-
«នៅកន្លែងណាដែលទឹកនេះហូរកាត់ នឹងមានជីវិតនៅកន្លែងនោះ»ការគោរពប្រណិប័តន៍ពិតដល់ព្រះយេហូវ៉ាបានត្រូវរៀបចំឡើងវិញហើយ!
-
-
ជំពូកទី១៩
«នៅកន្លែងណាដែលទឹកនេះហូរកាត់ នឹងមានជីវិតនៅកន្លែងនោះ»
គោលចំណុច: របៀបដែលការបើកបង្ហាញអំពីទន្លេដែលហូរចេញពីវិហារ កើតឡើងនៅសម័យបុរាណ នៅសម័យយើង និងនៅថ្ងៃអនាគត
១, ២. យោងទៅតាមអេសេគាល ៤៧:១-១២ តើអេសេគាលបានឃើញនិងរៀនអំពីអ្វី? (សូមមើលរូបភាពនៅដើមអត្ថបទ)
ក្នុងការបើកបង្ហាញអំពីវិហារ អេសេគាលបានឃើញអ្វីមួយទៀតដ៏អស្ចារ្យ គឺមានអូរមួយហូរចេញពីសំណង់ដ៏ពិសិដ្ឋនេះតែម្ដង! សូមស្រមៃគិតថាគាត់កំពុងមើលខ្សែទឹកដ៏ថ្លាឆ្វង់នោះ។ (សូមអាន អេសេគាល ៤៧:១-១២) ដំបូង ទឹកនោះហូររិញៗចេញពីកំណល់ទ្វារនៃទីបរិសុទ្ធ ហើយហូរចេញពីសំណង់វិហារក្បែរខ្លោងទ្វារខាងកើត។ បន្ទាប់មក ទេវតានាំអេសេគាលដើរចេញពីវិហារ ទាំងដើរបណ្ដើរវាស់ចម្ងាយបណ្ដើរ។ ម្ដងហើយម្ដងទៀត ទេវតានោះឲ្យអេសេគាលដើរឆ្លងកាត់ទឹក ហើយរាល់លើកអេសេគាលឃើញថាទឹកនោះកាន់តែជ្រៅទៅៗ។ ទឹកនោះក្លាយទៅជាទន្លេ ហើយហូរខ្លាំងឡើងៗ រហូតដល់គាត់ត្រូវហែលឆ្លងកាត់ ព្រោះមិនអាចដើរលុយបានទេ។
២ អេសេគាលឃើញថាទឹកទន្លេនោះហូរចូលក្នុងសមុទ្រស្លាប់ ហើយធ្វើឲ្យទឹកសមុទ្រនោះទៅជាទឹកសាបវិញ ទីណាដែលទឹកនោះហូរទៅដល់ ទីនោះមានត្រីច្រើនឥតគណនា។ នៅតាមដងទន្លេ គាត់ឃើញដើមឈើគ្រប់ប្រភេទដុះឡើង។ ជារៀងរាល់ខែ ដើមឈើទាំងនោះបង្កើតផលផ្លែដែលមានជីវជាតិ ហើយមានស្លឹកដែលធ្វើឲ្យជាសះស្បើយ។ ពេលអេសេគាលឃើញអ្វីទាំងនេះ គាត់ច្បាស់ជាមានសេចក្ដីសង្ឃឹមនិងសេចក្ដីសុខសាន្តក្នុងចិត្ត។ ស្ដីអំពីផ្នែកដ៏អស្ចារ្យនេះនៃការបើកបង្ហាញអំពីវិហារ តើមានន័យយ៉ាងណាចំពោះគាត់និងជននិរទេសឯទៀត? ហើយតើមានន័យយ៉ាងណាចំពោះយើងសព្វថ្ងៃ?
តើការបើកបង្ហាញអំពីទន្លេមានន័យយ៉ាងណាចំពោះជននិរទេស?
៣. ហេតុអ្វីពួកយូដានៅសម័យបុរាណមិនយល់ថាទន្លេដែលអេសេគាលបានឃើញក្នុងគំនិតជាទន្លេមែនទែន?
៣ ជនជាតិយូដាសម័យបុរាណ ច្បាស់ជាមិនយល់ថាទន្លេដែលអេសេគាលឃើញក្នុងគំនិត គឺជាទន្លេមែនទែនទេ។ ផ្ទុយទៅវិញ កំណត់ហេតុនេះទំនងជារំលឹកពួកគេអំពីទំនាយមួយទៀតអំពីការរៀបចំឡើងវិញ ដែលបានត្រូវកត់ទុកដោយយ៉ូអែលជាអ្នកប្រកាសទំនាយប្រហែលជាងពីរសតវត្សរ៍មុន។ (សូមអាន យ៉ូអែល ៣:១៨) ពេលជននិរទេសទាំងនោះអានទំនាយដែលព្រះបានដឹកនាំឲ្យយ៉ូអែលកត់ទុក ពួកគេមិនរំពឹងថានឹងមាន‹ស្រាផ្អែមស្រក់ចេញ›ពីតំបន់ភ្នំ ឬ‹ទឹកដោះហូរចេញ›ពីទីទួលទេ ហើយក៏មិនរំពឹងថានឹងមានប្រភពទឹក«ផុសចេញពីវិហាររបស់ព្រះយេហូវ៉ា»ដែរ។ ស្រដៀងគ្នាដែរ ជនជាតិយូដាដែលជាជននិរទេសប្រហែលជាមិនយល់ថាព័ត៌មានក្នុងការបើកបង្ហាញដែលអេសេគាលបានឃើញទាក់ទងនឹងទន្លេមែនទែនឡើយ។a ដូច្នេះ តើព្រះយេហូវ៉ាចង់ប្រាប់ព័ត៌មានអ្វី? គម្ពីរជួយយើងឲ្យយល់អត្ថន័យនៃផ្នែកខ្លះក្នុងការបើកបង្ហាញដែលអេសេគាលបានឃើញ។ ប៉ុន្តែ ជាទូទៅយើងនឹងពិចារណាការធានាដ៏កក់ក្ដៅបីយ៉ាងដែលយើងអាចរៀនពីកំណត់ហេតុនេះ។
៤. (ក) តើទន្លេដែលអេសេគាលបានឃើញក្នុងគំនិត នាំឲ្យពួកយូដារំពឹងថាពួកគេនឹងទទួលបានពរអ្វីខ្លះពីព្រះយេហូវ៉ា? (ខ) តើតាមរបៀបណាពាក្យ«ទន្លេ»និង«ទឹក»ពង្រឹងទំនុកចិត្តយើងថាព្រះយេហូវ៉ានឹងផ្ដល់ពរដល់រាស្ត្រលោក? (សូមមើលប្រអប់«ទន្លេដែលផ្ដល់ពរពីព្រះយេហូវ៉ា»)
៤ ទន្លេដែលផ្ដល់ពរជាច្រើន។ ជាញឹកញយក្នុងគម្ពីរ ពាក្យទន្លេនិងទឹកគឺប្រើសម្រាប់រៀបរាប់អំពីពរដ៏ហូរហៀរពីព្រះយេហូវ៉ា។ អេសេគាលបានឃើញទន្លេដូចនោះហូរចេញពីវិហារព្រះ។ ដូច្នេះ នេះច្បាស់ជានាំឲ្យរាស្ត្ររបស់ព្រះយេហូវ៉ារំពឹងថាពួកគេនឹងទទួលពរពីលោកយ៉ាងហូរហៀរ បើពួកគេកាន់តាមការគោរពប្រណិប័តន៍ពិត។ តើមានពរអ្វីខ្លះ? ពួកគេនឹងទទួលការណែនាំម្ដងទៀតពីព្រះតាមរយៈពួកសង្ឃ។ ដោយសារមានការជូនគ្រឿងបូជាឡើងវិញនៅឯវិហារ ពួកគេអាចមានទំនុកចិត្តថាពួកគេនឹងទទួលការជម្រះភាពខុសឆ្គង។ (អេគ. ៤៤:១៥, ២៣; ៤៥:១៧) ហេតុនេះ ពួកគេនឹងស្អាតបរិសុទ្ធម្ដងទៀត ប្រៀបដូចជាបានត្រូវលាងសម្អាតដោយទឹកបរិសុទ្ធដែលហូរចេញពីវិហារ។
៥. តើតាមរបៀបណាទន្លេដែលអេសេគាលបានឃើញ ជួយរាស្ត្រព្រះឲ្យមានទំនុកចិត្តថានឹងមានពរគ្រប់គ្រាន់សម្រាប់ពួកគេទាំងអស់គ្នា?
៥ តើនឹងមានពរគ្រប់គ្រាន់សម្រាប់មនុស្សទាំងអស់ឬ? ពិតជាមានមែន។ ការបើកបង្ហាញដែលអេសេគាលបានឃើញអំពីអូរច្បាស់ជាជួយពួកយូដាឲ្យមានទំនុកចិត្តថានឹងមានពរជាបរិបូរសម្រាប់គ្រប់គ្នា! ព្រោះអូរនោះបានរីកធំអស្ចារ្យទៅជាទន្លេដ៏ធំក្នុងចម្ងាយប្រមាណពីរគីឡូម៉ែត្រប៉ុណ្ណោះ។ (អេគ. ៤៧:៣-៥) ចំនួនជនជាតិយូដាដែលបានត្រឡប់មកស្រុកកំណើតរបស់ខ្លួនវិញ ប្រហែលជាកើនឡើង តែព្រះយេហូវ៉ានឹងផ្ដល់ពរដល់ពួកគេគ្រប់គ្នាដើម្បីបំពេញសេចក្ដីត្រូវការរបស់ពួកគេ។ ហេតុនេះ ទន្លេបញ្ជាក់អំពីភាពសម្បូរហូរហៀរ!
៦. (ក) ស្ដីអំពីទឹកទន្លេដែលអេសេគាលបានឃើញក្នុងគំនិត តើមានសេចក្ដីសន្យាអ្វីដែលពង្រឹងកម្លាំងចិត្ត? (ខ) ប៉ុន្តែ តើការបើកបង្ហាញនេះមានការព្រមានអ្វី? (សូមមើលកំណត់សម្គាល់)
៦ ទឹកដែលផ្ដល់ជីវិត។ នៅក្នុងការបើកបង្ហាញដែលអេសេគាលបានឃើញ ទន្លេនោះហូរចូលទៅក្នុងសមុទ្រស្លាប់ នាំឲ្យអ្វីៗនៅក្នុងនោះមានជីវិត។ សូមកត់សម្គាល់ថាទឹកទន្លេនោះធ្វើឲ្យមានត្រីគ្រប់ប្រភេទ ដូចត្រីដែលមាននៅក្នុងសមុទ្រធំឬសមុទ្រមេឌីទែរ៉ានេ។ បន្ថែមទៅទៀត មានការនេសាទជាច្រើននៅតាមឆ្នេរសមុទ្រស្លាប់ ដែលនៅរវាងក្រុងពីរដែលតាមមើលទៅនៅដាច់ឆ្ងាយពីគ្នា។ ទេវតានិយាយថា៖ «នៅកន្លែងណាដែលទឹកនេះហូរកាត់ នឹងមានជីវិតនៅកន្លែងនោះ»។ តើនេះមានន័យថាទឹកដែលហូរចេញពីវិហាររបស់ព្រះយេហូវ៉ាបានទៅដល់គ្រប់ផ្នែកនៃសមុទ្រស្លាប់ឬ? មិនមែនទេ។ ទេវតានោះពន្យល់ថាទឹកដែលផ្ដល់ជីវិតនោះ មិនបានហូរចូលត្រពាំងបឹងបួខ្លះដែលនៅក្បែរសមុទ្រស្លាប់នោះទេ។ នៅកន្លែងទាំងនោះ«នៅពេញដោយជាតិអំបិលដដែល»។b (អេគ. ៤៧:៨-១១) ដូច្នេះ ការបើកបង្ហាញដែលអេសេគាលឃើញក្នុងគំនិតមានសេចក្ដីសន្យាដ៏គួរឲ្យលើកទឹកចិត្ត ដែលថាការគោរពប្រណិប័តន៍ពិតនឹងធ្វើឲ្យមនុស្សមានជីវិតឡើងវិញ ហើយមានសេចក្ដីចម្រើនកើនឡើង។ ប៉ុន្តែ មានការព្រមានមួយ គឺមិនមែនមនុស្សទាំងអស់នឹងទទួលពរពីព្រះយេហូវ៉ា ឬនឹងត្រូវធ្វើឲ្យជាសះស្បើយឡើយ។
៧. តើដើមឈើនៅតាមដងទន្លេដែលអេសេគាលបានឃើញក្នុងគំនិត ផ្ដល់សេចក្ដីសង្ឃឹមអ្វីដល់ជនជាតិយូដាដែលជាជននិរទេស?
