-
តើសេចក្ដីពិតក្នុងគម្ពីរបានត្រូវរកឃើញម្ដងទៀតយ៉ាងដូចម្ដេច?នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា?
-
-
មេរៀនទី៣
តើសេចក្ដីពិតក្នុងគម្ពីរបានត្រូវរកឃើញម្ដងទៀតយ៉ាងដូចម្ដេច?
និស្សិតគម្ពីរនាទសវត្សរ៍នៃឆ្នាំ១៨៧០
ទស្សនាវដ្ដីប៉មយាម លេខទី១ ឆ្នាំ១៨៧៩
ទស្សនាវដ្ដីប៉មយាមសព្វថ្ងៃនេះ
គម្ពីរបានទាយថា ក្រោយមរណភាពរបស់គ្រិស្ត គ្រូក្លែងក្លាយនឹងលេចមកក្នុងចំណោមគ្រិស្តសាសនិកសម័យដើម ហើយបង្ខូចសេចក្ដីពិតក្នុងគម្ពីរ។ (សកម្មភាព ២០:២៩, ៣០) ក្រោយមករឿងនេះបានកើតឡើងមែន។ ពួកគេបានលាយឡំសេចក្ដីបង្រៀនរបស់លោកយេស៊ូជាមួយនឹងគំនិតរបស់អ្នកដែលមិនកាន់គ្រិស្តសាសនា ហើយគ្រិស្តសាសនាក្លែងក្លាយក៏បានចម្រើនឡើង។ (ធីម៉ូថេទី២ ៤:៣, ៤) សព្វថ្ងៃនេះ តើយើងអាចប្រាកដថា យើងមានការយល់ដឹងត្រឹមត្រូវអំពីអ្វីដែលគម្ពីរពិតជាបង្រៀនឬទេ?
ពេលវេលាដែលព្រះយេហូវ៉ាបានកំណត់ដើម្បីបើកបង្ហាញសេចក្ដីពិតបានមកដល់។ លោកបានទាយថា ក្នុងអំឡុង‹គ្រាចុងបំផុត ចំណេះពិតនឹងបានចម្រើនឡើង›។ (ដានីយ៉ែល ១២:៤) នៅឆ្នាំ១៨៧០ ក្រុមតូចមួយដែលជាអ្នកស្វែងរកសេចក្ដីពិត បានទទួលស្គាល់ថា សេចក្ដីបង្រៀនជាច្រើនរបស់គ្រិស្តសាសនាមិនស្របនឹងគម្ពីរទេ។ ហេតុនេះ ពួកគាត់ចាប់ផ្ដើមស្រាវជ្រាវដើម្បីយល់អត្ថន័យដើមក្នុងគម្ពីរ ហើយព្រះយេហូវ៉ាបានជួយពួកគាត់ឲ្យយល់បទគម្ពីរ។
បុរសដែលមានចិត្តស្មោះបានសិក្សាគម្ពីរយ៉ាងហ្មត់ចត់។ នៅសម័យនោះ សាក្សីព្រះយេហូវ៉ាបានត្រូវហៅថានិស្សិតគម្ពីរ។ ពួកអ្នកមានចិត្តស្មោះទាំងនោះបានខំរកវិធីសិក្សាដើម្បីយល់បទគម្ពីរ ហើយរហូតដល់សព្វថ្ងៃនេះយើងនៅតែប្រើវិធីដែលពួកគាត់បានរកឃើញ។ ពួកគាត់ពិភាក្សាគម្ពីរពីប្រធានបទមួយទៅប្រធានបទមួយ។ កាលណាពួកគាត់មានខគម្ពីរដែលពិបាកយល់ ពួកគាត់រកមើលខគម្ពីរឯទៀតដែលជួយឲ្យយល់ខនោះ។ ពេលដែលការសន្និដ្ឋានរបស់ពួកគាត់ស្របនឹងបទគម្ពីរឯទៀត នោះពួកគាត់កត់ទុក។ ដោយឲ្យគម្ពីរបកស្រាយខ្លួនឯង នោះពួកគាត់បានរកឃើញសេចក្ដីពិតអំពីនាម រាជាណាចក្រ និងគោលបំណងរបស់លោកចំពោះមនុស្សជាតិនិងផែនដី ថែមទាំងអំពីស្ថានភាពរបស់មនុស្សស្លាប់ និងសេចក្ដីសង្ឃឹមអំពីការប្រោសឲ្យរស់ឡើងវិញ។ ការរកឃើញរបស់ពួកគាត់បានជួយពួកគាត់ឲ្យរួចផុតពីជំនឿនិងការប្រព្រឹត្តមិនត្រឹមត្រូវជាច្រើន។—យ៉ូហាន ៨:៣១, ៣២
នៅឆ្នាំ១៨៧៩ និស្សិតគម្ពីរបានដឹងថា ពេលវេលាដែលត្រូវប្រកាសសេចក្ដីពិតឲ្យបានឮសុសសាយបានមកដល់ហើយ។ ដូច្នេះ នៅឆ្នាំនោះ ពួកគាត់បានចាប់ផ្ដើមបង្កើតទស្សនាវដ្ដីដែលយើងបោះពុម្ពផ្សាយរហូតដល់សព្វថ្ងៃនេះ គឺទស្សនាវដ្ដីប៉មយាម ប្រកាសអំពីរាជាណាចក្ររបស់ព្រះយេហូវ៉ា។ ឥឡូវនេះ យើងកំពុងផ្សព្វផ្សាយសេចក្ដីពិតពីគម្ពីរដល់មនុស្សនៅ២៤០ប្រទេស និងជាង៧៥០ភាសា។ ជាងពេលមុនៗទៅទៀត ចំណេះពិតមានច្រើនជាបរិបូរមែន!
