់អ្នកធ្វើការជាមួយយើង មិត្តរួមថ្នាក់ មនុស្សតាមថ្នល់និងនៅសួនឬក៏នៅទីធ្លាចតឡាន ពីផ្សារមួយទៅផ្សារមួយ ហើយនៅកន្លែងណាក៏បានដែលអាចរកឃើញមនុស្ស។ ដោយមានការគាំទ្រពីព្រះយេហូវ៉ា នោះការព្យាយាមរបស់យើងបានជោគជ័យណាស់។ តើអ្នកក៏រួមចំណែកក្នុងការផ្សព្វផ្សាយដល់មនុស្ស ទោះបីគេនៅកន្លែងណាក៏ដោយឬទេ?
  
  ^៤ ចូរឲ្យយើងរៀងៗខ្លួនប្រើវិធីទាំងអស់ ចំពោះការធ្វើឲ្យព្រះនាមរបស់ព្រះយេហូវ៉ាត្រូវស្គាល់ក្នុងតំបន់ផ្សាយរបស់យើង។ យើងអាចទទួលនៅការពេញចិត្តដ៏ខ្លាំង ពីការសម្រេចកិច្ចបំរើរបស់យើង ពេលយើងពឹងពាក់ព្រះយេហូវ៉ាជាអ្នកដែលទាញមនុស្សដែលមានចិត្តស្មោះស។—យ៉ូហាន ៦:៤៤

តើអ្នកនឹងនៅទីនោះទេ?

២០០០ កិច្ចបម្រើព្រះ | មករា
- តើអ្នកនឹងនៅទីនោះទេ?
  
  ^១ បុរសម្នាក់ដែលជាស្មរបន្ទាល់យូរយារមកហើយបានប្រាប់ថា៖«បើសិនជាអ្នកខកខានមិននៅថ្ងៃទីមួយនៃមហាសន្និបាត នោះ អ្នកនឹងបានទទួលការខ្វះខាតច្រើនណាស់!»។ ហេតុអ្វីគាត់មានអារម្មណ៍អ៊ីចឹង? ពីព្រោះថ្ងៃទីមួយជាទីចាប់ផ្ដើមនៃជប់លៀងខាងវិញ្ញាណមួយ ដ៏សម្បូរនឹងម្ហូបអាហារខាងវិញ្ញាណដ៏ឈ្ងុយឆ្ងាញ់ ដែលអង្គការរបស់ព្រះយេហូវ៉ាបានរៀបចំសំរាប់យើង។ (អេសាយ ២៥:៦) ការចូលរួមពីថ្ងៃចាប់ផ្ដើមបង្ហាញថា យើងយល់ព្រមនឹងអារម្មណ៍របស់អ្នកសរសេរទំនុកដំកើងដែលថា៖«កាលគេនិយាយមកខ្ញុំថា ចូរយើងចូលទៅក្នុងដំណាក់នៃព្រះយេហូវ៉ា នោះខ្ញុំមានសេចក្ដីអំណរអរណាស់»។—ទំនុកដំកើង ១២២:១
  
  ^២ ប៉ុន្តែ ឆ្នាំមុននៅមហាសន្និបាត«បន្ទូលរបស់ព្រះខាងទំនាយ»ក្នុងតំបន់ខ្លះនោះ ចំនួនមនុស្សនៅថ្ងៃសុក្រគឺតិចជាងថ្ងៃសៅរ៍និងថ្ងៃអាទិត្យមួយចំនួនក្រែល។ នេះមានន័យថា ដែលបងប្អូនរបស់យើងមួយភាគធំ បានខានដោយមិនបានឮផ្នែកផ្សេងៗនៅឯមហាសន្និបាត ដែលបានផ្ដល់ឲ្យពត៌មានដ៏សំខាន់ដែលលះចោលមិនបានអំពីព្រះបន្ទូលខាងទំនាយ។ ពួកគេក៏បានបាត់បង់នូវការសេពគប់រួបរួមដ៏សប្បាយជាមួយនឹងអ្នកជឿគ្នីគ្នា។
  
  ^៣ កុំឲ្យការងារធ្វើការរំខាន: កង្វល់ពីការធ្វើឲ្យមានផលអាក្រក់ដល់ការងារធ្វើរបស់ខ្លួន នោះប្រហែលជាមូលហេតុដែលអ្នកខ្លះមិនចូលរួមនៅថ្ងៃសុក្រ។ ក៏ប៉ុន្តែ ស្មរបន្ទាល់ជាច្រើននាក់បានឃើញថា និយោជករបស់គេគឺសុខចិត្តជួយគេក្នុងរឿងនេះ បើសិនជាគេសូមឈប់តាំងពីយូរមុនថ្ងៃនោះមកដល់។ និយោជកម្នាក់បានកោតស្ងើចដល់ម្ល៉េះ ចំពោះជំហរដ៏មាំមួនរបស់បងស្រីម្នាក់ ដើម្បីចូលរួមគ្រប់ទាំងកិច្ចប្រជុំក្រុមជំនុំថែមទាំងសន្និបាត រហូតដល់ធ្វើឲ្យនិយោជកបានទៅចូលរួមមហាសន្និបាតរបស់នាងពេញមួយថ្ងៃដែរ!
  
  ^៤ អ្នកមិនគួរសន្មតជាមុនថា និយោជករបស់អ្នកគ្មានចិត្តចង់ឲ្យអ្នកឈប់ទេ ហើយអ្នកក៏មិនគួរសន្និដ្ឋានថា គឺមិនសំខាន់ទេបើសិនជាអ្នកខកខានចូលរួមមួយថ្ងៃនៃសន្និបាត។ ដោយមានជំនឿស៊ប់ក្នុងចិត្ត រៀបចំបង្ហាញដោយការប៉ិនប្រសប់ដល់និយោជករបស់អ្នក ពីមូលហេតុតាមព្រះគម្ពីរដែលការចូលរួមមហាសន្និបាត គឺជាផ្នែកធំនៃការថ្វាយបង្គំរបស់អ្នកនោះ។ (ហេព្រើរ ១០:២៤, ២៥) ក្រោយនោះ មានការទុកចិត្តទាំងស្រុងទៅលើសេចក្ដីសន្យារបស់ព្រះយេហូវ៉ាទាំងទទួលស្គាល់ថា អ្វីក៏ដោយដែលអ្នកត្រូវការខាងវត្ថុទ្រព្យនឹងត្រូវផ្គត់ផ្គង់ បើសិនជាអ្នករក្សាទុកអ្វីខាងវិញ្ញាណឲ្យមានអាទិភាពក្នុងជីវិតរបស់អ្នកជាមុន។—ម៉ាថាយ ៦:៣៣; ហេព្រើរ ១៣:៥, ៦
  
  ^៥ កត្ដាដែលសំខាន់បំផុត គឺជាការយល់តម្លៃនៃ«សេចក្ដីដែលប្រសើរ»។ (ភីលីព ១:១០, ១១; ទំនុកដំកើង ២៧:៤) នេះជំរុញឲ្យយើងធ្វើការរៀបចំដើម្បីទទួលប្រយោជន៍ពេញលេញ ពីសំវិធានការដ៏សំខាន់នេះពីព្រះយេហូវ៉ា។ ចាប់ផ្ដើមធ្វើការរៀបចំជាក់លាក់របស់អ្នកឥឡូវនេះ ហើយតាំងចិត្តថា អ្នកនឹងនៅទីនោះគ្រប់បីថ្ងៃមែន!