៧ ដើមឈើសម្រាប់ជាអាហារនិងធ្វើឲ្យជាសះស្បើយ។ ចុះយ៉ាងណាដើមឈើដែលដុះនៅតាមដងទន្លេ? ដើមឈើទាំងនោះធ្វើឲ្យមានទិដ្ឋភាពស្រស់បំព្រង ហើយក៏ជួយបញ្ជាក់អត្ថន័យនៃការបើកបង្ហាញដែលអេសេគាលបានឃើញដែរ។ អេសេគាលនិងជនរួមជាតិគាត់ច្បាស់ជាសប្បាយចិត្តគិតអំពីផលផ្លែឆ្ងាញ់ៗដែលដើមឈើទាំងនោះផ្ដល់ឲ្យជារៀងរាល់ខែ! ទិដ្ឋភាពដែលទាក់ទាញចិត្តនោះច្បាស់ជាផ្ដល់សេចក្ដីសង្ឃឹមថែមទៀតដល់ពួកគេ ដែលថាព្រះយេហូវ៉ានឹងផ្ដល់ការណែនាំដែលជួយពួកគេឲ្យមានចំណងមិត្តភាពជិតស្និទ្ធជាមួយនឹងលោក។ តើមានអ្វីទៀត? សូមកត់សម្គាល់ថាស្លឹកពីដើមឈើទាំងនោះ«សម្រាប់ធ្វើឲ្យជាសះស្បើយ»។ (អេគ. ៤៧:១២) សំខាន់ជាងគេបំផុត ព្រះយេហូវ៉ាបានដឹងថាជននិរទេសដែលត្រឡប់មកស្រុកកំណើតរបស់ខ្លួនវិញ ត្រូវការការធ្វើឲ្យជាសះស្បើយក្នុងន័យធៀប ហើយលោកបានសន្យាថាលោកនឹងធ្វើឲ្យពួកគេជាសះស្បើយមែន។ យើងបានរៀនអំពីរបៀបដែលលោកធ្វើដូច្នោះក្នុងទំនាយអំពីការរៀបចំឡើងវិញក្នុងជំពូកទី៩នៃសៀវភៅនេះ។
៨. តើអ្វីបង្ហាញថាការបើកបង្ហាញដែលអេសេគាលបានឃើញមានការកើតឡើងក្នុងកម្រិតធំជាង?
៨ ដូចយើងបានពិចារណាក្នុងជំពូកទី៩ ជននិរទេសដែលត្រឡប់មកវិញឃើញទំនាយដូចនោះកើតឡើងក្នុងមួយកម្រិតប៉ុណ្ណោះ តែគឺបណ្ដាជនទាំងនោះហើយ ដែលបានធ្វើឲ្យទំនាយនោះកើតឡើងតែមួយកម្រិត។ តើឲ្យព្រះយេហូវ៉ាផ្ដល់ពរយ៉ាងពេញលេញដល់ពួកគេម្ដេចនឹងបាន បើពួកគេក្បត់សេចក្ដីសន្យារបស់ខ្លួន មិនស្ដាប់បង្គាប់លោក ហើយមិនអើពើនឹងការគោរពប្រណិប័តន៍ពិតម្ដងហើយម្ដងទៀតដូច្នេះ? ជនជាតិយូដាដ៏ស្មោះត្រង់បានខកចិត្តនិងឈឺចិត្តជាខ្លាំង ដោយសារការប្រព្រឹត្តរបស់ជនរួមជាតិខ្លួន។ ប៉ុន្តែ អ្នកដែលគោរពប្រណិប័តន៍ដ៏ស្មោះភក្ដីរបស់ព្រះយេហូវ៉ាដឹងថាសេចក្ដីសន្យារបស់លោកនឹងសម្រេច គឺតែងតែក្លាយជាការពិត។ (សូមអាន យ៉ូស្វេ ២៣:១៤) ដូច្នេះ នៅថ្ងៃណាមួយការបើកបង្ហាញដែលអេសេគាលបានឃើញក្នុងគំនិត នឹងកើតឡើងក្នុងកម្រិតធំជាងជាមិនខាន។ ប៉ុន្តែ តើនៅពេលណា?
ទន្លេហូរនៅសព្វថ្ងៃ!
៩. តើពេលណាការបើកបង្ហាញដែលអេសេគាលបានឃើញអំពីវិហារមានការកើតឡើងក្នុងកម្រិតធំជាង?
៩ ដូចយើងបានរៀនហើយនៅជំពូកទី១៤នៃសៀវភៅនេះ ការបើកបង្ហាញអំពីវិហារដែលអេសេគាលបានឃើញក្នុងគំនិត កើតឡើងក្នុងកម្រិតធំជាងក្នុងអំឡុង«គ្រាចុងក្រោយបង្អស់» ជាគ្រាដែលការគោរពប្រណិប័តន៍ពិតត្រូវលើកតម្កើងខ្ពង់ខ្ពស់បំផុត។ នេះជាអ្វីដែលមិនធ្លាប់មានពីមុនមកទេ។ (អេ. ២:២) ផ្នែកនេះនៃការបើកបង្ហាញដែលអេសេគាលបានឃើញ កំពុងកើតឡើងនៅសព្វថ្ងៃ។ តើក្នុងន័យអ្វី?
១០, ១១. (ក) នៅសព្វថ្ងៃ តើយើងទទួលពរជាច្រើនអ្វីខ្លះដូចជាទឹកទន្លេ? (ខ) តើតាមរបៀបណាព្រះយេហូវ៉ាផ្ដល់ពរកាន់តែច្រើនដើម្បីបំពេញសេចក្ដីត្រូវការរបស់រាស្ត្រលោកក្នុងគ្រាចុងក្រោយបង្អស់នេះ?
១០ ទន្លេដែលផ្ដល់ពរជាច្រើន។ តើទឹកដែលហូរចេញពីវិហាររបស់ព្រះយេហូវ៉ារំលឹកយើងអំពីពរអ្វីខ្លះនៅសព្វថ្ងៃ? យើងបានត្រូវរំលឹកអំពីអ្វីៗជាច្រើនដែលព្រះយេហូវ៉ាផ្ដល់ឲ្យដើម្បីជាប្រយោជន៍ដល់យើង។ សំខាន់បំផុតគឺគ្រឿងបូជាលោះរបស់គ្រិស្តដែលលាងជម្រះភាពខុសឆ្គងរបស់យើង ហើយនាំឲ្យយើងទទួលការអភ័យទោសពីព្រះយេហូវ៉ា។ បន្ថែមទៅទៀត សេចក្ដីពិតដ៏បរិសុទ្ធពីបណ្ដាំរបស់ព្រះ គឺប្រៀបដូចជាទឹកដែលផ្ដល់ជីវិត ហើយនឹងធ្វើឲ្យយើងមានភាពស្អាតស្អំខាងការគោរពប្រណិប័តន៍ព្រះនិងខាងសីលធម៌។ (អេភ. ៥:២៥-២៧) តើតាមរបៀបណាពរទាំងនោះមានហូរហៀរនៅសម័យយើង?
១១ នៅឆ្នាំ១៩១៩ មានអ្នកបម្រើព្រះយេហូវ៉ាតែប៉ុន្មានពាន់នាក់ប៉ុណ្ណោះ ហើយពួកគេរំភើបចិត្តទទួលអ្វីដែលពួកគេពិតជាត្រូវការ គឺសេចក្ដីបង្រៀនពីព្រះដែលប្រៀបដូចជាអាហារ។ ប៉ុន្មានទសវត្សរ៍ក្រោយមក ពួកគេមានចំនួនកាន់តែច្រើនឡើង។ នៅសព្វថ្ងៃនេះ រាស្ត្ររបស់ព្រះមានចំនួនជាង៨លាននាក់។ តើទឹកដ៏បរិសុទ្ធនៃសេចក្ដីពិតបានហូរទាន់ដើម្បីបំពេញសេចក្ដីត្រូវការរបស់ពួកគេឬទេ? ពិតជាហូរទាន់មែន! យើងមានសេចក្ដីពិតពីព្រះច្រើនហូរហៀរ។ ក្នុង១០០ឆ្នាំកន្លងមក រាស្ត្ររបស់ព្រះទទួលបានគម្ពីរ សៀវភៅ ទស្សនាវដ្ដីរាប់ពាន់លានក្បាល និងខិត្តប័ណ្ណរាប់ពាន់លានច្បាប់។ ដូចទន្លេដែលអេសេគាលបានឃើញក្នុងគំនិត ក្នុងន័យធៀបសេចក្ដីពិតដ៏បរិសុទ្ធបានរីកធំឡើងនិងហូរយ៉ាងលឿន ដើម្បីបំពេញសេចក្ដីត្រូវការរបស់មនុស្សនៅទូទាំងផែនដីដែលស្រេកឃ្លានការណែនាំពីព្រះ។ តាំងពីយូរមកហើយ យើងមានសៀវភៅផ្សេងៗដែលមានមូលដ្ឋានលើគម្ពីរជាឯកសារបោះពុម្ព ហើយឥឡូវតាមរយៈគេហទំព័រjw.org យើងមានសៀវភៅផ្សេងៗជាឯកសារអេឡិចត្រូនិកជាង៩០០ភាសា។ តើតាមរបៀបណាទឹកនៃសេចក្ដីពិតទាំងនេះមានឥទ្ធិពលទៅលើមនុស្សដែលមានចិត្តគំនិតត្រឹមត្រូវ?
១២. (ក) តើតាមរបៀបណាដំណឹងនៃសេចក្ដីពិតបានជួយមនុស្សឲ្យមានជំនឿលើព្រះយេហូវ៉ា? (ខ) តើការបើកបង្ហាញដែលអេសេគាលបានឃើញ ផ្ដល់ការព្រមានអ្វីដែលចំពេលដល់យើងនៅសព្វថ្ងៃ? (សូមមើលកំណត់សម្គាល់)
១២ ទឹកដែលផ្ដល់ជីវិត។ អេសេគាលបានត្រូវប្រាប់ថា៖ «នៅកន្លែងណាដែលទឹកនេះហូរកាត់ នឹងមានជីវិតនៅកន្លែងនោះ»។ សូមគិតអំពីរបៀបដែលដំណឹងនៃសេចក្ដីពិតបានហូរទៅដល់អស់អ្នកដែលចូលស្រុកក្នុងន័យធៀបដែលបានត្រូវរៀបចំឡើងវិញ។ សេចក្ដីពិតពីគម្ពីរមានឥទ្ធិពលទៅលើចិត្តរបស់មនុស្សរាប់លាននាក់ ហើយជួយពួកគេឲ្យមានជំនឿទៅលើព្រះយេហូវ៉ា។ ប៉ុន្តែ ការបើកបង្ហាញនោះក៏ផ្ដល់ការព្រមានចំពេលដែរ គឺមិនមែនមនុស្សទាំងអស់នឹងបន្តកាន់ខ្ជាប់តាមសេចក្ដីពិតទេ។ ដូចត្រពាំងបឹងបួដែលនៅក្បែរសមុទ្រស្លាប់ក្នុងការបើកបង្ហាញដែលអេសេគាលបានឃើញ មានមនុស្សដែលមានចិត្តរឹងមិនព្រមទទួលសេចក្ដីពិត ហើយមិនអនុវត្តសេចក្ដីពិតនោះទេ។c សូមកុំឲ្យយើងធ្វើដូចនោះឡើយ!—សូមអាន ការបំភ្លឺច្បាប់ ១០:១៦-១៨
១៣. តើយើងអាចទាញមេរៀនអ្វីខ្លះពីដើមឈើដែលអេសេគាលបានឃើញក្នុងគំនិត?
១៣ ដើមឈើសម្រាប់ជាអាហារនិងធ្វើឲ្យជាសះស្បើយ។ តើដើមឈើនៅតាមដងទន្លេដែលអេសេគាលបានឃើញក្នុងគំនិត ផ្ដល់មេរៀនដែលលើកទឹកចិត្តយើងនៅសព្វថ្ងៃនេះទេ? ពិតជាផ្ដល់មែន! សូមចាំថាដើមឈើទាំងនោះបង្កើតផលផ្លែដ៏ឈ្ងុយឆ្ងាញ់ជារៀងរាល់ខែ ហើយស្លឹកពីដើមទាំងនោះធ្វើឲ្យជាសះស្បើយឡើងវិញ។ (អេគ. ៤៧:១២) ហេតុនេះ ដើមឈើទាំងនោះរំលឹកយើងថាយើងបម្រើព្រះដែលផ្គត់ផ្គង់យើងដោយចិត្តទូលាយ ហើយសំខាន់បំផុតធ្វើឲ្យយើងជាសះស្បើយ ពោលគឺមានចំណងមិត្តភាពជាមួយលោក។ សព្វថ្ងៃនេះ មនុស្សទូទៅមិនយល់សេចក្ដីពិតក្នុងគម្ពីរទេ។ ផ្ទុយទៅវិញ សូមគិតអំពីអ្វីដែលព្រះយេហូវ៉ាផ្ដល់ឲ្យរាស្ត្រលោក។ ក្រោយពីអានអត្ថបទណាមួយ ច្រៀងចម្រៀងបញ្ចប់នៅឯសន្និបាតឬមហាសន្និបាត ឬក្រោយពីមើលវីដេអូណាមួយ ឬមើលកម្មវិធីjwទូរទស្សន៍ អ្នកច្បាស់ជាមានអំណរគុណដែលបានទទួលសេចក្ដីបង្រៀនពីព្រះជាបរិបូរ មែនទេ? យើងពិតជាទទួលបានការបំពាក់បំប៉នយ៉ាងល្អណាស់។ (អេ. ៦៥:១៣, ១៤) តើសេចក្ដីបង្រៀនពីព្រះនឹងជួយយើងឲ្យមានរបៀបរស់នៅដ៏មានន័យខ្លឹមសារ ហើយទទួលការពេញចិត្តពីព្រះឬទេ? ឱវាទល្អៗដែលយើងទទួលមានមូលដ្ឋានពីបណ្ដាំរបស់ព្រះ។ ឱវាទទាំងនោះជួយយើងឲ្យជៀសវាងពីអំពើខុសឆ្គងដូចជា អំពើប្រាសចាកសីលធម៌ខាងផ្លូវភេទ ការមានចិត្តលោភលន់ និងការខ្វះជំនឿ។ បន្ថែមទៅទៀត ព្រះយេហូវ៉ាបានផ្ដល់ការរៀបចំដើម្បីជួយគ្រិស្តសាសនិកដែលបានធ្វើខុសធ្ងន់ធ្ងរឲ្យជាសះស្បើយឡើងវិញ។ (សូមអាន យ៉ាកុប ៥:១៤) យើងពិតជាបានទទួលពរជាច្រើនដូចដែលបានពណ៌នាអំពីដើមឈើដែលអេសេគាលបានឃើញក្នុងគំនិត។
១៤, ១៥. (ក) ក្នុងការបើកបង្ហាញដែលអេសេគាលបានឃើញអំពីត្រពាំងបឹងបួដែលមិនបានប្រែទៅជាទឹកសាប តើយើងបានទាញមេរៀនអ្វី? (ខ) តើទន្លេដែលអេសេគាលបានឃើញ ផ្ដល់ប្រយោជន៍ដល់យើងនៅសព្វថ្ងៃយ៉ាងដូចម្ដេច?
