តើយើងអាចរៀនអ្វីខ្លះពីពួកស្ត្រីដែលបានត្រូវកត់ទុកក្នុងគម្ពីរ?

ចម្លើយពីគម្ពីរ

គម្ពីរណែនាំយើងឲ្យស្គាល់ស្ត្រីជាច្រើនដែលជីវិតរបស់ពួកគេ អាចបង្រៀនយើងនូវមេរៀនដ៏មានប្រយោជន៍។ (រ៉ូម ១៥:៤; ធីម៉ូថេទី២ ៣:១៦, ១៧) អត្ថបទនេះរៀបរាប់យ៉ាងសង្ខេបអំពីស្ត្រីមួយចំនួន ដែលបានត្រូវលើកឡើងក្នុងគម្ពីរ។ ស្ត្រីជាច្រើនបានទុកគំរូល្អឲ្យយើងយកតម្រាប់តាម ឯស្ត្រីខ្លះទៀត យើងមិនចង់យកតម្រាប់តាមគំរូរបស់ពួកគេទេ។—កូរិនថូសទី១ ១០:១១; ហេប្រឺ ៦:១២

អ័ប៊ីកែល

តើអ័ប៊ីកែលជាអ្នកណា? នាងជាប្រពន្ធរបស់ណាបាលដែលជាអ្នកមានស្ដុកស្តម្ភ តែគាត់មិនមានចិត្តសប្បុរសនោះទេ។ ប៉ុន្តែ អ័ប៊ីកែលជាស្ត្រីឈ្លាសវៃនិងមានចិត្តរាបទាប ថែមទាំងមានរូបសម្ផស្សស្អាត និងមានគុណសម្បត្តិដែលព្រះយេហូវ៉ាពេញចិត្ត។—សាំយូអែលទី១ ២៥:៣

តើនាងបានធ្វើអ្វីខ្លះ? អ័ប៊ីកែលបានប្រព្រឹត្តដោយប្រាជ្ញានិងចេះគិតពិចារណាដើម្បីគេចផុតពីអន្តរាយ។ នាងនិងណាបាលរស់នៅតំបន់មួយ ដែលដាវីឌជាស្ដេចរបស់ជនជាតិអ៊ីស្រាអែលនៅថ្ងៃអនាគត កំពុងលាក់ខ្លួន។ កាលដែលដាវីឌនិងពួកបុរសរបស់គាត់រស់នៅទីនោះជាជនភៀសខ្លួន ពួកគាត់បានជួយការពារហ្វូងចៀមរបស់ណាបាលពីពួកចោរប្លន់។ ប៉ុន្តែ ពេលដាវីឌចាត់អ្នកនាំសារឲ្យទៅសុំអាហារខ្លះពីណាបាល ណាបាលបាននិយាយមិនគួរសមនិងមិនព្រមឲ្យអាហារទេ។ ដាវីឌខឹងខ្លាំងណាស់! ដូច្នេះ ដាវីឌនិងបុរសរបស់គាត់បានចេញទៅសម្លាប់ណាបាល និងបុរសទាំងអស់ដែលនៅក្នុងផ្ទះគាត់។—សាំយូអែលទី១ ២៥:១០-១២, ២២

ពេលអ័ប៊ីកែលឮអំពីអ្វីដែលប្ដីបានធ្វើ នាងបានចាត់វិធានការភ្លាមៗ ដោយឲ្យពួកអ្នកបម្រើរៀបចំម្ហូបអាហារ យកទៅជូនដាវីឌនិងពួកបុរសរបស់គាត់ ហើយនាងក៏បានទៅតាមពួកគេដែរ ដើម្បីអង្វរសុំសេចក្ដីមេត្តាករុណាពីដាវីឌ។ (សាំយូអែលទី១ ២៥:១៤-១៩, ២៤-៣១) ពេលដាវីឌឃើញអំណោយ និងចិត្តរាបទាបរបស់នាង ថែមទាំងឮយោបល់ដ៏ប្រកបដោយប្រាជ្ញារបស់នាង នោះដាវីឌទទួលស្គាល់ថាព្រះបានប្រើនាង ដើម្បីបញ្ឈប់គាត់ពីការសម្លាប់ណាបាលនិងពួកបុរសរបស់គាត់។ (សាំយូអែលទី១ ២៥:៣២, ៣៣) មិនយូរក្រោយនោះ ណាបាលបានស្លាប់ ហើយអ័ប៊ីកែលបានក្លាយទៅជាប្រពន្ធរបស់ដាវីឌ។—សាំយូអែលទី១ ២៥:៣៧-៤១

តើយើងអាចទាញមេរៀនអ្វីពីនាង? ទោះជាអ័ប៊ីកែលមានរូបឆោមស្អាតនិងមានទ្រព្យសម្បត្តិស្ដុកស្តម្ភក្ដី នាងមិនបានគិតថាខ្លួនជាមនុស្សសំខាន់នោះទេ។ ដើម្បីឲ្យមានសេចក្ដីសុខសាន្ត នាងសុខចិត្តសុំអភ័យទោសចំពោះអ្វីដែលនាងមិនបានធ្វើទេ។ នាងបានដោះស្រាយស្ថានការណ៍នោះដោយចិត្តស្ងប់ ដោយឈ្លាសវៃ ដោយក្លាហាន និងដោយប្រាជ្ញា។

▸ ដើម្បីដឹងព័ត៌មានថែមទៀតអំពីអ័ប៊ីកែល សូមមើលអត្ថបទ«នាងបានប្រព្រឹត្តដោយចេះគិតពិចារណា»ជាភាសាអង់គ្លេស។

ដេបូរ៉ា

តើដេបូរ៉ាជាអ្នកណា? នាងជាអ្នកប្រកាសទំនាយដែលព្រះយេហូវ៉ាជាព្រះនៃជនជាតិអ៊ីស្រាអែល បានប្រើឲ្យប្រាប់រាស្ត្ររបស់លោកនូវអ្វីដែលលោកចង់ឲ្យពួកគេធ្វើ។ ព្រះក៏បានប្រើនាងឲ្យជួយដោះស្រាយបញ្ហាក្នុងចំណោមជនជាតិអ៊ីស្រាអែលផងដែរ។—ពួកចៅហ្វាយ ៤:៤, ៥

តើនាងបានធ្វើអ្វីខ្លះ? ដេបូរ៉ាដែលជាអ្នកប្រកាសទំនាយបានជួយអ្នកគោរពប្រណិប័តន៍ព្រះដោយចិត្តក្លាហាន។ តាមការណែនាំរបស់ព្រះ នាងបានចាត់គេឲ្យទៅហៅបារ៉ាក់ឲ្យនាំទ័ពអ៊ីស្រាអែល ទៅប្រយុទ្ធនឹងជនជាតិកាណានដែលគាបសង្កត់ពួកគេ។ (ពួកចៅហ្វាយ ៤:៦, ៧) ពេលបារ៉ាក់សុំដេបូរ៉ាឲ្យទៅជាមួយនឹងគាត់ នាងសុខចិត្តទៅជាមួយបារ៉ាក់ដោយមិនភ័យខ្លាច។—ពួកចៅហ្វាយ ៤:៨, ៩

ក្រោយព្រះបានជួយជនជាតិអ៊ីស្រាអែលឲ្យមានជ័យជម្នះដ៏ធំ ដេបូរ៉ាបាននិពន្ធផ្នែកមួយនៃចម្រៀងដែលនាងនិងបារ៉ាក់បានច្រៀងរៀបរាប់អំពីព្រឹត្តិការណ៍នោះ។ ក្នុងចម្រៀងនោះ នាងបានលើកឡើងអំពីតួនាទីរបស់យ៉ាអែលជាស្ត្រីដ៏ក្លាហានម្នាក់ទៀត ដែលបានជួយឲ្យមានជ័យជម្នះលើជនជាតិកាណាន។—ពួកចៅហ្វាយ ជំពូក⁠៥

តើយើងអាចទាញមេរៀនអ្វីពីនាង? ដេបូរ៉ាមានចិត្តក្លាហាននិងលះបង់ប្រយោជន៍ខ្លួន។ នាងបានលើកទឹកចិត្តអ្នកឯទៀតឲ្យប្រព្រឹត្តអ្វីដែលព្រះពេញចិត្ត។ ពេលពួកគេធ្វើដូច្នោះ នាងបានសរសើរដោយស្មោះចំពោះអ្វីដែលពួកគេធ្វើ។

▸ ដើម្បីដឹងព័ត៌មានថែមទៀតអំពីដេបូរ៉ា សូមមើលអត្ថបទ«ខ្ញុំបានត្រូវតាំងឡើងជាម្ដាយម្នាក់ក្នុងប្រជាជាតិអ៊ីស្រាអែល»ជាភាសាអង់គ្លេស។

