-
លោកយេស៊ូទាយអំពីព្រឹត្ដិការណ៍ដែលនឹងកើតឡើងពេញពិភពលោកគម្ពីរបរិសុទ្ធ តើរៀបរាប់អំពីអ្វី?
-
-
ភាគ១៩
លោកយេស៊ូទាយអំពីព្រឹត្ដិការណ៍ដែលនឹងកើតឡើងពេញពិភពលោក
លោកយេស៊ូទាយអំពីវត្តមានរបស់លោក ជាស្តេច និងអំពីគ្រាចុងបញ្ចប់នៃរបៀបរបបពិភពលោកនេះ
នៅលើភ្នំដើមអូលីវ ជាកន្លែងដែលគេអាចមើលឃើញទេសភាពដ៏ត្រចះត្រចង់នៃក្រុងយេរូសាឡិមនិងវិហារដែលនៅខាងក្រោម នោះពួកសាវ័កបួននាក់របស់លោកយេស៊ូបានសួរលោកដោយឡែកពីគេអំពីអ្វីដែលលោកបានមានប្រសាសន៍ពីមុន។ លោកយេស៊ូទើបតែបានមានប្រសាសន៍ថា វិហារនៅក្រុងយេរូសាឡិមនឹងត្រូវបំផ្លាញចោល។ ហើយនៅពេលមួយមុននេះ លោកបានប្រាប់ពួកអ្នកកាន់តាមអំពី«ទីបញ្ចប់របៀបរបបពិភពលោកនេះ»។ (ម៉ាថាយ ១៣:៤០, ៤៩) ឥឡូវ ពួកសាវ័កសួរថា៖ «តើអ្វីជាសញ្ញាសម្គាល់ដែលបញ្ជាក់វត្តមានរបស់លោក និងគ្រាចុងបញ្ចប់នៃរបៀបរបបពិភពលោក?»។—ម៉ាថាយ ២៤:៣
លោកយេស៊ូបានប្រាប់អំពីអ្វីដែលនឹងកើតឡើងមុនការបំផ្លាញចោលក្រុងយេរូសាឡិម។ ប៉ុន្តែ ប្រសាសន៍របស់លោករួមបញ្ចូលអ្វីច្រើនទៀត។ ទំនាយរបស់លោកនឹងបានសម្រេចក្នុងកម្រិតធំជាងនៅពិភពលោកទាំងមូល។ លោកយេស៊ូបានទាយអំពីព្រឹត្ដិការណ៍ផ្សេងៗនិងស្ថានភាពក្នុងពិភពលោកដែលរួមគ្នាជាសញ្ញាសម្គាល់មួយ។ សញ្ញាសម្គាល់នោះនឹងបង្ហាញដល់អស់អ្នកដែលនៅផែនដីថា វត្តមានរបស់លោកយេស៊ូពេលគ្រប់គ្រងជាស្តេចបានចាប់ផ្ដើមហើយ។ និយាយឲ្យចំទៅ សញ្ញាសម្គាល់នឹងបង្ហាញថា ព្រះយេហូវ៉ាបានតែងតាំងលោកយេស៊ូជាស្តេចក្នុងរាជាណាចក្រនៃមេស្ស៊ី ដែលបានត្រូវសន្យាជាយូរមកហើយ។ សញ្ញាសម្គាល់នោះបង្ហាញថា រាជាណាចក្ររបស់ព្រះហៀបនឹងដកចេញនូវអំពើអាក្រក់ជួជាតិ និងនាំមកនូវសន្ដិភាពពិតដល់មនុស្សជាតិ។ ដូច្នេះព្រឹត្ដិការណ៍ផ្សេងៗដែលលោកយេស៊ូបានទាយ សម្គាល់គ្រាចុងក្រោយបង្អស់នៃរបៀបរបបចាស់នៃពិភពលោកនេះ ពោលគឺរបៀបរបបសាសនា នយោបាយ និងសង្គមដែលមាននៅសម័យនេះ ហើយសម្គាល់ការចាប់ផ្ដើមរបៀបរបបថ្មីមួយទៀត។
ពេលលោកយេស៊ូពន្យល់អំពីអ្វីដែលត្រូវកើតឡើងនៅផែនដីក្នុងអំឡុងវត្តមានរបស់លោកពេលគ្រប់គ្រងជាស្តេចនៅស្ថានសួគ៌ លោកបានមានប្រសាសន៍ថានឹងមានសង្គ្រាមរវាងប្រជាជាតិនានា ការអត់ឃ្លាន ការរញ្ជួយដីយ៉ាងខ្លាំង និងរោគរាតត្បាត។ ការប្រឆាំងច្បាប់នឹងមានកាន់តែច្រើនឡើង។ អ្នកកាន់តាមពិតរបស់លោកយេស៊ូនឹងផ្សព្វផ្សាយដំណឹងល្អអំពីរាជាណាចក្ររបស់ព្រះនៅពាសពេញផែនដី។ នៅទីបញ្ចប់នៃព្រឹត្ដិការណ៍ទាំងនោះ នឹងមាន«ទុក្ខវេទនាជាខ្លាំង»ដែលមិនធ្លាប់មានពីមុនទេ។—ម៉ាថាយ ២៤:២១
