ជំពូកទី១០ (ផ្នែកជាបន្ត)
អង្គការមួយដែលធ្វើតាមបំណងព្រះហឫទ័យព្រះយេហូវ៉ា
កិច្ចបម្រើជាអ្នកត្រួសត្រាយជំនួយ ពេញពេល និងពិសេស
អ្នកផ្សាយទាំងឡាយគួរតែដឹងអំពីតម្រូវការជាទូទៅសម្រាប់កិច្ចបម្រើជាអ្នកត្រួសត្រាយជំនួយ ត្រួសត្រាយពេញពេល និងត្រួសត្រាយពិសេស ព្រមទាំងកិច្ចបម្រើពេញពេលឯទៀត។ ម្ដងម្កាល កិច្ចបម្រើព្រះរាជាណាចក្រយើង ផ្ដល់ព័ត៌មានបន្ថែមយ៉ាងចំៗចំពោះកិច្ចបម្រើទាំងនេះ។ អ្នកត្រួសត្រាយ ត្រូវទុកគំរូដ៏ល្អជាគ្រិស្តសាសនិកដែលត្រូវបានជ្រមុជទឹក ហើយមានកាលៈទេសៈដែលអនុញ្ញាតឲ្យគាត់បំពេញចំនួនម៉ោងប្រចាំខែដោយផ្សព្វផ្សាយដំណឹងល្អ។ គណៈកម្មាធិការកិច្ចបម្រើក្រុមជំនុំត្រូវយល់ព្រមនឹងការដាក់ពាក្យសុំបម្រើជាអ្នកត្រួសត្រាយជំនួយ រីឯអ្នកត្រួសត្រាយពេញពេលនិងត្រួសត្រាយពិសេសវិញ ត្រូវបានតែងតាំងដោយការិយាល័យសាខា។
អ្នកត្រួសត្រាយជំនួយ ត្រូវបានតែងតាំងយ៉ាងហោចណាស់សម្រាប់មួយខែ សម្រាប់ប៉ុន្មានខែជាបន្តបន្ទាប់ ឬក៏រហូត អាស្រ័យទៅលើកាលៈទេសៈរបស់គាត់។ អ្នកផ្សាយព្រះរាជាណាចក្រជាច្រើនចូលចិត្តបម្រើជាអ្នកត្រួសត្រាយជំនួយនៅពេលវេលាពិសេស ដូចជាក្នុងអំឡុងពេលធ្វើពិធីបុណ្យរំលឹក ឬខែទស្សនកិច្ចរបស់អ្នកត្រួតពិនិត្យមណ្ឌល។ អ្នកខ្លះជ្រើសរើសខែណាដែលមានពេលសម្រាកពីការងារ។ សិស្សសាលាជាអ្នកផ្សព្វផ្សាយដែលត្រូវបានជ្រមុជទឹក ប្រហែលអាចចុះឈ្មោះជាអ្នកត្រួសត្រាយជំនួយក្នុងអំឡុងពេលវិស្សមកាល។ ទោះបីមានកាលៈទេសៈយ៉ាងណាក៏ដោយ ប្រសិនបើអ្នករក្សាភាពស្អាតស្អំខាងសីលធម៌ អាចបំពេញចំនួនម៉ោងដែលត្រូវការចំពោះកិច្ចបម្រើផ្សាយ ហើយជឿថាអ្នកអាចបម្រើមួយខែឬច្រើនខែជាអ្នកត្រួសត្រាយជំនួយ ក្រុមជំនុំអ្នកចាស់ទុំនឹងសប្បាយចិត្តអនុញ្ញាតឲ្យអ្នកដាក់ពាក្យសុំធ្វើជាអ្នកត្រួសត្រាយជំនួយដែលជាឯកសិទ្ធក្នុងកិច្ចបម្រើផ្សាយ។