ដេលីឡា

តើដេលីឡាជាអ្នកណា? នាងជាស្ត្រីម្នាក់ដែលសាំសុនជាចៅហ្វាយនៃជនជាតិអ៊ីស្រាអែលស្រឡាញ់ពេញចិត្ត។—ពួកចៅហ្វាយ ១៦:៤, ៥

តើនាងបានធ្វើអ្វីខ្លះ? នាងបានទទួលប្រាក់ពីពួកមន្ត្រីភីលីស្ទីន ដើម្បីក្បត់នឹងសាំសុនដែលជាអ្នកដែលព្រះប្រើឲ្យរំដោះជនជាតិអ៊ីស្រាអែលពីពួកភីលីស្ទីន។ ពួកភីលីស្ទីនមិនអាចយកឈ្នះសាំសុនបានទេ ព្រោះគាត់មានកម្លាំងខ្លាំងក្លា។ (ពួកចៅហ្វាយ ១៣:៥) ដូច្នេះ មន្ត្រីរបស់ពួកគេបានរកជំនួយពីដេលីឡា។

ពួកភីលីស្ទីនបានឲ្យប្រាក់ដល់ដេលីឡា ដើម្បីរកមូលហេតុដែលសាំសុនមានកម្លាំងខ្លាំងក្រៃលែង។ ដេលីឡាបានទទួលប្រាក់នោះ ហើយក្រោយពីនាងខំព្យាយាមរកអស់ជាច្រើនដង ទីបំផុតនាងក៏បានដឹងអំពីអាថ៌កំបាំងរបស់សាំសុន។ (ពួកចៅហ្វាយ ១៦:១៥-១៧) រួចមក នាងបានប្រាប់អាថ៌កំបាំងនោះដល់ពួកភីលីស្ទីន ហើយពួកគេក៏ចាប់សាំសុនដាក់គុក។—ពួកចៅហ្វាយ ១៦:១៨-២១

តើយើងអាចទាញមេរៀនអ្វីពីនាង? គំរូរបស់ដេលីឡា មិនគួរឲ្យយកតម្រាប់តាមទេ។ ដោយសារនាងលោភលន់ នាងបានបោកបញ្ឆោត ប្រព្រឹត្តមិនស្មោះត្រង់ និងទាញយកប្រយោជន៍ពីអ្នកបម្រើព្រះយេហូវ៉ា។

អេសធើរ

តើអេសធើរជាអ្នកណា? នាងជាជនជាតិយូដា ហើយនាងត្រូវបានអ័ហាស៊ូរុសជាស្ដេចជនជាតិពើស៊ី ជ្រើសរើសជាអគ្គមហេសី។

តើនាងបានធ្វើអ្វីខ្លះ? អគ្គមហេសីអេសធើរបានប្រើអំណាចរបស់នាង ដើម្បីការពារជនរួមជាតិពីការសម្លាប់ផ្ដាច់ពូជ។ នាងបានរកឃើញថាមន្ត្រីម្នាក់ បានចេញច្បាប់មួយដែលកំណត់ថ្ងៃទុកជាស្រេច ដើម្បីសម្លាប់ជនជាតិយូដាទាំងអស់ដែលរស់នៅចក្រភពពើស៊ី។ គម្រោងការណ៍អាក្រក់នេះមកពីបុរសម្នាក់ឈ្មោះហាម៉ាន គាត់ជានាយករដ្ឋមន្ត្រី។ (នាងអេសធើរ ៣:១៣-១៥; ៤:១, ៥) ដោយមានជំនួយពីម៉ាដេកាយជាបងប្រុសជីដូនមួយ និងដោយប្រថុយជីវិតខ្លួន អេសធើរបានលាតត្រដាងគម្រោងការណ៍អាក្រក់នោះឲ្យស្ដេចអ័ហាស៊ូរុសជាប្ដីរបស់នាងដឹង។ (នាងអេសធើរ ៤:១០-១៦; ៧:១-១០) បន្ទាប់មក ស្ដេចអ័ហាស៊ូរុសបានអនុញ្ញាតឲ្យអេសធើរនិងម៉ាដេកាយ ចេញច្បាប់មួយទៀត គឺប្រគល់អំណាចដល់ជនជាតិយូដាការពារខ្លួន។ ជនជាតិយូដានៅទូទាំងចក្រភព បានឈ្នះលើពួកសត្រូវរបស់ពួកគេ។—នាងអេសធើរ ៨:៥-១១; ៩:១៦, ១៧

តើយើងអាចទាញមេរៀនអ្វីពីនាង? អគ្គមហេសីអេសធើរបានទុកគំរូដ៏អស្ចារ្យស្ដីអំពីចិត្តក្លាហាន ចិត្តរាបទាប និងសុភាពរាបទាប។ (ទំនុកតម្កើង ៣១:២៤; ភីលីព ២:៣) ទោះជានាងមានសម្រស់ស្រស់ស្អាតនិងមានឋានៈខ្ពង់ខ្ពស់ក៏ដោយ នាងមានចិត្តរាបទាបសុំយោបល់និងជំនួយពីអ្នកឯទៀត។ ពេលនិយាយជាមួយនឹងប្ដីរបស់នាង នាងបាននិយាយដោយប៉ិនប្រសប់និងដោយគោរព តែដោយក្លាហាន។ នៅគ្រាដែលមានគ្រោះថ្នាក់ដ៏ធំចំពោះជនជាតិយូដា នាងបានបង្ហាញអត្តសញ្ញាណរបស់ខ្លួនជាជនជាតិយូដាដោយចិត្តក្លាហាន។

▸ ដើម្បីដឹងព័ត៌មានថែមទៀតអំពីអេសធើរ សូមមើលអត្ថបទ«នាងបានការពាររាស្ត្ររបស់ព្រះ» និងអត្ថបទ«នាងបានប្រព្រឹត្តដោយឈ្លាសវៃ ដោយក្លាហាន និងដោយមិនគិតពីប្រយោជន៍ខ្លួន»ជាភាសាអង់គ្លេស។

អេវ៉ា

តើអេវ៉ាជាអ្នកណា? នាងជាស្ត្រីដំបូងបង្អស់ និងជាស្ត្រីទី១ដែលបានត្រូវរៀបរាប់ក្នុងគម្ពីរ។

តើនាងបានធ្វើអ្វីខ្លះ? អេវ៉ាមិនបានស្ដាប់បង្គាប់ដ៏ជាក់លាក់ដែលមកពីព្រះទេ។ ដូចប្ដីរបស់នាង អេវ៉ាបានត្រូវបង្កើតមកជាមនុស្សល្អឥតខ្ចោះនិងមានចិត្តសេរី ហើយមានសមត្ថភាពបណ្ដុះឲ្យមានគុណសម្បត្តិដែលព្រះពេញចិត្ត ដូចជាសេចក្ដីស្រឡាញ់និងប្រាជ្ញាជាដើម។ (លោកុប្បត្តិ ១:២៧) អេវ៉ាដឹងថាព្រះបានបង្គាប់អាដាមអំពីដើមឈើមួយ បើពួកគេបរិភោគផ្លែពីដើមនោះ ពួកគេនឹងស្លាប់ជាមិនខាន។ ប៉ុន្តែ សាថានបានបញ្ឆោតនាងឲ្យជឿថានាងនឹងមិនស្លាប់ទេ។ តាមពិត សាថានបានបញ្ឆោតនាងឲ្យជឿថា នាងនឹងមានជីវិតល្អប្រសើរជាង បើនាងមិនស្ដាប់បង្គាប់ព្រះ។ ដូច្នេះ នាងក៏បរិភោគផ្លែនោះ ហើយក្រោយមកនាងបានបញ្ចុះបញ្ចូលប្ដីឲ្យបរិភោគដែរ។—លោកុប្បត្តិ ៣:១-៦; ធីម៉ូថេទី១ ២:១៤

តើយើងអាចទាញមេរៀនអ្វីពីនាង? អេវ៉ាជាគំរូនៃការព្រមានសម្រាប់យើងស្ដីអំពីគ្រោះថ្នាក់ដែលមកពីការបន្តគិតអំពីសេចក្ដីប៉ងប្រាថ្នាមិនត្រឹមត្រូវ។ ដោយប្រឆាំងនឹងបង្គាប់ដ៏ជាក់លាក់របស់ព្រះ នាងបានបណ្ដុះឲ្យមានសេចក្ដីប៉ងប្រាថ្នាយ៉ាងខ្លាំង ក្នុងការចង់បានអ្វីដែលមិនមែនជារបស់នាង។—លោកុប្បត្តិ ៣:៦; យ៉ូហានទី១ ២:១៦