១៤ នៅដំណាលគ្នានោះ យើងអាចទាញមេរៀនពីត្រពាំងបឹងបួដែលមិនបានប្រែជាទឹកសាប។ យើងច្បាស់ជាមិនចង់រារាំងពរពីព្រះយេហូវ៉ាដែលហូរចូលក្នុងជីវិតយើងឡើយ។ បើយើងនៅតែមិនទាន់ជាសះស្បើយខាងជំនឿដូចមនុស្សជាច្រើនក្នុងពិភពលោកដែលឃ្លាតឆ្ងាយពីព្រះ គឺគួរឲ្យសោកស្ដាយណាស់។ (ម៉ាថ. ១៣:១៥) ផ្ទុយទៅវិញ យើងរីករាយទទួលប្រយោជន៍ពីទន្លេដែលផ្ដល់ពរជាច្រើន។ ពេលយើងផឹកទឹកដ៏បរិសុទ្ធនៃសេចក្ដីពិតពីបណ្ដាំរបស់ព្រះ និងពេលយើងចែករំលែកសេចក្ដីពិតដល់អ្នកឯទៀតតាមរយៈកិច្ចការផ្សព្វផ្សាយ យើងប្រហែលជាគិតដល់ទន្លេដែលអេសេគាលបានឃើញក្នុងគំនិត។ ពេលយើងទទួលដំបូន្មាន ការសម្រាលទុក្ខ និងជំនួយដែលប្រកបដោយសេចក្ដីស្រឡាញ់ពីពួកអ្នកចាស់ទុំដែលបានត្រូវបង្ហាត់បង្រៀនដោយខ្ញុំបម្រើស្មោះត្រង់ នោះយើងក៏ប្រហែលជាគិតដល់ទន្លេដែលអេសេគាលបានឃើញក្នុងគំនិតដែរ។ ទីណាដែលទន្លេនោះហូរកាត់ ទីនោះនឹងមានជីវិតនិងការជាសះស្បើយ!
១៥ ទំនាយអំពីទន្លេដែលអេសេគាលបានឃើញក្នុងគំនិត ក៏នឹងកើតឡើងនៅថ្ងៃអនាគតដែរ។ យើងនឹងឃើញថាទន្លេនោះនឹងហូរខ្លាំងបំផុតនៅក្នុងសួនឧទ្យាននៅថ្ងៃខាងមុខ។
ការបើកបង្ហាញដែលអេសេគាលបានឃើញនឹងកើតឡើងក្នុងសួនឧទ្យាន
១៦, ១៧. (ក) តើតាមរបៀបណាទឹកដែលផ្ដល់ជីវិតនឹងមានកាន់តែច្រើនក្នុងសួនឧទ្យាន? (ខ) តើតាមរបៀបណាយើងនឹងទទួលប្រយោជន៍ពីទន្លេដែលផ្ដល់ពរក្នុងសួនឧទ្យាន?
១៦ តើអ្នកអាចស្រមៃឃើញខ្លួនអ្នកនៅក្នុងសួនឧទ្យាន កំពុងអរសប្បាយនឹងជីវិតយ៉ាងពេញលេញជាមួយនឹងមិត្តភក្តិនិងក្រុមគ្រួសារឬទេ? ការរៀនអំពីទន្លេដែលអេសេគាលបានឃើញក្នុងគំនិត អាចជួយអ្នកឲ្យកាន់តែឃើញទិដ្ឋភាពនោះយ៉ាងរស់រវើក។ តើតាមរបៀបណា? សូមពិចារណាម្ដងទៀតនូវចំណុចបីយ៉ាងដែលច្បាស់និងប្រកបដោយសេចក្ដីស្រឡាញ់ក្នុងការបើកបង្ហាញនោះ។
១៧ ទន្លេដែលផ្ដល់ពរ។ ក្នុងន័យម្យ៉ាង ទន្លេនោះនឹងហូរខ្លាំងជាងនៅក្នុងសួនឧទ្យាន ព្រោះវាមិនគ្រាន់តែផ្ដល់ប្រយោជន៍ខាងជំនឿទេ តែក៏ផ្ដល់ប្រយោជន៍ខាងរូបកាយដែរ។ ក្នុងអំឡុងគ្រាគ្រប់គ្រង១.០០០ឆ្នាំរបស់លោកយេស៊ូ រាជាណាចក្រព្រះនឹងជួយមនុស្សស្មោះត្រង់ឲ្យទទួលប្រយោជន៍យ៉ាងពេញលេញពីថ្លៃលោះរបស់លោកយេស៊ូ។ បន្តិចម្ដងៗ ពួកគេនឹងទៅជាមនុស្សល្អឥតខ្ចោះ! នៅពេលនោះ នឹងលែងមានជំងឺ គ្រូពេទ្យ គិលានុបដ្ឋាក មន្ទីរពេទ្យ និងប័ណ្ណធានារ៉ាប់រងទៀតហើយ។ ទឹកដែលផ្ដល់ជីវិតនោះនឹងហូរទៅដល់មនុស្សរាប់លាននាក់ ដែលបានរួចរស់ជីវិតពីសង្គ្រាមអាម៉ាគេដូន គឺជា«មនុស្សមួយក្រុមធំ»ដែលចេញផុតពី«គ្រាទុក្ខវេទនាជាខ្លាំង»។ (បប. ៧:៩, ១៤) ប៉ុន្តែ ទោះជានៅដើមដំបូងទន្លេដែលផ្ដល់ពរហូរយ៉ាងអស្ចារ្យក៏ដោយ តែនោះគ្រាន់តែជាការហូររិញៗប៉ុណ្ណោះ បើប្រៀបធៀបនឹងអ្វីដែលនឹងកើតឡើងក្រោយមក។ ដូចបានបញ្ជាក់ក្នុងការបើកបង្ហាញដែលអេសេគាលបានឃើញក្នុងគំនិត ទន្លេនោះនឹងរីកកាន់តែធំ ហើយហូរកាន់តែលឿនដើម្បីបំពេញសេចក្ដីត្រូវការរបស់មនុស្សជាច្រើន។
ក្នុងសួនឧទ្យាន ទន្លេដែលផ្ដល់ពរ នឹងធ្វើឲ្យមនុស្សទាំងអស់ទៅជាក្មេងវិញ ហើយមានសុខភាពល្អឥតខ្ចោះ (សូមមើលវគ្គ១៧)
១៨. តើទន្លេដែលមាន«ទឹកដែលផ្ដល់ជីវិត»នឹងក្លាយទៅជាទន្លេដ៏ធំនៅគ្រា១.០០០ឆ្នាំក្នុងន័យអ្វី?
១៨ ទឹកដែលផ្ដល់ជីវិត។ ក្នុងអំឡុងគ្រា១.០០០ឆ្នាំ «ទន្លេដែលមានទឹកដែលផ្ដល់ជីវិត» នឹងក្លាយទៅជាទន្លេដ៏ធំ។ (បប. ២២:១) មនុស្សរាប់ពាន់លាននាក់នឹងត្រូវប្រោសឲ្យរស់ឡើងវិញ ហើយទទួលឱកាសរស់ជារៀងរហូតក្នុងសួនឧទ្យាន។ ហេតុនេះ ពរពីព្រះយេហូវ៉ាតាមរយៈរាជាណាចក្ររបស់លោក នឹងរួមបញ្ចូលការធ្វើឲ្យមនុស្សច្រើនរាប់មិនអស់ដែលបានស្លាប់ជាយូរមកហើយ មានជីវិតឡើងវិញ។ (អេ. ២៦:១៩) ប៉ុន្តែ តើអស់អ្នកដែលបានត្រូវប្រោសឲ្យរស់ឡើងវិញនឹងរស់ជារៀងរហូតឬ?
១៩. (ក) តើអ្វីបញ្ជាក់ថានឹងមានទឹកថ្មីនៃសេចក្ដីពិតក្នុងសួនឧទ្យាន? (ខ) នៅថ្ងៃអនាគត តើអ្នកខ្លះនឹង«ពេញដោយជាតិអំបិល»ក្នុងន័យអ្វី?
១៩ បុគ្គលម្នាក់ៗត្រូវធ្វើការសម្រេចចិត្ត។ នៅគ្រានោះ រមូរថ្មីនឹងត្រូវបើកឡើង។ ដូច្នេះ ទឹកដែលផ្ដល់កម្លាំងចិត្តពីព្រះយេហូវ៉ានឹងរួមបញ្ចូលសេចក្ដីពិតថ្មី គឺការណែនាំថ្មីពីលោក។ ពេលគិតអំពីនោះគឺពិតជាគួរឲ្យរំភើបចិត្តណាស់ មែនទេ? ទោះជាយ៉ាងណាក្ដី មនុស្សខ្លះនឹងមិនព្រមទទួលពរនោះទេ ហើយសម្រេចចិត្តមិនស្ដាប់បង្គាប់ព្រះយេហូវ៉ា។ ក្នុងអំឡុងគ្រា១.០០០ឆ្នាំ បុគ្គលខ្លះប្រហែលជាបះបោរប្រឆាំង។ ប៉ុន្តែ ពួកគេនឹងមិនត្រូវអនុញ្ញាតឲ្យបង្ខូចបរិយាកាសនៅក្នុងសួនឧទ្យានទេ។ (អេ. ៦៥:២០) យើងប្រហែលជានឹកគិតអំពីការបើកបង្ហាញដែលអេសេគាលបានឃើញ ហើយគិតអំពីត្រពាំងបឹងបួដែល«នៅពេញទៅដោយអំបិលដដែល»។ អស់អ្នកដែលមានចិត្តរឹងចចេស ហើយមិនព្រមផឹកទឹកដែលផ្ដល់ជីវិត គឺពិតជាល្ងីល្ងើណាស់! ក្រោយគ្រា១.០០០ឆ្នាំ ក្រុមមនុស្សបះបោរនឹងចូលខាងសាថាន។ អស់អ្នកដែលមិនព្រមចុះចូលក្រោមការគ្រប់គ្រងដ៏សុចរិតរបស់ព្រះយេហូវ៉ា នឹងទទួលលទ្ធផលដូចសាថានដែរ គឺសេចក្ដីស្លាប់ជារៀងរហូត។—បប. ២០:៧-១២
២០. ក្នុងអំឡុងគ្រា១.០០០ឆ្នាំ តើនឹងមានការរៀបចំអ្វីសម្រាប់ជាប្រយោជន៍ដល់យើងដែលរំលឹកយើងអំពីដើមឈើដែលអេសេគាលបានឃើញ?
២០ ដើមឈើសម្រាប់ជាអាហារនិងធ្វើឲ្យជាសះស្បើយ។ ព្រះយេហូវ៉ាមិនចង់ឲ្យយើងណាម្នាក់បាត់បង់ឱកាសរស់ជារៀងរហូតឡើយ។ ដើម្បីជួយយើងឲ្យចាប់យ៉ាងជាប់នូវឱកាសដ៏អស្ចារ្យនោះ ព្រះនឹងធ្វើឲ្យប្រាកដថាមានការរៀបចំមួយដូចអ្វីដែលអេសេគាលបានឃើញអំពីដើមឈើ។ ប៉ុន្តែក្នុងសួនឧទ្យាន ប្រយោជន៍ដែលយើងទទួលបានពីព្រះយេហូវ៉ាមិនគ្រាន់តែខាងរូបកាយប៉ុណ្ណោះទេ តែក៏ខាងចំណងមិត្តភាពជាមួយនឹងលោកដែរ។ នៅស្ថានសួគ៌ លោកយេស៊ូគ្រិស្តនិងពួក១៤៤.០០០នាក់ នឹងគ្រប់គ្រងជាមួយលោកជាស្ដេចអស់រយៈពេល១.០០០ឆ្នាំ។ ក្នុងនាមជាសង្ឃ ពួក១៤៤.០០០នាក់នឹងជួយមនុស្សស្មោះត្រង់ឲ្យទទួលប្រយោជន៍ពីគ្រឿងបូជាលោះរបស់គ្រិស្ត ព្រមទាំងជួយពួកគេឲ្យទៅជាល្អឥតខ្ចោះ។ (បប. ២០:៦) ការរៀបចំដែលផ្ដល់ប្រយោជន៍ខាងរូបកាយនិងខាងចំណងមិត្តភាពជាមួយព្រះ រំលឹកយើងអំពីដើមឈើតាមដងទន្លេដែលអេសេគាលបានឃើញ។ ដើមឈើទាំងនោះមានផ្លែដែលមានជីវជាតិ និងមានស្លឹកដែលធ្វើឲ្យជាសះស្បើយ។ ការបើកបង្ហាញដែលអេសេគាលបានឃើញក្នុងគំនិតស្រដៀងនឹងការបើកបង្ហាញដែលសាវ័កយ៉ូហានបានឃើញនិងកត់ទុកដែរ។ (សូមអាន ការបើកបង្ហាញ ២២:១, ២) ស្លឹកពីដើមឈើដែលយ៉ូហានបានឃើញ គឺ«សម្រាប់ធ្វើឲ្យប្រជាជាតិនានាជាសះស្បើយ»។ ហេតុនេះ មនុស្សស្មោះត្រង់ច្រើនឥតគណនានឹងទទួលប្រយោជន៍ពីកិច្ចបម្រើជាសង្ឃរបស់ពួក១៤៤.០០០នាក់។
២១. តើការរំពឹងគិតអំពីទន្លេដែលអេសេគាលបានឃើញមានឥទ្ធិពលយ៉ាងណាមកលើអ្នក? ហើយតើយើងនឹងពិចារណាអ្វីនៅជំពូកបន្ទាប់? (សូមមើលប្រអប់«ទឹកហូររិញៗបានទៅជាទន្លេដ៏ធំ!»)