ដើម្បីមានលក្ខណៈគ្រប់គ្រាន់បម្រើជាអ្នកត្រួសត្រាយពេញពេល អ្នកត្រូវមានលទ្ធភាពបំពេញម៉ោងកិច្ចបម្រើផ្សាយប្រចាំឆ្នាំ។ កិច្ចបម្រើព្រះរាជាណាចក្រយើង ណែនាំឲ្យមានគោលដៅបំពេញម៉ោងជាប្រចាំខែ ហើយនេះនឹងជួយអ្នកបំពេញភារកិច្ចនេះ។ ជាអ្នកត្រួសត្រាយពេញពេល អ្នកត្រូវសហការជានិច្ចជាមួយក្រុមជំនុំដែលអ្នកបម្រើ។ អ្នកត្រួសត្រាយដែលមានចិត្តខ្នះខ្នែងពិតជាផ្ដល់ប្រយោជន៍ដល់ក្រុមជំនុំ បង្កើតឲ្យមានអារម្មណ៍សាទរចំពោះកិច្ចបម្រើផ្សាយ ហើយក៏លើកទឹកចិត្តអ្នកឯទៀតឲ្យបម្រើជាអ្នកត្រួសត្រាយដែរ។ យ៉ាងហោចណាស់អ្នកត្រូវបានជ្រមុជទឹកអស់រយៈពេល៦ខែ មានសីលធម៌ល្អ ហើយបង្ហាញថាអ្នកជាអ្នកផ្សាយដែលទុកគំរូល្អ មុនដែលពួកអ្នកចាស់ទុំស្នើសុំការិយាល័យសាខាឲ្យតែងតាំងអ្នកជាអ្នកត្រួសត្រាយពេញពេល។ ដើម្បីបំពេញតម្រូវការម៉ោងក្នុងកិច្ចបម្រើផ្សាយ នោះអ្នកត្រូវតែមានកាលវិភាគដែលអាចធ្វើបាន។
អ្នកត្រួសត្រាយពិសេស ត្រូវបានជ្រើសរើសពីចំណោមអ្នកត្រួសត្រាយពេញពេលដែលបានបង្ហាញដោយប្រសិទ្ធភាពក្នុងកិច្ចបម្រើផ្សាយ ហើយជាអ្នកដែលអាចបម្រើនៅតំបន់ណាដែលការិយាល័យសាខាចាត់ឲ្យទៅ។ ជាញឹកញាប់ តំបន់នោះជាតំបន់ដាច់ស្រយាលដែលគាត់អាចស្វែងរកអស់អ្នកដែលមានចំណាប់អារម្មណ៍ ហើយបង្កើតក្រុមជំនុំថ្មី។ ម្ដងម្កាល អ្នកត្រួសត្រាយពិសេស ត្រូវបានចាត់ឲ្យទៅក្រុមជំនុំដែលត្រូវការជំនួយក្នុងតំបន់ផ្សាយដែលមិនបានធ្វើជារឿយៗ។ អ្នកត្រួសត្រាយពិសេសខ្លះដែលជាអ្នកចាស់ទុំដែរ ត្រូវបានចាត់ឲ្យទៅជួយក្រុមជំនុំតូចៗ សូម្បីតែមិនត្រូវការអ្នកផ្សព្វផ្សាយថែមទៀតក៏ដោយ។ អ្នកត្រួសត្រាយពិសេសទទួលប្រាក់ឧបត្ថម្ភល្មមគ្រប់គ្រាន់ដើម្បីចិញ្ចឹមជីវិត។
សាលាបង្ហាត់ខាងកិច្ចបម្រើ