ហាណា

តើហាណាជាអ្នកណា? នាងជាប្រពន្ធរបស់អែលកាណា និងជាម្ដាយរបស់សាំយូអែលដែលជាអ្នកប្រកាសទំនាយដែលគេស្គាល់ទូទៅនៅក្នុងស្រុកអ៊ីស្រាអែលពីបុរាណ។—សាំយូអែលទី១ ១:១, ២, ៤-៧

តើនាងបានធ្វើអ្វីខ្លះ? នៅគ្រាដែលហាណាមិនមានកូន នាងបានសុំការសម្រាលទុក្ខពីព្រះ។ ប្ដីរបស់ហាណាមានប្រពន្ធពីរនាក់។ ប្រពន្ធមួយទៀតឈ្មោះពេនីណា ហើយនាងមានកូនជាច្រើន។ ចំណែកឯហាណាវិញ នាងគ្មានកូនទេទោះជារៀបការអស់រយៈពេលជាយូរក៏ដោយ។ ពេនីណាបាននិយាយតិះដៀលហាណាជាខ្លាំង តែហាណាបានអធិដ្ឋានសុំការសម្រាលទុក្ខពីព្រះ។ នាងបានស្បថនឹងព្រះថា បើលោកឲ្យនាងមានកូនប្រុសមួយ នាងនឹងប្រគល់កូននោះដល់លោក ដោយឲ្យកូនបម្រើនៅឯត្រសាលជំនុំ ដែលជនជាតិអ៊ីស្រាអែលធ្លាប់ប្រើសម្រាប់ការគោរពប្រណិប័តន៍។—សាំយូអែលទី១ ១:១១

ព្រះបានឆ្លើយតបនឹងសេចក្ដីអធិដ្ឋានរបស់ហាណា។ នាងក៏បង្កើតបានកូនប្រុសមួយ ហើយដាក់ឈ្មោះថាសាំយូអែល។ ហាណាបានគោរពពាក្យសន្យារបស់នាង ហើយបាននាំសាំយូអែលទៅបម្រើនៅឯត្រសាលជំនុំ កាលដែលគាត់នៅក្មេងតូចនៅឡើយ។ (សាំយូអែលទី១ ១:២៧, ២៨) ជារៀងរាល់ឆ្នាំ នាងបានដេរអាវអត់ដៃយកទៅឲ្យកូន។ ក្រោយមក ព្រះបានឲ្យពរហាណាមានកូនប្រាំនាក់ទៀត គឺកូនប្រុសបីនាក់និងកូនស្រីពីរនាក់។—សាំយូអែលទី១ ២:១៨-២១

តើយើងអាចទាញមេរៀនអ្វីពីនាង? សេចក្ដីអធិដ្ឋានអស់ពីចិត្តបានជួយហាណាឲ្យស៊ូទ្រាំនឹងការពិបាកផ្សេងៗ។ សេចក្ដីអធិដ្ឋានដោយចិត្តកតញ្ញូរបស់នាងដែលបានត្រូវកត់ទុកនៅសាំយូអែលទី១ ២:១-១០ ឆ្លុះបញ្ចាំងអំពីជំនឿដ៏រឹងមាំរបស់នាងចំពោះព្រះ។

▸ ដើម្បីដឹងព័ត៌មានថែមទៀតអំពីហាណា សូមមើលអត្ថបទ«នាងបានអធិដ្ឋានអស់ចិត្តទៅព្រះ»ជាភាសាអង់គ្លេស។
▸ ដើម្បីស្វែងយល់នូវមូលហេតុដែលព្រះអនុញ្ញាតឲ្យមានប្រពន្ធច្រើនក្នុងចំណោមរាស្ត្របុរាណ សូមមើលអត្ថបទ«តើព្រះពេញចិត្តនឹងការមានប្ដីឬប្រពន្ធច្រើនឬទេ?»ជាភាសាអង់គ្លេស។

យ៉ាអែល

តើយ៉ាអែលជាអ្នកណា? នាងជាប្រពន្ធរបស់ហេប៊ើរ នាងមិនមែនជាជនជាតិអ៊ីស្រាអែលទេ។ យ៉ាអែលបានជួយរាស្ត្ររបស់ព្រះដោយចិត្តក្លាហាន។

តើនាងបានធ្វើអ្វីខ្លះ? ពេលស៊ីសេរ៉ាជាមេទ័ពរបស់ជនជាតិកាណានមកជំរំរបស់យ៉ាអែល នាងបានចាត់វិធានការយ៉ាងក្លាហាន។ ស៊ីសេរ៉ាបានច្បាំងចាញ់ជនជាតិអ៊ីស្រាអែល ហើយគាត់កំពុងស្វែងរកកន្លែងលាក់ខ្លួននិងជ្រកកោន។ យ៉ាអែលបានអញ្ជើញគាត់ចូលក្នុងត្រសាលរបស់នាងដើម្បីលាក់ខ្លួននិងសម្រាក។ ពេលស៊ីសេរ៉ាកំពុងដេកលក់ នាងក៏សម្លាប់គាត់ទៅ។—ពួកចៅហ្វាយ ៤:១៧-២១

សកម្មភាពរបស់យ៉ាអែលបានកើតឡើងដូចទំនាយដែលដេបូរ៉ាបានប្រកាសទុកជាមុនមែន ដែលថា៖«ព្រះយេហូវ៉ាទ្រង់នឹងលក់ស៊ីសេរ៉ា ទៅក្នុងកណ្ដាប់ដៃរបស់ស្ត្រីវិញ»។ (ពួកចៅហ្វាយ ៤:៩) ដោយសារនាងបានធ្វើដូច្នោះ យ៉ាអែលបានទទួលការសរសើរជាអ្នក«មានពរលើសជាងអស់ទាំងស្ត្រី»។—ពួកចៅហ្វាយ ៥:២៤

តើយើងអាចទាញមេរៀនអ្វីពីនាង? យ៉ាអែលបានចាត់វិធានការជាមុន និងដោយចិត្តក្លាហាន។ បទពិសោធន៍របស់នាងបង្ហាញថាព្រះអាចបណ្ដាលឲ្យអ្វីកើតឡើងក៏បាន ដើម្បីឲ្យទំនាយបានក្លាយជាការពិត។

យេសេបិល

តើយេសេបិលជាអ្នកណា? នាងជាប្រពន្ធរបស់អ័ហាប់ជាស្ដេចជនជាតិអ៊ីស្រាអែល។ នាងមិនមែនជាជនជាតិអ៊ីស្រាអែលទេ ហើយក៏មិនគោរពប្រណិប័តន៍ព្រះយេហូវ៉ាដែរ។ ផ្ទុយទៅវិញ នាងគោរពប្រណិប័តន៍ព្រះបាលជាព្រះរបស់ជនជាតិកាណាន។

តើនាងបានធ្វើអ្វីខ្លះ? ម្ចាស់ក្សត្រិយ៍យេសេបិលជាមនុស្សមានអំណួត ព្រហើនឥតកោតក្រែង និងសាហាវឃោរឃៅ។ នាងបានលើកស្ទួយការគោរពបូជាព្រះបាល និងអំពើប្រាសចាកសីលធម៌ខាងផ្លូវភេទដែលទាក់ទងនឹងការគោរពបូជាព្រះនោះ។ នៅដំណាលគ្នាដែរ នាងបានព្យាយាមបំបាត់ចោលនូវការគោរពប្រណិប័តន៍ព្រះយេហូវ៉ាជាព្រះពិត។—ពង្សាវតារក្សត្រទី១ ១៨:៤, ១៣; ១៩:១-៣

យេសេបិលបានកុហក និងសម្លាប់មនុស្ស ដើម្បីបានអ្វីដែលខ្លួនចង់បាន។ (ពង្សាវតារក្សត្រទី១ ២១:៨-១៦) ដូចបានប្រកាសទុកជាមុន នាងបានស្លាប់យ៉ាងវេទនា ហើយសាកសពនាងមិនបានត្រូវបញ្ចុះទេ។—ពង្សាវតារក្សត្រទី១ ២១:២៣; ពង្សាវតារក្សត្រទី២ ៩:១០, ៣២-៣៧

តើយើងអាចទាញមេរៀនអ្វីពីនាង? គំរូរបស់យេសេបិល មិនគួរឲ្យយកតម្រាប់តាមទេ។ ដោយសារនាងជាស្ត្រីដែលមិនចេះខ្មាសប្រព្រឹត្តអំពើអាក្រក់ ប្រាសចាកសីលធម៌ និងគ្មានការគោរពចំពោះសិទ្ធិអំណាច ហើយមិនខ្វល់ថាអ្វីដែលខ្លួនធ្វើគឺខុសនោះទេ។

លេអា

តើលេអាជាអ្នកណា? នាងជាប្រពន្ធទី១របស់យ៉ាកុប។ នាងមានប្អូនស្រីឈ្មោះរ៉ាជែលដែលជាប្រពន្ធម្នាក់ទៀតរបស់យ៉ាកុប។—លោកុប្បត្តិ ២៩:២០-២៩

