-
ភ្លើងឆេះក្នុងគុម្ពបន្លាមេរៀនដែលអ្នកអាចរៀនពីគម្ពីរ
-
-
មេរៀនទី១៨
ភ្លើងឆេះក្នុងគុម្ពបន្លា
ម៉ូសេរស់នៅស្រុកម៉ាឌានអស់៤០ឆ្នាំ។ គាត់បានរៀបការ ហើយមានកូន។ ថ្ងៃមួយ ពេលម៉ូសេកំពុងឃ្វាលចៀមនៅក្បែរភ្នំស៊ីណាយ គាត់បានឃើញរឿងដ៏អស្ចារ្យមួយ គឺឃើញអណ្ដាតភ្លើងឆេះក្នុងគុម្ពបន្លា តែគុម្ពបន្លាមិនឆេះទេ! ហេតុនេះ ម៉ូសេក៏ចូលទៅជិត ដើម្បីដឹងថាមានអ្វីកើតឡើង ស្រាប់តែគាត់ឮសំឡេងមួយចេញពីគុម្ពបន្លាថា៖ ‹ម៉ូសេ! កុំចូលមកជិតទៀត។ ចូរដោះស្បែកជើងអ្នកចេញ ព្រោះកន្លែងដែលអ្នកកំពុងឈរនេះ គឺជាដីបរិសុទ្ធ›។ នេះជាសំឡេងរបស់ព្រះយេហូវ៉ា ដែលកំពុងមានប្រសាសន៍តាមរយៈទេវតាមួយរូប។
ពេលឮសំឡេងនោះ ម៉ូសេភ័យណាស់ ដូច្នេះគាត់ក៏បាំងមុខ។ ព្រះយេហូវ៉ាមានប្រសាសន៍ទៀតថា៖ ‹ខ្ញុំបានឃើញទុក្ខវេទនារបស់ជនជាតិអ៊ីស្រាអែល។ ខ្ញុំនឹងសង្គ្រោះពួកគេឲ្យរួចពីកណ្ដាប់ដៃរបស់ពួកអេហ្ស៊ីប ហើយនាំពួកគេទៅស្រុកដ៏ល្អ។ អ្នកគឺជាបុគ្គលដែលខ្ញុំនឹងប្រើ ដើម្បីដឹកនាំរាស្ដ្ររបស់ខ្ញុំចេញពីស្រុកអេហ្ស៊ីប›។ នេះច្បាស់ជាធ្វើឲ្យម៉ូសេភ្ញាក់ផ្អើលណាស់ មែនទេ?
ម៉ូសេសួរថា៖ ‹តើខ្ញុំគួរឆ្លើយយ៉ាងណា បើបណ្ដាជនសួរថាអ្នកណាចាត់ខ្ញុំឲ្យមក?›។ ព្រះតបថា៖ ‹ចូរប្រាប់ពួកគេថា ព្រះយេហូវ៉ាជាព្រះនៃអាប្រាហាំ ព្រះនៃអ៊ីសាក និងព្រះនៃយ៉ាកុប បានចាត់ខ្ញុំឲ្យមកឯអ្នករាល់គ្នា›។ ម៉ូសេក៏សួរទៀតថា៖ ‹ចុះបើបណ្ដាជនមិនជឿខ្ញុំ?›។ ព្រះយេហូវ៉ាបានបង្ហាញម៉ូសេថា លោកនឹងជួយគាត់។ លោកបានប្រាប់គាត់ឲ្យបោះដំបងទៅលើដី។ ពេលគាត់ធ្វើតាម ដំបងនោះបានប្រែទៅជាសត្វពស់! ពេលគាត់លូកដៃចាប់កាន់កន្ទុយពស់ នោះវាក៏ប្រែទៅជាដំបងវិញ។ ព្រះយេហូវ៉ាមានប្រសាសន៍ថា៖ ‹ពេលអ្នកធ្វើការអស្ចារ្យដូចនេះ ពួកគេនឹងជឿថាខ្ញុំបានចាត់អ្នកឲ្យមក›។
ប៉ុន្តែ ម៉ូសេបន្តប្រាប់ថា៖ ‹ខ្ញុំមិនពូកែនិយាយទេ›។ ព្រះយេហូវ៉ាសន្យាថា៖ ‹ខ្ញុំនឹងប្រាប់អ្នកនូវអ្វីដែលអ្នកត្រូវនិយាយ ហើយខ្ញុំនឹងចាត់អេរ៉ុនបងប្រុសរបស់អ្នកឲ្យជួយអ្នក›។ ពេលម៉ូសេដឹងច្បាស់ថា ព្រះយេហូវ៉ានៅជាមួយនឹងគាត់ នោះគាត់បាននាំប្រពន្ធនិងកូនៗធ្វើដំណើរត្រឡប់ទៅស្រុកអេហ្ស៊ីបវិញ។
«កុំខ្វល់ចិត្តថាអ្នកត្រូវនិយាយអ្វីឬនិយាយយ៉ាងណាឡើយ ពីព្រោះអ្នកនឹងដឹងនូវអ្វីៗដែលត្រូវនិយាយនៅវេលានោះឯង»។—ម៉ាថាយ ១០:១៩
-
-
សេចក្តីវេទនាបីដំបូងមេរៀនដែលអ្នកអាចរៀនពីគម្ពីរ
-
-
មេរៀនទី១៩
សេចក្ដីវេទនាបីដំបូង