ការរីកចម្រើននូវក្រុមជំនុំថ្មីៗដែលត្រូវបានបង្កើនរៀងរាល់ឆ្នាំ បញ្ជាក់ថាព្រះយេហូវ៉ាកំពុងតែប្រទានពរទៅលើការព្យាយាមនៃរាស្ត្ររបស់ទ្រង់ ដើម្បីផ្សព្វផ្សាយដំណឹងល្អនៃព្រះរាជាណាចក្រ។ (កិច្ច. ១៦:៥) ដោយសារចំនួនក្រុមជំនុំកាន់តែច្រើនឡើងៗ នេះមានន័យថាត្រូវការពួកអ្នកចាស់ទុំនិងអ្នកងារជំនួយជាច្រើនថែមទៀតដែរ។ បងប្រុសៗដែលនៅលីវហើយមានលក្ខណៈគ្រប់គ្រាន់ ត្រូវបានលើកទឹកចិត្តឲ្យបំពេញសេចក្ដីត្រូវការនេះដោយពោលទៅព្រះយេហូវ៉ាថា៖ «ទូលបង្គំនៅឯណេះហើយ សូមចាត់ទូលបង្គំចុះ!»។ (អេសា. ៦:៨) បងប្រុសជាច្រើនបានតបឆ្លើយដូចនេះដោយដាក់ពាក្យសុំចូលសាលាបង្ហាត់ខាងកិច្ចបម្រើ ជាសាលាសម្រាប់តែអ្នកងារជំនួយនិងអ្នកចាស់ទុំដែលនៅលីវ ហើយសុខចិត្តនិងអាចបម្រើនៅកន្លែងដែលមានសេចក្ដីត្រូវការច្រើនជាង។ ដើម្បីទទួលព័ត៌មានថែមទៀត បងប្រុសណាដែលមានចំណាប់អារម្មណ៍ទៅសាលាបង្ហាត់ខាងកិច្ចបម្រើ អាចចូលរួមប្រជុំសម្រាប់សាលានេះនៅឯសន្និបាតប្រចាំមណ្ឌល។
សាលានេះផ្ដល់ការអប់រំខាងសេចក្ដីបង្រៀនព្រះគម្ពីរ និងដឹងពីដំណើរការរបស់អង្គការ ដើម្បីបង្រៀនបងប្រុសដែលមានលក្ខណៈគ្រប់គ្រាន់នោះ អាចគង្វាលក្រុមជំនុំនិងបំពេញភារកិច្ចឯទៀត។ (យេ. ២៣:៤) ដោយមានការអប់រំបែបនេះ អ្នកខ្លះបានចាត់ឲ្យបម្រើនៅតំបន់ដែលត្រូវការអ្នកផ្សាយច្រើនជាងនៅក្នុងប្រទេស រីឯអ្នកឯទៀតបានចាត់ឲ្យបម្រើនៅប្រទេសក្រៅ។ អ្នកខ្លះត្រូវបានចាត់ឲ្យត្រឡប់ទៅក្រុមជំនុំរបស់ខ្លួនវិញ ដើម្បីជួយនិងលើកទឹកចិត្តបងប្អូននៅទីនោះ។ បងប្រុសដែលបានទទួលការអប់រំនេះ អាចផ្ដល់ជំនួយកាន់តែប្រសើរជាងទៅបងប្អូននៅក្រុមជំនុំឲ្យពង្រីកកិច្ចបម្រើ និងជួយបំពេញភារកិច្ចផ្សេងៗ។—២ធី. ៣:១៦, ១៧
ការបម្រើជាសាសនទូត
ដើម្បីឲ្យដំណឹងល្អនៃព្រះរាជាណាចក្រត្រូវបានផ្សព្វផ្សាយ«ដល់ចុងផែនដីបំផុត»មុនទីបញ្ចប់មកដល់ គឺចាំបាច់ឲ្យបញ្ជូនសាសនទូតទៅប្រទេសជាច្រើន។ (កិច្ច. ១:៨; ម៉ាថ. ២៤:១៤) នេះបានបើកឱកាសឲ្យស្មរបន្ទាល់ព្រះយេហូវ៉ារាប់ពាន់នាក់ឲ្យទទួលនូវឯកសិទ្ធិកិច្ចបម្រើច្រើនជាងថែមទៀត