តើនាងបានធ្វើអ្វីខ្លះ? លេអាបានបង្កើតកូនប្រុស៦នាក់ឲ្យយ៉ាកុប។ (នាងរស់ ៤:១១) ដំបូង យ៉ាកុបមានបំណងរៀបការជាមួយរ៉ាជែលមិនមែនលេអាទេ។ ប៉ុន្តែ ឡាបាន់ជាឪពុកបានរៀបចំឲ្យលេអារៀបការជំនួសរ៉ាជែល។ ពេលយ៉ាកុបបានដឹងថាគាត់បានត្រូវបញ្ឆោតឲ្យរៀបការជាមួយលេអា គាត់បានតវ៉ានឹងឡាបាន់។ ឡាបាន់បានអះអាងថាតាមទំនៀមទម្លាប់ ប្អូនស្រីមិនត្រូវរៀបការមុនបងស្រីទេ។ មួយសប្ដាហ៍ក្រោយមក យ៉ាកុបបានរៀបការជាមួយរ៉ាជែល។—លោកុប្បត្តិ ២៩:២៦-២៨

យ៉ាកុបស្រឡាញ់រ៉ាជែលខ្លាំងជាងលេអា។ (លោកុប្បត្តិ ២៩:៣០) ជាលទ្ធផល លេអាមានចិត្តច្រណែននឹងប្អូនស្រីខ្លួន ហើយបានប្រជែងជាមួយនឹងនាង ដើម្បីទទួលបានសេចក្ដីស្រឡាញ់និងការយកចិត្តទុកដាក់ពីយ៉ាកុប។ ព្រះបានកត់សម្គាល់អារម្មណ៍របស់លេអា ហើយបានឲ្យពរនាងដោយឲ្យនាងមានកូន៧នាក់ គឺកូនប្រុស៦នាក់និងកូនស្រីម្នាក់។—លោកុប្បត្តិ ២៩:៣១

តើយើងអាចទាញមេរៀនអ្វីពីនាង? លេអាបានពឹងផ្អែកលើព្រះដោយអធិដ្ឋានទៅលោក ហើយទោះជានាងមានបញ្ហាក្នុងគ្រួសារក្ដី នាងនៅតែដឹងគុណព្រះជានិច្ច។ (លោកុប្បត្តិ ២៩:៣២-៣៥; ៣០:២០) កំណត់ហេតុអំពីជីវិតរបស់នាងបង្ហាញឲ្យឃើញយ៉ាងច្បាស់ថាការមានប្រពន្ធច្រើនមិននាំឲ្យមានសុភមង្គលនោះទេ។ ព្រះអនុញ្ញាតឲ្យមានការរៀបចំនោះតែមួយរយៈពេលប៉ុណ្ណោះ។ ខ្នាតតម្រារបស់ព្រះស្ដីអំពីអាពាហ៍ពិពាហ៍ គឺប្ដីមួយប្រពន្ធមួយប៉ុណ្ណោះ។—ម៉ាថាយ ១៩:៤-៦

▸ ដើម្បីដឹងព័ត៌មានថែមទៀតអំពីលេអា សូមមើលអត្ថបទ«បងប្អូនស្រីពីរនាក់ដែលមានទុក្ខព្រួយ‹បានបង្កើតពួកគ្រួអ៊ីស្រាអែលឡើង›»ជាភាសាអង់គ្លេស។
▸ ដើម្បីស្វែងយល់នូវមូលហេតុដែលព្រះអនុញ្ញាតឲ្យមានប្រពន្ធច្រើនក្នុងចំណោមរាស្ត្រលោកនាសម័យបុរាណ សូមមើលអត្ថបទ«តើព្រះពេញចិត្តនឹងការមានប្រពន្ធច្រើនឬទេ?»ជាភាសាអង់គ្លេស។

ម៉ាថា

តើម៉ាថាជាអ្នកណា? នាងជាបងស្រីរបស់ម៉ារៀនិងឡាសា ហើយពួកគាត់ទាំងបីនាក់រស់នៅភូមិបេថានីក្បែរក្រុងយេរូសាឡិម។

តើនាងបានធ្វើអ្វីខ្លះ? ម៉ាថាជាមិត្តជិតស្និទ្ធរបស់លោកយេស៊ូ។ លោក«ស្រឡាញ់ម៉ាថា ប្អូនរបស់នាង និងឡាសា»។ (យ៉ូហាន ១១:៥) ម៉ាថាជាស្ត្រីដែលរាក់ទាក់។ ពេលមួយ លោកយេស៊ូបានមកលេងពួកគេ។ អំឡុងពេលនោះ ម៉ារៀបានជ្រើសរើសស្ដាប់លោក កាលដែលម៉ាថាកំពុងរវល់ធ្វើកិច្ចការផ្ទះ។ ម៉ាថាបានត្អូញត្អែរប្រាប់លោកយេស៊ូថាម៉ារៀមិនបានជួយនាងទេ។ លោកយេស៊ូបានកែតម្រង់ម៉ាថាដោយស្លូតបូតឲ្យមានទស្សនៈត្រឹមត្រូវវិញ។—លូកា ១០:៣៨-៤២

ពេលឡាសាធ្លាក់ខ្លួនឈឺ ម៉ាថានិងប្អូនស្រីរបស់នាងបានសុំឲ្យលោកយេស៊ូមក។ នាងមានទំនុកចិត្តថាលោកអាចធ្វើឲ្យប្អូនប្រុសរបស់ពួកគេជាសះស្បើយ។ (យ៉ូហាន ១១:៣, ២១) ប៉ុន្តែ ឡាសាបានស្លាប់ហើយ។ ការសន្ទនារបស់ម៉ាថានិងលោកយេស៊ូ សឲ្យឃើញនូវទំនុកចិត្តរបស់នាងទៅលើសេចក្ដីសន្យាក្នុងគម្ពីរស្ដីអំពីការប្រោសឲ្យរស់ឡើងវិញ ហើយនាងមានទំនុកចិត្តទៅលើសមត្ថភាពរបស់លោកយេស៊ូក្នុងការប្រោសប្អូនប្រុសនាងឲ្យរស់ឡើងវិញ។—យ៉ូហាន ១១:២០-២៧

តើយើងអាចទាញមេរៀនអ្វីពីនាង? ម៉ាថាខំអស់ពីសមត្ថភាពដើម្បីបង្ហាញការរាក់ទាក់។ នាងសុខចិត្តទទួលយោបល់ ហើយនិយាយជាចំហអំពីអារម្មណ៍និងជំនឿរបស់នាង។

▸ ដើម្បីដឹងព័ត៌មានថែមទៀតអំពីម៉ាថា សូមមើលអត្ថបទ«ខ្ញុំបានជឿហើយ»ជាភាសាអង់គ្លេស។

ម៉ារៀ (ម្ដាយលោកយេស៊ូ)

តើម៉ារៀជាអ្នកណា? នាងជាស្ត្រីវ័យក្មេងជនជាតិយូដា និងជាស្រីក្រមុំបរិសុទ្ធ កាលដែលនាងពពោះលោកយេស៊ូជាបុត្ររបស់ព្រះដោយអព្ភូតហេតុ។

តើនាងបានធ្វើអ្វីខ្លះ? ម៉ារៀបានធ្វើតាមបំណងប្រាថ្នារបស់ព្រះដោយចិត្តរាបទាប។ ទេវតាមួយរូបបានលេចមកជួបនាង ហើយប្រកាសថានាងនឹងមានផ្ទៃពោះ រួចសម្រាលបានមេស្ស៊ីដែលបណ្ដាជនទន្ទឹងចាំជាយូរ នៅពេលនោះនាងបានភ្ជាប់ពាក្យជាមួយនឹងយ៉ូសែបរួចហើយ។ (លូកា ១:២៦-៣៣) នាងបានយល់ព្រមទទួលភារកិច្ចនោះដោយស្ម័គ្រពីចិត្ត។ ក្រោយលោកយេស៊ូបានកើតមក ម៉ារៀនិងយ៉ូសែបមានកូនប្រុសបួននាក់ទៀត ហើយតាមមើលទៅតិចបំផុតក៏មានកូនស្រីពីរនាក់ដែរ។ ដូច្នេះ ម៉ារៀមិនមែននៅក្រមុំបរិសុទ្ធរហូតឡើយ។ (ម៉ាថាយ ១៣:៥៥, ៥៦) ទោះជានាងមានឯកសិទ្ធិពិសេសក៏ដោយ នាងមិនដែលចង់ទទួលការសរសើរ និងចង់ឲ្យគេប្រព្រឹត្តមកលើនាងតាមរបៀបពិសេសទេ មិនថាក្នុងអំឡុងកិច្ចបម្រើលោកយេស៊ូ ឬជាសមាជិកនៃក្រុមជំនុំគ្រិស្តសាសនិកពីសម័យមុនក្ដី។

