-
«ទ្រង់រមែងចំរើនកំឡាំង ដល់អ្នកដែលល្វើយ»២០០៧ កិច្ចបម្រើព្រះ | ឧសភា
-
-
«ទ្រង់រមែងចំរើនកំឡាំង ដល់អ្នកដែលល្វើយ»
១ ម្ដងម្កាល យើងទាំងអស់គ្នាអស់កម្លាំងឬល្វើយ។ នេះមិនគ្រាន់តែមកពីការងារឬសកម្មភាពណាមួយដែលយើងធ្វើទេ ប៉ុន្តែក៏មកពីបញ្ហាដែលយើងជួបប្រទះនៅ«គ្រាលំបាក»ដែរ។ (២ធី. ៣:១) ក្នុងនាមជាអ្នកបម្រើព្រះយេហូវ៉ា តើយើងបានកម្លាំងមកពីណា ដើម្បីកុំឲ្យបន្ថយសកម្មភាពផ្សព្វផ្សាយរបស់យើង? ដោយពឹងពាក់ទៅលើបុគ្គលដែលមាន«តេជានុភាពដ៏ខ្លាំងក្លា» ពោលគឺព្រះយេហូវ៉ា។ (អេសា. ៤០:២៦) ទ្រង់ជ្រាបសេចក្ដីត្រូវការរបស់យើង និងយកព្រះទ័យទុកដាក់យ៉ាងស្មោះដើម្បីជួយយើង។—១ពេ. ៥:៧
២ ព្រះយេហូវ៉ាមានរបៀបរៀបចំដើម្បីជួយយើង: ព្រះយេហូវ៉ាពង្រឹងកម្លាំងយើងតាមរយៈសកម្មពលរបស់ទ្រង់។ សកម្មពលនេះជាកម្លាំងដែលគ្មានអ្វីរាំងស្ទះបាន ហើយជាអ្វីដែលទ្រង់បានប្រើដើម្បីបង្កើតសកលលោក។ សកម្មពលរបស់ព្រះជួយយើងឲ្យមាន«កំឡាំងចំរើន» បើយើងល្វើយឬអស់កម្លាំង។ (អេសា. ៤០:៣១) សូមសួរខ្លួនឯង‹តើនៅពេលណាដែលខ្ញុំបានអធិស្ឋានយ៉ាងចំៗជាលើកចុងក្រោយ សូមសកម្មពលរបស់ព្រះជួយពង្រឹងកម្លាំងខ្ញុំដើម្បីបំពេញកាតព្វកិច្ចជាគ្រិស្តសាសនិក?›។—លូ. ១១:១១-១៣
៣ ដោយអានជាប្រចាំថ្ងៃនិងរំពឹងគិតពីព្រះគម្ពីរដែលព្រះបណ្ដាលឲ្យសរសេរ ហើយទទួលចំណេះអំពីព្រះដោយសិក្សាសៀវភៅគ្រិស្តសាសនិករបស់យើងយ៉ាងទៀងទាត់ នោះយើងនឹងបានដូចជា«ដើមឈើ ដែលដុះនៅក្បែរផ្លូវទឹក ដែលបង្កើតផលតាមរដូវកាល ហើយស្លឹកក៏មិនចេះស្រពោន»។—ទំនុក. ១:២, ៣
៤ ព្រះយេហូវ៉ាក៏ប្រើអ្នកជឿគ្នីគ្នា ដែលអាច«កំសាន្តចិត្ត»យើងដែរ។ (កូល. ៤:១០, ១១) បងប្អូននោះពង្រឹងកម្លាំងយើងនៅកិច្ចប្រជុំក្រុមជំនុំដោយការសន្ទនា ចម្លើយ និងសុន្ទរកថាដែលលើកទឹកចិត្ត។ (កិច្ច. ១៥:៣២) ជាពិសេស ពួកអ្នកចាស់ទុំផ្ដល់ជំនួយឲ្យយើងរក្សាចំណងមេត្រីភាពជាមួយនឹងព្រះ និងលើកទឹកចិត្តឲ្យយើងមានអារម្មណ៍ស្រស់ថ្លា។—អេសា. ៣២:១, ២
៥ កិច្ចបម្រើផ្សាយ: ប្រសិនបើអ្នកមានអារម្មណ៍ថាខ្លួនអស់កម្លាំង សូមកុំឈប់ផ្សព្វផ្សាយឡើយ! តាមពិតការចូលរួមកិច្ចបម្រើផ្សាយជាទៀងទាត់ផ្ដល់កម្លាំងឲ្យយើង ផ្ទុយពីសកម្មភាពជាច្រើនឯទៀត។ (ម៉ាថ. ១១:២៨-៣០) ការផ្សព្វផ្សាយដំណឹងល្អជួយយើងឲ្យប្រមូលអារម្មណ៍ទៅលើព្រះរាជាណាចក្ររបស់ព្រះ និងគិតអំពីសេចក្ដីសង្ឃឹមដ៏អស្ចារ្យទៅអនាគត។
-
-
តើអ្នកគាំទ្រព្រះបន្ទូលរបស់ព្រះទេ?២០០៧ កិច្ចបម្រើព្រះ | ឧសភា
-
-
តើអ្នកគាំទ្រព្រះបន្ទូលរបស់ព្រះទេ?