ជាពិសេសសម្រាប់អស់អ្នកដែលបានបង្ហាញរួចទៅហើយថា ខ្លួនមានចិត្តខ្នះខ្នែង ថ្វាយបង្គំព្រះអស់ពីចិត្ត និងមានប្រសិទ្ធភាពនៅកិច្ចបម្រើផ្សាយ។ ធម្មតាអស់អ្នកដែលត្រូវបានអញ្ជើញឲ្យបម្រើជាសាសនទូត ទទួលការអប់រំពិសេសនៅសាលាព្រះគម្ពីរគីលាតនៃសមាគមប៉មយាម។
ដោយសារសាសនទូតជាច្រើនត្រូវបានចាត់ឲ្យបម្រើនៅប្រទេសដែលមានជីវភាពរស់នៅលំបាកណាស់ ហេតុនេះហើយបុគ្គលម្នាក់ត្រូវមានសុខភាពល្អ និងកម្លាំងកាយនិងកម្លាំងចិត្ត ទើបមានលក្ខណៈគ្រប់គ្រាន់បម្រើជាសាសនទូត។ ក្រៅពីជំងឺនានាដែលអាចមាន សាសនទូតប្រហែលត្រូវកែប្រែរបៀបរស់នៅពីព្រោះមានកម្រិតជីវភាពខុសពីមុន និងមានវប្បធម៌ថ្មី។
ប្រសិនបើអ្នកជាអ្នកបម្រើពេញពេលរួចទៅហើយ និងមានបំណងចង់ទទួលឯកសិទ្ធិបន្ថែមជាសាសនទូត អ្នកអាចទទួលព័ត៌មានថែមទៀតពីតម្រូវការផ្សេងៗ ដោយចូលរួមប្រជុំ សម្រាប់អស់អ្នកដែលមានចំណាប់អារម្មណ៍ទៅលើកិច្ចការជាសាសនទូត ពេលដែលមាននៅឯមហាសន្និបាត។ អ្នកត្រួតពិនិត្យមណ្ឌលរបស់អ្នកក៏អាចជូនយោបល់ល្អចំពោះរឿងនេះដល់អ្នកដែរ។ ប្រសិនបើមានលក្ខណៈគ្រប់គ្រាន់ អ្នកអាចមានឱកាសបម្រើជាសាសនទូត ដ្បិតនេះជាកិច្ចបម្រើដែលបានជួយយ៉ាងច្រើនឲ្យការថ្វាយបង្គំពិតរីកចម្រើនទូទាំងពិភពលោក។
កិច្ចបម្រើនៅបេតអែល
ការបម្រើនៅឯបេតអែលដែលមានជាច្រើនទូទាំងពិភពលោកជាឯកសិទ្ធិដ៏ពិសេស។ ពាក្យបេតអែលមានន័យថា «ដំណាក់នៃព្រះ» ហើយការជ្រើសរើសពាក្យនេះជាសមរម្យណាស់សម្រាប់មជ្ឈមណ្ឌលនៃសកម្មភាពដែលពាក់ព័ន្ធនឹងកិច្ចបម្រើព្រះទូទាំងពិភពលោក។ បងប្រុសនិងបងស្រីនៅបេតអែលធ្វើកិច្ចការដ៏សំខាន់ ក្នុងការបោះពុម្ពនិងបែងចែកសៀវភៅ ដែលស្មរបន្ទាល់ព្រះយេហូវ៉ាប្រើប្រាស់ទូទាំងពិភពលោក។ ពីមន្ទីរចាត់ការនៅទីក្រុងប៊្រូគ្លិន រដ្ឋញូវយ៉ក សហរដ្ឋអាម៉េរិក គណៈអភិបាលត្រួតពិនិត្យនិងណែនាំក្រុមជំនុំទាំងឡាយទូទាំងពិភពលោក។