តើយើងអាចទាញមេរៀនអ្វីពីនាង? ម៉ារៀជាស្ត្រីដែលមានជំនឿរឹងមាំ នាងសុខចិត្តទទួលភារកិច្ចដ៏ធ្ងន់ធ្ងរ។ នាងស្គាល់បទគម្ពីរយ៉ាងច្បាស់។ តាមមើលទៅម៉ារៀបានដកស្រង់បទគម្ពីរប្រហែលជា២០ដង ពេលដែលនាងនិយាយនៅលូកា ១:៤៦-៥៥។

▸ ដើម្បីដឹងព័ត៌មានថែមទៀតអំពីម៉ារៀ សូមមើលអត្ថបទ«យើងអាចរៀនពីម្ដាយរបស់លោកយេស៊ូ»។

ម៉ារៀ (បងប្អូនរបស់ម៉ាថានិងឡាសា)

តើម៉ារៀជាអ្នកណា? នាងជាមិត្តជិតស្និទ្ធរបស់លោកយេស៊ូ ហើយម៉ាថាជាបងស្រី និងឡាសាក៏ជាមិត្តរបស់លោកដែរ។

តើនាងបានធ្វើអ្វីខ្លះ? ម៉ារៀបង្ហាញម្ដងហើយម្ដងទៀតថា នាងដឹងគុណលោកយេស៊ូដែលជាបុត្ររបស់ព្រះ។ នាងបង្ហាញជំនឿថា លោកយេស៊ូអាចរារាំងសេចក្ដីស្លាប់របស់ឡាសាជាប្អូនប្រុសរបស់នាង ហើយពេលលោកយេស៊ូប្រោសឡាសាឲ្យរស់ឡើងវិញនាងក៏នៅទីនោះដែរ។ ម៉ាថាជាបងស្រីនាងបានរិះគន់ម៉ារៀ ពេលដែលនាងជ្រើសរើសស្ដាប់លោកយេស៊ូជាជាងជួយធ្វើកិច្ចការផ្ទះ។ ប៉ុន្តែ លោកយេស៊ូបានសរសើរម៉ារៀ ដោយសារនាងចាត់ទុកសេចក្ដីពិតពីព្រះថាសំខាន់ជាងអ្វីទាំងអស់។—លូកា ១០:៣៨-៤២

ពេលមួយទៀត ម៉ារៀបានបង្ហាញចិត្តទូលាយយ៉ាងខ្លាំងចំពោះលោកយេស៊ូដោយចាក់«ប្រេងក្រអូបដ៏ថ្លៃ»ទៅលើក្បាលនិងជើងរបស់លោកយេស៊ូ។ (ម៉ាថាយ ២៦:៦, ៧) អ្នកឯទៀតដែលនៅទីនោះ បានចោទប្រកាន់ថានាងបង្ខាតប្រេងឥតប្រយោជន៍។ ប៉ុន្តែ លោកយេស៊ូនិយាយការពារនាងថា៖«នៅគ្រប់កន្លែងក្នុងពិភពលោក ដែលដំណឹងល្អនេះ[នៃរាជាណាចក្រព្រះ]ត្រូវផ្សព្វផ្សាយ អ្វីដែលស្ត្រីនេះបានធ្វើក៏នឹងត្រូវរៀបរាប់ដែរ ដើម្បីរំលឹកអំពីនាង»។—ម៉ាថាយ ២៤:១៤; ២៦:៨-១៣

តើយើងអាចទាញមេរៀនអ្វីពីនាង? ម៉ារៀបានបណ្ដុះឲ្យមានជំនឿរឹងមាំ។ នាងបានចាត់ទុកការគោរពប្រណិប័តន៍ព្រះថាសំខាន់ជាងរឿងផ្សេងៗក្នុងជីវិត។ នាងលើកកិត្តិយសលោកយេស៊ូ ដោយចិត្តរាបទាប ទោះជាត្រូវចំណាយប្រាក់ជាច្រើនក្ដី។

ម៉ារៀ ម៉ាក់ដាឡេន

តើម៉ារៀ ម៉ាក់ដាឡេនជាអ្នកណា? នាងជាអ្នកកាន់តាមដ៏ស្មោះត្រង់របស់លោកយេស៊ូ។

តើនាងបានធ្វើអ្វីខ្លះ? ម៉ារៀម៉ាក់ដាឡេនជាស្ត្រីម្នាក់ក្នុងចំណោមស្ត្រីមួយចំនួនដែលធ្វើដំណើរជាមួយលោកយេស៊ូ និងពួកអ្នកកាន់តាមលោក។ នាងប្រើធនធានរបស់ខ្លួនដោយចិត្តទូលាយដើម្បីជួយផ្គត់ផ្គង់សេចក្ដីត្រូវការរបស់ពួកគេ។ (លូកា ៨:១-៣) នាងបានទៅតាមលោកយេស៊ូរហូតដល់ទីបញ្ចប់នៃកិច្ចបម្រើរបស់លោក ហើយនាងបន្តនៅជាប់នឹងលោកយេស៊ូ ពេលលោកត្រូវគេសម្លាប់។ នាងមានឯកសិទ្ធិនៅក្នុងចំណោមស្ត្រីដែលបានឃើញលោកយេស៊ូមុនគេ បន្ទាប់ពីលោកបានត្រូវប្រោសឲ្យរស់ឡើងវិញ។—យ៉ូហាន ២០:១១-១៨

តើយើងអាចទាញមេរៀនអ្វីពីនាង? ម៉ារៀម៉ាក់ដាឡេនបានប្រើធនធានរបស់ខ្លួនដើម្បីគាំទ្រកិច្ចបម្រើរបស់លោកយេស៊ូ ហើយបានបន្តធ្វើជាអ្នកកាន់តាមលោកយ៉ាងស្មោះត្រង់។

ម៉ារាម

តើម៉ារាមជាអ្នកណា? នាងជាបងស្រីរបស់ម៉ូសេនិងអេរ៉ុន។ នាងជាស្ត្រីទី១ក្នុងគម្ពីរដែលបានត្រូវហៅថាអ្នកប្រកាសទំនាយ។

តើនាងបានធ្វើអ្វីខ្លះ? ជាអ្នកប្រកាសទំនាយ នាងមានតួនាទីប្រាប់អ្នកឯទៀតអំពីដំណឹងពីព្រះ។ នាងមានឋានៈសំខាន់នៅក្នុងស្រុកអ៊ីស្រាអែល ហើយក្រោយពីព្រះបំផ្លាញទ័ពអេស៊ីបក្នុងសមុទ្រក្រហម នាងបានច្រៀងចម្រៀងជ័យជម្នះជាមួយនឹងពួកប្រុសៗ។—និក្ខមនំ ១៥:១, ២០, ២១

មិនយូរក្រោយមក ម៉ារាមនិងអេរ៉ុនបាននិយាយរិះគន់ម៉ូសេ។ តាមមើលទៅ ពួកគេបាននិយាយដូច្នោះ ដោយសារពួកគេមានអំណួតនិងចិត្តច្រណែន។ ព្រះ«ឮពាក្យនោះ» ហើយលោកបានឲ្យដំបូន្មានយ៉ាងម៉ឺងម៉ាត់ដល់ម៉ារាមនិងអេរ៉ុន។ (ជនគណនា ១២:១-៩) បន្ទាប់មក ព្រះបានធ្វើឲ្យម៉ារាមកើតជំងឺឃ្លង់ តាមមើលទៅដោយសារនាងបាននិយាយរិះគន់។ ពេលម៉ូសេអង្វរសុំព្រះឲ្យនាង លោកក៏ធ្វើឲ្យនាងជាសះស្បើយ។ ក្រោយពីបានត្រូវបង្ខាំងទុកអស់រយៈពេល៧ថ្ងៃ នាងក៏បានត្រូវអនុញ្ញាតឲ្យចូលក្នុងជំរំអ៊ីស្រាអែលវិញ។—ជនគណនា ១២:១០-១៥

គម្ពីរបញ្ជាក់ថាម៉ារាមបានទទួលការកែតម្រង់។ ប៉ុន្មានសតវត្សរ៍ក្រោយមក ព្រះបានលើកឡើងអំពីឯកសិទ្ធិវិសេសរបស់នាង ពេលលោករំលឹកជនជាតិអ៊ីស្រាអែលថា៖«អញ . . . បានចាត់ម៉ូសេ អើរ៉ុន នឹងម៉ារាមឲ្យនាំមុខឯង»។—មីកា ៦:៤