១ ក្នុងពិភពលោកដែលធ្វើឲ្យមនុស្សលែងជឿព្រះគម្ពីរជាសេចក្ដីពិត គ្រិស្តសាសនិកពិតគាំទ្រព្រះបន្ទូលរបស់ព្រះដោយចិត្តខ្នះខ្នែង។ ដោយជឿជាក់ថា «គ្រប់ទាំងបទគម្ពីរ គឺជាព្រះទ្រង់បានបញ្ចេញព្រះវិញ្ញាណបណ្ដាលឲ្យតែង» យើងឯកភាពជាមួយនឹងព្រះយេស៊ូគ្រិស្ត ពេលទ្រង់បានបញ្ជាក់ពីសេចក្ដីអធិស្ឋានទូលព្រះយេហូវ៉ាថា៖ «សេចក្ដីពិត គឺជាព្រះបន្ទូលរបស់ទ្រង់»។ (២ធី. ៣:១៦; យ៉ូន. ១៧:១៧) តើយើងអាចគាំទ្រព្រះបន្ទូលរបស់ព្រះដោយប្រសិទ្ធភាពយ៉ាងដូចម្ដេច?
២ ចូរស្គាល់បទគម្ពីរផ្សេងៗ: ជាពិតប្រាកដ ព្រះយេស៊ូច្បាស់ជាបានព្យាយាមរៀនសូតព្រះគម្ពីរយ៉ាងហ្មត់ចត់។ នេះអនុញ្ញាតឲ្យទ្រង់បង្រៀនពីបទគម្ពីរក្នុងកិច្ចបម្រើផ្សាយរបស់ទ្រង់។ (លូ. ៤:១៦-២១; ២៤:៤៤-៤៦) តើយើងអាចចាំបទគម្ពីរមួយចំនួនយ៉ាងដូចម្ដេច? គឺដោយការអានព្រះគម្ពីរជាប្រចាំថ្ងៃ ហើយរំពឹងគិតពីខមួយដែលលើកទឹកចិត្តយើង ឬអាចជួយយើងប្រើក្នុងកិច្ចបម្រើផ្សាយ។ នៅពេលរៀបចំសម្រាប់កិច្ចប្រជុំ យើងគួរតែបើកមើលនិងអានបទគម្ពីរពីព្រះគម្ពីរ ហើយប្រហែលរៀបចំចម្លើយសម្រាប់ខនោះ។ ពេលចូលរួមកិច្ចប្រជុំ យើងគួរតែមើលផ្ទៀងតាម ពេលអ្នកថ្លែងអានបទគម្ពីរ។ ការរៀនបទគម្ពីរផ្សេងៗ នឹងជួយយើងឲ្យត្រៀមខ្លួនដើម្បី«កាត់ស្រាយព្រះបន្ទូលនៃសេចក្ដីពិតយ៉ាងត្រឹមត្រូវ»។—២ធី. ២:១៥
៣ ចូរអានពីព្រះគម្ពីរ: ពេលចូលរួមក្នុងកិច្ចបម្រើផ្សាយយើងគួរតែអានពីព្រះគម្ពីរ។ ជាឧទាហរណ៍ ប្រសិនបើកាលៈទេសៈអនុញ្ញាត យើងគួរតែព្យាយាមអានខគម្ពីរនិងពិភាក្សាខនោះជាមួយម្ចាស់ផ្ទះ។ ប្រសិនបើគាត់សួរសំណួរឬលើកការជំទាស់មួយ វិធីល្អបំផុតគឺឲ្យយើងប្រើព្រះគម្ពីរដើម្បីឆ្លើយសំណួរនោះ។ ពេលម្ចាស់ផ្ទះជាប់រវល់ យើងនៅតែអាចលើកចំណុចពីព្រះគម្ពីរដោយពោលថា៖ «មុនដែលខ្ញុំលា ខ្ញុំសូមអានខគម្ពីរមួយនេះជូនអ្នក»។ នៅពេលណាដែលអាចធ្វើបាន សូមអានព្រះគម្ពីរ ហើយឲ្យអ្នកស្ដាប់មើលឃើញខគម្ពីរនោះដោយផ្ទាល់។
៤ ក្រោយពីបានអានខគម្ពីរខ្លះៗដែលបញ្ជក់ថាព្រះឯកត្រីអង្គជាសេចក្ដីបង្រៀនខុស ម្ចាស់ផ្ទះម្នាក់បានឧទានថា៖ «ខ្ញុំបានទៅព្រះវិហារអស់មួយជីវិត តែខ្ញុំមិនបានដឹងថាព្រះគម្ពីរបង្រៀនយ៉ាងនេះទេ!»។ គាត់បានចាប់ផ្ដើមសិក្សាព្រះគម្ពីរភ្លាមៗ។ ព្រះយេស៊ូបានមានបន្ទូលថា ចៀមរបស់ទ្រង់នឹងស្ដាប់តាមសំឡេងរបស់ទ្រង់។ (យ៉ូន. ១០:១៦, ២៧) វិធីដ៏ល្អបំផុតដើម្បីឲ្យអ្នកដែលមានចិត្តស្មោះត្រង់ស្គាល់សេចក្ដីពិត គឺឲ្យគេមើលដោយផ្ទាល់ពីព្រះគម្ពីរ។ ដូច្នេះ ចូរឲ្យយើងគាំទ្រព្រះបន្ទូលនៃសេចក្ដីពិតរបស់ព្រះ!
-