សេចក្ដីស្រឡាញ់ជាគន្លឹះដែលនាំឲ្យបង្កើតផលក្នុងកិច្ចបម្រើផ្សាយ
១ «ចូរមកឯខ្ញុំ . . . ខ្ញុំនឹងឲ្យអ្នករាល់គ្នាឈប់សំរាក»។ (ម៉ាថ. ១១:២៨) សម្ដីដែលគួរឲ្យចាប់ចិត្តបែបនេះបង្ហាញឲ្យឃើញពីសេចក្ដីស្រឡាញ់ដ៏ជ្រាលជ្រៅដែលព្រះយេស៊ូមានចំពោះមនុស្ស។ យើងជាគ្រិស្តសាសនិកចង់យកតម្រាប់តាមព្រះយេស៊ូក្នុងការបង្ហាញសេចក្ដីស្រឡាញ់ចំពោះអស់អ្នកដែលនឿយព្រួយ ដោយព្រោះតែលោកិយដែលមិនមានសេចក្ដីស្រឡាញ់។ តើយើងអាចបង្ហាញសេចក្ដីស្រឡាញ់យ៉ាងដូចម្ដេចពេលដែលយើងផ្សព្វផ្សាយដំណឹងល្អ?
២ ដោយពាក្យសម្ដី: សេចក្ដីស្រឡាញ់ចំពោះមនុស្សបានជំរុញព្រះយេស៊ូឲ្យរកគ្រប់ឱកាសដើម្បីប្រាប់សារដំណឹងល្អដល់ពួកគេ។ (យ៉ូន. ៤:៧-១៤) សេចក្ដីស្រឡាញ់នឹងជួយយើងមិនឲ្យស្ទាក់ស្ទើរក្នុងការធ្វើបន្ទាល់ក្រៅផ្លូវការ។ កុមារីអាយុប្រាំមួយឆ្នាំម្នាក់បានធ្វើបន្ទាល់យ៉ាងសមរម្យដល់ស្ត្រីម្នាក់ដែលអង្គុយក្បែរនាងក្នុងបន្ទប់រង់ចាំគ្រូពេទ្យ។ តើអ្វីដែលជំរុញចិត្តនាងឲ្យធ្វើដូច្នេះ? នាងបានប្រាប់ថា៖ «ស្ត្រីម្នាក់នោះមើលទៅហាក់ដូចជាគាត់ចង់ដឹងអំពីព្រះយេហូវ៉ា»។
៣ យើងអាចសម្ដែងឲ្យឃើញការយកចិត្តទុកដាក់យ៉ាងស្មោះ ដោយញញឹមយ៉ាងរាក់ទាក់ និងទំហំសំឡេងរបស់យើង។ ការប្រុងស្ដាប់ទស្សនៈរបស់ម្ចាស់ផ្ទះ យល់ពីកង្វល់ និងបង្ហាញការយកចិត្តទុកដាក់យ៉ាងស្មោះ នោះហើយគឺជាការបង្ហាញឲ្យឃើញពីសេចក្ដីស្រឡាញ់។ (សុ. ១៥:២៣) ក្នុងការយកតម្រាប់តាមព្រះយេស៊ូ យើងគួរបង្ហាញថាសារព្រះរាជាណាចក្រជាសារដែលលើកទឹកចិត្ត និងឲ្យឃើញពីសេចក្ដីស្រឡាញ់ ការអាណិតអាសូរដែលព្រះយេហូវ៉ាមានចំពោះមនុស្ស។—ម៉ាថ. ២៤:១៤; លូ. ៤:១៨
៤ ដោយការប្រព្រឹត្ត: ព្រះយេស៊ូបំពេញសេចក្ដីត្រូវការរបស់អ្នកឯទៀតភ្លាមៗតាមរបៀបដែលផ្ដល់ប្រយោជន៍និងខាងសម្ភារៈដែរ។ (ម៉ាថ. ១៥:៣២) យើងក៏អាចបង្ហាញឲ្យឃើញសេចក្ដីស្រឡាញ់និងការអាណិតអាសូរនៅក្នុងកិច្ចបម្រើផ្សាយដែរ។ បងស្រីយើងបានសង្កេតឃើញស្ត្រីម្នាក់ទទួលទូរស័ព្ទសំខាន់មួយ តែគាត់មិនយល់ពីអ្វីដែលគេនិយាយមករកគាត់សោះ។ បងស្រីយើងស្ម័គ្រចិត្តជួយបកប្រែជូនគាត់។ ការប្រព្រឹត្តដែលប្រកបដោយសេចក្ដីស្រឡាញ់បែបនេះបានបើកឱកាសឲ្យមានការសន្ទនាពីព្រះគម្ពីរ។ ការសន្ទនាបានជួយស្ត្រីនោះឲ្យយល់ព្រមសិក្សាព្រះគម្ពីរ។ មានករណីមួយទៀត បងប្រុសម្នាក់កំពុងតែធ្វើការត្រឡប់ទៅជួប ប្រទះឃើញម្ចាស់ផ្ទះមានចិត្តមួម៉ៅដោយកៅអីធំមួយជាប់ស្ទះនៅមាត់ទ្វារពេលគាត់ខំលើកម្នាក់ឯង។ ក្រោយពីបានជួយសែងកៅអីធំនោះចេញពីមាត់ទ្វារហើយ បងប្រុសបានអង្គុយលើកៅអីភ្លាម ក៏ចាប់ផ្ដើមសិក្សាព្រះគម្ពីរជាមួយម្ចាស់ផ្ទះដែលមានចិត្តកតញ្ញូ។
៥ យើងបង្ហាញសេចក្ដីស្រឡាញ់របស់យើងចំពោះព្រះនិងចំពោះអ្នកជិតខាង ពេលយើងចូលរួមក្នុងកិច្ចបម្រើផ្សាយ។ (ម៉ាថ. ២២:៣៦-៤០) ការសម្ដែងឲ្យឃើញតាមពាក្យសម្ដីនិងតាមការប្រព្រឹត្តបែបនេះ អាចជួយមនុស្សទៀងត្រង់ឲ្យយល់ថាយើងមានសេចក្ដីពិត។