តើយើងអាចទាញមេរៀនអ្វីពីនាង? កំណត់ហេតុអំពីម៉ារាមបញ្ជាក់ថា ព្រះយកចិត្តទុកដាក់ស្ដាប់ចំពោះអ្វីដែលអ្នកគោរពប្រណិប័តន៍លោកនិយាយទៅកាន់អ្នកណាម្នាក់ឬនិយាយអំពីអ្នកឯទៀត។ យើងក៏ដឹងថាដើម្បីឲ្យព្រះពេញចិត្ត យើងត្រូវជៀសវាងពីការមានអំណួតនិងចិត្តច្រណែន គឺជាគុណវិបត្ដិដែលនាំឲ្យយើងនិយាយអ្វីមួយដែលបង្ខូចកេរ្ដិ៍ឈ្មោះរបស់អ្នកឯទៀត។

រ៉ាជែល

តើរ៉ាជែលជាអ្នកណា? រ៉ាជែលជាកូនស្រីរបស់ឡាបាន់ និងជាប្រពន្ធដែលយ៉ាកុបស្រឡាញ់ពេញចិត្ត។

តើនាងបានធ្វើអ្វីខ្លះ? រ៉ាជែលបានរៀបការជាមួយនឹងយ៉ាកុប ហើយបានបង្កើតកូនប្រុសពីរនាក់ឲ្យគាត់។ កូនទាំងពីរបានទៅជាមេនៃកុលសម្ព័ន្ធទាំង១២នៃជនជាតិអ៊ីស្រាអែលពីបុរាណ។ រ៉ាជែលបានជួបអនាគតប្ដីរបស់នាង កាលដែលនាងកំពុងឃ្វាលហ្វូងចៀមរបស់ឪពុកនាង។ (លោកុប្បត្តិ ២៩:៩, ១០) នាងមាន«រូបឆោមលោមពណ៌ស្រស់បស់ល្អណាស់» បើប្រៀបនឹងលេអាជាបងស្រី។—លោកុប្បត្តិ ២៩:១៧

យ៉ាកុបលង់ស្រឡាញ់រ៉ាជែល រហូតដល់ព្រមធ្វើការអស់៧ឆ្នាំ ដើម្បីអាចរៀបការជាមួយនាង។ (លោកុប្បត្តិ ២៩:១៨) ប៉ុន្តែ ឡាបាន់បានបញ្ឆោតយ៉ាកុបឲ្យរៀបការជាមួយនឹងលេអាជាមុន ក្រោយមកទើបឡាបាន់អនុញ្ញាតឲ្យយ៉ាកុបរៀបការជាមួយរ៉ាជែល។—លោកុប្បត្តិ ២៩:២៥-២៧

យ៉ាកុបស្រឡាញ់រ៉ាជែលនិងកូនពីរនាក់របស់នាងច្រើនជាងស្រឡាញ់លេអានិងកូនៗរបស់នាង។ (លោកុប្បត្តិ ៣៧:៣; ៤៤:២០, ២៧-២៩) ជាលទ្ធផល ស្ត្រីទាំងពីរនាក់ចេះតែប្រកួតប្រជែងគ្នា។—លោកុប្បត្តិ ២៩:៣០; ៣០:១, ១៥

តើយើងអាចទាញមេរៀនអ្វីពីនាង? រ៉ាជែលបានស៊ូទ្រាំនឹងស្ថានភាពពិបាកក្នុងគ្រួសារ ដោយនៅតែមានសង្ឃឹមថាព្រះនឹងស្ដាប់សេចក្ដីអធិដ្ឋានរបស់នាងមិនខាន។ (លោកុប្បត្តិ ៣០:២២-២៤) កំណត់ហេតុអំពីជីវិតរបស់នាង បង្ហាញឲ្យឃើញថាការមានប្រពន្ធច្រើនក្នុងក្រុមគ្រួសារមួយ គឺនាំឲ្យមានការពិបាកខ្លាំងណាស់។ បទពិសោធន៍របស់រ៉ាជែលបង្ហាញនូវប្រាជ្ញារបស់ព្រះដែលជាអ្នកបង្កើតឲ្យមានខ្នាតតម្រាអាពាហ៍ពិពាហ៍ គឺប្ដីមួយមានប្រពន្ធតែមួយប៉ុណ្ណោះ។—ម៉ាថាយ ១៩:៤-៦

▸ ដើម្បីដឹងព័ត៌មានថែមទៀតអំពីរ៉ាជែល សូមមើលអត្ថបទជា«បងប្អូនស្រីពីរនាក់ដែលមានទុក្ខព្រួយ‹បានបង្កើតពួកគ្រួអ៊ីស្រាអែលឡើង›»ភាសាអង់គ្លេស។
▸ ដើម្បីស្វែងយល់នូវមូលហេតុដែលព្រះអនុញ្ញាតឲ្យមានប្រពន្ធច្រើនក្នុងចំណោមរាស្ត្រលោកនាសម័យបុរាណ សូមមើលអត្ថបទ«តើព្រះពេញចិត្តនឹងការមានប្រពន្ធច្រើនឬទេ?»ជាភាសាអង់គ្លេស។

រ៉ាហាប

តើរ៉ាហាបជាអ្នកណា? នាងជាស្ត្រីពេស្យារស់នៅក្រុងយេរីខូក្នុងស្រុកកាណាន ហើយនាងបានក្លាយទៅជាអ្នកគោរពប្រណិប័តន៍ព្រះយេហូវ៉ា។

តើនាងបានធ្វើអ្វីខ្លះ? រ៉ាហាបបានលាក់ជនជាតិអ៊ីស្រាអែលពីរនាក់ដែលមកស៊ើបការណ៍ក្នុងស្រុកកាណាន។ នាងបានធ្វើដូច្នេះ ដោយសារនាងបានឮអំពីរបៀបដែលព្រះយេហូវ៉ាជាព្រះនៃជនជាតិអ៊ីស្រាអែល បានសង្គ្រោះរាស្ត្ររបស់លោកចេញពីស្រុកអេស៊ីប និងក្រោយមកបានវាយប្រហារកុលសម្ព័ន្ធមួយដែលហៅថាអាម៉ូរី។

រ៉ាហាបបានជួយពួកអ្នកស៊ើបការណ៍នោះ ហើយអង្វរពួកគេឲ្យទុកជីវិតនាងនិងក្រុមគ្រួសារនាង ពេលដែលជនជាតិអ៊ីស្រាអែលមកបំផ្លាញក្រុងយេរីខូ។ ពួកគេបានយល់ព្រម តែមានល័ក្ខខ័ណ្ឌខ្លះ គឺនាងមិនត្រូវប្រាប់អ្នកឯទៀតអំពីការមកស៊ើបការណ៍របស់ពួកគេទេ ហើយពេលដែលជនជាតិអ៊ីស្រាអែលចូលមកវាយប្រហារក្រុងនេះ នាងនិងក្រុមគ្រួសារត្រូវនៅខាងក្នុងផ្ទះ បន្ថែមទៀតនាងត្រូវចងខ្សែក្រហមនៅបង្អួចដើម្បីសម្គាល់ថាជាផ្ទះរបស់នាង។ រ៉ាហាបបានស្ដាប់តាមការណែនាំទាំងអស់ ហើយនាងនិងក្រុមគ្រួសារបានរួចជីវិត ពេលដែលជនជាតិអ៊ីស្រាអែលដណ្ដើមបានក្រុងយេរីខូ។

ក្រោយមក រ៉ាហាបបានរៀបការជាមួយនឹងជនជាតិអ៊ីស្រាអែល ហើយបានក្លាយជាបុព្វបុរសរបស់ស្ដេចដាវីឌ និងលោកយេស៊ូគ្រិស្ត។—យ៉ូស្វេ ២:១-២៤; ៦:២៥; ម៉ាថាយ ១:៥, ៦, ១៦

តើយើងអាចទាញមេរៀនអ្វីពីនាង? គម្ពីរបញ្ជាក់ថារ៉ាហាបជាគំរូដ៏អស្ចារ្យស្ដីអំពីជំនឿ។ (ហេប្រឺ ១១:៣០, ៣១; យ៉ាកុប ២:២៥) កំណត់ហេតុអំពីនាង បង្ហាញថាព្រះយេហូវ៉ាតែងតែអភ័យទោស និងមិនរើសមុខឡើយ។ លោកឲ្យពរដល់អស់អ្នកដែលទុកចិត្តលោក ទោះជាពួកគេមកពីមជ្ឈដ្ឋានណាក៏ដោយ។

▸ ដើម្បីដឹងព័ត៌មានថែមទៀតអំពីរ៉ាហាប សូមមើលអត្ថបទ«នាង‹បានត្រូវប្រកាសថាជាមនុស្សសុចរិតដោយសារការប្រព្រឹត្ត›»ជាភាសាអង់គ្លេស។