ក្រោយមរណភាពរបស់គ្រិស្ត តើមានអ្វីកើតឡើងដល់សេចក្ដីពិតក្នុងគម្ពីរ?
តើអ្វីបានជួយយើងឲ្យរកឃើញម្ដងទៀតនូវសេចក្ដីពិតពីបណ្ដាំរបស់ព្រះ?
-
-
ហេតុអ្វីយើងមានសេចក្ដីបកប្រែពិភពលោកថ្មី?នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា?
-
-
មេរៀនទី៤
ហេតុអ្វីយើងមានសេចក្ដីបកប្រែពិភពលោកថ្មី?
កុងហ្គោ (គិនសាសា)
រ្វ៉ាន់ដា
បំណែកស៊ីមម៉ាខឹស ដែលមាននាមរបស់ព្រះនៅទំនុកតម្កើង ៦៩:៣១ នៅសតវត្សរ៍ទី៣ឬទី៤ គ.ស.
អស់រាប់ឆ្នាំហើយ ដែលសាក្សីព្រះយេហូវ៉ាបានប្រើ បានបោះពុម្ព និងបានចែកសេចក្ដីបកប្រែផ្សេងៗនៃគម្ពីរ។ ប៉ុន្តែក្រោយមក យើងដឹងថា យើងត្រូវបង្កើតសេចក្ដីបកប្រែថ្មីដែលនឹងជួយមនុស្សឲ្យមាន«ចំណេះត្រឹមត្រូវអំពីសេចក្ដីពិត»ដែលជាបំណងប្រាថ្នារបស់ព្រះចំពោះមនុស្សគ្រប់រូប។ (ធីម៉ូថេទី១ ២:៣, ៤) អាស្រ័យហេតុនេះ នៅឆ្នាំ១៩៥០ យើងបានចាប់ផ្ដើមចេញផ្នែកផ្សេងៗនៃគម្ពីររបស់យើងជាភាសាអង់គ្លេស ពោលគឺសេចក្ដីបកប្រែពិភពលោកថ្មី។ យើងបានបកប្រែគម្ពីរនោះយ៉ាងស្មោះត្រង់ និងយ៉ាងត្រឹមត្រូវជាង១៣០ភាសា។
ត្រូវមានគម្ពីរមួយដែលស្រួលយល់។ យូរៗទៅភាសាមានការផ្លាស់ប្ដូរ ហើយសេចក្ដីបកប្រែជាច្រើនមានពាក្យដែលមនុស្សភាគច្រើនមិនស្គាល់ ឬហួសសម័យដែលពិបាកយល់។ ម្យ៉ាងទៀត គេបានរកឃើញឯកសារពីសម័យបុរាណដែលត្រឹមត្រូវ ជិតដូចច្បាប់ដើមជាង ដែលធ្វើឲ្យងាយយល់បទគម្ពីរជាភាសាហេប្រឺ អារ៉ាម និងក្រិច។
ត្រូវមានសេចក្ដីបកប្រែមួយដែលត្រឹមត្រូវស្របតាមបណ្ដាំរបស់ព្រះ។ ជាជាងផ្លាស់ប្ដូរអ្វីៗដែលបានត្រូវសរសេរក្រោមការដឹកនាំរបស់ព្រះ អ្នកបកប្រែគម្ពីរគួរតែបកប្រែយ៉ាងស្មោះត្រង់ទៅតាមច្បាប់ដើម។ ក៏ប៉ុន្តែ សេចក្ដីបកប្រែភាគច្រើនមិនប្រើនាមរបស់ព្រះ គឺយេហូវ៉ានៅក្នុងបទគម្ពីរបរិសុទ្ធទេ។
ត្រូវមានគម្ពីរមួយដែលលើកកិត្ដិយសព្រះដែលជាអ្នកនិពន្ធគម្ពីរ។ (សាំយូអែលទី២ ២៣:២) ក្នុងសេចក្ដីបកប្រែពិភពលោកថ្មី នាមយេហូវ៉ាបានត្រូវដាក់នៅកន្លែងដើមវិញដែលមានជិត៧.០០០ដងក្នុងឯកសារគម្ពីរដែលចាស់ជាងគេ ដូចរូបភាពខាងក្រោមនេះបញ្ជាក់។ (ទំនុកតម្កើង ៨៣:១៨) គម្ពីរនេះ គឺគួរឲ្យចង់អាន ព្រោះបានបង្ហាញយ៉ាងច្បាស់នូវទស្សនៈរបស់ព្រះ ហើយនេះជាលទ្ធផលដែលមកពីការព្យាយាមស្រាវជ្រាវអស់ជាច្រើនឆ្នាំ។ ទោះជាលោកអ្នកមានសេចក្ដីបកប្រែពិភពលោកថ្មីជាភាសារបស់លោកអ្នកឬមិនមានក៏ដោយ យើងសូមលើកទឹកចិត្តលោកអ្នកឲ្យមានទម្លាប់ល្អក្នុងការអានបណ្ដាំរបស់ព្រះយេហូវ៉ាជារៀងរាល់ថ្ងៃ។—យ៉ូស្វេ ១:៨; ទំនុកតម្កើង ១:២, ៣
ហេតុអ្វីបានជាយើងសន្និដ្ឋានថា ការបកប្រែថ្មីនៃគម្ពីរគឺចាំបាច់?
សម្រាប់អ្នកដែលចង់រៀនអំពីបំណងប្រាថ្នារបស់ព្រះ តើគួរមានទម្លាប់ល្អអ្វីដែលត្រូវធ្វើជាប្រចាំថ្ងៃ?
-