កិច្ចការជាច្រើននៅបេតអែលត្រូវប្រើកម្លាំងកាយ។ ហេតុនេះហើយ អស់អ្នកដែលបានអញ្ជើញទៅបម្រើនៅបេតអែលភាគច្រើនជាបងប្រុសដែលត្រូវបានឧទ្ទិសថ្វាយខ្លួននិងជ្រមុជទឹក មានអាយុវ័យក្មេង មានសុខភាពល្អ ហើយនិងមានកម្លាំង។ ប្រសិនបើមានសេចក្ដីត្រូវការនៅប្រទេសរបស់អ្នក ហើយអ្នកមានចិត្តចង់បម្រើនៅបេតអែល អ្នកអាចទទួលព័ត៌មានថែមទៀតអំពីតម្រូវការ ដោយចូលរួមប្រជុំពិសេស សម្រាប់អស់អ្នកដែលមានចំណាប់អារម្មណ៍ទៅលើកិច្ចបម្រើនៅបេតអែល ពេលដែលមាននៅឯមហាសន្និបាត។ អ្នកត្រួតពិនិត្យមណ្ឌលរបស់អ្នកក៏អាចផ្ដល់ជំនួយចំពោះរឿងនេះដល់អ្នកដែរ។
អ្នកស្ម័គ្រចិត្តបម្រើផ្នែកសាងសង់
ការកសាងសាលព្រះរាជាណាចក្រនិងសាលសន្និបាត ជាមួយផ្នែកនៃកិច្ចបម្រើពិសិដ្ឋ ដែលស្រដៀងនឹងព្រះវិហារដែលស្តេចសាឡូម៉ូនកសាង។ (១ពង្ស. ៨:១៣-១៨) បងប្អូនប្រុសស្រីជាច្រើននាក់បង្ហាញការខ្នះខ្នែងដ៏ខ្លាំងចំពោះអង្គការរបស់ព្រះយេហូវ៉ា ដោយស្ម័គ្រចិត្តចំណាយពេលនិងទ្រព្យរបស់ខ្លួនដើម្បីគាំទ្រព្រមទាំងចូលរួមក្នុងកិច្ចការនេះ។
តើអ្នកអាចជួយក្នុងផ្នែកនៃកិច្ចបម្រើពិសិដ្ឋនេះទេ? ប្រសិនបើអ្នកជាអ្នកផ្សាយដែលបានជ្រមុជទឹកហើយ ស្ម័គ្រចិត្តចង់ជួយក្នុងកិច្ចការនេះ នោះគណៈកម្មាធិការខាងការសង់តាមភូមិភាគនឹងមានចិត្តកតញ្ញូដោយអ្នកចង់ផ្ដល់ជំនួយក្នុងការនេះ។ ប្រសិនបើអ្នកមិនមានជំនាញខាងផ្នែកសាងសង់ ឬជាអ្នកផ្សាយដែលមិនទាន់ជ្រមុជទឹក តែមានលក្ខណៈគ្រប់គ្រាន់ក្នុងក្រុមជំនុំ អ្នកប្រហែលអាចជួយក្នុងការកសាងសាលព្រះរាជាណាចក្រនៅតំបន់អ្នក។ សូមជម្រាបពួកអ្នកចាស់ទុំនិងអ្នកត្រួតពិនិត្យមណ្ឌលអំពីកាលៈទេសៈរបស់អ្នកដើម្បីជួយក្នុងកិច្ចការនេះ។ អ្នកផ្សាយខ្លះៗដែលបានជ្រមុជទឹកហើយបានស្ម័គ្រចិត្តជួយខាងផ្នែកសាងសង់អន្តរជាតិដើម្បីកសាងសាលរាជាណាចក្រ និងសាលសន្និបាតនៅប្រទេសឯទៀត។
តើអ្នកមានគោលដៅអ្វីក្នុងកិច្ចបម្រើព្រះ?