២១ កាលដែលអ្នកបានរំពឹងគិតអំពីទន្លេដែលអេសេគាលបានឃើញ ចិត្តរបស់អ្នកច្បាស់ជាពេញទៅដោយសេចក្ដីសុខសាន្តនិងសេចក្ដីសង្ឃឹម មែនទេ? នៅថ្ងៃខាងមុខ ជាគ្រាដ៏អស្ចារ្យណាស់! សូមគិតទៅមើលតាំងពីប៉ុន្មានពាន់ឆ្នាំមុន ព្រះយេហូវ៉ាបានពណ៌នាយ៉ាងល្អិតល្អន់ក្នុងទំនាយផ្សេងៗ ដើម្បីជួយយើងឲ្យឃើញទិដ្ឋភាពដ៏រស់រវើកអំពីសួនឧទ្យាន។ ដោយចិត្តអត់ធ្មត់ លោកអញ្ជើញយើងឲ្យចូលសួនឧទ្យានដើម្បីឃើញសេចក្ដីសន្យាក្នុងទំនាយទាំងនោះក្លាយជាការពិត។ តើអ្នកនឹងនៅទីនោះឬទេ? អ្នកប្រហែលជាឆ្ងល់ថាតើពិតជានឹងមានកន្លែងមួយសម្រាប់អ្នកនៅក្នុងសួនឧទ្យានឬទេ? នៅជំពូកបន្ទាប់ សូមឲ្យយើងពិចារណាផ្នែកចុងក្រោយនៃទំនាយអេសេគាល ហើយនេះនឹងពង្រឹងទំនុកចិត្តរបស់យើង។
a បន្ថែមទៅទៀត ជនជាតិយូដាដែលជាជននិរទេសដែលចាំអំពីភូមិសាស្ត្រនៃស្រុកកំណើតខ្លួន ដឹងថាគ្មានទន្លេណាអាចហូរចេញពីក្រុងយេរូសាឡិមចូលទៅក្នុងសមុទ្រស្លាប់បានទេ ព្រោះមានតំបន់ខ្ពស់ៗជាច្រើនដែលទឹកមិនអាចហូរឡើងបានឡើយ។
b អ្នកខ្លះគិតថាឃ្លានេះសំដៅលើអ្វីល្អ។ ពួកគេវែកញែកថាការធ្វើអំបិលយកមកប្រើប្រាស់ គឺជាអាជីវកម្មទទួលបានកម្រៃច្រើនដែលមានតាំងពីយូរមកហើយនៅតំបន់សមុទ្រស្លាប់។ ប៉ុន្តែ សូមកត់សម្គាល់ថាកំណត់ហេតុគម្ពីរចែងចំៗថាត្រពាំងបឹងបួនៅក្បែរនោះ«នឹងមិនប្រែទៅជាទឹកសាបទេ»។ កន្លែងទាំងនោះគ្មានជីវិត ព្រោះទឹកដែលផ្ដល់ជីវិតពីវិហាររបស់ព្រះយេហូវ៉ាមិនបានហូរទៅដល់ទីនោះឡើយ។ ដូច្នេះ ក្នុងករណីនេះតាមមើលទៅ ការដែលត្រពាំងបឹងបួទាំងនោះពេញទៅដោយអំបិល គឺសំដៅលើអ្វីអាក្រក់វិញ។—ចសព. ១០៧:៣៣, ៣៤; យេ. ១៧:៦
c ស្រដៀងគ្នាដែរ សូមពិចារណាអំពីឧទាហរណ៍របស់លោកយេស៊ូអំពីអួន។ ត្រីជាច្រើនជាប់អួន តែមិនមែនត្រីទាំងអស់ជា«ត្រីល្អ»ឡើយ។ ត្រីដែលមិនអាចបរិភោគបាននឹងត្រូវបោះចោល។ យ៉ាងនេះ លោកយេស៊ូព្រមានថាមនុស្សមួយចំនួនដែលចូលមកក្នុងអង្គការរបស់ព្រះយេហូវ៉ា ប្រហែលជាលែងស្មោះត្រង់ក្រោយមក។—ម៉ាថ. ១៣:៤៧-៥០; ២ធី. ២:២០, ២១
-
-
‹ចូរចាប់ឆ្នោតបែងចែកដីជាមត៌ក›ការគោរពប្រណិប័តន៍ពិតដល់ព្រះយេហូវ៉ាបានត្រូវរៀបចំឡើងវិញហើយ!
-
-
ជំពូកទី២០
‹ចូរចាប់ឆ្នោតបែងចែកដីជាមត៌ក›
គោលចំណុច: អត្ថន័យនៃការបែងចែកដីធ្លី
១, ២. (ក) តើអេសេគាលបានទទួលការណែនាំអ្វីខ្លះពីព្រះយេហូវ៉ា? (ខ) តើយើងនឹងពិចារណាសំណួរអ្វីខ្លះ?
អេសេគាលទើបតែបានទទួលការបើកបង្ហាញមួយ ដែលច្បាស់ជាធ្វើឲ្យគាត់គិតទៅដល់សម័យម៉ូសេនិងសម័យយ៉ូស្វេប្រមាណ៩០០ឆ្នាំមុន។ នៅគ្រានោះ ព្រះយេហូវ៉ាបានប្រាប់ម៉ូសេអំពីព្រំប្រទល់នៃស្រុកសន្យា ហើយក្រោយមកលោកបានប្រាប់យ៉ូស្វេអំពីរបៀបបែងចែកដីធ្លីដល់កុលសម្ព័ន្ធអ៊ីស្រាអែល។ (ជប. ៣៤:១-១៥; យ៉ូស. ១៣:៧; ២២:៤, ៩) ប៉ុន្តែ ឥឡូវនេះគឺឆ្នាំ៥៩៣ មុនគ.ស. ព្រះយេហូវ៉ាផ្ដល់ការណែនាំដល់អេសេគាលនិងជននិរទេសឯទៀត ឲ្យបែងចែកដីធ្លីក្នុងស្រុកសន្យាដល់កុលសម្ព័ន្ធអ៊ីស្រាអែលម្ដងទៀត!—អេគ. ៤៥:១; ៤៧:១៤; ៤៨:២៩
២ តើការបើកបង្ហាញនេះមានដំណឹងអ្វីដល់អេសេគាលនិងជននិរទេសឯទៀត? ហេតុអ្វីការបើកបង្ហាញនេះផ្ដល់ការលើកទឹកចិត្តដល់រាស្ត្ររបស់ព្រះនៅសព្វថ្ងៃនេះ? តើការបើកបង្ហាញនេះនឹងកើតឡើងក្នុងកម្រិតធំជាងនៅថ្ងៃអនាគតឬទេ?
ការធានាបួនយ៉ាងដែលលើកទឹកចិត្ត
៣, ៤. (ក) តើការបើកបង្ហាញចុងក្រោយដែលអេសេគាលឃើញក្នុងគំនិតផ្ដល់ការធានាបួនយ៉ាងអ្វីខ្លះដល់ជននិរទេស? (ខ) ក្នុងជំពូកនេះ តើយើងនឹងពិចារណាអំពីការធានាអ្វី?
៣ ការបើកបង្ហាញចុងក្រោយដែលអេសេគាលបានឃើញក្នុងគំនិត បានត្រូវរៀបរាប់ចាប់ពីជំពូកទី៤០ដល់ជំពូកទី៤៨ក្នុងសៀវភៅអេសេគាល។ (អេគ. ៤០:១–៤៨:៣៥) ការបើកបង្ហាញនេះផ្ដល់ការធានាបួនយ៉ាងដែលគួរឲ្យលើកទឹកចិត្តដល់ជននិរទេស ស្ដីអំពីប្រជាជាតិអ៊ីស្រាអែលដែលបានត្រូវរៀបចំឡើងវិញ។ តើការធានាបួនយ៉ាងនោះមានអ្វីខ្លះ? ទី១ ការគោរពប្រណិប័តន៍ពិតនឹងត្រូវរៀបចំឡើងនៅឯវិហារព្រះ។ ទី២ សង្ឃនិងពួកគង្វាលដែលជាមនុស្សសុចរិតនឹងនាំមុខប្រជាជាតិអ៊ីស្រាអែល។ ទី៣ ដីធ្លីនឹងត្រូវបែងចែកជាមត៌កដល់អស់អ្នកដែលត្រឡប់មកស្រុកអ៊ីស្រាអែលវិញ។ ទី៤ ព្រះយេហូវ៉ានឹងនៅជាមួយពួកគេម្ដងទៀត។
៤ ជំពូកទី១៣និង១៤ក្នុងសៀវភៅនេះ រៀបរាប់អំពីរបៀបដែលការធានាពីរដំបូងបានក្លាយជាការពិត ពោលគឺការរៀបចំការគោរពប្រណិប័តន៍ពិតឡើងវិញ និងការមានពួកគង្វាលដែលជាមនុស្សសុចរិតនាំមុខ។ ក្នុងជំពូកនេះ យើងនឹងផ្ដោតទៅលើការធានាទី៣ ស្ដីអំពីការបែងចែកដីធ្លីជាមត៌ក។ នៅជំពូកបន្ទាប់ យើងនឹងរៀនអំពីការធានាទី៤ ដែលថាព្រះយេហូវ៉ានឹងនៅជាមួយពួកគេ។—អេគ. ៤៧:១៣-២១; ៤៨:១-៧, ២៣-២៩
«ទឹកដីនេះ . . . ខ្ញុំប្រគល់ដល់អ្នករាល់គ្នាទុកជាមត៌ក»
៥, ៦. (ក) ក្នុងការបើកបង្ហាញដែលអេសេគាលបានឃើញក្នុងគំនិត តើទឹកដីអ្វីនឹងត្រូវបែងចែក? (សូមមើលរូបភាពនៅដើមអត្ថបទ) (ខ) តើការបើកបង្ហាញអំពីការបែងចែកដីធ្លីមានគោលបំណងអ្វី?
៥ សូមអាន អេសេគាល ៤៧:១៤។ ក្នុងការបើកបង្ហាញ ព្រះយេហូវ៉ាបានឲ្យអេសេគាលឃើញទឹកដីមួយចំណែក ដែលនឹង«ស្អាតដូចជាសួនអេដែន» ហើយនឹងមាននាពេលខាងមុខ។ (អេគ. ៣៦:៣៥) បន្ទាប់មក ព្រះយេហូវ៉ាមានប្រសាសន៍ថា៖ «នេះជាទឹកដីដែលអ្នករាល់គ្នាត្រូវបែងចែកឲ្យដល់កុលសម្ព័ន្ធទាំង១២នៃជនជាតិអ៊ីស្រាអែល ទុកជាមត៌ក»។ (អេគ. ៤៧:១៣) «ទឹកដី»ដែលត្រូវបែងចែកគឺជាស្រុកអ៊ីស្រាអែលដែលបានត្រូវរៀបចំសាជាថ្មី ជាកន្លែងដែលជននិរទេសនឹងត្រឡប់មកវិញ។ បន្ទាប់មក ដូចដែលបានកត់ទុកនៅអេសេគាល ៤៧:១៥-២១ ព្រះយេហូវ៉ាបន្តរៀបរាប់ព័ត៌មានល្អិតល្អន់អំពីព្រំប្រទល់នៃស្រុកទាំងមូល។
៦ តើការបើកបង្ហាញអំពីការបែងចែកដីធ្លីមានគោលបំណងអ្វី? ការរៀបរាប់អំពីព្រំប្រទល់ដែលបានត្រូវវាស់វែងយ៉ាងត្រឹមត្រូវ ផ្ដល់ទំនុកចិត្តដល់អេសេគាលនឹងជននិរទេសឯទៀតថាស្រុកកំណើតជាទីស្រឡាញ់របស់ពួកគេនឹងត្រូវរៀបចំឡើងវិញជាមិនខាន។ សូមស្រមៃគិតទៅមើល ព័ត៌មានដ៏ល្អិតល្អន់និងរស់រវើកដែលព្រះយេហូវ៉ាបានប្រាប់ ច្បាស់ជាលើកទឹកចិត្តជននិរទេសខ្លាំងណាស់! តើរាស្ត្ររបស់ព្រះនៅសម័យបុរាណពិតជាបានទទួលដីធ្លីដែលបានត្រូវបែងចែកឲ្យពួកគេជាមត៌កឬទេ? ពួកគេពិតជាបានទទួលមែន។
៧. (ក) តើមានព្រឹត្តិការណ៍អ្វីខ្លះបានកើតឡើងនៅឆ្នាំ៥៣៧ មុនគ.ស.? ហើយតើនេះរំលឹកយើងអំពីអ្វី? (ខ) ដំបូង តើយើងនឹងពិចារណាសំណួរអ្វី?