តើពួកអ្នកកាន់តាមលោកយេស៊ូអាចដឹងដោយដូចម្ដេចថា សេចក្ដីវេទនានោះគឺជិតកើតឡើងហើយ? លោកយេស៊ូបានមានប្រសាសន៍ថា៖ «ចូរទាញយកមេរៀនពីឧទាហរណ៍អំពីដើមល្វាតូច»។ (ម៉ាថាយ ២៤:៣២) កាលដែលឃើញមែកល្វាដុះស្លឹក នោះជាសញ្ញាសម្គាល់យ៉ាងច្បាស់ថា រដូវក្ដៅជិតដល់ហើយ។ ដូចគ្នាដែរ កាលដែលឃើញអ្វីៗដែលលោកយេស៊ូបានទាយកើតឡើងនៅគ្រាតែមួយ នោះជាសញ្ញាសម្គាល់យ៉ាងច្បាស់ថាទីបញ្ចប់ជិតដល់ហើយ។ ក្រៅពីបិតានៅស្ថានសួគ៌ នោះគ្មានអ្នកណាដឹងអំពីថ្ងៃនិងម៉ោងពិតប្រាកដ ដែលសេចក្ដីវេទនាជាខ្លាំងនឹងចាប់ផ្ដើមទេ។ ដូច្នេះ លោកយេស៊ូបានដាស់តឿនពួកអ្នកកាន់តាមលោកថា៖ «ចូរប្រុងប្រយ័ត្ន ព្រោះអ្នករាល់គ្នាមិនដឹងថាពេលណាជាពេលកំណត់ឡើយ»។—ម៉ាកុស ១៣:៣៣
—មានមូលដ្ឋានលើសៀវភៅម៉ាថាយ ជំពូកទី២៤និង២៥ ម៉ាកុស ជំពូកទី១៣ លូកា ជំពូកទី២១។
-
-
លោកយេស៊ូគ្រិស្តត្រូវគេសម្លាប់គម្ពីរបរិសុទ្ធ តើរៀបរាប់អំពីអ្វី?
-
-
ភាគ២០
លោកយេស៊ូគ្រិស្តត្រូវគេសម្លាប់
លោកយេស៊ូផ្ដួចផ្ដើមពិធីថ្មីមួយ។ លោកត្រូវគេក្បត់ ហើយព្យួរលើបង្គោល
ក្រោយពីផ្សព្វផ្សាយនិងបង្រៀនអស់បីឆ្នាំកន្លះ លោកយេស៊ូបានដឹងថា ជីវិតរបស់លោកនៅផែនដីគឺជិតដល់ទីបញ្ចប់ហើយ។ ពួកមេដឹកនាំសាសនាយូដាបានប្រឹក្សាគ្នាដើម្បីសម្លាប់លោក ប៉ុន្តែពួកគេខ្លាចក្រែងបណ្ដាជនកើតចលាចល ពីព្រោះបណ្ដាជនចាត់ទុកលោកជាអ្នកប្រកាសទំនាយ។ ចន្លោះពេលនោះ សាថានបានធ្វើឲ្យសាវ័កម្នាក់ក្នុងចំណោមសាវ័ក១២នាក់របស់លោកយេស៊ូក្បត់លោក។ អ្នកនោះគឺយូដាសអ៊ីស្ការីយ៉ុត។ ពួកមេដឹកនាំសាសនាយូដាបានឲ្យយូដាស៣០កាក់ធ្វើពីប្រាក់ដើម្បីក្បត់លោកយេស៊ូ។
នៅយប់ចុងក្រោយ លោកយេស៊ូបានប្រមូលពួកសាវ័កដើម្បីធ្វើពិធីបុណ្យរំលង។ ក្រោយពីឲ្យយូដាសចេញទៅ លោកបានប្រារព្ធពិធីថ្មីមួយ ពោលគឺអាហារល្ងាចរបស់លោកម្ចាស់។ លោកបានយកនំប៉័ងមួយដុំ អធិដ្ឋានអរគុណព្រះ រួចកាច់ឲ្យពួកសាវ័ក១១នាក់។ លោកមានប្រសាសន៍ថា៖ «នេះជាតំណាងរូបកាយរបស់ខ្ញុំដែលនឹងត្រូវប្រគល់ឲ្យ ដើម្បីអ្នករាល់គ្នា។ ចូរបន្តធ្វើដូច្នេះ ដើម្បីរំលឹកដល់ខ្ញុំ»។ លោកយកពែងនោះធ្វើបែបដូច្នោះដែរ ដោយមានប្រសាសន៍ថា៖ «ពែងនេះជាតំណាងកិច្ចព្រមព្រៀងថ្មី ដែលមានមូលដ្ឋានលើឈាមរបស់ខ្ញុំ»។—លូកា ២២:១៩, ២០