ប្រសិនបើអ្នកបានឧទ្ទិសថ្វាយជីវិតខ្លួនទៅព្រះយេហូវ៉ា អ្នកមានបំណងបម្រើព្រះយេហូវ៉ាជារៀងរហូត។ ប៉ុន្តែមុននឹងសម្រេចបំណងនេះបាន តើអ្នកមានគោលដៅអ្វីក្នុងកិច្ចបម្រើព្រះ? ការមានគោលដៅក្នុងកិច្ចបម្រើព្រះនឹងជួយអ្នកប្រើកម្លាំង និងធនធានឯទៀតដោយប្រាជ្ញា។ (១កូ. ៩:២៦) អ្នកនឹងអាចធ្វើការសម្រាប់អ្វីដែលមានប្រយោជន៍។ គោលដៅបែបនេះនឹងជួយឲ្យមានការរីកចម្រើនក្នុងការថ្វាយបង្គំព្រះយេហូវ៉ា ហើយជួយអ្នកឲ្យប្រមូលអារម្មណ៍ទៅលើអ្វីដែលសំខាន់ជាង ពេលដែលអ្នកបង្ហាញចិត្តចង់ទទួលឯកសិទ្ធិកិច្ចបម្រើបន្ថែម។—ភី. ១:១០; ១ធី. ៤:១៥, ១៦
នៅរឿងប្រៀបប្រដូចអំពីអ្នកសាបព្រោះពូជ ព្រះយេស៊ូបានបញ្ជាក់ថាដីល្អបង្កើតផលផ្លែខុសពីគ្នា។ ទ្រង់មានបន្ទូលថា៖ «តែអ្នកដែលទទួលពូជក្នុងដីល្អវិញ នោះគឺជាអ្នកដែលឮព្រះបន្ទូល ហើយយល់ ក៏បង្កើតផលផ្លែ មួយជា១រយ មួយជា៦០ ហើយមួយទៀតជា៣០»។ (ម៉ាថ. ១៣:២៣) ប្រសិនបើយើងពិតជាយល់អត្ថន័យនៃព្រះបន្ទូលមែន យើងគួរខំប្រឹងបង្កើតផលផ្លែយ៉ាងច្រើនដើម្បីសរសើរព្រះយេហូវ៉ា មែនទេ? យើងចង់បង្កើតផលផ្លែព្រះរាជាណាចក្រជាច្រើននៅពេលយើងផ្សព្វផ្សាយយ៉ាងខ្នះខ្នែង មែនទេ? ហើយយើងចង់បង្កើតផលផ្លែនៃវិញ្ញាណរបស់ព្រះយ៉ាងបរិបូរនៅជីវិតប្រចាំថ្ងៃយើង មែនទេ? (យ៉ូន. ១៥:២, ៣; កា. ៥:២២, ២៣) ការមានគោលដៅក្នុងកិច្ចបម្រើព្រះអាចជួយយើងឲ្យសម្រេចកិច្ចការទាំងអស់នោះ។
សាវ័កប៉ុលបានតាំងគំរូដ៏ល្អឲ្យយើងត្រាប់តាមក្នុងកិច្ចបម្រើព្រះ។ (១កូ. ១១:១) ប៉ុលបានខំប្រឹងយ៉ាងខ្លាំងដើម្បីបម្រើព្រះយេហូវ៉ាអស់ពីសមត្ថភាព។ គាត់បានកត់សម្គាល់ថា កិច្ចបម្រើព្រះយេហូវ៉ាបើកឱកាសជាច្រើនដល់គាត់។ ដោយសរសេរទៅកាន់បងប្អូននៅទីក្រុងកូរិនថូស ប៉ុលបានកត់ទុកថា៖ «ទ្វារបើកចំហរយ៉ាងធំសំរាប់អោយខ្ញុំបំពេញកិច្ចការ»។ ករណីរបស់យើងក៏ដូចនេះដែរ មែនទេ? យើងមានឱកាសជាច្រើនក្នុងការបម្រើព្រះយេហូវ៉ាជាមួយក្រុមជំនុំ ជាពិសេសនៅក្នុងកិច្ចផ្សព្វផ្សាយដំណឹងល្អអំពីព្រះរាជាណាចក្រ មែនទេ? ប៉ុន្តែដូចសាវ័កប៉ុល យើងត្រូវចាំថាការចូលក្នុង«ទ្វារបើកចំហរយ៉ាងធំ»នោះ ក៏ត្រូវតយុទ្ធនឹង«អ្នកប្រឆាំងច្រើន»ដែរ។ (១ករ. [១កូ.] ១៦:៩, ខ.ស.) ប៉ុលសុខចិត្តលត់ដំខ្លួនជានិច្ច ដូចជាកីឡាករដែលមានចិត្តចង់ឈ្នះមកុដនៅឯការប្រណាំងដែលនឹងស្វិតស្រពោនយ៉ាងរហ័ស។ សូមកត់សម្គាល់អ្វីដែលប៉ុលបានមានប្រសាសន៍៖ «ខ្ញុំវាយ[លត់]ដំរូបកាយខ្ញុំ ទាំងបង្ខំឲ្យចុះចូល»។ (១កូ. ៩:២៤-២៧) តើយើងមានចិត្តគំនិតដូចនេះទេ?