រេបិកា

តើរេបិកាជាអ្នកណា? នាងជាប្រពន្ធរបស់អ៊ីសាក និងជាម្ដាយរបស់យ៉ាកុបនិងអេសាវដែលជាកូនភ្លោះ។

តើនាងបានធ្វើអ្វីខ្លះ? រេបិកាធ្វើតាមបំណងប្រាថ្នារបស់ព្រះ ទោះជាការធ្វើដូច្នោះពិបាកក្ដី។ ពេលដែលនាងកំពុងដងទឹកពីអណ្ដូង បុរសម្នាក់បានសុំទឹកនាងពិសា។ ភ្លាមនោះ រេបិកាបានឲ្យទឹកគាត់ពិសា ហើយនាងក៏បានសុំដងទឹកឲ្យសត្វអូដ្ឋរបស់បុរសនោះផឹកដែរ។ (លោកុប្បត្តិ ២៤:១៥-២០) បុរសនោះជាអ្នកបម្រើរបស់អាប្រាហាំ។ គាត់បានធ្វើដំណើរយ៉ាងឆ្ងាយដើម្បីស្វែងរកប្រពន្ធឲ្យអ៊ីសាកជាកូនរបស់អាប្រាហាំ។ (លោកុប្បត្តិ ២៤:២-៤) គាត់ក៏បានអធិដ្ឋានសុំពរពីព្រះដែរ។ ពេលគាត់ឃើញការឧស្សាហ៍ខ្នះខ្នែងនិងការរាក់ទាក់របស់រេបិកា គាត់បានយល់ថាព្រះបានតបឆ្លើយនឹងសេចក្ដីអធិដ្ឋានរបស់គាត់ ដោយបង្ហាញថានាងជាស្ត្រីដែលលោកបានជ្រើសរើសឲ្យអ៊ីសាកមែន។—លោកុប្បត្តិ ២៤:១០-១៤, ២១, ២៧

ពេលរេបិកាបានដឹងមូលហេតុដែលអ្នកបម្រើនោះបានមក នាងក៏យល់ព្រមធ្វើដំណើរទៅជាមួយនឹងគាត់ ហើយបានក្លាយទៅជាប្រពន្ធរបស់អ៊ីសាក។ (លោកុប្បត្តិ ២៤:៥៧-៥៩) ក្រោយមក រេបិកាសម្រាលបានកូនប្រុសភ្លោះពីរនាក់។ ព្រះបានបង្ហាញឲ្យនាងដឹងថា អេសាវជាកូនបងនឹងបម្រើយ៉ាកុបជាកូនប្អូន។ (លោកុប្បត្តិ ២៥:២៣) ពេលអ៊ីសាករៀបចំឲ្យពរដល់អេសាវជាកូនច្បង រេបិកាបានធ្វើអ្វីផ្សេងៗ ដើម្បីឲ្យប្រាកដថាយ៉ាកុបជាអ្នកទទួលពរនោះវិញ ព្រោះនោះស្របតាមអ្វីដែលនាងបានដឹងថាជាបំណងប្រាថ្នារបស់ព្រះ។—លោកុប្បត្តិ ២៧:១-១៧

តើយើងអាចទាញមេរៀនអ្វីពីនាង? រេបិកាមានចិត្តសុភាពរាបទាប ឧស្សាហ៍ព្យាយាម និងមានចិត្តរាក់ទាក់។ គុណសម្បត្តិទាំងនេះជួយឲ្យនាងធ្វើជាប្រពន្ធល្អ ម្ដាយល្អ និងជាអ្នកគោរពប្រណិប័តន៍ដ៏ស្មោះត្រង់ចំពោះព្រះពិត។

▸ ដើម្បីដឹងព័ត៌មានថែមទៀតអំពីរេបិកា សូមមើលអត្ថបទ«ខ្ញុំព្រមទៅ»។

រូថ

តើរូថជាអ្នកណា? នាងជាជនជាតិម៉ូអាប់។ នាងបានឈប់គោរពបូជាព្រះរបស់ខ្លួន និងចាកចេញពីស្រុកកំណើត ដើម្បីក្លាយជាអ្នកគោរពប្រណិប័តន៍ព្រះយេហូវ៉ានៅស្រុកអ៊ីស្រាអែល។

តើនាងបានធ្វើអ្វីខ្លះ? រូថបានបង្ហាញសេចក្ដីស្រឡាញ់យ៉ាងធំធេងចំពោះន៉ាអូមីដែលជាម្ដាយក្មេក។ នៅគ្រាដែលមានការអត់ឃ្លាននៅស្រុកអ៊ីស្រាអែល ន៉ាអូមីនិងប្ដីរបស់នាង ព្រមទាំងកូនប្រុសពីរនាក់ បានទៅរស់នៅស្រុកម៉ូអាប់ដើម្បីរួចផុតពីការអត់ឃ្លាន។ ក្រោយមក កូនប្រុសពីរនាក់របស់នាងបានរៀបការជាមួយនឹងស្ត្រីជនជាតិម៉ូអាប់ គឺរូថនិងអ័រប៉ា។ ប៉ុន្តែ មិនយូរក្រោយមកប្ដីរបស់ន៉ាអូមី និងកូនប្រុសពីរនាក់របស់នាងបានស្លាប់ ទុកឲ្យស្ត្រីទាំងបីនាក់នៅមេម៉ាយ។

ន៉ាអូមីបានសម្រេចចិត្តត្រឡប់ទៅស្រុកអ៊ីស្រាអែលវិញ ព្រោះនៅទីនោះលែងមានភាពរាំងស្ងួតទៀតហើយ។ រូថនិងអ័រប៉ាបានសម្រេចចិត្តទៅជាមួយនឹងន៉ាអូមីដែរ។ ប៉ុន្តែ ន៉ាអូមីសុំឲ្យពួកគេត្រឡប់ទៅឯសាច់ញាតិរបស់ពួកគេវិញ។ អ័រប៉ាបានត្រឡប់ទៅវិញ។ (នាងរស់ ១:១-៦, ១៥) ប៉ុន្តែ រូថបានបន្តនៅជាប់ជាមួយនឹងម្ដាយក្មេកដោយស្មោះភក្ដី។ នាងស្រឡាញ់ន៉ាអូមី និងចង់គោរពប្រណិប័តន៍ព្រះយេហូវ៉ាជាព្រះរបស់ន៉ាអូមីដែរ។—នាងរស់ ១:១៦, ១៧; ២:១១

ដោយសាររូថជាកូនប្រសាដែលស្មោះភក្ដី និងខំធ្វើកិច្ចការយ៉ាងនឿយហត់ នោះនាងក៏មានកេរ្ដិ៍ឈ្មោះល្អនៅក្នុងក្រុងបេថ្លេហិមជាស្រុកកំណើតរបស់ន៉ាអូមី។ នៅគ្រានោះ មានម្ចាស់ដីម្នាក់ជាអ្នកមានស្ដុកស្តម្ភ គាត់ឈ្មោះបូអូស។ គាត់បាននឹកសរសើររូថជាខ្លាំង ហើយគាត់បានផ្ដល់អាហារដល់នាងនិងន៉ាអូមីដោយចិត្តទូលាយ។ (នាងរស់ ២:៥-៧, ២០) ក្រោយមក រូថបានរៀបការជាមួយនឹងបូអូស ហើយក្លាយទៅជាបុព្វបុរសរបស់ស្ដេចដាវីឌ និងលោកយេស៊ូគ្រិស្ត។—ម៉ាថាយ ១:៥, ៦, ១៦

តើយើងអាចទាញមេរៀនអ្វីពីនាង? ដោយសារសេចក្ដីស្រឡាញ់ចំពោះន៉ាអូមីនិងព្រះយេហូវ៉ា រូថសុខចិត្តចាកចេញពីផ្ទះនិងក្រុមគ្រួសាររបស់នាង។ នាងខំធ្វើការយ៉ាងនឿយហត់ មានភក្ដីភាព និងស្មោះត្រង់ ទោះជានាងមានការពិបាកជាច្រើនក៏ដោយ។

▸ ដើម្បីដឹងព័ត៌មានថែមទៀតអំពីរូថ សូមមើលអត្ថបទ«កន្លែងណាដែលអ្នកម្ដាយអញ្ជើញទៅ នោះខ្ញុំនឹងទៅតាម»និងអត្ថបទ«នាងជាស្ត្រីល្អត្រឹមត្រូវណាស់»ជាភាសាអង់គ្លេស។