៧ ប្រហែល៥៦ឆ្នាំក្រោយអេសេគាលទទួលការបើកបង្ហាញឲ្យឃើញក្នុងគំនិត នៅឆ្នាំ៥៣៧ មុនគ.ស. ជននិរទេសរាប់ពាន់នាក់ចាប់ផ្ដើមត្រឡប់មកស្រុកអ៊ីស្រាអែលវិញ ហើយទទួលដីធ្លីនៅទីនោះ។ ព្រឹត្តិការណ៍សំខាន់ៗទាំងនោះ រំលឹកយើងអំពីព្រឹត្តិការណ៍ដែលបានកើតឡើងក្នុងចំណោមរាស្ត្រព្រះនៅសម័យយើង។ ក្នុងន័យម្យ៉ាង ពួកគេក៏បានទទួលដីធ្លីដែរ។ តើតាមរបៀបណា? ព្រះយេហូវ៉ាបានអនុញ្ញាតឲ្យអ្នកបម្រើរបស់លោកចូលក្នុងស្រុកក្នុងន័យធៀប ហើយទទួលដីធ្លីនៅទីនោះ។ ហេតុនេះហើយ ការរៀបចំស្រុកសន្យាសម័យបុរាណផ្ដល់មេរៀនជាច្រើន អំពីការរៀបចំស្រុកក្នុងន័យធៀបរបស់រាស្ត្រព្រះនៅសព្វថ្ងៃ។ ប៉ុន្តែ មុននឹងយើងពិចារណាមេរៀនទាំងនេះ ដំបូងសូមឲ្យយើងពិចារណាសំណួរមួយជាមុនសិន គឺ«ហេតុអ្វីយើងអាចសន្និដ្ឋានថាស្រុករបស់រាស្ត្រព្រះពិតជាមាននៅសព្វថ្ងៃនេះមែន?»។
៨. (ក) តើព្រះយេហូវ៉ាបានជំនួសប្រជាជាតិអ៊ីស្រាអែលដោយប្រជាជាតិអ្វី? (ខ) តើស្រុករបស់រាស្ត្រព្រះជាអ្វី? (គ) តើស្រុកនោះមានឡើងនៅពេលណា? ហើយតើអ្នកណាខ្លះរស់នៅក្នុងស្រុកនោះ?
៨ នៅក្នុងការបើកបង្ហាញមុនដែលអេសេគាលបានទទួល ព្រះយេហូវ៉ាបានបញ្ជាក់ថាទំនាយអំពីការរៀបចំអ៊ីស្រាអែលឡើងវិញ នឹងកើតឡើងក្នុងកម្រិតធំជាង ក្រោយ«ដាវីឌជាអ្នកបម្រើ»លោក គឺលោកយេស៊ូគ្រិស្តចាប់ផ្ដើមគ្រប់គ្រងជាស្ដេច។ (អេគ. ៣៧:២៤) ព្រឹត្តិការណ៍នោះបានកើតឡើងនៅឆ្នាំ១៩១៤ គ.ស.។ មកដល់គ្រានេះប្រជាជាតិអ៊ីស្រាអែល បានត្រូវជំនួសជាយូរមកហើយដោយអ៊ីស្រាអែលនៃព្រះ។ ពួកគេគឺជាគ្រិស្តសាសនិកដែលព្រះបានរើសតាំង។ (សូមអាន ម៉ាថាយ ២១:៤៣; ពេត្រុសទី១ ២:៩) ប៉ុន្តែ ព្រះយេហូវ៉ាមិនគ្រាន់តែជំនួសប្រជាជាតិអ៊ីស្រាអែលដោយអ៊ីស្រាអែលនៃព្រះប៉ុណ្ណោះទេ តែលោកក៏ជំនួសស្រុកអ៊ីស្រាអែលដោយស្រុកក្នុងន័យធៀបដែរ។ (អេ. ៦៦:៨) ដូចយើងបានរៀននៅជំពូកទី១៧ក្នុងសៀវភៅនេះ ស្រុកនេះគឺប្រៀបដូចជាសួនឧទ្យានដែលមានស្ថានភាពសុខសាន្តនិងមានសកម្មភាពផ្សេងៗដែលពួកអ្នករើសតាំងបានគោរពប្រណិប័តន៍ព្រះយេហូវ៉ាតាំងពីឆ្នាំ១៩១៩(សូមមើលប្រអប់៩ខ«ហេតុអ្វីនៅឆ្នាំ១៩១៩?»)។ កាលដែលពេលវេលាកន្លងទៅ «ចៀមឯទៀត»ជាពួកអ្នកដែលមានសេចក្ដីសង្ឃឹមរស់នៅផែនដី ក៏ចាប់ផ្ដើមរស់នៅក្នុងស្រុកនេះដែរ។ (យ៉ូន. ១០:១៦) នៅសព្វថ្ងៃ ស្រុករបស់រាស្ត្រព្រះកាន់តែរីកធំឡើង ហើយពួកគេនឹងទទួលពរយ៉ាងពេញលេញក្រោយសង្គ្រាមអាម៉ាគេដូន។
ការបែងចែកទឹកដីយ៉ាងត្រឹមត្រូវនិងស្មើគ្នា
៩. ស្ដីអំពីការបែងចែកដីធ្លី តើព្រះយេហូវ៉ាបានផ្ដល់ការណែនាំយ៉ាងល្អិតល្អន់អ្វីខ្លះ?
៩ សូមអាន អេសេគាល ៤៨:១, ២៨។ ក្រោយពីមានការកំណត់ព្រំប្រទល់ស្រុកនោះរួចហើយ ព្រះយេហូវ៉ាបានរៀបរាប់យ៉ាងល្អិតល្អន់អំពីរបៀបបែងចែកទឹកដីនោះ។ លោកបានណែនាំឲ្យបែងចែកទឹកដីយ៉ាងត្រឹមត្រូវនិងស្មើគ្នាសម្រាប់កុលសម្ព័ន្ធទាំង១២ ពីទិសខាងជើងដល់ទិសខាងត្បូង។ ដំបូង កុលសម្ព័ន្ធដាន់បានទទួលទឹកដីនៅប៉ែកខាងជើងនៃព្រំប្រទល់ស្រុក ហើយចុងក្រោយបង្អស់ កុលសម្ព័ន្ធកាដបានទទួលទឹកដីនៅប៉ែកខាងត្បូងនៃព្រំប្រទល់ស្រុក។ ដីធ្លីដែលជាចំណែកមត៌កនៃកុលសម្ព័ន្ធនីមួយៗលាតសន្ធឹងពីព្រំប្រទល់ភាគខាងកើតទៅភាគខាងលិច គឺទៅដល់សមុទ្រធំឬសមុទ្រមេឌីទែរ៉ានេ។—អេគ. ៤៧:២០
១០. ផ្នែកនេះនៃការបើកបង្ហាញ តើមានការធានាអ្វីខ្លះទំនងជាបានត្រូវបញ្ជាក់ដល់ជននិរទេស?
១០ ក្នុងផ្នែកនេះនៃការបើកបង្ហាញ តើមានការធានាអ្វីខ្លះដែលទំនងជាបានត្រូវបញ្ជាក់ដល់ជននិរទេស? ព័ត៌មានល្អិតល្អន់ដែលអេសេគាលបានរៀបរាប់អំពីការបែងចែកទឹកដី ច្បាស់ជាផ្ដល់ការធានាដល់ជននិរទេសថា ការបែងចែកទឹកដីនឹងមានរបៀបរៀបរយ។ បន្ថែមទៅទៀត ការបែងចែកទឹកដីយ៉ាងត្រឹមត្រូវសម្រាប់កុលសម្ព័ន្ធទាំង១២ ផ្ដល់ការធានាថាជននិរទេសម្នាក់ៗដែលត្រឡប់មកវិញ នឹងទទួលទឹកដីជាមត៌កនៅក្នុងស្រុកដែលបានត្រូវរៀបចំសាជាថ្មី។ គ្មានអ្នកណាម្នាក់ដែលត្រឡប់មកវិញមិនបានទទួលដីធ្លី ឬផ្ទះសម្បែងឡើយ។
១១. តើយើងអាចទាញមេរៀនអ្វីខ្លះពីការបើកបង្ហាញអំពីការបែងចែកដីធ្លី? (សូមមើលប្រអប់«ការបែងចែកដីធ្លី»)
១១ នៅសព្វថ្ងៃ តើយើងអាចទាញមេរៀនអ្វីខ្លះដែលគួរឲ្យលើកទឹកចិត្តពីការបើកបង្ហាញនេះ? ស្រុកសន្យាដែលបានត្រូវរៀបចំឡើងវិញ មិនមែនសម្រាប់តែពួកសង្ឃ ពួកលេវី និងពួកមេដឹកនាំប៉ុណ្ណោះទេ តែក៏សម្រាប់សមាជិកទាំងអស់ដែលមកពីកុលសម្ព័ន្ធទាំង១២ផងដែរ។ (អេគ. ៤៥:៤, ៥, ៧, ៨) ស្រដៀងគ្នាដែរ នៅសព្វថ្ងៃនេះសួនឧទ្យានក្នុងន័យធៀប មិនគ្រាន់តែសម្រាប់គ្រិស្តសាសនិករើសតាំងដែលនៅសល់ និងសម្រាប់ពួកអ្នកនាំមុខនៅក្នុងចំណោម«មនុស្សមួយក្រុមធំ»ប៉ុណ្ណោះទេ តែក៏សម្រាប់សមាជិកទាំងអស់នៃមនុស្សមួយក្រុមធំផងដែរ។a (បប. ៧:៩) មិនថាយើងមានតួនាទីតូចទាបយ៉ាងណានៅក្នុងអង្គការព្រះយេហូវ៉ាក៏ដោយ យើងមានតួនាទីសំខាន់និងមានភារកិច្ចដ៏មានតម្លៃនៅក្នុងស្រុករបស់រាស្ត្រព្រះ។ នេះជាការធានាដ៏កក់ក្ដៅណាស់!
មិនថាយើងមានភារកិច្ចអ្វីក៏ដោយនៅក្នុងអង្គការព្រះយេហូវ៉ា លោកឲ្យតម្លៃចំពោះចិត្តខ្នះខ្នែងរបស់យើង (សូមមើលវគ្គ១១)
តើភាពខុសគ្នាពីរដ៏សំខាន់មានន័យយ៉ាងណាចំពោះយើង?
១២, ១៣. ស្ដីអំពីការបែងចែកដីធ្លីដល់កុលសម្ព័ន្ធទាំង១២ តើព្រះយេហូវ៉ាបានផ្ដល់ការណែនាំជាក់លាក់អ្វីខ្លះ?
១២ ការណែនាំខ្លះរបស់ព្រះយេហូវ៉ាអំពីការបែងចែកទឹកដី ប្រហែលជាធ្វើឲ្យអេសេគាលឆ្ងល់ ដោយសារការណែនាំទាំងនោះខុសពីការណែនាំដែលព្រះបានឲ្យដល់ម៉ូសេ។ ឥឡូវសូមពិចារណាភាពខុសគ្នាពីរនេះ។ មួយទាក់ទងនឹងទឹកដី ហើយមួយទៀតទាក់ទងនឹងមនុស្សដែលរស់នៅលើទឹកដីនោះ។
១៣ ទី១ ទឹកដី។ ម៉ូសេបានត្រូវបង្គាប់ឲ្យបែងចែកដីធ្លីដល់កុលសម្ព័ន្ធនីមួយៗស្របតាមចំនួនមនុស្សក្នុងកុលសម្ព័ន្ធនោះ។ (ជប. ២៦:៥២-៥៤) ប៉ុន្តែ ក្នុងការបើកបង្ហាញដែលអេសេគាលឃើញក្នុងគំនិត ព្រះយេហូវ៉ាបានផ្ដល់ការណែនាំយ៉ាងជាក់លាក់ឲ្យបែងចែកដីធ្លីដល់កុលសម្ព័ន្ធនីមួយៗ«ស្មើៗគ្នា»។ (អេគ. ៤៧:១៤) ដូច្នេះ ដីធ្លីដែលជាមត៌ករបស់កុលសម្ព័ន្ធនីមួយៗ មានចម្ងាយដែលត្រូវធ្វើដំណើរពីព្រំប្រទល់ខាងជើងដល់ព្រំប្រទល់ខាងត្បូងស្មើគ្នា។ ទោះជាជនជាតិអ៊ីស្រាអែលមកពីកុលសម្ព័ន្ធណាក៏ដោយ ពួកគេម្នាក់ៗអាចទទួលប្រយោជន៍ពីធនធានធម្មជាតិដូចគ្នាក្នុងស្រុកសន្យា។ មិនត្រឹមតែប៉ុណ្ណោះ ពួកគេក៏ទទួលភោគផលល្អៗពីស្រុកដែលសម្បូរទឹកនោះផងដែរ។
១៤. ស្ដីអំពីជនបរទេស តើការណែនាំរបស់ព្រះយេហូវ៉ាដល់អេសេគាល ខុសគ្នាយ៉ាងណានឹងអ្វីដែលបានចែងទុកក្នុងច្បាប់ម៉ូសេ?