សព្វថ្ងៃនេះមានបងប្អូនជាច្រើននាក់ដែលកំពុងតែបម្រើជាសាសនទូត ដោយសារគេទទួលការលើកទឹកចិត្តពីមាតាបិតានិងអ្នកឯទៀត ហើយគេមានគោលដៅក្នុងកិច្ចបម្រើព្រះជាសាសនទូតនិងចង់ទទួលការអប់រំនៅសាលាគីលាតតាំងពីក្មេងមក។ ស្រដៀងគ្នាដែរ បងប្អូនជាច្រើននាក់ដែលកំពុងតែបម្រើនៅបេតអែលបានទុកកិច្ចបម្រើនេះជាគោលដៅពេលគេនៅក្មេង ឬពេលគេស្គាល់ដំណឹងល្អជាលើកដំបូងហើយរៀនអំពីឯកសិទ្ធពិសេសនេះ។
យោងទៅតាមកាលៈទេសៈខុសៗគ្នា យើងម្នាក់ៗត្រូវបានលើកទឹកចិត្តឲ្យព្យាយាមបំពេញគោលដៅក្នុងកិច្ចបម្រើព្រះ។ គោលដៅខ្លះប្រហែលដូចតទៅនេះ : ចូលរួមក្នុងកិច្ចបម្រើផ្សាយរាល់សប្ដាហ៍ ចាប់ផ្ដើមនិងដឹកនាំការសិក្សាព្រះគម្ពីរតាមផ្ទះ ចាត់ទុកពេលវេលាច្រើនទៀតដើម្បីរៀបចំសម្រាប់កិច្ចប្រជុំក្រុមជំនុំ ចុះឈ្មោះបម្រើជាអ្នកត្រួសត្រាយជំនួយឬពេញពេល បម្រើនៅកន្លែងដែលត្រូវការអ្នកផ្សាយច្រើនជាង ការកសាងសាលព្រះរាជាណាចក្រនិងសាលសន្និបាត បម្រើនៅបេតអែលឬជាសាសនទូត។ ពិតមែន មានគោលដៅខាងកិច្ចបម្រើព្រះឯទៀតដែលប្រហែលបញ្ជាក់នៅកិច្ចប្រជុំក្រុមជំនុំ មហាសន្និបាត ហើយក្នុងសៀវភៅនៃស្មរបន្ទាល់ព្រះយេហូវ៉ា ដែលអ្នកអាចពិចារណានិងព្យាយាមបំពេញតាមកាលៈទេសៈរបស់អ្នក។ អ្វីដ៏សំខាន់គឺឲ្យអ្នករក្សាភាពខ្ជាប់ខ្ជួន និងបំពេញកិច្ចបម្រើផ្សាយឲ្យបានពេញទំហឹង។ ប្រសិនបើធ្វើដូចនេះមែន អ្នកនឹងលើកកិត្ដិយសថ្វាយព្រះ និងបំពេញគោលដៅល្អបំផុតរបស់អ្នក ពោលគឺការបម្រើព្រះយេហូវ៉ាជារៀងរហូត។—លូ. ១៣:២៤; ១ធី. ៤:៧ខ, ៨