សារ៉ា

តើសារ៉ាជាអ្នកណា? នាងជាប្រពន្ធរបស់អាប្រាហាំ និងជាម្ដាយរបស់អ៊ីសាក។

តើនាងបានធ្វើអ្វីខ្លះ? សារ៉ាបានលះបង់ជីវិតស្រណុកសុខស្រួលនៅក្រុងអ៊ើរជាក្រុងដ៏សម្បូរសប្បាយ ដោយសារនាងមានជំនឿលើសេចក្ដីសន្យាដែលព្រះបានសន្យាជាមួយនឹងអាប្រាហាំប្ដីរបស់នាង។ ព្រះបានប្រាប់អាប្រាហាំឲ្យចាកចេញពីក្រុងអ៊ើរ ហើយធ្វើដំណើរទៅស្រុកកាណាន។ ព្រះបានសន្យាថានឹងឲ្យពរគាត់ និងធ្វើឲ្យគាត់ក្លាយទៅជាប្រជាជាតិដ៏ធំមួយ។ (លោកុប្បត្តិ ១២:១-៥) ពេលនោះសារ៉ាមានអាយុប្រហែល៦០ឆ្នាំ។ តាំងពីពេលនោះមក សារ៉ានិងប្ដីរបស់នាងបានរស់នៅក្នុងត្រសាល ហើយរើពីកន្លែងមួយទៅកន្លែងមួយ។

ទោះជាជីវិតផ្លាស់លំនៅច្រើនដងជារបៀបរស់នៅដែលមានគ្រោះថ្នាក់ក៏ដោយ នាងបានគាំទ្រអាប្រាហាំ ពេលដែលគាត់ធ្វើតាមការណែនាំពីព្រះ។ (លោកុប្បត្តិ ១២:១០, ១៥) អស់ជាច្រើនឆ្នាំ សារ៉ាមិនមានកូនទេ នេះបានធ្វើឲ្យនាងមានទុក្ខព្រួយជាខ្លាំង។ ប៉ុន្តែ ព្រះបានសន្យាថាឲ្យពរដល់កូនចៅរបស់អាប្រាហាំ។ (លោកុប្បត្តិ ១២:៧; ១៣:១៥; ១៥:១៨; ១៦:១, ២, ១៥) ក្រោយមក ព្រះបានសន្យាថាសារ៉ានឹងបង្កើតកូនឲ្យអាប្រាហាំ។ នាងបានសម្រាលកូន ពេលដែលនាងហួសអាយុនឹងមានកូន។ ពេលនោះ នាងមានអាយុ៩០ឆ្នាំ ហើយប្ដីរបស់នាងមានអាយុ១០០ឆ្នាំ។ (លោកុប្បត្តិ ១៧:១៧; ២១:២-៥) ពួកគាត់បានដាក់ឈ្មោះកូននោះថាអ៊ីសាក។

តើយើងអាចទាញមេរៀនអ្វីពីនាង? គំរូរបស់សារ៉ាបង្រៀនយើងថា យើងអាចទុកចិត្តព្រះថាលោកតែងតែសម្រេចសេចក្ដីសន្យារបស់លោក ទោះជាមើលទៅមិនអាចទៅរួចក៏ដោយ! (ហេប្រឺ ១១:១១) បន្ថែមទៅទៀត គំរូរបស់នាងជាប្រពន្ធលើកបញ្ជាក់អំពីសារៈសំខាន់នៃការចុះចូលគោរពក្នុងចំណងអាពាហ៍ពិពាហ៍។—ពេត្រុសទី១ ៣:៥, ៦

▸ ដើម្បីដឹងព័ត៌មានថែមទៀតអំពីសារ៉ា សូមមើលអត្ថបទ«នាងជាស្ត្រីស្រស់ស្អាតណាស់»ជាភាសាអង់គ្លេស និងអត្ថបទជាភាសាខ្មែរ«ព្រះបានហៅនាងថា‹ម្ចាស់ក្សត្រី›»។

ស្ត្រីក្រមុំពីភូមិស៊ូឡាម

តើស្ត្រីក្រមុំពីភូមិស៊ូឡាមជាអ្នកណា? នាងជាស្ត្រីជនបទ និងជាតួអង្គសំខាន់ក្នុងសៀវភៅគម្ពីរដែលហៅថាបទចម្រៀងសាឡូម៉ូន។ គម្ពីរមិនបានប្រាប់អំពីឈ្មោះរបស់នាងទេ។

តើនាងបានធ្វើអ្វីខ្លះ? ស្ត្រីក្រមុំពីភូមិស៊ូឡាមបានរក្សាភក្ដីភាពចំពោះយុវជនគង្វាលដែលនាងស្រឡាញ់។ (បទចម្រៀងសាឡូម៉ូន ២:១៦) នាងមានរូបសម្រស់ស្រស់ស្អាតណាស់ ហេតុនេះហើយបានជាស្ដេចសាឡូម៉ូនដែលជាអ្នកមានស្ដុកស្តម្ភ ចាប់ចិត្តស្រឡាញ់នាង ហើយគាត់ខំព្យាយាមធ្វើឲ្យនាងស្រឡាញ់គាត់វិញ។ (បទចម្រៀងសាឡូម៉ូន ៧:៦) ទោះជាអ្នកឯទៀតបានជំរុញចិត្តនាងឲ្យជ្រើសរើសសាឡូម៉ូនក៏ដោយ តែនាងមិនព្រមធ្វើតាមពួកគេទេ។ នាងស្រឡាញ់យុវជនគង្វាលក្រីក្រ ហើយស្មោះស្ម័គ្រនឹងគាត់ជានិច្ច។—បទចម្រៀងសាឡូម៉ូន ៣:៥; ៧:១០; ៨:៦

តើយើងអាចទាញមេរៀនអ្វីពីនាង? នាងមានចិត្តសុភាពរាបទាប ទោះជានាងមានរូបសម្រស់ស្រស់ស្អាត និងមានគេស្រឡាញ់ច្រើនក៏ដោយ។ នាងមិនអនុញ្ញាតឲ្យទ្រព្យសម្បត្តិ ការល្បីល្បាញ និងការបង្ខិតបង្ខំពីមនុស្សដែលមានអាយុស្រករគ្នា ធ្វើឲ្យនាងឈប់ស្រឡាញ់យុវជនគង្វាលឡើយ។ នាងចេះគ្រប់គ្រងអារម្មណ៍របស់ខ្លួន ហើយរក្សាភាពបរិសុទ្ធខាងសីលធម៌។

ប្រពន្ធរបស់ឡុត

តើប្រពន្ធរបស់ឡុតជាអ្នកណា? គម្ពីរមិនបានរៀបរាប់អំពីឈ្មោះនាងទេ។ ប៉ុន្តែ គម្ពីរប្រាប់យើងថានាងមានកូនស្រីពីរនាក់ ហើយប្រាប់ថានាងនិងគ្រួសារនាងរស់នៅក្រុងសូដុម។—លោកុប្បត្តិ ១៩:១, ១៥

តើនាងបានធ្វើអ្វីខ្លះ? នាងមិនបានស្ដាប់បង្គាប់ព្រះទេ។ ព្រះបានសម្រេចចិត្តបំផ្លាញក្រុងសូដុមនិងក្រុងទាំងប៉ុន្មានដែលនៅជុំវិញ ព្រោះតែអំពើប្រាសចាកសីលធម៌ខាងផ្លូវភេទដ៏ស្មោកគ្រោករបស់អ្នកក្រុងនោះ។ ដោយសារព្រះស្រឡាញ់ឡុតជាមនុស្សសុចរិតនិងក្រុមគ្រួសាររបស់គាត់ នោះលោកបានចាត់ទេវតាពីររូបឲ្យទៅនាំពួកគេចេញពីក្រុងសូដុមដោយសុវត្ថិភាព។—លោកុប្បត្តិ ១៨:២០; ១៩:១, ១២, ១៣

ទេវតាបានប្រាប់ក្រុមគ្រួសារឡុតឲ្យរត់ចេញពីតំបន់នោះ ហើយមិនត្រូវមើលក្រោយឡើយ។ បើពុំនោះទេ ពួកគេនឹងស្លាប់មិនខាន។ (លោកុប្បត្តិ ១៩:១៧) ឯប្រពន្ធរបស់ឡុត គាត់ក៏‹ងាកបែរមើលទៅក្រោយ នោះស្រាប់តែទៅជាបង្គោលអំបិលទៅ›។—លោកុប្បត្តិ ១៩:២៦

តើយើងអាចទាញមេរៀនអ្វីពីនាង? កំណត់ហេតុអំពីប្រពន្ធរបស់ឡុតបានបញ្ជាក់នូវគ្រោះថ្នាក់ ដែលមកពីការស្រឡាញ់វត្ថុទ្រព្យជាខ្លាំង រហូតដល់លែងស្ដាប់បង្គាប់ព្រះ។ លោកយេស៊ូបានលើកបញ្ជាក់គំរូរបស់នាងទុកជាការព្រមាន។ លោកមានប្រសាសន៍ថា៖«ចូរអ្នករាល់គ្នានឹកចាំពីប្រពន្ធរបស់ឡុត»។—លូកា ១៧:៣២