១៤ ទី២ មនុស្សដែលរស់នៅលើទឹកដីនោះ។ ច្បាប់ម៉ូសេការពារជននិរទេស និងអនុញ្ញាតឲ្យពួកគេចូលរួមក្នុងការគោរពប្រណិប័តន៍ព្រះយេហូវ៉ា តែពួកគេមិនអាចទទួលដីធ្លីជាមត៌កឡើយ។ (ចល. ១៩:៣៣, ៣៤) ប៉ុន្តែ ឥឡូវអ្វីដែលព្រះយេហូវ៉ាប្រាប់អេសេគាល ខុសពីអ្វីដែលលោកបានប្រាប់ក្នុងច្បាប់ម៉ូសេ។ ព្រះយេហូវ៉ាបង្គាប់ថា៖ «ត្រូវប្រគល់ចំណែកដីធ្លីជាមត៌កដល់ជនបរទេស ក្នុងទឹកដីរបស់កុលសម្ព័ន្ធណាដែលគេបានទៅរស់នៅ»។ តាមរយៈបង្គាប់នេះ ព្រះយេហូវ៉ាបំបាត់ចោលភាពខុសគ្នារវាង«ជនជាតិអ៊ីស្រាអែល»និងជនបរទេសនៅក្នុងស្រុក។ (អេគ. ៤៧:២២, ២៣) ក្នុងស្រុកដែលបានត្រូវរៀបចំឡើងវិញដែលអេសេគាលឃើញក្នុងការបើកបង្ហាញ គាត់ឃើញថាមនុស្សដែលរស់នៅទីនោះ មានភាពស្មើគ្នានិងមានសាមគ្គីភាពក្នុងការគោរពប្រណិប័តន៍ព្រះ។—ចល. ២៥:២៣
១៥. តើមានសេចក្ដីពិតដ៏ស្ថិតស្ថេរអ្វីអំពីព្រះយេហូវ៉ាដែលបានត្រូវបញ្ជាក់ក្នុងការណែនាំរបស់លោកអំពីទឹកដីនិងមនុស្សដែលរស់នៅទីនោះ?
១៥ ការណែនាំដ៏អស្ចារ្យទាំងពីរដែលអេសេគាលបានទទួលស្ដីអំពីទឹកដីនិងមនុស្សដែលរស់នៅទីនោះ ច្បាស់ជាពង្រឹងកម្លាំងចិត្តជននិរទេស។ ពួកគេដឹងថាព្រះយេហូវ៉ានឹងបែងចែកដីធ្លីដល់ពួកគេស្មើៗគ្នា ទោះជាពួកគេជាជនជាតិអ៊ីស្រាអែលឬជាជនបរទេសដែលគោរពប្រណិប័តន៍ព្រះយេហូវ៉ាក៏ដោយ។ (អែស. ៨:២០; នេហ. ៣:២៦; ៧:៦, ២៥; អេ. ៥៦:៣, ៨) បន្ថែមទៅទៀត ការណែនាំទាំងនេះបញ្ជាក់អំពីសេចក្ដីពិតដ៏ស្ថិតស្ថេរនិងគួរឲ្យលើកទឹកចិត្តថា ចំពោះព្រះយេហូវ៉ាអ្នកបម្រើទាំងអស់របស់លោកមានតម្លៃស្មើគ្នា។ (សូមអាន ហាកាយ ២:៧) សព្វថ្ងៃនេះ មិនថាយើងមានសេចក្ដីសង្ឃឹមនៅស្ថានសួគ៌ឬនៅផែនដីក្ដី យើងឲ្យតម្លៃសេចក្ដីពិតនោះដូចគ្នា។
១៦, ១៧. (ក) តើតាមរបៀបណាយើងទទួលប្រយោជន៍ពីការគិតពិចារណាយ៉ាងល្អិតល្អន់អំពីស្រុកនិងមនុស្សដែលរស់នៅទីនោះ? (ខ) តើយើងនឹងពិចារណាអំពីអ្វីនៅជំពូកបន្ទាប់?
១៦ តើតាមរបៀបណាយើងទទួលប្រយោជន៍ពីការគិតពិចារណាយ៉ាងល្អិតល្អន់អំពីទឹកដីនិងមនុស្សដែលរស់នៅទីនោះ? យើងបានទទួលការរំលឹកថាសព្វថ្ងៃនេះភាពស្មើគ្នានិងសាមគ្គីភាពជាលក្ខណៈពិសេសនៃបងប្អូនរួមជំនឿរបស់យើងនៅទូទាំងពិភពលោក។ ព្រះយេហូវ៉ាមិនរើសមុខទេ។ ហេតុនេះ យើងត្រូវសួរខ្លួនថា‹តើខ្ញុំមិនរើសមុខដូចព្រះយេហូវ៉ាឬទេ? មិនថាបងប្អូនរួមជំនឿជាជនជាតិណាឬមានកាលៈទេសៈណាក្នុងជីវិតក៏ដោយ តើខ្ញុំប្រព្រឹត្តទៅលើពួកគាត់ម្នាក់ៗដោយគោរពយ៉ាងអស់ពីចិត្តឬទេ?›។ (រ៉ូម ១២:១០) យើងមានអំណរខ្លាំងណាស់ដែលព្រះយេហូវ៉ាឲ្យយើងមានសិទ្ធិស្មើៗគ្នាក្នុងសួនឧទ្យានក្នុងន័យធៀប ជាកន្លែងដែលយើងបំពេញកិច្ចបម្រើពិសិដ្ឋជូនបិតាស្ថានសួគ៌របស់យើងយ៉ាងអស់ពីចិត្ត និងទទួលពរពីលោកយ៉ាងបរិបូរ។—កាឡ. ៣:២៦-២៩; បប. ៧:៩
តើយើងមិនរើសមុខនិងគោរពអ្នកឯទៀតអស់ពីចិត្តដូចព្រះយេហូវ៉ាឬទេ? (សូមមើលវគ្គ១៥និង១៦)
១៧ ឥឡូវសូមឲ្យយើងពិចារណាការធានាទី៤ ដែលមាននៅផ្នែកចុងក្រោយនៃការបើកបង្ហាញដែលអេសេគាលបានឃើញក្នុងគំនិត។ ការធានានោះគឺជាសេចក្ដីសន្យាដែលថា ព្រះយេហូវ៉ានឹងនៅជាមួយជននិរទេស។ តើយើងអាចទាញមេរៀនអ្វីខ្លះពីសេចក្ដីសន្យានោះ? យើងនឹងរកឃើញចម្លើយក្នុងជំពូកបន្ទាប់។
a ដើម្បីដឹងអំពីតួនាទីពិសេសនិងភារកិច្ចដែលព្រះយេហូវ៉ាផ្ដល់ឲ្យពួកសង្ឃនិងមេដឹកនាំក្នុងស្រុករបស់រាស្ត្រព្រះ សូមមើលក្នុងជំពូកទី១៤នៃសៀវភៅនេះ។
-
-
«គេនឹងហៅក្រុងនោះថាព្រះយេហូវ៉ាស្ថិតនៅទីនោះ»ការគោរពប្រណិប័តន៍ពិតដល់ព្រះយេហូវ៉ាបានត្រូវរៀបចំឡើងវិញហើយ!
-
-
ជំពូកទី២១
«គេនឹងហៅក្រុងនោះថាព្រះយេហូវ៉ាស្ថិតនៅទីនោះ»
គោលចំណុច: អត្ថន័យនៃក្រុងនិងដីវិភាគទាន
១, ២. (ក) តើចំណែកដីពិសេសអ្វីដែលបានត្រូវញែកទុកជាបរិសុទ្ធ? (សូមមើលរូបភាពនៅក្របខាងក្រោយនៃសៀវភៅនេះ) (ខ) តើការបើកបង្ហាញនេះផ្ដល់ទំនុកចិត្តអ្វីដល់ជននិរទេស?
ក្នុងការបើកបង្ហាញចុងក្រោយដែលអេសេគាលបានឃើញ គាត់បានឃើញដីមួយចំណែកដែលបានត្រូវញែកទុកសម្រាប់គោលបំណងពិសេស។ ដីមួយចំណែកនេះមិនមែនទុកឲ្យកុលសម្ព័ន្ធណាមួយនៃប្រជាជាតិអ៊ីស្រាអែលជាមត៌កទេ តែទុកជាវិភាគទានដល់ព្រះយេហូវ៉ាវិញ។ អេសេគាលក៏ឃើញក្រុងដ៏អស្ចារ្យមួយ ដែលមានឈ្មោះដ៏គួរឲ្យចាប់អារម្មណ៍។ ផ្នែកនេះនៃការបើកបង្ហាញផ្ដល់ទំនុកចិត្តខ្លាំងបំផុតដល់ជននិរទេស គឺថាព្រះយេហូវ៉ានឹងនៅជាមួយនឹងពួកគេពេលដែលពួកគេត្រឡប់ទៅស្រុកកំណើតជាទីស្រឡាញ់របស់ខ្លួនវិញ។
២ អេសេគាលបានពណ៌នាយ៉ាងល្អិតល្អន់អំពីដីវិភាគទាននោះ។ សូមឲ្យយើងពិចារណាកំណត់ហេតុនេះ ដែលមានមេរៀនជាច្រើនសម្រាប់យើងជាអ្នកគោរពប្រណិប័តន៍ពិតដល់ព្រះយេហូវ៉ា។
‹វិភាគទានបរិសុទ្ធនិងក្រុង›
៣. តើមានផ្ទៃដីប្រាំកន្លែងអ្វីខ្លះក្នុងទឹកដីដែលព្រះយេហូវ៉ាបានញែកទុក? ហើយតើផ្ទៃដីទាំងនោះទុកសម្រាប់គោលបំណងអ្វីខ្លះ? (សូមមើលប្រអប់‹អ្នករាល់គ្នាត្រូវញែកដីទុកជាវិភាគទានដល់ព្រះ›)
៣ ផ្ទៃដីដែលជាចំណែកពិសេសមានប្រវែង២៥.០០០ហត្ថ(១៣គីឡូម៉ែត្រ)ពីទិសខាងជើងដល់ទិសខាងត្បូង ហើយក៏មានប្រវែង២៥.០០០ហត្ថដែរ ពីទិសខាងកើតដល់ទិសខាងលិច។ ផ្ទៃដីដែលមានរាងការ៉េនេះបានត្រូវហៅថា«វិភាគទានទាំងមូល» ហើយបានត្រូវបែងចែកជាបីផ្នែក។ ផ្ទៃដីផ្នែកខាងលើទុកសម្រាប់ពួកលេវី ហើយផ្ទៃដីផ្នែកកណ្ដាលទុកសម្រាប់ពួកសង្ឃនិងវិហារព្រះ។ ផ្ទៃដីទាំងពីរផ្នែកនេះបានត្រូវហៅថា«វិភាគទានបរិសុទ្ធ»។ រីឯផ្ទៃដីផ្នែកខាងក្រោមដែលតូចជាងឬ«ដីនៅសល់»ទុក«សម្រាប់ប្រើជាដីក្រុង»។—អេគ. ៤៨:១៥, ២០
៤. តើយើងអាចទាញមេរៀនអ្វីពីកំណត់ហេតុអំពីវិភាគទានជូនព្រះយេហូវ៉ា?
៤ តើយើងអាចទាញមេរៀនអ្វីពីកំណត់ហេតុអំពីវិភាគទានជូនព្រះយេហូវ៉ា? ដំបូង ព្រះយេហូវ៉ាញែកដីទុកសម្រាប់វិភាគទានពិសេស ហើយបន្ទាប់មកបែងចែកដីធ្លីសម្រាប់កុលសម្ព័ន្ធនីមួយៗ។ ហេតុនេះ ព្រះយេហូវ៉ាបញ្ជាក់ថារាស្ត្ររបស់លោកត្រូវផ្ដោតសំខាន់ទៅលើមណ្ឌលនៃការគោរពប្រណិប័តន៍លោក។ (អេគ. ៤៥:១) ការបែងចែកទឹកដីដូច្នេះ ច្បាស់ជាផ្ដល់មេរៀនជាច្រើនដល់ជននិរទេស។ ពួកគេត្រូវចាត់ទុកការគោរពប្រណិប័តន៍ព្រះយេហូវ៉ាជាអ្វីដែលសំខាន់បំផុតក្នុងជីវិត។ ស្រដៀងគ្នាដែរសព្វថ្ងៃនេះ យើងចាត់ទុកសកម្មភាពដែលទាក់ទងនឹងការគោរពប្រណិប័តន៍ព្រះជាអ្វីសំខាន់បំផុត។ សកម្មភាពទាំងនោះមានដូចជា ការសិក្សាបណ្ដាំរបស់ព្រះ ការចូលរួមកិច្ចប្រជុំគ្រិស្តសាសនិក និងការចូលរួមកិច្ចបម្រើផ្សាយជាដើម។ ពេលយើងធ្វើតាមគំរូរបស់ព្រះយេហូវ៉ាអំពីការកំណត់ថាអ្វីជាអាទិភាព នោះយើងតែងតែចាត់ទុកការគោរពប្រណិប័តន៍លោកជាអ្វីដែលសំខាន់បំផុតក្នុងជីវិតប្រចាំថ្ងៃ។
«ក្រុងនោះនឹងស្ថិតនៅកណ្ដាលផ្ទៃដីនោះ»
៥, ៦. (ក) តើក្រុងនោះជាកម្មសិទ្ធិរបស់អ្នកណា? (ខ) តើក្រុងនោះមិនសំដៅទៅលើអ្វី? ហើយហេតុអ្វី?