ជនជាតិអ៊ីស្រាអែលបានត្រូវបង្ខំឲ្យធ្វើការយ៉ាងលំបាកក្នុងភាពជាខ្ញុំបម្រើ។ ព្រះយេហូវ៉ាបានបង្គាប់ម៉ូសេនិងអេរ៉ុនឲ្យទៅជួបផារ៉ូ ហើយប្រាប់ថា៖ ‹ចូរឲ្យរាស្ត្ររបស់ខ្ញុំចេញទៅតំបន់ស្ងាត់ជ្រងំ ដើម្បីពួកគេអាចគោរពប្រណិប័តន៍ខ្ញុំ›។ ផារ៉ូតបទៅវិញដោយអំណួតថា៖ ‹ខ្ញុំមិនខ្វល់នឹងសម្ដីរបស់ព្រះយេហូវ៉ាទេ ហើយខ្ញុំមិនព្រមឲ្យជនជាតិអ៊ីស្រាអែលចេញទៅឡើយ›។ រួចមក ផារ៉ូបង្ខំឲ្យជនជាតិអ៊ីស្រាអែលធ្វើការធ្ងន់ជាងមុនទៅទៀត។ ព្រះយេហូវ៉ានឹងបង្រៀនផារ៉ូនូវមេរៀនមួយ។ តើអ្នកដឹងថាលោកនឹងធ្វើអ្វីទេ? លោកនឹងធ្វើឲ្យមានសេចក្ដីវេទនា១០យ៉ាងនៅស្រុកអេហ្ស៊ីប។ ព្រះយេហូវ៉ាប្រាប់ម៉ូសេថា៖ ‹ផារ៉ូមិនព្រមស្ដាប់ខ្ញុំទេ។ នៅព្រឹកស្អែក គាត់នឹងចេញទៅទន្លេនីល។ ចូរទៅជួបគាត់ ហើយប្រាប់ថា៖ «ដោយសារអ្នកមិនព្រមឲ្យរាស្ត្ររបស់ខ្ញុំចេញទៅ នោះទឹកទន្លេនីលនឹងប្រែទៅជាឈាម»›។ ម៉ូសេក៏ទៅជួបផារ៉ូតាមបង្គាប់លោក។ រួចអេរ៉ុនបានយកដំបងវាយទឹកទន្លេនីលនៅចំពោះមុខផារ៉ូ ស្រាប់តែទន្លេក៏ប្រែទៅជាឈាម ហើយត្រីចាប់ផ្ដើមងាប់ ធ្វើឲ្យទឹកទន្លេនោះស្អុយ រហូតដល់មិនអាចផឹកបាន។ ប៉ុន្តែ ផារ៉ូមិនព្រមឲ្យជនជាតិអ៊ីស្រាអែលចេញទៅឡើយ។
ប្រាំពីរថ្ងៃក្រោយមក ព្រះយេហូវ៉ាបានចាត់ម៉ូសេឲ្យទៅប្រាប់ផារ៉ូថា៖ ‹បើអ្នកមិនព្រមឲ្យរាស្ត្ររបស់ខ្ញុំចាកចេញទេ នោះស្រុកអេហ្ស៊ីបនឹងពេញទៅដោយកង្កែប›។ ពេលអេរ៉ុនលើកដំបងគាត់ឡើង នោះក៏មានហ្វូងកង្កែបឡើងមកពាសពេញស្រុកអេហ្ស៊ីប។ មានកង្កែបនៅក្នុងផ្ទះ នៅលើគ្រែ សូម្បីតែចានក៏មានដែរ គឺមាននៅគ្រប់កន្លែងក្នុងស្រុកនោះ! ផារ៉ូបានប្រាប់ម៉ូសេឲ្យអង្វរព្រះយេហូវ៉ាដកសេចក្ដីវេទនានោះចេញ ហើយផារ៉ូសន្យាថានឹងដោះលែងជនជាតិអ៊ីស្រាអែល។ ដូច្នេះ ព្រះយេហូវ៉ាបានបញ្ឈប់សេចក្ដីវេទនានោះ។ កង្កែបចាប់ផ្ដើមងាប់ ហើយជនជាតិអេហ្ស៊ីបបានប្រមូលហ្វូងកង្កែបដែលងាប់ទៅជាគំនររាប់មិនអស់។ ស្រុកទាំងមូលពេញទៅដោយក្លិនស្អុយ។ ប៉ុន្តែ ផារ៉ូនៅតែរឹងចចេសមិនឲ្យជនជាតិអ៊ីស្រាអែលចេញទៅទេ។
បន្ទាប់មក ព្រះយេហូវ៉ាបានប្រាប់ម៉ូសេថា៖ ‹ចូរឲ្យអេរ៉ុនវាយដំបងទៅនឹងដី នោះធូលីដីនឹងក្លាយទៅជាសត្វសុច។ ពួកវានឹងធ្វើទុក្ខទាំងមនុស្សទាំងសត្វ›។ ភ្លាមៗនោះ ក៏កើតមានសត្វសុចគ្រប់ទីកន្លែង។ មនុស្សរបស់ផារ៉ូបានប្រាប់ផារ៉ូថា៖ ‹សេចក្ដីវេទនានេះគឺមកពីព្រះ›។ ប៉ុន្តែ ផារ៉ូនៅតែមិនព្រមឲ្យជនជាតិអ៊ីស្រាអែលចេញទៅឡើយ។
«ខ្ញុំនឹងបង្ហាញឲ្យពួកគេឃើញ គឺឃើញថាមពលនិងឫទ្ធានុភាពដ៏ខ្លាំងក្លារបស់ខ្ញុំ នោះពួកគេនឹងដឹងថានាមខ្ញុំគឺយេហូវ៉ា»។—យេរេមា ១៦:២១
-