លោកយេស៊ូមានរឿងច្រើនដើម្បីប្រាប់ពួកសាវ័កលោកនៅយប់នោះ។ លោកបានឲ្យបញ្ញត្ដិថ្មីដល់ពួកគាត់ ពោលគឺឲ្យពួកគាត់បង្ហាញសេចក្ដីស្រឡាញ់ដល់គ្នាទៅវិញទៅមកដោយមិនគិតប្រយោជន៍ខ្លួន។ លោកមានប្រសាសន៍ថា៖ «យ៉ាងនេះ មនុស្សគ្រប់គ្នានឹងដឹងថាអ្នករាល់គ្នាជាអ្នកកាន់តាមខ្ញុំ បើអ្នករាល់គ្នាស្រឡាញ់គ្នា»។ (យ៉ូហាន ១៣:៣៤, ៣៥) លោកបានដាស់តឿនពួកគាត់កុំឲ្យខ្វល់ចិត្តដោយសារព្រឹត្ដិការណ៍ខ្លោចផ្សាដែលហៀបនឹងកើតឡើងនោះ។ លោកយេស៊ូបានអធិដ្ឋានយ៉ាងស្មោះអស់ពីចិត្តឲ្យពួកគាត់។ ពួកគាត់បានច្រៀងសរសើរព្រះ ហើយក៏ចេញទៅសួនហ្គេតសេម៉ានីក្នុងយប់នោះ។
នៅក្នុងសួនហ្គេតសេម៉ានី លោកយេស៊ូបានលុតជង្គង់អធិដ្ឋានអង្វរព្រះយ៉ាងស្មោះអស់ពីចិត្ត។ បន្ដិចក្រោយមក មនុស្សមួយក្រុមដែលមានពួកទាហាន ពួកសង្ឃនិងពួកអ្នកឯទៀតបានមកដល់ទាំងកាន់អាវុធដើម្បីចាប់លោក។ យូដាសចូលមក ហើយបង្ហាញពួកគេថានរណាជាលោកយេស៊ូ ដោយថើបលោក។ កាលដែលពួកទាហានចងលោកយេស៊ូ នោះពួកសាវ័ករត់ចេញអស់។
នៅមុខតុលាការជាន់ខ្ពស់សាសន៍យូដា លោកយេស៊ូបានបញ្ជាក់ឲ្យគេស្គាល់ថាលោកជាបុត្ររបស់ព្រះ។ តុលាការនេះបានចាត់ទុកលោកថាមានទោសជាអ្នកប្រមាថព្រះ ហើយគួរតែស្លាប់។ រួចមក គេយកលោកយេស៊ូទៅជួបអភិបាលជាជនជាតិរ៉ូមឈ្មោះប៉ុនទាស ពីឡាត។ ទោះជាគាត់បានទទួលស្គាល់ថាលោកយេស៊ូគ្មានទោសក៏ដោយ តែគាត់បានប្រគល់លោកយេស៊ូទៅហ្វូងមនុស្សដែលទាមទារឲ្យប្រហារជីវិតលោក។
គេបានយកលោកយេស៊ូទៅកុលកូថា នៅទីនោះពួកទាហានជាតិរ៉ូមបានបោះដែកគោលភ្ជាប់លោកនឹងបង្គោល។ ដោយអព្ភូតហេតុ ថ្ងៃភ្លឺចែសបានទៅជាងងឹត។ ក្រោយមកក្នុងរសៀលថ្ងៃនោះ លោកយេស៊ូបានទទួលមរណភាព ហើយក៏មានការរញ្ជួយដីយ៉ាងខ្លាំង។ គេបានដាក់សពលោកក្នុងរូងថ្ម។ ស្អែកឡើង ពួកសង្ឃបានបិទត្រាទីបញ្ចុះសពនោះ ហើយបានដាក់ឲ្យគេយាមមាត់រូង។ តើលោកយេស៊ូនឹងនៅក្នុងទីបញ្ចុះសពនោះឬ? ទេ។ អព្ភូតហេតុដ៏អស្ចារ្យបំផុតមួយបានហៀបនឹងកើតឡើង។
—មានមូលដ្ឋានលើសៀវភៅម៉ាថាយ ជំពូកទី២៦និង២៧ ម៉ាកុស ជំពូកទី១៤និង១៥ លូកា ជំពូកទី២២និង២៣ យ៉ូហាន ជំពូកទី១២ដល់១៩។
a ដើម្បីដឹងអំពីតម្លៃនៃមរណភាពរបស់លោកយេស៊ូ សូមមើលសៀវភៅតើគម្ពីរអាចបង្រៀនយើងអំពីអ្វី? ជំពូកទី៥។
-
-
កាលបរិច្ឆេទគម្ពីរបរិសុទ្ធ តើរៀបរាប់អំពីអ្វី?
-
-
ថ្ងៃទី១៤ ខែណែសាន ឆ្នាំ៣៣ គ.ស. លោកយេស៊ូត្រូវគេព្យួរ (ណែសានគឺប្រហែលនឹងពាក់កណ្ដាលខែមីនាដល់ពាក់កណ្ដាលខែមេសា)
ថ្ងៃទី១៦ ខែណែសាន ឆ្នាំ៣៣ គ.ស. លោកយេស៊ូបានត្រូវប្រោសឲ្យរស់ឡើងវិញ
-