៥ សូមអាន អេសេគាល ៤៨:១៥។ តើ«ក្រុងនោះ»និងដីធ្លីជុំវិញមានលក្ខណៈសំខាន់អ្វី? (អេគ. ៤៨:១៦-១៨) ក្នុងការបើកបង្ហាញ ព្រះយេហូវ៉ាបានប្រាប់អេសេគាលថា៖ «ដីធ្លីក្រុង . . . នឹងទៅជាកម្មសិទ្ធិរបស់ពូជពង្សអ៊ីស្រាអែលទាំងអស់»។ (អេគ. ៤៥:៦, ៧) ហេតុនេះ ក្រុងនិងដីធ្លីនៅជុំវិញមិនមែនជាផ្នែកនៃ«វិភាគទានបរិសុទ្ធ»ដែលបានត្រូវ«ញែកទុកជូនព្រះយេហូវ៉ា»ទេ។ (អេគ. ៤៨:៩) ដោយគិតអំពីចំណុចនេះ សូមឲ្យយើងពិនិត្យមើលអំពីការរៀបចំនៃក្រុងនោះ ដែលអាចបង្រៀនយើងនៅសព្វថ្ងៃ។
៦ ដើម្បីដឹងថាយើងអាចទាញមេរៀនអ្វីខ្លះពីក្រុងនោះ ដំបូងយើងត្រូវដឹងថាក្រុងនោះមិនសំដៅទៅលើអ្វី។ ក្រុងនោះមិនអាចសំដៅទៅលើក្រុងយេរូសាឡិមនិងវិហារដែលបានត្រូវសង់ឡើងវិញទេ។ ហេតុអ្វី? ព្រោះក្រុងដែលអេសេគាលឃើញក្នុងគំនិត គ្មានវិហារក្នុងក្រុងនោះឡើយ។ បន្ថែមទៅទៀត ក្រុងនោះក៏មិនសំដៅទៅលើក្រុងណាផ្សេងទៀតនៅក្នុងស្រុកអ៊ីស្រាអែលដែលបានត្រូវរៀបចំឡើងវិញដែរ។ ហេតុអ្វី? ព្រោះគ្មានក្រុងណាដែលមានរចនាប្លង់ដូចដែលបានរៀបរាប់ក្នុងការបើកបង្ហាញដែលអេសេគាលបានឃើញ បានត្រូវសង់ឡើងវិញដោយជននិរទេសឬកូនចៅរបស់ពួកគេទេ។ ម្យ៉ាងទៀត ក្រុងនោះមិនអាចសំដៅទៅលើក្រុងនៅស្ថានសួគ៌ឡើយ។ ហេតុអ្វី? ព្រោះក្រុងនោះបានត្រូវសង់ឡើងលើដី«មិនបរិសុទ្ធ» ខុសពីសំណង់វិហារដែលបានត្រូវសង់ឡើងនៅលើដីដែលបានត្រូវញែកទុកជាពិសិដ្ឋសម្រាប់ការគោរពប្រណិប័តន៍ពិត។—អេគ. ៤២:២០
៧. តើក្រុងដែលអេសេគាលបានឃើញជាអ្វី? ហើយតាមមើលទៅ តើក្រុងនោះតំណាងអ្វី? (សូមមើលរូបភាពនៅដើមអត្ថបទ)
៧ តើក្រុងដែលអេសេគាលឃើញជាអ្វី? សូមចាំថាគាត់បានឃើញក្រុងនោះនៅក្នុងការបើកបង្ហាញដូចគ្នាដែលគាត់បានឃើញអំពីស្រុក។ (អេគ. ៤០:២; ៤៥:១, ៦) បណ្ដាំរបស់ព្រះបញ្ជាក់ថាស្រុកនោះសំដៅទៅលើស្រុកក្នុងន័យធៀប។ ដូច្នេះ ក្រុងនោះច្បាស់ជាសំដៅទៅលើក្រុងក្នុងន័យធៀបដែរ។ ជាទូទៅ តើពាក្យ«ក្រុង»សំដៅទៅលើអ្វី? ពាក្យក្រុងសំដៅទៅលើមនុស្សរស់នៅជាក្រុមដែលមានការរៀបចំល្អនិងមានរបៀបរៀបរយ។ ហេតុនេះ ក្រុងដែលមានសណ្ដាប់ធ្នាប់និងមានផ្ទៃដីរាងការ៉េដែលអេសេគាលបានឃើញ តាមមើលទៅតំណាងឲ្យអង្គការមួយដែលមានសណ្ដាប់ធ្នាប់និងមានរបៀបរៀបរយ។
៨. តើអង្គការនេះធ្វើអ្វីខ្លះ? ហើយហេតុអ្វី?
៨ តើអង្គការនេះធ្វើអ្វីខ្លះ? ក្នុងការបើកបង្ហាញដែលអេសេគាលបានឃើញក្នុងគំនិត បង្ហាញថាក្រុងនេះចាត់ចែងកិច្ចការក្នុងស្រុកក្នុងន័យធៀប។ ម្ល៉ោះហើយ សព្វថ្ងៃអង្គការនេះចាត់ចែងគ្រប់កិច្ចការរបស់រាស្ត្រព្រះ។ តើការដែលក្រុងសង់ឡើងនៅលើទឹកដីមិនបរិសុទ្ធបញ្ជាក់អំពីអ្វី? នេះរំលឹកយើងថាក្រុងនោះមិនសំដៅទៅលើអង្គការផ្នែកនៅស្ថានសួគ៌ទេ តែសំដៅទៅលើអង្គការផ្នែកនៅផែនដីវិញ។ អង្គការផ្នែកនៅផែនដីនេះចាត់ចែងកិច្ចការសម្រាប់ជាប្រយោជន៍ដល់អស់អ្នកដែលរស់នៅក្នុងសួនឧទ្យានក្នុងន័យធៀប។
៩. (ក) សព្វថ្ងៃនេះ តើអ្នកណារួមចំណែកក្នុងការចាត់ចែងអង្គការផ្នែកនៅផែនដី? (ខ) តើលោកយេស៊ូនឹងធ្វើអ្វីក្នុងអំឡុងគ្រាគ្រប់គ្រង១.០០០ឆ្នាំ?
៩ តើអ្នកណារួមចំណែកក្នុងការចាត់ចែងអង្គការផ្នែកនៅផែនដី? ក្នុងការបើកបង្ហាញដែលអេសេគាលឃើញក្នុងគំនិត បុគ្គលដែលនាំមុខក្នុងការគ្រប់គ្រងក្រុងបានត្រូវហៅថា«មេដឹកនាំ»។ (អេគ. ៤៥:៧) គាត់ជាអ្នកត្រួតពិនិត្យលើបណ្ដាជន តែគាត់មិនមែនជាសង្ឃឬពួកលេវីទេ។ មេដឹកនាំនេះធ្វើឲ្យយើងគិតទៅដល់អ្នកត្រួតពិនិត្យក្នុងក្រុមជំនុំសព្វថ្ងៃដែលមិនមែនជាពួកអ្នកដែលព្រះបានរើសតាំង។ ពួកគាត់ជាគង្វាលដែលមានទស្សនៈដូចព្រះនិងយកចិត្តទុកដាក់ចំពោះចៀមរបស់លោក។ ពួកគាត់មកពីចំណោម«ចៀមឯទៀត» ហើយពួកគាត់បម្រើរដ្ឋាភិបាលរបស់គ្រិស្តដែលនៅស្ថានសួគ៌ដោយចិត្តរាបទាប។ (យ៉ូន. ១០:១៦) ក្នុងអំឡុងគ្រា១.០០០ឆ្នាំនៅថ្ងៃខាងមុខ លោកយេស៊ូនឹងជ្រើសរើស ហើយតែងតាំងពួកអ្នកចាស់ទុំឬ«អ្នកនាំមុខ»ដែលមានគុណសម្បត្តិគ្រប់គ្រាន់«នៅទូទាំងផែនដី»។ (ចសព. ៤៥:១៦) ក្រោមការដឹកនាំនៃរាជាណាចក្រស្ថានសួគ៌ ពួកគាត់នឹងមើលថែរក្សារាស្ត្ររបស់ព្រះក្នុងអំឡុងគ្រា១.០០០ឆ្នាំ។
«ព្រះយេហូវ៉ាស្ថិតនៅទីនោះ»
១០. តើក្រុងនោះមានឈ្មោះអ្វី? ហើយតើនេះផ្ដល់ការធានាអ្វី?
១០ សូមអាន អេសេគាល ៤៨:៣៥។ ក្រុងនោះមានឈ្មោះថា«ព្រះយេហូវ៉ាស្ថិតនៅទីនោះ»។ ឈ្មោះនេះផ្ដល់ការធានាថា ព្រះយេហូវ៉ាមានវត្តមាននៅក្រុងនោះ។ ដោយបង្ហាញអេសេគាលនូវក្រុងដែលមានទីតាំងនៅចំកណ្ដាល ក្នុងន័យម្យ៉ាងព្រះយេហូវ៉ាប្រាប់ជននិរទេសថា៖ ‹ខ្ញុំនឹងនៅជាមួយអ្នករាល់គ្នាម្ដងទៀត!›។ នេះជាការធានាដ៏គួរឲ្យលើកទឹកចិត្តមែន!
១១. តើយើងអាចទាញមេរៀនអ្វីខ្លះពីការបើកបង្ហាញដែលអេសេគាលបានឃើញ អំពីក្រុងនិងឈ្មោះនៃក្រុងនោះ?
១១ តើយើងអាចទាញមេរៀនអ្វីខ្លះពីផ្នែកនេះនៃទំនាយអេសេគាល? ឈ្មោះនៃក្រុងនេះផ្ដល់ការធានាដល់អ្នកបម្រើព្រះយេហូវ៉ានៅសព្វថ្ងៃនេះថា លោកនៅជាមួយពួកអ្នកបម្រើស្មោះត្រង់របស់លោកនៅផែនដីនៅឥឡូវនេះនិងជារៀងរហូត។ បន្ថែមទៅទៀត ឈ្មោះដ៏មានន័យខ្លឹមសារនេះក៏បញ្ជាក់សេចក្ដីពិតដ៏សំខាន់មួយថាក្រុងនេះបានត្រូវស្ថាបនាឡើង មិនមែនដើម្បីឲ្យមនុស្សណាម្នាក់កាន់អំណាចទេ តែដើម្បីធ្វើតាមការរៀបចំរបស់ព្រះយេហូវ៉ាដែលសមហេតុសមផលនិងប្រកបដោយសេចក្ដីស្រឡាញ់។ ជាឧទាហរណ៍ ព្រះយេហូវ៉ាមិនបានផ្ដល់សិទ្ធិអំណាចដល់ពួកអ្នកចាត់ចែងអង្គការនេះឲ្យបែងចែកដីធ្លីតាមតែពួកគេយល់ថាត្រឹមត្រូវនោះទេ។ ផ្ទុយទៅវិញ ព្រះយេហូវ៉ាតម្រូវឲ្យពួកអ្នកចាត់ចែងទាំងនោះប្រគល់ដីធ្លីឬឯកសិទ្ធិដែលលោកផ្ទាល់ប្រគល់ឲ្យដល់ពួកអ្នកបម្រើលោក រួមទាំងមនុស្ស«ទន់ទាប»ផងដែរ។—សុភ. ១៩:១៧; អេគ. ៤៦:១៨; ៤៨:២៩
១២. (ក) តើអ្វីជាលក្ខណៈពិសេសនៃក្រុងនេះ ហើយតើនេះបញ្ជាក់អំពីអ្វី? (ខ) តើផ្នែកនេះនៃការបើកបង្ហាញផ្ដល់ការរំលឹកដ៏សំខាន់អ្វីដល់អ្នកត្រួតពិនិត្យជាគ្រិស្តសាសនិក?
១២ តើក្រុងដែលមានឈ្មោះថា«ព្រះយេហូវ៉ាស្ថិតនៅទីនោះ»មានលក្ខណៈពិសេសមួយទៀតអ្វី? បណ្ដាក្រុងនៅសម័យបុរាណមានកំពែងការពារ ហើយមិនសូវមានខ្លោងទ្វារច្រើនទេ តែក្រុងនេះមានខ្លោងទ្វារដល់ទៅ១២! (អេគ. ៤៨:៣០-៣៤) នៅទិសនីមួយៗនៃក្រុងនោះមានខ្លោងទ្វារបី។ ខ្លោងទ្វារទាំងនោះបញ្ជាក់ថាពួកអ្នកចាត់ចែងក្រុង គឺជាមនុស្សដែលស្រួលទាក់ទង ហើយប្រុងប្រៀបជានិច្ចដើម្បីជួយអ្នកបម្រើទាំងអស់របស់ព្រះ។ បន្ថែមទៅទៀត ខ្លោងទ្វារ១២បង្ហាញថាក្រុងនេះបានត្រូវបើកស្វាគមន៍ដល់មនុស្សគ្រប់រូប គឺ«ពូជពង្សអ៊ីស្រាអែលទាំងអស់»។ (អេគ. ៤៥:៦) ការដែលក្រុងនេះមានខ្លោងទ្វារច្រើននិងស្រួលចូល ផ្ដល់ការរំលឹកដ៏សំខាន់ដល់អ្នកត្រួតពិនិត្យជាគ្រិស្តសាសនិក គឺថាព្រះយេហូវ៉ាចង់ឲ្យពួកគេទៅជាមនុស្សរួសរាយរាក់ទាក់ ហើយស្រួលទាក់ទងសម្រាប់មនុស្សទាំងអស់ដែលរស់នៅក្នុងសួនឧទ្យានក្នុងន័យធៀប។
អ្នកត្រួតពិនិត្យជាគ្រិស្តសាសនិក រួសរាយរាក់ទាក់ ហើយស្រួលទាក់ទង (សូមមើលវគ្គ១២)
រាស្ត្ររបស់ព្រះ«ចូលទៅគោរពប្រណិប័តន៍» ហើយ«មានភារកិច្ចបម្រើនៅក្រុងនោះ»
១៣. តើព្រះយេហូវ៉ាមានប្រសាសន៍យ៉ាងណាអំពីកិច្ចបម្រើផ្សេងៗដែលបណ្ដាជននឹងធ្វើ?
១៣ សូមឲ្យយើងស្រមៃគិតទៅដល់គ្រារបស់អេសេគាលម្ដងទៀត ហើយស្វែងយល់ព័ត៌មានល្អិតល្អន់ ដែលគាត់បានកត់ទុកអំពីការបែងចែកដីធ្លីដែលគាត់បានឃើញយ៉ាងជាក់លាក់ក្នុងគំនិត។ ព្រះយេហូវ៉ារៀបរាប់អំពីអស់អ្នកដែលរួមចំណែកក្នុងកិច្ចបម្រើផ្សេងៗ។ ពួកសង្ឃដែលមាន‹ភារកិច្ចចូលទៅបម្រើព្រះយេហូវ៉ានៅឯវិហារ› ត្រូវជូនគ្រឿងបូជាដល់លោក។ រីឯពួកលេវីដែល«បម្រើនៅវិហារ» ពួកគេមាន«ភារកិច្ចមើលថែវិហារនិងបំពេញកិច្ចការបន្ទាប់បន្សំ»វិញ។ (អេគ. ៤៤:១៤-១៦; ៤៥:៤, ៥) បន្ថែមទៅទៀត នៅក្បែរក្រុងក៏មានអ្នកធ្វើការយ៉ាងសកម្មដែរ។ តើពួកគេជាអ្នកណា?
១៤. តើពួកអ្នកដែលធ្វើការនៅក្បែរក្រុងរំលឹកយើងអំពីអ្វី?
១៤ ពួកអ្នកដែលធ្វើការនៅក្បែរក្រុងមកពី«កុលសម្ព័ន្ធនានានៃជនជាតិអ៊ីស្រាអែល»។ ពួកគេមានតួនាទីជួយទំនុកបម្រុង។ ភារកិច្ចរបស់ពួកគេគឺភ្ជួររាស់ដាំដុះ ដើម្បីផ្គត់ផ្គង់«អាហារដល់ពួកអ្នកដែលបម្រើនៅក្នុងក្រុង»។ (អេគ. ៤៨:១៨, ១៩) តើការរៀបចំនេះរំលឹកយើងអំពីឯកសិទ្ធិមួយដែលយើងមាននៅសព្វថ្ងៃនេះទេ? ពិតជារំលឹកមែន។ សព្វថ្ងៃនេះ អស់អ្នកដែលរស់នៅក្នុងសួនឧទ្យានក្នុងន័យធៀប មានឯកសិទ្ធិគាំទ្រកិច្ចបម្រើរបស់អ្នករើសតាំងដែលជាបងប្អូនគ្រិស្ត និងកិច្ចបម្រើរបស់ពួកអ្នកដែលមកពី«មនុស្សមួយក្រុមធំ»ដែលព្រះយេហូវ៉ាបានតែងតាំងឲ្យនាំមុខ។ (បប. ៧:៩, ១០) វិធីសំខាន់មួយដែលយើងគាំទ្រពួកគាត់ គឺធ្វើតាមការណែនាំពីខ្ញុំបម្រើដ៏ស្មោះត្រង់យ៉ាងអស់ពីចិត្ត។
១៥, ១៦. (ក) តើការបើកបង្ហាញដែលអេសេគាលបានឃើញមានព័ត៌មានអ្វីទៀតដែលយើងអាចទាញមេរៀន? (ខ) តើយើងមានឱកាសរួមចំណែកក្នុងសកម្មភាពអ្វីខ្លះដែលស្រដៀងនឹងនោះ?
១៥ ការបើកបង្ហាញដែលអេសេគាលបានឃើញ មានព័ត៌មានល្អិតល្អន់មួយទៀត ដែលយើងអាចទាញមេរៀនស្ដីអំពីកិច្ចបម្រើផ្សាយ។ តើព័ត៌មាននោះជាអ្វី? ព្រះយេហូវ៉ារៀបរាប់ថាសមាជិកមកពីកុលសម្ព័ន្ធទាំង១២ដែលមិនមែនជាពួកលេវី នឹងមានសកម្មភាពនៅទីតាំងពីរកន្លែង គឺក្នុងទីធ្លាវិហារ និងនៅលើដីក្បែរក្រុង។ តើពួកគេធ្វើអ្វីនៅទីតាំងនីមួយៗ? នៅទីធ្លាវិហារ កុលសម្ព័ន្ធទាំងអស់«ចូលទៅគោរពប្រណិប័តន៍»ព្រះយេហូវ៉ាដោយជូនគ្រឿងបូជាដល់លោក។ (អេគ. ៤៦:៩, ២៤) នៅលើដីក្បែរក្រុង សមាជិកនៃកុលសម្ព័ន្ធទាំងអស់ចូលទៅទំនុកបម្រុងក្រុងដោយភ្ជួររាស់ដាំដុះនៅលើដីនោះ។ តើយើងអាចទាញមេរៀនអ្វីពីគំរូរបស់ពួកគេ?
១៦ សព្វថ្ងៃនេះ សមាជិកនៃមនុស្សមួយក្រុមធំ មានឱកាសរួមចំណែកក្នុងសកម្មភាពផ្សេងៗដែលស្រដៀងនឹងសកម្មភាពរបស់ពួកអ្នកដែលបានត្រូវរៀបរាប់ក្នុងការបើកបង្ហាញដែលអេសេគាលបានឃើញ។ ពួកគេគោរពប្រណិប័តន៍ព្រះយេហូវ៉ា«ក្នុងវិហាររបស់លោក» ដោយជូនលោកនូវសេចក្ដីសរសើរជាគ្រឿងបូជា។ (បប. ៧:៩-១៥) ពួកគេធ្វើដូច្នេះដោយចូលរួមក្នុងកិច្ចការផ្សព្វផ្សាយ ហើយបង្ហាញជំនឿដោយចូលរួមឆ្លើយក្នុងកិច្ចប្រជុំគ្រិស្តសាសនិក។ ពួកគេចាត់ទុកការគោរពប្រណិប័តន៍ព្រះយេហូវ៉ាតាមរបៀបដូចនោះ ជាភារកិច្ចដ៏សំខាន់បំផុត។ (១ប្រ. ១៦:២៩) បន្ថែមទៅទៀត រាស្ត្រជាច្រើនរបស់ព្រះអាចគាំទ្រអង្គការរបស់លោក តាមរបៀបផ្សេងៗទៀត។ ជាឧទាហរណ៍ ពួកគេជួយសាងសង់និងថែទាំសាលប្រជុំ និងអគារការិយាល័យសាខា។ ពួកគេក៏ជួយក្នុងគម្រោងផ្សេងៗទៀតរបស់អង្គការព្រះយេហូវ៉ាដែរ ហើយបងប្អូនឯទៀតជួយគាំទ្រគម្រោងទាំងនោះដោយជូនវិភាគទាន។ កិច្ចការទាំងប៉ុន្មានដែលពួកគេបានធ្វើ ប្រៀបដូចជាពួកគេភ្ជួររាស់ដាំដុះលើដីក្រុងដើម្បីឲ្យ«ព្រះទទួលការសរសើរតម្កើង»។ (១កូ. ១០:៣១) ពួកគេបំពេញភារកិច្ចរបស់ខ្លួនដោយខ្នះខ្នែងនិងដោយអំណរ ព្រោះពួកគេដឹងថាព្រះយេហូវ៉ា«ពេញចិត្តគ្រឿងបូជាបែបនេះ»។ (ហេ. ១៣:១៦) តើអ្នកកំពុងចាប់យកឱកាសទាំងនោះយ៉ាងពេញលេញទេ?
តើយើងអាចទាញមេរៀនអ្វីខ្លះពីការពណ៌នារបស់អេសេគាលអំពីសកម្មភាពផ្សេងៗនៅក្បែរខ្លោងទ្វារក្រុង? (សូមមើលវគ្គ១៤-១៦)
«យើងកំពុងទន្ទឹងរង់ចាំមេឃថ្មីនិងផែនដីថ្មី»
១៧. (ក) ស្ដីអំពីការបើកបង្ហាញដែលអេសេគាលបានឃើញ តើនឹងមានការកើតឡើងក្នុងកម្រិតធំជាងអ្វីដែលយើងនឹងឃើញនៅថ្ងៃអនាគត? (ខ) ក្នុងអំឡុងគ្រាគ្រប់គ្រង១.០០០ឆ្នាំ តើអ្នកណានឹងទទួលប្រយោជន៍ពីអង្គការផ្នែកនៅផែនដី?
១៧ នៅថ្ងៃអនាគត តើយើងនឹងឃើញការកើតឡើងក្នុងកម្រិតធំជាងនៃការបើកបង្ហាញដែលអេសេគាលបានឃើញអំពីដីវិភាគទានឬទេ? ពិតជានឹងឃើញមែន! សូមគិតអំពីចំណុចនេះ អេសេគាលបានឃើញដីមួយចំណែកដែលហៅថា«វិភាគទានបរិសុទ្ធ» ហើយដីនោះមានទីតាំងនៅចំកណ្ដាលតែម្ដង។ (អេគ. ៤៨:១០) ស្រដៀងគ្នាដែរ ក្រោយសង្គ្រាមអាម៉ាគេដូន ទោះជាយើងរស់នៅកន្លែងណាក៏ដោយនៅផែនដី ព្រះយេហូវ៉ានឹងនៅជាមួយយើង។ (បប. ២១:៣) ក្នុងអំឡុងគ្រា១.០០០ឆ្នាំ អង្គការផ្នែកនៅផែនដីនឹងត្រូវចាត់ចែងដោយអស់អ្នកដែលបានត្រូវតែងតាំងឲ្យមើលថែរាស្ត្ររបស់ព្រះ។ ពួកគេនឹងចាត់ចែងកិច្ចការនៅទូទាំងផែនដី ដោយផ្ដល់ការណែនាំដែលប្រកបដោយសេចក្ដីស្រឡាញ់ ដល់ពួកអ្នកដែលរួមចំណែកជា«ផែនដីថ្មី»ឬសង្គមមនុស្សថ្មី។—២ពេ. ៣:១៣
១៨. (ក) ហេតុអ្វីយើងអាចប្រាកដថាអង្គការផ្នែកនៅផែនដីនឹងដំណើរការស្របតាមការគ្រប់គ្រងរបស់ព្រះ? (ខ) តើឈ្មោះនៃក្រុងនោះផ្ដល់ការធានាអ្វីដល់យើង?
១៨ ហេតុអ្វីយើងអាចប្រាកដថាអង្គការផ្នែកនៅផែនដីនឹងបន្តដំណើរការស្របតាមការគ្រប់គ្រងរបស់ព្រះទាំងស្រុង? ពីព្រោះបណ្ដាំរបស់ព្រះចែងយ៉ាងច្បាស់ថា ក្រុងនៅផែនដីដែលមានខ្លោងទ្វារ១២ ឆ្លុះបញ្ចាំងអំពីក្រុងនៅស្ថានសួគ៌ដែលមានខ្លោងទ្វារ១២ ពោលគឺក្រុងយេរូសាឡិមថ្មីដែលមាន១៤៤.០០០នាក់គ្រប់គ្រងជាមួយគ្រិស្ត។ (បប. ២១:២, ១២, ២១-២៧) នេះបញ្ជាក់ថាអង្គការផ្នែកនៅផែនដីនឹងធ្វើការសម្រេចចិត្តទាំងអស់ស្របតាមរាជាណាចក្ររបស់ព្រះនៅស្ថានសួគ៌ ហើយនឹងធ្វើតាមការសម្រេចចិត្តទាំងនោះយ៉ាងយកចិត្តទុកដាក់។ ឈ្មោះនៃក្រុងដែលថា«ព្រះយេហូវ៉ាស្ថិតនៅទីនោះ» ផ្ដល់ការធានាដល់យើងម្នាក់ៗថាការគោរពប្រណិប័តន៍ពិតនឹងរីកដុះដាល ហើយស្ថិតស្ថេរជារៀងរហូតក្នុងសួនឧទ្យាន។ នោះជាអនាគតដ៏អស្ចារ្យណាស់សម្រាប់យើង!
-